Pipiimau Pea Ann M. Dibb Fesoasoani Lua i le Au Peresitene Aoao a Tamaitai Talavou E lei tuulafoaiina i tatou e le Tama Faalelagi i o tatou olaga faataitai. Ua uma ona Ia aumai ia i tatou “meafaigaluega uma mo le saogalemu” tatou te manaomia e toe foi atu ai ma le manuia ia te Ia. Na tosina atu lau vaai i se tusiga e tasi-le-inisi le tele i la matou nusipepa i le lotoifale i ni nai tausaga ua mavae, ma ou te manatuaina pea talu mai lena taimi: “E toafa tagata na maliliu ae toafitu le aufaigaluega na faasaoina mai ina ua mavae le silia ma se itula o pipiimau i le itu i lalo o le auala laupapa e 125-futu-le maualuga i St. Catharines, Ontario, [Kanata,] ina ua solofa i lalo le fatāmanu sa latou galulue ai . . . ” (“News Capsules,” Deseret News, 9 Iuni, 1993, A2). E tumau pea lo’u maofa i lenei tala puupuu. E lei leva ona maea le faitauina o lenei tala, ae ou valaau loa i se uo a lo matou aiga na nonofo i St. Catharines. Fai mai a ia, sa vali e le aufaigaluega le alalaupapa o le Garden City Skyway mo le tausaga, ma toe lua vaiaso mae’a le galuega ae tupu loa le faalavelave. Ina ua mavae le faalavelave, na fesiligia le au mautofi pe aisea na leai ai ni meafaigaluega mo le saogalemu o nei alii. Na faigofie le tali: na tofu i latou ma meafaigaluega mo le saogalemu; ae na latou filifili lava e le faaaogaina. Ina ua solofa i lalo le fatāmanu, sa pipiimau i latou na faasaoina i se pou uamea e tasi-le-inisi (2.5 senitimita) ma tutu i se fata uamea e valu-inisi (20 senitimita) mo le silia i le itula seia taunuu atu le au laveai. Sa faamatala e se tasi na sao mai, a o pipii ai pea o ia i le alalaupapa, sa mafaufau tele o ia i lona aiga. Sa fai mai o ia, “Ou te faafetai lava i le Alii mo lo’u i ai iinei i lenei aso . . . Ou te tau atu ia te outou, sa matuai taufaafefe lava” (i le Rick Bogacz, “Skyway Horror,” Standard, 9 Iuni, 1993). E tele ni lesona e ao ona aoaoina ma ni faatusatusaga e ao ona faia mai i lenei mea na tupu. E ui o le toatele o i tatou o le a le feagai lava ma sea tulaga matautia, ae toatele i tatou e manatu o loo tatou feagai ma taimi taufaafefe i o tatou olaga taitoatasi. Atonu tatou te lagonaina e faapei o loo tatou pipii i se mea e foliga mai o se pou u’amea e tasi le inisi le mafiafia. E le faigofie lo tatou olaga faataitai, ma e le puupuu foi. Ua faamanuiaina i tatou e o mai i lenei lalolagi ma maua ai se tino faitino. O le olaga lenei, o lo tatou avanoa lea e faamaonia atu ai i tatou lava ma faaaoga lo tatou faitalia (tagai Aperaamo 3:25). E mafai ona tatou filifili e mulimuli i le ata o le faaolataga e faavavau a le Tama Faalelagi (tagai Iaroma 1:2; Alema 42:5; Mose 6:62) ma le togiola (tagai Iakopo 6:8; Alema 12:25; 42:11), e mafai foi ona tatou taumafai e saili lo tatou lava ala. E mafai ona tatou usiusitai ma tausi Ana poloaiga, e mafai foi ona tatou teena ma fetaiai ma taunuuga o le a mulimuli mai. Ona o lena mea, ua i ai foi sa tatou galuega ma tiute. E tatau ona tatou taulimaina luitau. Tatou te ono oo i le tuuatoatasi, mafutaga ua amata ona vaivai, lē talitonuina o le faatuatuaga, faaosoosoga, o mea e fai ma vaisu, lē atoatoa o o tatou tino faaletino, o le leai o se galuega e matuai manaomia. E ono mafai ona luitauina i tatou i lagona o le faanoanoa ona o o tatou faamoemoega ma miti amiotonu ua le mafai ona faataunuuina i o tatou lava taimi atofaina. Tatou te ono fesiligia o tatou tomai ma fefefe i le ono tulai mai o le toilalo, e oo lava i o tatou valaauga i totonu o le Ekalesia ma aiga. O luitau ma mea matautia o loo tatou ola ai nei, e aofia ai le taliaina e le lalolagi o le agasala, na valoia e perofeta anamua ma perofeta soifua. E tutusa lava le matautia ma le moni i le taufaamatau o le pau ifo mai se alalaupapa e 125 futu (38 mita) ma oti ai. O lo’u olaga e le atoatoa. Ou te feagai foi ma le tele o na lava luitau. O i tatou uma lava. Ou te iloa o loo i ai pea faaosoosoga a le tiapolo ma faigata o le olaga e faaluafesasi ai i tatou taitoatasi. Ou te faaluaina le lagona faaalia o le tagata faigaluega lea na faasaoina e uiga i ona aafiaga matautia i le pipiimau pea lea i lena pou uamea: “Ou te fai atu ia te outou, e matua taufaafefe lava.” Peitai e taua le matauina, o tusitusiga paia e itiiti lava ni nai tala o tagata taitoatasi o e na soifua i le fiafia atoatoa ma leai ni mea faafeagai na latou feagai. Tatou te aoao ma tuputupu ae e ala i le foiaina o luitau i le faatuatua, filiga, ma le amiotonu patino. Ua faamalosia lava au i le talitonuga e le iu o Peresitene Thomas S. Monson i lo tatou Tama Faalelagi ma i tatou. Fai mai a ia: “Manatua o loo e agavaa mo faamanuiaga a lo tatou Tama [Faalelagi] i lenei galuega. Na te lei valaauina outou i o outou tulaga faamanuiaina tou te savavali taitoatasi ai, e aunoa ma se taiala, ae faamoemoe i le maua o se laki. I se tulaga e ese mai ai, Na te silafia o outou tomai, Na te silafia foi lo outou tuuto, ma o le a Ia suia o outou vaivaiga e avea ma malosiaga aloaia. Na Ia folafola mai: ‘O le a ou muamua atu i o outou luma. O le a ou i ai i lo outou itu taumatau ma lo outou itu tauagavale, ma o le a i ai lo’u Agaga i o outou loto, ma o le a siomia foi outou e a’u agelu, e sapasapaia outou’” (“Sugar Beets and the Worth of a Soul,” Liahona, Iul. 2009, 3–4). E lei tuulafoaiina i tatou e le Tama Faalelagi i o tatou olaga faataitai. Ua uma ona Ia tuuina mai ia i tatou meafaigaluega uma mo le saogalemu tatou te manaomia e toe foi atu ai ma le manuia ia te Ia. Ua Ia tuuina mai ia i tatou ia tatalo a le tagata lava ia, o tusitusiga paia, perofeta soifua, ma le Agaga Paia e taialaina i tatou. I nisi o taimi, o le faaaogaina o nei meafaigaluega e foliga o se avega mamafa, e le lagolelei, ma matuai le toe faaaogaina lava. O lona faaaogaina tatau e manaomia ai lo tatou filiga, usiusitai, ma le maelega. Peitai o au le isi tagata ua ou filifili e faaaogaina. E tatau ia i tatou uma ona filifili e faaaogaina. I tusitusiga paia, ua tatou aoao ai i se tasi o vaega autu o meafaigaluega mo le saogalemu—o le “ai uamea.” Ua valaaulia soo o lo tatou Faaola, o Iesu Keriso e pipiimau pea i lenei ai uamea ina ia maua ai ma le saogalemu o latou auala i le ola e faavavau. O loo ou talanoa atu i le miti a Liae i le laau o le ola o loo maua i le Tusi a Mamona. E ala i faaaliga patino faalelagi, na faaali atu ai i perofeta o le Tusi a Mamona o Liae, ma lona atalii o Nifae, se faaaliga i le tulaga o lo tatou olaga faataitai ma ona tulaga matautia e i ai faatasi. Fai mai Liae, “Ma ua oo ina alu ae le puao o le pogisa, ioe, o le puao tele lava o le pogisa, ua iu ina le iloa ai o latou ala e i latou na amata i le ala, ma ua feseseai i latou, ma ua le toe iloa” (1 Nifae 8:23). Ae peitai “ua na iloa atu [foi] nisi motu o tagata ua fetaomi mai i luma; ua latou o mai ma ua fetagofi i le pito o le ai uamea, ma ua latou fetaomi mai i luma i le ala, o piimau pea i lena ai uamea, ua oo ina taunuu mai ma faapauu, ma ua latou aai i le fua o le laau” o lona uiga o le laau o le ola (1 Nifae 8:30). Mai le miti a Liae, ua tatou aoaoina ai e tatau ona tatou pipiimau pea i lenei pa saogalemu, o lenei ai uamea, o loo maua i autafa o o tatou lava ala sao ma le vaapiapi, ma pipiimau pea seia tatou taunuu i la tatou sini faaiu o le ola e faavavau ma lo tatou Tama Faalelagi. Na folafola mai e Nifae e faapea, o i latou e taofi mau i le ai u’amea, “e le fano i latou e faavavau; e le mafai foi e tofotofoga ma u fanafana mu a lē ita mai ona manumalo ia te i latou e oo i le tauaso e taitaiese ai i latou i le malaia” (1 Nifae 15:24). Ou te valaaulia outou e toe faitau le tala atoa o lenei faaaliga musuia. Suesue i ai, mafaufau loloto i ai, ma ia faaaoga i o outou lava olaga i aso uma. I se faaupuga faaneionapo, e mafai ona tatou faapea ifo ua valaaulia i tatou ina ia “maua se piitaga.” E tatau ona tatou pipiimau pea i le ai uamea ma aua lava nei faamaamulu. A o ou talavou, sa aoao mai e le perofeta o Peresitene Harold B. Lee, “Afai e i ai lava se isi mea e manaomia i le taimi lenei o le faanunununu ma le lē fiafia lea ua saili atu ai ma le naunautai alii ma tamaitai ma le autalavou mo ni tali i faafitauli o loo mafatia ai tagata, o se ‘ai u’amea’ e avea ma taiala saogalemu i le ala sa’o i le ola faavavau, i le lotolotoi o ala matautia ma le taufaasese e i’u atu ai i le faatafunaga ma le faatama’iga o mea uma e ‘mama, matagofie, po o le tauleleia’” (“The Iron Rod,” Ensign, Iuni 1971, 7). Sa talafeagai lenei saunoaga a o ou talavou, ma atonu foi ua tele atu ona talafeagai i ona po nei. O upu a perofeta e lapatai ai, aoao, ma faamalosiauina le upumoni, pe na tulei i ai i le 60 TLM, 1971, po o le 2009. Ou te fautuaina outou ina ia faafofoga i ai, talitonu i ai, ma faatino upu musuia a i latou ua tatou lagolagoina o ni perofeta, tagatavaai, ma talifaaaliga. O le pipiimau i le ai uamea e le o taimi uma e faigofie ai. Atonu tatou te faamamulu ona o uunaiga a le tupulaga po o le faamaualuga, o le mafaufau faapea e mafai ona tatou maua lo tatou lava auala e toe foi atu ai—mulimuli ane. A tatou faia, ua tatou tuua a tatou meafaigaluega mo le saogalemu. I le miti a Liae, na ia vaaia le toatele na faamaamulu ese mai le ai uamea. Fai mai Nifae: “Na ia le iloa nisi e toatele ina o feoai i ala ese” (1 Nifae 8:32). I taimi faigata o o tatou lava olaga, tatou te ono iloa ai ua tatou “feoai i ala ese.” Ou te fia faamautinoa atu ia te outou e mafai lava i taimi uma ona tatou toe maua lo tatou auala e toe foi atu ai. E ala i le salamo, lea na mafai ona o le taulaga Togiola a lo tatou Faaola o Iesu Keriso, ua mafai ai ona tatou toe maua ma toe tautino ai e pipiimau malosi i le ai uamea ma lagona le taitaiga alofa a lo tatou Tama Faalelagi. Ua tuuina mai e le Faaola se valaaulia tumau ia i tatou: salamo, pipiimau pea, ma aua le faamaamulu. E pei o Nifae, ou te apoapoai atu ma le maelega uma o lo’u agaga ia outou “usiusitai i le afioga a le Atua, ma manatua e tausi pea i ana poloaiga i mea uma” (1 Nifae 15:25). Faaaoga meafaigaluega mo le saogalemu na Ia tuuina atu ia te outou. Pipiimau ma talitonu o le a faamanuia outou e le Tama Faalelagi mo lo outou maelega. Ou te iloa e moni le talalelei toefuataiina, ma ou te iloa ua taitaiina i tatou e se perofeta soifua a le Atua o Peresitene Thomas S. Monson. O se avanoa ma se faamanuiaga maoae mo au le avea ai ma ona afafine. Ou te alofa tele i o’u matua. I se tasi o afiafi sa ou lagona ai si lotovaivai ma na ou faapea atu ai, “Oi, Tama, o faamanuiaga ua tatou oo i ai i le avea ai ma tagata o le Ekalesia ma faamanuiaga folafolaina mai o le malumalu e matuai lelei lava, pe ana faapea la o le a tatou aapa atu i ai ma filifili e talia. Na tali mai o Ia e aunoa ma se faatuai, “Ann, o mea uma lava na.” Talosia ia tatou pipiimau pea i upumoni faavavau o le talalelei a Iesu Keriso aua e moni lava o mea uma na, o lau tatalo faamaoni lea i le suafa o Iesu Keriso, amene.