Nga ang Inyong mga Alantuson Mahimo nga Magaan Elder L. Whitney Clayton Sa Kapangulohan sa Seventy Ang mga alantuson naghatag og mga kahigayunan sa pagbansay og mga hiyas nga nagtampo ngadto sa kahingpitan sa kaulahian. Daghang tuig na ang milabay ako naglakaw sa kaadlawon nianang lapad nga kadalanan nga gibakbak sa bato sa Cusco, Peru, sa Kabukiran sa Andes. Ako nakakita og usa ka tawo gikan sa usa ka lumad nga grupo naglakaw sa usa sa kadalanan. Dili siya dako nga tawo, pero naglukdo siya og hilabihan kadaghang kahoy igsusugnod nga gisulod og sako. Ang sako daw sama niya kadako. Ang gibug-aton tingali sama ka bug-at niya. Iya kining gihigot ang sako ug gilukdo ngadto sa iyang ulo. Iya kining gihigtan og maayo ang sako ngadto sa isig ka kilid sa iyang ulo. Iyang gibutangan og panapton ang iyang agtang ilawom sa pisi aron dili siya masamad. Moduko siya og gamay aron iya kining malukdo ug mabinantayon nga molakaw, sa lisud nga agianan. Ang tawo midala sa sugnod ngadto sa tabo, diin kini ibaligya. Sa usa ka adlaw tingali siya makahimo og duha o tulo ka biyahe paingon sa lungsod aron sa paghatud og pareho nga bakikaw, bug-at nga mga karga. Ang panunduman kabahin niya nga nabaliko ang lawas, naningkamot diha sa dalan nakahatag og dakong kahulugan ngari kanako sa paglabay sa mga tuig. Hangtud kanus-a siya magpadayon sa pagdala niining sama nga alantuson? Ang kinabuhi mopabug-at sa tanang matang sa alantuson ngari kanato, ang uban gaan apan ang uban kapoy ug bug-at. Ang mga tawo nanlimbasug matag adlaw sa mga alantuson gamit ang ilang tanang kusog. Kadaghanan kanato nanlimbasug sa ingon nga mga alantuson. Kini makapapuol sa emosyonal o pisikal nga paagi. Kini makapabalaka, makapasahol, ug makapakapoy. Ug kini mahimong magpadayon sulod sa pipila ka tuig. Sa kinatibuk-ang paglantaw, ang atong mga alantuson nagagikan sa tulo ka tinubdan. Ang ubang alantuson resulta sa natural nga mga kondisyon sa kalibutan nga atong gipuy-an. Sakit, pisikal nga kakulang ug mga unos, ug mga linog moabut matag karon ug unya nga dili nato sayop. Kita makapangandam alang niining mga katalagman ug usahay makahibalo nang daan niini, apan sa natural nga dagan sa kinabuhi kitang tanan mosagubang niining mga hagit. Ang ubang mga alantuson gipahamtang diri kanato tungod sa pagpabadlong sa uban. Ang pag-abuso ug pagka-adik makahimo sa atong mga panimalay sa bisan unsa gawas lamang sa usa ka langit dinhi sa yuta alang sa mga inosente nga mga sakop sa pamilya. Ang sala, sayop nga mga tradisyon, pagdaug-daog, ug krimen nagpakatap og alantuson sa mga biktima diha sa dalan sa kinabuhi. Bisan sa dili kaayo seryoso nga mga sayop sama sa paglibak ug dili pagkamabination makahimo og tinud-anay nga pag-antus ngadto sa uban. Ang atong kaugalingong mga sayop ug kakulangan maoy makaingon sa atong mga problema ug makahatag og bug-at nga mga alantuson sa atong kaugalingong mga abaga. Ang pinakalisud nga alantuson nga atong gipahamtang sa atong kaugalingon mao ang palas-anon sa sala. Kitang tanan nahibalo na sa pagbasol ug kasakit nga dili malikayan nga mosunod tungod sa atong pagkapakyas sa pagsunod sa mga kasugoan. Bisan unsa nga mga alantuson nga atong gisagubang sa kinabuhi agi og sangputanan sa natural nga mga kondisyon, ang pagpabadlong sa uban, o sa atong kaugalingong mga sayop ug pagkulang, kitang tanan mga anak sa usa ka mahigugmaon nga Langitnong Amahan, kinsa mipadala kanato sa yuta isip kabahin sa Iyang mahangturon nga plano alang sa atong pagtubo ug pag-uswag. Ang atong talagsaon nga indibidwal nga mga kasinatian makatabang kanato sa pagpangandam balik ngadto Kaniya. Ang kalisdanan ug mga kasakitan nga atong nasinati, bisan unsa kalisud sa pag-agwanta, sa pagsulbad, gikan sa langitnong panglantaw, “kini sulod lamang sa mubo nga higayon; ug unya, kon [kita] molahutay pag-ayo, ang Dios mobayaw [kanato] sa kahitas-an.”1 Kinahanglan nga atong buhaton ang tanan natong mahimo sa paglahutay sa atong mga alantuson nga “maayo” kay bisan unsa kadugay sa atong “mubo nga higayon” sa paglahutay kini molungtad ra. Ang mga alantuson naghatag og mga kahigayunan sa pagbansay og mga hiyas nga nagtampo ngadto sa kahingpitan sa kaulahian. Kini nagdapit kanato sa “pagdani sa Balaang Espiritu, ug [isalikway] ang kinaiyanhon nga pagkatawo ug [mahimo] nga usa ka santos pinaagi sa pag-ula ni Kristo ang Ginoo, ug [mahimo] nga ingon sa usa ka bata, manunuton, maaghup, mapainubsanon, mapailubon, puno sa gugma, mauyunon sa pagdawat sa tanan nga mga butang diin ang Ginoo makakita nga angay ipahamtang ngari [kanato], bisan ingon sa usa ka bata nga motugyan sa iyang kaugalingon ngadto sa iyang amahan.”2 Sa ingon ang mga alantuson mahimong mga panalangin, bisan usahay kini nga mga panalangin gitago ra ug mahimong magkinahanglan og panahon, paningkamot, ug hugot nga pagtuo sa pagdawat ug pagsabut. Upat ka mga panig-ingnan makatabang kanato sa pagpasabut niini: • Una, si Adan gisultihan, “Tungluhon ang yuta tungod kanimo,” nga nagpasabut alang sa iyang kaayohan, ug “pinaagi sa singot sa imong nawong ikaw makakaon og pan.”3 Ang trabaho usa ka nagpadayon nga alantuson, apan kini usab usa ka nagpadayon nga panalangin “tungod kanimo,” tungod kay kini nagtudlo kanato og mga leksyon nga atong makat-unan lamang “pinaagi sa singot sa [atong] nawong.” • Ikaduha, si Alma nakaobserbar nga ang kawad-on ug “mga kasakit [sa mga kabus tali sa mga Zoramite] sa tinuod nakapahimo kanilangmapainubsanon ug sila nangandam sa pagpaminaw sa pulong.”4 Siya midugang, “Tungod kay kamo napugos sa pagpaubos bulahan kamo.”5 Ang atong ekonomikanhong mga hagit mahimong makatabang sa pagpangandam kanato sa pagpaminaw usab sa Ginoo ug mopanalangin kanato sa susamang paagi. • Ikatulo, tungod sa “hilabihan ka dugay sa [ilang] gubat,” daghang mga Nephite ug mga Lamanite “nahumok tungod sa ilang mga kasakit, nga sa ingon sila mipaubos sa ilang mga kaugalingon atubangan sa Dios, gani sa kinahiladman sa pagkamapainubsanon.”6 Mga politikanhong kagubot, walay kahusay sa palibut, kasamok sa kultura, ug, sa ubang dapit sa kalibutan modernong mga tulisan nga Gadianton mahimong makapaubos kanato ug moaghat kanato sa pagpangita sa langitnong kapasilongan gikan sa kagubot sa katilingban. • Ikaupat, si Joseph Smith gisultihan nga ang grabe nga mga butang nga iyang giantus sulod sa katuigan sa mga kamot sa iyang mga kaaway “makahatag [kaniya] og kasinatian, ug . . . alang sa [iyang] kaayohan.”7 Ang pag-antus nga atong nasinati pinaagi sa mga sala sa uban usa ka mapuslanon, bisan tuod sakit kaayo, kini usa ka tulunghaan alang sa pag-uswag sa atong kaugalingong kinaiya. Dugang pa, ang pag-antus sa atong kaugalingong alantuson makapalambo ngari kanato og igo-igong pagbinatiay sa mga problema sa uban. Si Apostol Pablo mitudlo nga kita kinahanglan nga “moyayong . . . sa kabug-at sa usag usa, ug sa ingon niana tumanon ang kasugoan ni Kristo.”8 Tungod niini, ang atong mga pakigsaad sa bunyag nagkinahanglan nga kita “andam sa pagtambayayong sa usag usa nga mga alantuson, nga sila mahimo nga magaan; oo, ug [mahimong] andam sa pagbangutan uban niadto nga nagbangutan; oo, ug sa paghupay niadto nga nagkinahanglan sa kahupayan.”9 Ang pagsunod sa atong mga pakigsaad sa bunyag makatabang sa paghupay sa atong kaugalingon nga mga alantuson ingon man usab niadtong nag-antus nga mga kalag nga atong gialagaran.10 Kadtong naghatag og susamang tabang sa uban nagbarug sa yuta nga balaan. Sa pagpasabut niini, ang Manluluwas mitudlo: “Kanus-a kami nakakita kanimo nga gigutom, ug amo ikawng gipakaon? o giuhaw ug amo ikawng gipainom? “Kanus-a ba kami nakakita kanimo nga nadumoloong, ug amo ikawng gipasaka? o hubo ug amo ikawng gibistihan? “O kanus-a ba kami nakakita kanimo nga nagmasakiton, o nabilanggo, ug amo ikawng giduaw? “Ug kanila mitubag ang Hari nga nagaingon, Sa pagkatinuod, magaingon ako kaninyo, nga maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako.”11 Bisan niining tanan, ang Manluluwas nagdalit kanato og igong kalig-on ug suporta, ug sa Iyang kaugalingong panahon ug paagi, Siya naghalad og kaluwasan. Sa dihang si Alma ug iyang sumusunod mieskapo gikan sa mga kasundalohan ni Haring Noah, sila mitukod og kapunungan nga ginganlan og Helam. Sila misugod og bugwal sa yuta, mitukod og mga building, midaghan ug miuswag.12 Sa walay pagpahibalo, usa ka kasundalohan sa mga Lamanite miulipon kanila ug “walay usa nga makaluwas kanila apan ang Ginoo nga ilang Dios.”13 Kadto nga kaluwasan, bisan pa niana, wala dayon miabut. Ang ilang mga kaaway misugod sa “pagbutang og mga buluhaton diha kanila, ug mibutang og kapatas ibabaw kanila.”14 Bisan og sila gihulga og kamatayon tungod sa pag-ampo,15 si Alma ug ang iyang mga katawhan “mibu-bu sa ilang mga kasingkasing ngadto sa [Dios]; ug siya nasayud sa mga hunahuna sa ilang mga kasingkasing.”16 Tungod sa ilang kaayo ug sa ilang kamasulundon sa ilang mga pakigsaad sa bunyag,17 sila giluwas. Ang Ginoo miingon ngadto kanila: “Ako . . . mopagaan sa mga alantuson diin anaa gitungtong diha sa inyong mga abaga, nga . . . kamo dili makabati kanila diha sa inyong mga buko-buko, bisan anaa kamo sa pagkaulipon; ug kini Ako mobuhat nga kamo mobarug ingon nga mga saksi alang kanako human niini, ug nga kamo mahimo nga masayud sa pagkatinuod nga Ako, ang Ginoong Dios, moduaw sa akong mga katawhan diha sa ilang kasakit. “Ug karon nahinabo nga ang mga alantuson diin gibutang diha kang Alma ug sa iyang mga kaaigsoonan gihimo nga magaan; oo, ang Ginoo mipalig-on kanila nga sila makadaug sa ilang mga alantuson uban sa kasayon, ug sila mitugyan sa maayo nga buot ug uban sa pailub ngadto sa tanan nga kabubut-on sa Ginoo. “Ug nahinabo nga hilabihan ka dako sa ilang hugot nga pagtuo ug sa ilang pailub nga ang tingog sa Ginoo miabut nganha kanila pag-usab, nag-ingon: Pagmadasigon, kay pagkaugma Ako moluwas kaninyo gikan sa pagkaulipon.”18 Uban sa dakong kalooy, ang Anak sa Dios mihatag usab og kaluwasan gikan sa pagkaulipon sa atong mga sala, nga naglakip na sa labing bug-at nga mga alantuson nga atong giantus. Atol sa Iyang Pag-ula Siya miantus “sumala sa unod nga siya unta modala diha kaniya sa mga sala sa iyang mga katawhan, nga siya unta mopapas sa ilang mga kalapasan sumala sa gahum sa iyang pagluwas.”19 Si Kristo “nag-antus niini nga mga butang alang sa tanan, nga sila unta dili mag-antus kon sila maghinulsol.”20 Kon kita maghinulsol ug mosunod sa mga sugo, kahupayan gikan sa atong alantuson nga konsyensya moabut uban sa tabang nga ang Manluluwas lamang ang makahatag, kay “sa pagkatinuod, si bisan kinsa ang maghinulsol makakaplag sa kalooy.”21 Ako nahinumdom niadto nga tawo sa Peru, nabuktot og pinas-an ug naninguha sa pagkarga niadtong hilabihan ka daghang sako sa mga sugnod diha sa iyang buko-buko. Alang kanako, siya usa ka larawan kanatong tanan sa atong panlimbasug sa mga alantusonsa kinabuhi. Ako nasayud nga kon kita mosunod sa mga sugo sa Dios ug sa atong mga pakigsaad, Siya mopagaan sa atong mga alantuson. Siya mopalig-on kanato. Kon kita maghinulsol, Siya mopasaylo kanato ug mopanalangin kanato uban sa kalinaw sa tanlag ug hingpit nga kalipay.22 Kita unta mosunod sa dakong kalipay ug uban sa pailub ngadto sa tanang kabubut-on sa Ginoo, ako nag-ampo sa pangalan ni Jesukristo, amen. MUBO NGA MGA SULAT 1. D&P 121:7–8. 2. Mosiah 3:19. 3. Moises 4:23, 25. 4. Alma 32:6. 5. Alma 32:13. 6. Alma 62:41. 7. D&P 122:7. 8. Mga Taga-Galacia 6:2. 9. Mosiah 18:8–9. 10. Tan-awa sa Mateo 10:39; 11:28–30; Mosiah 2:22. 11. Tan-awa sa Mateo 25:35–40. 12. Tan-awa sa Mosiah 23:5, 19–20. 13. Tan-awa sa Mosiah 23:23–26. 14. Mosiah 24:9. 15. Tan-awa sa Mosiah 24:10–11. 16. Mosiah 24:12. 17. Tan-awa sa Mosiah 18:8–10, 24:13. 18. Mosiah 24:14–16. 19. Alma 7:13. 20. D&P 19:16. 21. Alma 32:13. 22. Tan-awa sa Mosiah 4:3; Alma 36:19–21.