Palesiteni Gordon B. Hinckley
ʻOku fakaofo e tupulaki ʻa e Siasí mei hono tupuʻanga māʻulaló ki hono tuʻunga lolotongá, ka ko ʻetau kamatá pē ia.
Siʻi ngaahi tokoua mo e tuofāfine ʻofeina, ʻoku ou fie kau atu hono talitali lelei kimoutolu ki he konifelenisi lahi ko ʻeni ʻo e Siasí. ʻOku fonu ʻa e fuʻu Senitā Konifelenisí ni ʻi Sōleki Sití pea pehē ki he ngaahi fale fakatahaʻanga kehe he feituʻú ni. ʻOku ʻikai ngata pē heʻemau lea ki he kakai hení, ka ʻoku aʻu atu foki kiate kimoutolu he ngaahi fonua kehé. ʻOku mau talitali fiefia kotoa kimoutolu. ʻOku mau ʻofa atu siʻi ngaahi tokoua mo e tuofāfine.
Ne u ngāue fakafaifekau ki he ʻOtu Motu Pilitāniá he taʻu ʻe 70 tupu kuo hilí. Naʻe kei kakato pē ha konga ʻo e Puleʻanga Pilitāniá. Ko e puleʻanga ko ia, ko ha puleʻanga fakapolitikale ia naʻe lahi taha ʻene kapa e ngaahi tapa kehekehe ʻo e māmaní. Naʻe taku ʻo pehē ʻoku ʻikai ʻaupito tō e laʻaá ia he Puleʻanga Pilitāniá. Naʻe vilingia e fuka ʻo e Puleʻanga Pilitāniá he funga ʻo e māmaní.
Naʻe maʻu ʻe ha ngaahi feituʻu kehekehe ha lelei lahi mei he puleʻanga ko iá. Ka naʻe ʻi ai foki ha faingataʻa lahi. Naʻe hoko e faingataʻa ko iá ko ha ola ʻo e ikuna fakamālohí, taú mo e fepakipakí. ʻOku tanu e sino ʻo ha kau sōtia Pilitānia ʻi ha ngaahi faʻitoka he funga ʻo e māmaní.
Kuo matafi atu e Puleʻanga Pilitāniá ia. Naʻe tohi ʻe Lutiati Kipilingi ʻo kau ki he holomui ko ʻení, ʻi heʻene maau ko e “Recessional” ʻo pehē:
Kuo ui hotau kakaí ki he fonua mamaʻó;
Ngata ʻa e fetauʻaki he matāfanga ʻo e koló
Kae vakai atu ki he mālie ʻo e ʻaneafí;
Kuo mōlia hangē ko Ninive ʻo e kuohilí!
(“God of Our Fathers, Known of Old,” Hymns, fika 80).
ʻOku ʻi ai ha puleʻanga ʻe taha he taimí ni. Ko e puleʻanga ʻo e ʻEiki ko Sīsū Kalaisí. Ko e puleʻanga ʻo e ongoongolelei kuo toe fakafoki maí. Ko e puleʻanga ʻo e ʻOtuá. Pea ʻoku ʻikai ʻaupito tō e laʻaá ia he puleʻangá ni. ʻOku ʻikai hoko mai ia ko ha ola ʻo ha ikuna, fepakipaki pe tau. Ka ʻoku hoko mai ia ko e ola ʻo ha fakalotoa he melino, ʻo ha fakamoʻoni mo e akonaki, ko e tokotaha ki heni pea tokotaha ki hena.
Hangē ko ia ʻoku mou meaʻí, ʻoku tau fakamanatu he taʻú ni ʻa e hokosia e taʻu 200 ʻo e Palōfita ko Siosefa Sāmitá, pea mo e taʻu 175 ʻo hono fokotuʻu ʻo e Siasí.
ʻOku fakaofo e tupulaki ʻa e Siasí mei hono tupuʻanga māʻulaló ki hono tuʻunga lolotongá, ka ko ʻetau kamatá pē ia.
ʻOku fakaʻilongaʻi mai ʻe he ngaahi langa temipalé ʻa e tupulaki ko ʻení. ʻOku feʻunga mo ha temipale ʻe 122 ʻoku ngāueʻaki he ngaahi tapa kehekehe ʻo e māmaní. ʻOku faitāpuekina moʻoni hotau kakaí ʻe he meʻá ni. Ko e toko taha kotoa pē ʻokú ne feʻunga ke maʻu ha lekomeni temipalé, ʻokú ne feʻunga foki ke hoko ko ha mēmipa faivelenga ʻo e Siasí. ʻOkú ne totongi vahehongofulu kakato, tauhi e Lea ʻo e Potó, fetuʻutaki lelei mo hono fāmilí, pea hoko ko ha tangataʻifonua pe fefineʻifonua lelei ʻo e koló. Ko e ngāue fakatemipalé, ko e ola aofangatuku ia ʻo ʻetau ngaahi akonaki mo e ʻekitivitī kotoa pē.
Naʻe fakahoko ha ngaahi ouau ʻe 32 miliona ʻi he ngaahi temipalé he taʻu kuo ʻosí. Ko e lahi taha ʻeni kuo fakahoko ʻi ha toe taʻu he kuohilí. ʻI he taimi ní, ʻoku fuʻu toko lahi pea ʻikai lahi feʻunga ha niʻihi ʻo hotau ngaahi temipalé. Kuo pau ke feau e ngaahi fie maʻu ʻa hotau Kāingalotu faivelengá.
Ne mau toki fanongonongó ni atu ha temipale foʻou ki he fakatonga- hahake ʻo e Teleʻa Sōlekí. ʻOku ʻi ai ha ongo konga kelekele lelei ʻi he feituʻu fakahihifó mo e fakatonga-hihifo ʻo e teleʻá, tuʻunga ʻi he angalelei ʻa kinautolu ʻoku nau kamakamataʻi hono fakalakalaka ʻo e ngaahi feituʻu ko ʻení. Ko e ʻuluaki konga te tau langa aí, ʻoku tuʻu ia he konga ʻo e fakalakalaká ʻoku ui ko e “Daybreak” pea ʻoku mau fanongonongo atu ia he ʻahó ni. Mahalo te mou fehuʻi pe ko e hā ʻoku tokangaʻi makehe ai ʻa ʻIutaá. Ka ko hono ʻuhingá he ʻoku fie maʻu ia ʻi he tuʻunga ʻo e ngāué. Ka ʻoku fakalakalaka ai pē e ngāue ki he ngaahi temipale foʻou ʻi Lekisipēki mo Tuini Folo ʻi ʻAitahoó, Sākalameto ʻi Kalifōniá, Helisingikī ʻi Finilení, Panamā Siti ʻi Panamaá, Kalitipa ʻi Palāsilá pea pehē ki ha temipale ʻe taha he ʻikai ke u ʻoatu hono hingoá he taimí ni he ʻoku teʻeki ai fanongonongo atu, ka ʻe vave pē taimí. ʻOku ʻi ai mo ha niʻihi ʻoku kei fakakaukauʻi. ʻI he ngaahi temipale kuó u fakalau atú, kuo tau maʻu ʻa e kelekelé, pea ʻoku laka ai pē ki muʻa ʻa e ngāué ʻi he ngaahi tafaʻaki kehekehe.
ʻOku tau houngaʻia ʻi he fakatapui kuo fai ʻe hotau kakaí, ʻo malava ke fakahoko kotoa ai ʻení.
Ko e taha ʻo e ngaahi tafaʻaki ʻoku fai ki ai e hohaʻa ʻi heʻetau ngāue fakatemipalé, ko e lahi ange ko ia ʻa e ngaahi temipale he funga ʻo e māmaní, ko e lahi ai pē ia hono faʻa fakahoko tuʻo lahi ʻo e ngāue fakafofongá ki he tokotaha pekia tatau pē. ʻOku ngāue ha kakai kehekehe ʻi ha ngaahi founga lahi ki he hohoko fakafāmili tatau pē pea nau iku maʻu ai ʻa e ngaahi hingoa tatau pē. ʻOku ʻikai ke nau ʻiloʻi ʻoku fakahoko ʻe ha kakai mei ha feituʻu kehe ʻa e ngāue tatau pē. Ko ia kuo fuoloa mai ʻemau fakahoko ha ngāue faingataʻa moʻoni. Ke fakaʻehiʻehi mei hano fakahoko tuʻo ua ha ouau ki ha taha, ʻoku mau fakafalala ai ki he tekinolosia faingataʻa ʻo e komipiutá. ʻOku hā mei he ngaahi fakaʻilonga he taimi ní ʻe ola lelei, pea kapau ʻe pehē, ʻe hoko ia ko ha meʻa fakaofo moʻoni ʻi he māmaní.
Ko ia, hangē ko ia ʻoku meaʻi ʻe hamou tokolahi, kuo mau fakahoko ha ngaahi konifelenisi fakasiteiki ʻo fakafou he satelaité. Kuo fuʻu lahi e tupulaki ʻa e Siasí, ko ia ʻoku faingataʻa ai ki he Kau Palesitenisī ʻUluakí, Kōlomu ʻo e Toko Hongofulu Mā Uá mo e Kau Taki Māʻolungá ke nau ʻaʻahi fakafoʻituitui atu ki he ngaahi siteikí, tukukehe kapau ko hano fokotuʻutuʻu foʻou pe vaheua. Kuo hanga ʻe he fakamafola fakasatelaité ʻo fakafaingofuaʻi ʻemau lava ʻo lea atu pē mei Sōleki Siti kae fanongo mo mamata mai ʻa e kakaí mei he ngaahi senitā fakasiteikí mo e ngaahi fale kehe he funga ʻo e māmaní. Ko ha meʻa fakaofo mo fakaʻofoʻofa moʻoni ia.
Ko e founga tatau pē ia ʻoku kau mai ai hamou tokolahi ki heʻetau konifelenisí he ʻahó ni. ʻOku tau kau fakataha ko ha fāmili fakatuʻapuleʻanga ʻi he hivá mo e lotú pea mo e fakahinohino mo e fakamoʻoni ʻa hotau Kau Takí.
ʻOku mau fakamālō atu kiate kimoutolu kāingalotu he meʻa kotoa pē kuo mou faí. ʻOku mau fakamālō atu ki he ngāue lahi ʻa e Kau Fitungofulu Fakaʻēliá, kau pīsopelikí mo e kau palesitenisī fakasiteikí, kau taki ʻo e ngaahi houalotú, kau palesitenisī ʻo e ngaahi temipalé mo e misioná pea mo ha niʻihi toko lahi kehe ʻoku nau foaki honau taimí, iví mo e paʻangá ke ʻunuakiʻi ʻaki e puleʻanga ʻo e ʻOtuá ʻi he māmaní.
Siʻoku ngaahi tokoua mo e tuofāfine, ʻoku ou lotua ke nofoʻia kimoutolu ʻe he ngaahi tāpuaki fungani ʻo e langí, ʻi he huafa toputapu ʻo Sīsū Kalaisí, ʻēmeni.
