Anne C. Pingree
Tokoni Ua ʻi he Kau Palesitenisī Lahi ʻo e Fineʻofá
ʻOfa ke faitāpuekina fakatāutaha kimoutolu ʻe he ʻEikí ʻi hoʻomou feinga fakafoʻituitui ke ʻiloʻi Hono finangalo maʻamoutolú pea ʻi hoʻomou fakavaivai homou lotó kiate Iá.
Ko ha tāpuaki fungani mo ha tufakanga toputapu ia ke hoko ko ha meʻangāue ʻi he toʻukupu ʻo e ʻOtuá. Neongo pe ko e fē feituʻu ʻoku tau ʻi aí, pe ko e hā hotau ngaahi tūkungá, tuʻunga ʻetau nofo malí pe taʻu motuʻá, ʻoku fie maʻu ʻe he ʻEikí ʻa e toko taha kotoa pē ʻo kitautolu, ke fakahoko hotau tufakanga makehe ʻi hono langa Hono puleʻangá ʻi he kuonga fakaʻosí ni. Ko ʻeku fakamoʻoní ia ke tau lava ʻo ʻiloʻi e finangalo ʻo e ʻEikí ke tau faí –pea ke tau aʻusia “ʻa e tāpuaki kuo foaki mai kiate kitautolú, pea kuo tau hoko ko ha ngaahi meʻangāue ʻi he toʻukupu ʻo e ʻOtuá [ke fakahoko ʻa e ngāue maʻongoʻongá ni].”1 Ko ʻeku fakaʻamú ia he pooni ke vahevahe atu ʻeku fononga fakatāutaha ke ʻiloʻi e founga ke hoko ai ko ha ngaahi meʻangāue peheé.
Te u kamata pē mei he ikuʻangá —ʻi he moʻoni fisifisimuʻa ko ia ne akoʻi mai ʻe ʻEletā Niila A. Mekisuelé: “Ko hono fakavaivaiʻi ko ia e loto ʻo ha taha, ko e meʻa fakafoʻituitui makehe ia ʻe lava ke tau hili ki he ʻōlita ʻo e ʻOtuá. Ko e ngaahi meʻa lahi kehe te tau lava ʻo ‘foakí,’ . . . ʻa e ngaahi meʻa ko ia kuó Ne ʻosi ʻomi pe foaki fakataimi maí. Neongo ia, ʻi he taimi ʻe fāifai pea tau fakavaivaiʻi ai kitautolu ki he finangalo ʻo e ʻOtuá, ko ʻetau toki foaki moʻoni ia ha meʻa Maʻana! Ko e koloa pē ia ʻoku ʻatautolu moʻoni ke foakí!”2
Siʻoku ngaahi tokoua ʻofeina, ʻoku ou fakamoʻoni, kuo pau ke fai ʻo hangē ko e lea ʻa ʻEletā Mekisuelé ʻo “fakavaivaiʻi kitautolu”3 ki he ʻEikí, ka tau lava ʻo hoko ko ha meʻangāue ʻi he toʻukupu ʻo e ʻOtuá, maʻu kakato e ngaahi tāpuaki kuo foaki kiate kitautolu ʻi he “moʻui ní,” ʻa ia ʻoku “tau fakahoko ai ʻetau ngaahi ngāué.”4
Ko e founga siviʻi ne u iku fakamoʻoniʻi ai ʻa e tefitoʻi moʻoni ko ʻení, naʻe hoko taʻeʻamanekina ia ʻi hoku taʻu 30 tupú, ʻi he maʻu hoku tāpuaki fakapēteliaké. Ne u teuteu ʻaki ʻeku ʻaukai mo lotu, mo fifili loto pē, “Ko e hā e meʻa ʻoku finangalo ʻa e ʻEikí ke u faí?” ʻI heʻeku ʻamanaki fiefia atu peá u ʻalu ki ai mo ʻeku fānau ʻe toko faá, ne ma ō leva mo hoku husepānití ki he ʻapi ʻo e pēteliake toulekeleká. Naʻá ne toutou fakamamafaʻi tā tuʻo lahi mai ʻi hoku tāpuakí ʻa e ngāue fakafaifekaú.
Meʻapango pē he naʻá ku taʻefiemālie mo puputuʻu ai. Taimi ko iá ne tātātaha pē ke u lau ʻo ʻosi e Tohi ʻa Molomoná. Naʻe ʻikai ha toe veiveiua ʻeku taʻe mateuteu ke ngāue fakafaifekaú. Ko ia ne u faʻo leva hoku tāpuaki fakapēteliaké ʻi he toloá. Ka ne u kamata foki ke ako fakamātoato e folofolá he ʻaho taki taha mo tokanga taha pē ki hono lehilehiʻi hake hoku fāmili tokolahí.
Ne fakalau atu e taʻú, pea ne ma tokanga taha mo hoku husepānití ki hono teuteuʻi ʻema fānaú ke ngāue fakafaifekaú. ʻI hono ʻoatu ko ia homa ngaahi fohá ki ha ngaahi fonua lahí, ne u tui moʻoni pē ai ko ʻeku fakahoko ia hoku fatongia fakafaifekaú.
Naʻe uiuiʻi leva hoku husepānití ke palesiteni fakamisiona ʻi ha fonua taʻemanonga ʻi he ngaahi feituʻu kei langalanga haké, ʻa ia naʻe maile ʻe 10,000 mei ʻapi pea tāumamaʻo ʻaupito mei he anga fakafonua mo e fetuʻutaki ne u ʻiloʻí. Ka ʻi he taimi ne maʻu ai hoku uiuiʻi ke hoko ko ha faifekau taimi kakató, ne u ongoʻi tatau mo ʻAlamā mo e ngaahi foha ʻo Mōsaiá—kuo uiuiʻi au ke u hoko “ko ha meʻangāue ʻi he toʻukupu ʻo e ʻOtuá ke [fakahoko ai ʻa e ngāue maʻongoʻongá ni].”5 Ne u maʻu foki mo ha meʻa naʻe ʻikai ke u fakapapauʻi ne nau maʻu—ko ha ongoʻi manavahē moʻoni!
ʻI he ngaahi ʻaho ne hoko aí, ne u toʻo hake hoku tāpuaki fakapēteliaké ʻo toutou lau ia, mo feinga ke maʻu ha mahino lahi ange ki ai. Naʻe ʻikai foki hanga ʻe he ʻilo ko ia kuó u aʻusia ha talaʻofa ne palōmesi mai ʻe ha pēteliake he ngaahi taʻu lahi ki muʻá, ʻo ʻomi kiate au ha nonga. ʻE lava nai ke u tuku ʻeku fānau ʻosi mali mo kei tāutahá pea mo ʻeku mātuʻa-ʻi he-fonó ʻoku toulekeleká? Te u ʻilo nai e ngaahi meʻa totonu ke u fai mo leaʻakí? Ko e hā te ma kai mo hoku husepānití? Te u malu nai ʻi ha fonua naʻe ngāngāʻehu fakapolitikale mo taʻepau? Ne u ongoʻi taʻefeʻunga he tapa kotoa pē.
ʻI heʻeku feinga ke maʻu ha nongá, ne u toe liunga ua ʻeku ʻalu ki he temipalé. Ne u fakalaulauloto ki he ʻuhinga ʻo e ngaahi fuakavá ʻi ha founga ne teʻeki ke u fai ki muʻa. Naʻe hoko ʻa e ngaahi fuakava ʻo e temipalé he ngaahi taimi mahuʻinga ko ʻeni ʻo e moʻuí, ko ha fakavaʻe mo ha fakalotolahi kiate aú. ʻIo, naʻá ku ilifia, ka ne u ʻiloʻi kuó u fai ha fili ke fai ha ngaahi tukupā fakatāutaha, tuʻuloa mo toputapu ʻa ia kuo pau ke u tauhi pau. Hili ko iá, ʻoku ʻikai ko ha ngāue ʻeni ia ke fai ʻe ha taha kehe. Ko hoku uiuiʻi fakafaifekaú ʻeni, pea ne u fakapapauʻi te u ngāue.
Naʻe hanga foki ʻe he tamai ʻa Siosefa Sāmitá ʻo foaki ange e ngaahi tāpuaki ko ʻení kiate ia: “Kuo ui koe ʻe he ʻEiki ko ho ʻOtuá mei he langí. Kuo uiuiʻi koe . . . ke fai e ngāue maʻongoʻonga ʻa e ʻEikí, ke fai ha ngāue ʻi he toʻu tangatá ni ʻoku ʻikai . . . toe fakahoko ʻe ha taha kehe tatau mo koe, ʻi he ngaahi meʻa kotoa pē ʻo fakatatau mo e finangalo ʻo e ʻEikí.”6 Naʻe uiuiʻi ʻa e Palōfita ko Siosefá ki hono fatongia makehe ʻi he “ngāue maʻongoʻonga ʻa e ʻEikí,” pea neongo ʻeku ongoʻi lōmekina mo taʻemateuteú, naʻá ku ʻiloʻi kuo uiuiʻi foki au ki hoku tufakanga ke fakahokó. Naʻe tokoni moʻoni e ʻilo ko ʻení mo ne fakalotolahiʻi au.
ʻI heʻeku ngaahi lotú, ne u hokohoko fehuʻi ai, “ʻE Tamai, te u lava fēfē ʻo fakahoko e meʻa kuó Ke uiuiʻi au ke faí?” ʻI ha pongipongi ʻe taha ki muʻa peá ma mavahe atu ki he malaʻe ngāue fakafaifekaú, naʻe haʻu ha toko ua ʻo ʻomi ha meʻaʻofa—-ko ha kiʻi himi ke u ʻalu mo ia. ʻI he ʻaho tatau pē, naʻe maʻu e tali ki heʻeku ngaahi lotu tāutapá mei he tohi himi ko ia. ʻI heʻeku kumi ki ha nonga ʻi ha feituʻu maomaonganoá, ne ongo mahino mai e ngaahi lea ko ʻení ki hoku ʻatamaí:
“ʻOua naʻa manavahē, ʻoku ou ʻiate koe.
He ko ho ʻOtuá au pea te u tokoniʻi koe.
Te u fakamālohia, tokoniʻi mo fokotuʻu maʻu koe,
Hoku nima angatonu mo mafimafí ke pukepuke hake koe.”7
Ko e kamataʻangá pē ʻa ʻeku ʻiloʻi fakatāutaha ko ia te u kau fakataha mo faitokonia au ʻe he ʻEikí. Naʻe kei lahi ha ngaahi meʻa ke u ʻilo fekauʻaki mo e hoko ko ha meʻangāue ʻi he toʻukupu ʻo e ʻOtua.
ʻI heʻema kamata ngāue mo hoku husepānití ʻi ha fonua foʻou mo mamaʻo mei ʻapí, ne ma hangē ko e kau paioniá ʻo tui ʻi he foʻi laka kotoa pē. Ne ma tuēnoa moʻoni he taimi lahi—ʻo feinga ke ʻiloʻi pē homa halá ʻi ha anga fakafonua ne ʻikai mahino kiate kimaua—pea mo ha ngaahi lea fakafonua ne ʻikai ke ma lava ʻo leaʻaki. Naʻe hanga ʻe he ongo ne maʻu ʻe ha taha ʻo e kau fuofua taki ʻo e Fineʻofá ʻi Nāvuú, ʻo fakamatalaʻi e ongo ne ma maʻú: “Kuó ma kamata e ngāué ni ʻi he huafa ʻo e ʻEikí. Tau laka atu ki muʻa ʻi he lototoʻa.”8
Ko e fuofua lēsoni ne u ako ke u hoko ai ko ha meʻangāue ʻi he toʻukupu ʻo e ʻOtuá, ko hono ako ʻo e folofolá, ʻaukai, lotu, ʻalu ki he temipalé pea moʻui faivelenga ʻaki e ngaahi fuakava kuó u fai he Fale ʻo e ʻEikí. Ko e lēsoni hono uá, ko e “laka atu ki muʻa ʻi he loto toʻa,” pea naʻe fie maʻu ke u falala kakato ki he ʻEikí mo fekumi faivelenga ki ha fakahā fakafoʻituitui. Ke maʻu e fakahā ko iá, naʻe pau ke u moʻui taau ai ke maʻu maʻu pē e takaua ʻa e Laumālie Māʻoniʻoní.
Ko ʻeku lēsoni fakaʻosí, ʻa ē tofu pē naʻe fakamatalaʻi mai ʻe ʻEletā Mekisuelé. Ne u fakavaivai ki he finangalo ʻo e ʻEikí ʻi he meʻa kotoa pē, he naʻá ku fuʻu fiemaʻu ʻEne tokoní, ʻEne tatakí mo ʻEne maluʻí. ʻI heʻeku fai iá, naʻe liliu māmālie hoku vā mo e Tamai Hēvaní—ʻi ha ngaahi founga mahuʻinga—ʻa ia kuó ne hokohoko faitāpuekina ai au mo hoku fāmilí.
ʻOku kehekehe pē ʻeku fononga he moʻuí meiate kimoutolu. ʻE lava ke mou taki taha akoʻi au mei he ngaahi meʻa kuo mou aʻusia ʻi hono fakavaivaiʻi homou lotó ki he finangalo ʻo e ʻEikí, ʻi hoʻomou fekumi faivelenga ke ʻiloʻi Hono finangalo maʻamoutolú. ʻE lava ke tau fiefia fakataha ʻi he ongoongolelei ʻo Sīsū Kalaisi kuo toe fakafoki maí, mo fakahaaʻi loto houngaʻia ʻa e ngaahi tāpuaki ʻoku maʻu mei heʻetau fakamoʻoniʻi ʻa e Fakamoʻuí mo ʻEne Fakalelei maʻatautolú. ʻOku ou ʻiloʻi . . . ʻoku ʻikai faingofua ʻetau ngaahi feinga fakatāutaha ke hoko ko ha “meʻangāue ʻi he toʻukupu ʻo e ʻOtuá” pea kuo tau tupulaki fakalaumālie ai—ʻo fakatupulaki ai ʻetau ngaahi fononga fakamatelié ʻi ha ngaahi founga fakatāutaha mo nāunauʻia.
Siʻi ngaahi tokoua, ʻofa ke faitāpuekina fakatāutaha kimoutolu ʻe he ʻEikí ʻi hoʻomou feinga fakafoʻituitui ke ʻiloʻi Hono finangalo maʻamoutolú pea ʻi hoʻomou fakavaivai homou lotó kiate Iá. ʻOku ou fakamoʻoni ko hotau loto fakatāutahá ko e “koloa pē ia ʻe taha ʻoku ʻatautolu moʻoni ke foakí.”9 ʻI he huafa ʻo Sīsū Kalaisí, ʻēmeni.
Maʻuʻanga Fakamatalá
1. ʻAlamā 26:3
2. ʻI he Conference Report, Sept–Oct, 1995, 30; pe Liahona, Nōvema 1995, 24; toe fakamamafaʻi.
3. ʻAlamā 34:32.
4. Liahona, Nōvema 1995, p. 24.
5. ʻAlamā 26:3.
6. ʻI he Gracia N. Jones, Emmaʻs Glory and Sacrifice: A Testimony (1987), 43–44.
7. “ʻE Kāinga Kuo Langa ha Tuʻungá,” Ngaahi Himí, fika 37.
8. Relief Society Minutes, March 30, 1842, Archives of The Church of Jesus Christ of Latter-day Saints, 24.
9. Ensign, November 1995, p. 24; toki fakamamafaʻi.
Previous
