PALESITENI GORDON B. HINCKLEY
Ko e feituʻu kotoa pē ne hoko ai ha faingataʻa ʻi ha faʻahinga ʻuhinga pē, kuo ʻosi aʻu atu ki ai ha kau fakafofonga ʻo e Siasí. . . .Kuó u mamata tonu ki hono ola ʻo ʻetau ngaahi tokoni ʻofa fakaetangata ki he kakaí.
ʻI he 1936, ʻa ia ko e taʻu ia ʻe 68 kuo hilí, naʻe fakahā mai kiate au ʻe ha taha ʻo e kau sekelitali ʻo e Kōlomu ʻo e Toko Hongofulu Mā Uá, ha meʻa naʻe fakahā ange kiate ia ʻe ha mēmipa ʻo e Toko Hongofulu Mā Uá. Naʻá ne pehē, ʻe fakahā ha polokalama ʻi he konifelenisi lahi ka hokó, ʻa ia ʻe ʻiloa ange pea fakatokangaʻi lahi ange ia ʻi he haʻu ko ia hotau kakai paioniá ki he ngaahi teleʻa ko ʻení.
ʻOku ʻikai totonu foki ke ke tala ki hoʻo sekelitalí ha meʻa ʻoku totonu ke ʻoua te ke toe fakahā holo, pea ʻoku ʻikai totonu ke ne tala ki ha toe taha kehe, ha fakamatala naʻe ʻoange kiate ia ʻoku ʻikai toe fie maʻu ke fakahā holo.
Ka, ko e meʻa ia ne hoko ʻi he taimi ko iá. ʻOku ʻikai hoko ia he ʻahó ni. ʻOku totonu foki ke u tānaki atu ʻoku teʻeki ai ʻaupito halaia ʻeku kau sēkelitalí ʻi hano maumauʻi ʻo ha falala ʻo fakahāhāholo ha meʻa naʻe ʻikai totonu ke fakahā.
Hangē ko ia ʻoku meaʻi ʻe kimoutolu ʻoku maheni mo e hisitōliá, naʻe fanongonongo ʻi he fakataha ko iá ʻa e palani maluʻi ʻa e Siasí, ʻa ia naʻe liliu ki mui hono hingoá ko e polokalama uelofea ʻa e Siasí.
Naʻá ku fifili ʻi he ngaahi ʻaho ko iá, pe ko e hā ha toe meʻa ʻe fai ʻe he Siasí ʻo laka ange ʻi he fononga fakahisitōlia kuo fai ʻe he Siasí, ʻo fakatatau mo e ngaahi fakakaukau ʻa e kakaí ki hono tānaki fakahisitōlia mai ʻa hotau kakaí ki he ngaahi teleʻa ko ʻeni ʻi he hihifo ʻo e ʻIunaiteti Siteití. Ko ha fononga fisifisimuʻa ia naʻá ku pehē ʻe ʻikai lava ʻe ha meʻa ʻo lakasi hono ongoongoá. Ka kuó u toki fakatokangaʻi ha meʻa mahuʻinga ʻi he taimi nounou ko ʻeni kuo hilí.
ʻOku mau talitali ha kau ʻaʻahi ʻiloa ki he ʻŌfisi ʻo e Kau Palesitenisī ʻUluakí. Naʻe kau ki ai ʻa e kau taki fakafonua mo e kau ʻamipasitoa ʻo e ngaahi puleʻangá. Naʻa mau toki talitali he ngaahi uike siʻi kuo hilí ʻa e pule kolo ʻo e taha ʻo e ngaahi kolo ʻiloa taha ʻi he māmaní. Naʻe pehē foki haʻamau toki talitali ʻa e tokoni palesiteni mo e ʻamipasitoa ʻo ʻEkuatoá, ʻamipasitoa ʻo Lifueniá, ko e ʻamipasitoa ʻo Pelalusí, mo ha niʻihi kehe foki. Kuo teʻeki lave ha taha ʻo kinautolu ʻi heʻemau ngaahi femeʻaʻakí, ʻo kau ki he fononga ʻa ʻetau ngaahi kuí. Ka kuo nau lea fakafoʻituitui kotoa ʻo fakalāngilangiʻi lahi ʻetau polokalama uelofeá mo ʻetau ngaahi tokoni ʻofa fakaetangatá.
Ko ia ʻi heʻeku lea atu ʻi he fakataha mahuʻinga ko ʻeni ʻo e lakanga fakataulaʻeikí, ʻoku ou fie lea ai ʻo kau ki heʻetau ngaahi feinga ke tokoniʻi ʻa kinautolu ʻoku faingataʻaʻiá, ʻo tatau ai pē pe ʻoku nau Siasi pe ʻikai, ʻi he ngaahi feituʻu kehekehe ʻo e māmaní.
ʻI he taimi naʻe kamata ai hono fokotuʻu ʻo e polokalama uelofea ʻo e onopōní, naʻe fakataumuʻa ia ke tokoniʻi ʻa e ngaahi fiemaʻu pē ʻa hotau kāingalotú. Ko ia kuo tokoniʻi ai ʻi he ngaahi taʻu kuo ʻosí ha lau afe lahi. Naʻe ala maʻu ai ʻe he kau pīsopé mo e kau palesiteni Fineʻofá ha meʻakai mo e vala mo e ngaahi koloa kehe ke tokoniʻi ʻa e kau faingataʻaʻiá. Kuo ʻi ai ha kāingalotu taʻefaʻalaua ʻo e Siasí kuo nau ngāue-ʻofa ʻi hono ngaohi ʻo e ngaahi meʻa ko ia naʻe fie maʻú. ʻOku tau maʻu he taimí ni ha ngaahi fale tukuʻanga koloa ʻe 113, ngaahi faama ʻe 63, ngaahi fale faʻoaki kapa ʻo e meʻakaí ʻe 105 mo e ngaahi senitā ʻoku fakatolonga ai e meʻakaí ke fakaʻaongaʻi fakatāutaha, ngaahi fale ngaohiʻanga meʻakai mo e ngaahi fale tufakiʻanga meʻakai ʻe 18, kae ʻumaʻā ha ngaahi fale lahi kehe.
ʻOku ʻikai ngata ʻi hono fakalato ʻo e ngaahi fiemaʻu ʻa e kāingalotu ʻo e Siasí, ka kuo fai foki hano tokoniʻi ʻo ha kakai tokolahi taʻefaʻalaua kehe. ʻOku ʻi ai ha kakai fiekaia tokolahi ʻi Sōleki Sití ni, ʻoku fafangaʻi fakaʻaho kinautolu ʻe ha ngaahi kautaha taʻe Siasi ʻa ia ʻoku nau fakaʻaongaʻi ʻa e ngaahi koloa uelofea ʻa e Siasí.
ʻOku tau fakalele ʻi he koló ni, pea ʻi ha ngaahi feituʻu kehe ha ngaahi fale koloa fakaʻofoʻofa ʻa ia ʻoku maʻu taʻetotongi pē ai ʻa e koloá, pea ʻoku ʻikai totongi ai ha paʻanga, ka ʻoku maʻu ai ʻa e valá mo e ngaahi koloa kehe ʻoku ʻaonga ki he kau faingataʻaʻiá. ʻOku ou tui ʻoku ʻikai ke ʻi ai ha huʻakau, pe kakanoʻi manu, pe mahoaʻa ʻoku maʻu ʻi ha ngaahi fale koloa meʻakai ʻe lelei ange ʻi he ngaahi meʻa ʻoku maʻu mei he ngaahi fale tukuʻanga koloa ʻo e kau pīsopé.
Ko e ngaahi tefitoʻi moʻoni ko ia naʻe makatuʻunga ai hono fokotuʻu ʻo e ngaahi feituʻu ko ʻení, ʻoku kei tatau pē ia mo e ngaahi tefitoʻi moʻoni naʻe kamataʻakí.
ʻOku ʻamanaki foki ʻe fai ʻe he kau faingataʻaʻiá ʻa honau tūkuingatá ke tokonaki pē maʻanautolu. Hili iá, ʻoku ʻi ai e ʻamanaki ʻe lava ke tokoni ʻa e ngaahi fāmilí ki honau kau mēmipa ʻoku masivá. Pea ʻoku toki fakafaingamālieʻi leva kiate kinautolu ʻa e ngaahi maʻuʻanga tokoni ʻa e Siasí.
ʻOku tau tui pea tau fai fakamātoato ki he ngaahi folofola ʻa hotau ʻEikí:
“Haʻu ʻa kimoutolu kuo monūʻia ʻi heʻeku Tamaí, ʻo maʻu ʻa e puleʻanga kuo teuteu moʻomoutolu talu mei he kamataʻanga ʻo māmaní.
“He naʻá ku fiekaia, pea naʻa mou foaki ʻa e meʻakai kiate au: naʻá ku fieinua, pea naʻa mou foaki ʻa e inu kiate au, ko e muli au, pea naʻa mou fakaafeʻi au:
“Telefua, pea naʻa mou fakakofuʻi au: naʻá ku mahaki, pea naʻa mou ʻaʻahi mai kiate au; naʻá ku ʻi he fale fakapōpulá, pea naʻa mou haʻu kiate au” (Mātiu 25:34-36).
Ko e founga ʻeni ʻa e ʻEikí ki hono tokangaʻi ʻa kinautolu faingataʻaʻiá, ʻa ia naʻá Ne folofola ki ai ʻo pehē, “ʻoku [nau] ʻiate kimoutolu maʻu ai pē” (vakai ki he Mātiu 26:11.)
ʻOku ngāue-ʻofa ʻa kinautolu ʻoku sino moʻui leleí ke tokonaki maʻanautolu ʻoku ʻikai lava ʻo ngāué. Naʻe feʻunga mo ha houa ngāue-ʻofa ʻe 563,000 ʻi he taʻu kuo ʻosí, ʻi he ngaahi fale uelofeá. ʻOku tatau ia mo ha ngāue houa ʻe valu ha tangata ʻi ha taʻu ʻe 1,542.
Naʻe toki ʻasi ʻi ha Church News ki muí ni mai ha talanoa naʻe kau ki ha kau faama ʻi ha kiʻi kolo ʻi ʻAitahō. ʻOku ou fie lau atu ha konga siʻi ʻo e fakamatala ko iá.
“Ko e taimi 6 pongipongi ʻeni ʻi he konga ki mui ʻo ʻOkatopá, pea kuo ʻosi kamata ke kāpui ʻe he kakapú ʻa e ngaahi ngoue sukapiiti ʻi Lupeti, ʻAitahoó.
“ʻOku mafao atu ʻa e ngaahi nima lōloa ʻo e ngaahi mīsini tutuʻú ʻi ha ʻotu ʻe hongofulu mā ua, ʻo tutuʻu ʻa e ʻulu ʻo e sukapītí. Naʻe muimui mai ai ʻa e ngaahi mīsini taʻakí ʻo hanga ʻe hono ngaahi meʻa kelí ʻo taʻaki hake ʻa e pītí ki ʻolunga, pea fakaheka ia ki ha leta takai ʻo huaʻi ki ha loli kuo ʻosi teuteu mai.
“. . . Ko e Faama Uelofea ʻeni ʻi Lupeti ʻAitahoó, pea ko e kau ngāue heni he ʻaho ní ko e kau ngāue-ʻofa pē. “ʻOku ʻi ai ʻa e taimi ʻe niʻihi ne aʻu ki he ngaahi mīsini ʻe 60 naʻa nau ngāue fakataha—pea ko ha ngaahi mīsini kotoa ia ʻa e kau faama fakalotofonuá pē.”
Naʻe fai ʻa e ngāué ʻi he ʻahó kakato.
“[Naʻe aʻu ki he] 7 efiafí . . . kuo tō ʻa e laʻaá, pea toe fakapoʻuli mo momoko ʻa e ngoué. Kuo foki ʻa e kau fāmá ki ʻapi, kuo nau ongosia ka naʻa nau fiefia.
“Kuo nau lavaʻi ai ha ngāue lelei ʻi ha toe ʻaho ʻe taha.
“Kuo nau taʻaki ʻa e suka-piiti ʻa e ʻEikí” (Neil K. Newell, “A Harvest in Idaho,” Church News, 10 Mar, 2004, p. 16).
ʻOku fai ha ngāueʻofa fakaofo pehē he taimi kotoa pē ke fakapapauʻi ʻoku ʻi ai ha ngaahi koloa ʻi he ngaahi fale tukuʻanga koloa ʻo e ʻEikí.
Kuo liliu ʻeni ʻa e taumuʻá mei hono tokangaʻi ʻo e niʻihi ʻoku faingataʻaʻiá, ki hono fakaʻaiʻai e ngaahi fāmili ʻo e Siasí ke nau nofo mateuteu mo haʻanau meʻatokoni kuo tānaki ke feʻunga mo ha taʻu e taha. ʻOku ʻikai ʻilo ʻe ha taha ki ha taimi ʻe hoko mai ai ha fakatuʻutāmakí. Pe ko ha puke, pe ha taʻe maʻu ngāue, pe ha fakatamaki ʻo ʻikai toe lava ai ha taha ʻo ngāue!
Naʻe hanga ʻe he polokalamá ʻo tokoniʻi ʻi he taʻu kuo ʻosí ʻa e ngaahi fāmilí ke nau tauhi ha pāuni meʻakai ʻe 18 miliona ʻi he tokateu ki ha taimi faingataʻa. ʻOku tau fakatauange pē ke ʻoua ʻe hoko mai ha taimi pehē. Ka ʻoku hanga ʻe he meʻakai lelei mo fakatupu-ivi ko ia ʻoku tauhí ʻo ʻomi ha nonga ki he fakakaukaú, mo e fiemālie ʻi he talangofua ki he akonakí.
Kuo toe tānaki mai he taimí ni ha taumuʻa ʻe taha. Naʻe kamata ia ʻi he ngaahi taʻu siʻi kuo hilí ʻi he tō ʻa e laʻalaʻā ʻi ʻAfilika pea fiekaia mo mate ai ha tokolahi taʻefaʻalaua. Naʻe kole ai ki he kāingalotu ʻo e Siasí ke nau tokoni ki ha ngāue lahi ʻo e tokoni ʻofa fakaetangatá ke tokoniʻi ʻa e kakaí pea feau ʻa e ngaahi fiemaʻu masiva moʻoni ko iá. Naʻe lahi mo ʻaufuatō moʻoni hoʻomou ngaahi tokoní. ʻOku kei hoko atu pē ʻa e ngāué he ʻoku kei ʻi ai pē ha ngaahi fie maʻu kehe ʻoku fuʻu vivili ʻi ha ngaahi feituʻu lahi. Kuo hoko ko ha mana ʻa e ola ʻo e tokoni ko ʻení. Kuo hanga ʻe ha kilokalami meʻakai ʻe lau miliona, ngaahi nāunau fakafaitoʻo, ngaahi sipi kafu, ngaahi tēniti, vala, mo e ngaahi nāunau kehe ʻo taʻofi ʻa e hongé mo e maumaú ʻi ha ngaahi feituʻu lahi ʻo e māmaní. Kuo keli ha ngaahi vaitupu, pea tō ha ngaahi ngoue, pea fakahaofi ʻa e moʻui ʻa ha tokolahi. Te u fai atu ha kiʻi fakatātā.
Ko ha tangata ʻenisinia fakakemikale ʻa Nila Tālingitoni, pea naʻá ne ngāue ki ha kautaha langa ʻiloa ʻi Kana. Kuó ne mālōlō mei ai he taimí ni.
Naʻe ui leva ia mo hono uaifí ke na hoko ko ha ongo faifekau. Naʻe ʻave leva kinaua ki Kana. Naʻe pehē ʻe Nila Tālingitoni, “ʻI heʻema hoko ko e ongo fakafofonga ʻo e Siasí, naʻá ma ʻi he ngaahi feituʻu ʻoku hongé, lahi ai e mahakí mo e ngāngāʻehu fakasōsialé, ʻo tokoni ki he kakai masivá, fiekaiá, mo faingataʻaʻiá.”
Naʻá na vili ʻi he ngaahi kolo īkí ha ngaahi vaitupu foʻou pea fakaleleiʻi ha ngaahi vaitupu motuʻa. ʻOku ʻikai lava ʻe kitautolu ʻoku tau maʻu ha vai foʻou mo maʻá, ʻa e ngaahi tuʻunga ʻoku ʻi ai ʻa kinautolu ʻoku ʻikai te nau maʻu ha vaí.
Te mou lava nai ʻo fakakaukau atu ki he ongo mātuʻá ni, ko ha ongo faifekau mateaki ʻo e Siasí? ʻOkú na vili ʻi he kelekele mōmoá. ʻOku aʻu ʻena vilí ki he nofoʻanga vai ʻi lalo fonuá, pea maʻu hake ʻa e vai fakamoʻuí ki ʻolunga pea tafe atu ʻi he kelekele mōmoa mo pakukaá. ʻOku ʻi ai ʻa e fiefiá. ʻOku tō mo ha ngahi loʻimata. Kuo maʻu ha vai inu he taimí ni, mo e vai ke fai ʻaki ʻa e foó, mo fuʻifuʻi ʻaki ʻa e ngoué. ʻOku ʻikai ha meʻa ʻe mahuʻinga ange ʻi he fonua mōmoá ka ko e vaí. Ko e meʻa fakaʻofoʻofa moʻoni ʻa e vai ʻoku tafe mai mei ha vaitupu foʻoú.
Naʻe ʻi ai ha taimi ʻe taha, ʻi he fakataha mai ʻa e houʻeiki ʻo e kakaí mo e kau mātuʻa ʻo e koló ke fakamālō kiate kinauá, naʻe kole ange ai ʻe Nila Tālingitoni ki he ʻeiki ʻo e koló pe ʻe lava ke na hivaʻi ange mo Sisitā Tālingatoni ha foʻi hiva kiate kinautolu. Naʻá na tuʻu ai ʻo sio atu ki he fofonga ʻo e kakai tangata mo fafine kili lanu fakapoʻupoʻuli ʻi muʻa ʻiate kinauá, peá na hivaʻi ʻa e, Fānau Au ʻa e ʻOtuá, ke fakamahinoʻi ʻaki ko e ngaahi tokoua kotoa pē ʻa kinautolu.
Kuo lava ʻe he ongo mātuʻá ni ʻo maʻu ha vai ke ʻinasi ai ha kakai ʻe toko 190,000 he ngaahi kolo mamaʻó mo e ngaahi ʻapitanga ʻo e kau kumi hūfangá. Mou fakakaukau atu ki he mana ʻo e ngāue lavameʻa ko ʻení.
ʻOku ʻi ai ha mātuʻa mali ʻe lau afe he taimí ni, naʻa nau mei nofo he toenga ʻo ʻenau moʻuí mo fai ha ngaahi meʻa ʻoku ʻikai fuʻu mahuʻinga, ka kuo nau ʻosi ʻalu atu ʻo ngāue, pea ʻoku lolotonga ngāue atu ha niʻihi, ʻi ha ngaahi founga lahi, pea ʻi ha ngaahi feituʻu lahi. Kuo nau ngāue pea ʻoku kei hoko atu ʻenau ngāué ʻi he ngaahi feituʻu masiva ʻo ʻAmeliká. Kuo nau ngāue, pea ʻoku nau kei ngāue, ʻi ʻInitia mo ʻInitonīsia, pea ʻi Taileni mo Kemipōtia pea ʻi Lūsia mo e ngaahi fonua hangē ko Lativia mo ʻEsitōniá. ʻOku pehē ʻa e mafola atu ʻa e ngāué.
Naʻe toki ngāue fakataha ʻa e Siasí mo ha niʻihi kehe, ʻo ʻoatu ha sāliote teketeke ki he kakai ʻe toko 42,000 ʻoku ʻikai te nau lava ʻo ʻalu. Mou fakakaukau ki hono mahuʻingá ki ha kakai naʻe pau ke nau totolo holo pē. Naʻe tokoni ha kau toketā mo e kau neesi ʻofa, ki hono akoʻi ʻo e fakahaofi ʻo e moʻui ʻa e fānau valevalé, ki ha kau ngāue ʻe toko 19,000 ʻi he taʻu 2003. ʻE tupu ai hano fakahaofi ʻa e moʻui ʻa ha pēpē ʻe lau afe.
Naʻe faitoʻo ʻa e ngaahi palopalema ki he mata ʻo ha kakai ʻe toko 2,700 nai ʻi he taʻu kuo ʻosí, pea akoʻi ha kau toketā mata fakalotofonua ʻe toko 300 ki he ngaahi founga ki hono fakahaofi ʻo e sió. Kuo toe lava moʻoni ʻa e kuí ʻo sio.
Ko e feituʻu ko ia kuo hoko ai ha tāfea fakamamahí, pea hoko ha fakatuʻutāmaki ʻi he ngaahi mofuiké, pea kei hoko ʻa e fiekaiá ko ha palopalema, pe ha feituʻu pē ne hoko ai ha faingataʻa ʻi ha faʻahinga ʻuhinga pē, kuo ʻosi aʻu atu ki ai ha kau fakafofonga ʻo e Siasí. Kuo tufotufa atu ʻi he taʻu kuo ʻosí ha paʻanga mo e ngaahi koloa feʻunga mo e paʻanga ʻAmelika ʻe 98 miliona, ʻo aʻu ai hono fakakātoa ʻo e ngaahi tokoni peheé ki he paʻanga ʻe 643 miliona ʻi he taʻu ʻe 18 kuo hilí.
Kuó u mamata tonu ki hono ola ʻo ʻetau ngaahi tokoni ʻofa fakaetangata ki he kakaí. ʻI heʻeku folau holo he māmaní, kuó u mamata ai ki he kakai kuo nau lave monū ʻi hoʻomou ʻofa ʻaufuatoó. Naʻá ku ʻaʻahi he 1998 ki ʻAmelika Lotoloto, ʻa ia naʻe toki tō mai ki ai ʻa e Afā ko Mitisií. Ne hoko ko ha mana kiate kimautolu ʻa hono palaniʻi vave hono tufaki ʻo e meʻakaí mo e valá, mo hono fakamaʻa mo hono toe langa ʻo e ngaahi fale ne ʻauhá kae ʻumaʻā ʻa e moʻui ne faingataʻaʻiá.
ʻOku ʻikai feʻunga ʻa e taimi ke u fakamatalaʻi ai ʻa hono ola kotoa ʻo e polokalama lahi mo mahuʻinga ko ʻení. Kuo teʻeki ai ke tau ʻeke ki he kakai naʻe tokoniʻí, pe ʻoku nau kau ki he Siasí pe ʻikai. He ʻoku tau ʻiloʻi ko e kakai kotoa ʻi he māmaní ko e fānau ia ʻa e ʻOtuá, pea ʻoku taau ke tokoniʻi kinautolu ʻi he taimi ʻo e faingataʻá. Ko e lahi taha ʻo e tokoni ʻoku faí, ʻoku ʻikai ha ʻilo ʻa e tokotaha ʻoku tokoniʻí pe ko hai naʻá ne tokoniʻi iá. ʻOku ʻikai te tau fiemaʻu ha totongí pe ha fakamālō. ʻOku feʻunga pē ʻetau totongí, ʻi heʻetau ʻilo, ko e taimi ʻoku tau tokoniʻi ai ha taha ʻoku kihiʻi siʻi hifo ʻiate kinautolú ni ko e fānau ʻa ʻetau Tamaí, ko ʻetau fai ia kiate Ia mo Hono ʻAlo ʻOfaʻangá (vakai, Mātiu 25:40).
Kuo pau ke tau hoko atu ʻi he ngāué ni. Kuo pau ke ʻi ai maʻu pē ha fiemaʻu. ʻE ʻiate kitautolu maʻu pē ʻa e fiekaiá mo e fiemaʻú mo e ngaahi fakatuʻutāmakí. Pea ʻe ʻi ai maʻu pē mo ha kakai ʻe ueʻi hake honau lotó ʻe he maama ʻo e ongoongoleleí ʻa ia te nau fie ngāue mo tokoni ke fakalotolahiʻi ʻa e kau faingataʻaʻia ʻo e māmaní.
ʻOku mei faitatau pē ia mo e ngāue ko ia kuo fokotuʻu ki he Paʻanga Tokoni Fakaako Tuʻumaʻú. Kuo lava ʻo fakahoko ia tuʻunga ʻi hoʻomou ngaahi foaki ʻofá. ʻOku fakahoko ia he taimí ni ʻi ha fonua ʻe 23. ʻOku ʻoatu ha nō ki he kau talavou mo e kau finemui ʻoku feʻungá ke nau lava ai ʻo ako. Kapau ne ʻikai ia, te nau kei ʻefihia ai pē ʻi he masiva lahi ne haʻisia ki ai ʻenau mātuʻá mo e ngaahi kuí ʻi ha ngaahi toʻu tangata lahi. Kuo ʻosi tokoniʻi ha toko 10,000 tupu he taimí ni, pea kuo hā mei he ngaahi meʻa kuo hokó, kuo nau lava ʻi heʻenau ako ko iá ʻo maʻu ha vāhenga ʻoku liunga tolu ki he fā ʻi he vāhenga naʻa nau lava ke maʻu ki muʻá.
ʻOku tataki ʻa e ngāué ni ʻe he Laumālie ʻo e ʻEikí. Ko ha ngāue fakatuʻasino ʻa e ngāue fakauelofeá, pea ʻoku fakahā ia ʻi he laise mo e piini, sipi kafu mo e tēniti, vala mo e faitoʻo, ngāue mo e ako ke maʻu ai ha ngāue lelei ange. Ka ko e meʻa ko ʻeni ʻoku ui ko e ngāue fakatuʻasinó, ko hano fakaʻaliʻali atu pē ia ki tuʻa ʻo ha laumālie ʻi loto—ʻa ia ko e Laumālie ʻo e ʻEikí, ʻa ia naʻe fakamatala ʻo kau kiate ia ʻo pehē, naʻá Ne “faʻa feʻaluʻaki ʻo fai lelei” (Ngāue 10:38).
ʻOfa ke tokoni mai ʻa e langí ke tuʻumālie ʻa e polokalama uelofea maʻongoʻongá ni, pea ʻofa ke nofoʻia ʻe he ngaahi tāpuaki ʻo e langí ʻa kinautolu kotoa pē ʻoku ngāue aí, ʻoku ou lotua ia ʻi he loto fakatōkilalo, pea ʻi he huafa toputapu ʻo Sīsū Kalaisí, ʻēmeni.
Previous
