Lipooti ʻa e Potungāue ʻAotita ʻa e Siasí, 2003 FAKAHOKO ʻE WESLEY L. JONES Talēkita Pule, Potungāue ʻAotita ʻa e Siasí Ki he Kau Palesitenisī ʻUluaki ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní Siʻomau Ngaahi Tokoua: ʻOku ʻi ai ha potungāue ʻaotita ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, pea ʻokú ne fakahoko ʻene ngaahi ngāué ʻo ʻikai fakafalala ki he ngaahi potungāue pe ngaahi ngāue kehe ʻa e Siasí. ʻOku lipooti hangatonu maʻu pē ʻa e Talēkita Pule ʻo e Potungāue ʻAotita ʻa e Siasí ki he Kau Palesitenisī ʻUluakí. ʻOku kau ki he kau ngāue ʻo e Potungāue ʻAotita ʻa e Siasí ha kau tauhi tohi kuo ʻosi fakamoʻoniʻi ʻenau feʻunga ke fai ʻa e ngāue tauhi tohí, kau ʻaotita fakalotongāue kuo ʻosi fakamoʻoniʻi, kau ʻaotita ki he ngaahi fakamatala fakalotongāue kuo ʻosi fakamoʻoniʻi, mo e kau mataotao kehe kuo fakamoʻoniʻi pea maʻu ʻenau ngaahi tohi fakamoʻoni. Tuʻunga ʻi he tuʻutuʻuni mei he Kau Palesitenisī ʻUluakí, ʻoku maʻu ai ʻe he Potungāue ʻAotita ʻa e Siasí ʻa e mafai ke nau sivi ʻaotita ʻa e ngaahi potungāue mo e ngaahi ngāue kotoa ʻa e Siasí ʻi he māmaní. ʻOku lava ʻe he Potungāue ʻAotita ʻa e Siasí ʻo ngāue ki he ngaahi lekooti, kau ngāue, ngaahi koloa, mo e ngaahi polokalama kotoa ʻoku fie maʻu ke ʻaotitaʻi ʻaki ʻa e ngaahi foakí, ngaahi fakamolé, mo e ngaahi maʻuʻanga tokoni kotoa pē ʻa e Siasí. ʻOku puleʻi ʻa e ngaahi ngāue fakaʻaotitá ʻe ha ngaahi founga ngāue fakaʻaotita mataotao. Ko e meʻa ʻoku makatuʻunga ai hono filiʻi ha meʻa ke ʻaotitaʻí, ko ha tokateu naʻa hoko ha faingataʻa. Ko e fatongia ʻo e Fakataha Alēlea ki he Founga Fakaʻaongaʻi ʻo e Ngaahi Vahehongofulú ke tokangaʻi ʻa e ngaahi fakamolé, pea nau fakamafaiʻi ʻa e ngaahi fakamole ʻoku fai mei he ngaahi paʻanga ʻa e Siasí ki he 2003. ʻOku kau ki he Fakataha Alēlea ko iá ʻa e Kau Palesitenisī ʻUluakí, Kōlomu ʻo e Kau ʻAposetolo ʻe Toko Hongofulu Mā Uá, mo e Kau Pīsope Pulé, ʻo fakatatau ki he fakahinohino kuo fai mai ʻi he fakahaá. Ko ia ʻoku fakatatau ki he tuʻutuʻuni ʻa e fakataha alēlea ko iá, ʻa hono puleʻi ʻo e ngaahi foakí mo e ngaahi fakamolé ʻo fakafou atu ʻi he Potungāue ki he Patiseti mo e Ngaahi Meʻa Fakapaʻanga ʻa e Siasí. Naʻe fai hono sivi fakaʻaotita ʻo hono puleʻi ʻo e ngaahi foaki naʻe maʻu maí mo e ngaahi fakamole ne kau ki he patisetí, pea fai hano lipooti. ʻOku pehē ʻe he Potungāue ʻAotita ʻa e Siasí ʻo makatuʻunga ʻi heʻenau ngaahi ʻaotitá, ko e ngaahi nāunau kotoa pē, mo e ngaahi foaki naʻe maʻu maí mo e ngaahi paʻanga naʻe ngāueʻaki ʻi he taʻú ʻo ngata ʻi he ʻaho 31 ʻo Tīsema 2002, naʻe puleʻi ia ʻo fakatatau ki he ngaahi fakahinohino fekauʻaki mo e ngaahi patisetí ʻa ia kuo fakangofua pea fokotuʻu ʻi he ngaahi tuʻutuʻuni mo e ngaahi founga ngāue ʻa e Siasí. Naʻe ʻikai ʻaotitaʻi ʻe he Potungāue ʻAotita ʻa e Siasí ʻi he taʻu 2003 ʻa e ngaahi ngāue fakapaʻanga ʻa e ngaahi kautaha ʻa e Siasí, ʻa ia ʻoku fakalele mavahe pē ia mei he Siasí. ʻOku kau ki he ngaahi kautaha ko iá, mo e ngaahi kautaha kehe, ʻa e Deseret Management Corporation mo hono ngaahi vaʻá mo e ʻUnivēsiti Pilikihami ʻIongí mo e ngaahi ʻapi ako māʻolunga ʻa e Siasí. Naʻe fai ʻe ha ngaahi kautaha ʻaotita kehe hono sivi ʻaotita ʻo e ngaahi fakamatala fakapaʻanga mo e anga ʻo hono puleʻi ʻo e ngaahi kautaha ko iá. Neongo iá, kuo fakapapauʻi ʻe he Potungāue ʻAotita ʻa e Siasí ʻa hono lipooti totonu ʻa e ngaahi ola ʻo e ngaahi sivi ʻaotita naʻe fai ʻe he ngaahi kautaha ko iá ki he kōmiti ʻaotita ʻa e kautaha taki taha. ʻI he loto fakaʻapaʻapa, Potungāue ʻAotita ʻa e Siasí Wesley L. Jones Talēkita Pulé