To tatou huru mau

Elder Jeffrey R. Holland
No te Pŭpŭ no te Tino Ahuru Ma Piti Aposetolo

Te autahu‘araa o te Atua... e mea titauhia ïa no te tí’araa mau o te Ekalesia a te Atua, tei ia’na ana‘e ra ho‘i te reira.

Elder Jeffrey R. Holland Ua ui te peresideni David O. McKay a 70 matahiti i ma‘iri a‘e nei, e tauturu noa â ïa oia i roto i te Peresideni Matamua no te Ekalesia, i teie uiraa i te naho‘a i putuputu mai no te amuiraa rahi: « Ahiri e uihia [outou] tata‘itahi i teie iho taime ia parau i roto i te hoê noa iho pereoda... te huru mau o te Ekalesia a Iesu Mesia i te Feia Mo‘a i te Mau Mahana Hopea Nei, eaha ïa o ta outou pahonoraa ? »

Ua parau oia, « Ta‘u pahonoraa, teie ïa... te mana mo‘a na roto i te heheuraa afaro. »¹

Taua mana mo‘a ra, o te autahu‘araa mo‘a ïa.

Ua parau mai te peresideni Gordon B. Hinckley i to’ na iteraa papû a parau ai oia e, « [Te autahu‘araa] o te mana mo‘a ïa i horo‘ahia mai, e mea taa ê te reira mana i te mau mana atoa i ni‘a i te fenua nei... O te mana hoê roa i te fenua nei o te ore roa e mou i raro atu i te pohe... Ahiri aita teie mana, e piihia ïa te ekalesia i te hoê atu i‘oa, [te hoê ekalesia] aita e mana no te faatereraa i te mau ohipa a te Atua. »²

A maha hebedoma i ma‘iri a‘e nei, ua parau te peresideni James E. Faust i te mau piahi o te fare haapiiraa tuatoru no BYU i roto i ta ratou pureraa, « Na te [autahu‘araa] e haamata e e faatere i te mau ohiparaa atoa o te Ekalesia. Ia ore te mau taviri o te autahu‘araa, aita ïa e ekalesia. »³

E haamata vau i teie pô na roto i teie nau faahitiraa e toru (i roto e rave rahi atu â o te nehenehe e parau) no te haapapû maitai i te hoê parau faufaa: oia ïa e, te autahu‘araa a te Atua, to’na mau taviri, ta’na mau oro‘a, e to’na tumu mau e ta’na ohipa no te haamau i te ra‘i i te mea o tei haamauhia i te fenua nei, e mea titauhia te reira no te Ekalesia mau a te Atua, inaha ho‘i, tei ia’na ana‘e ra te reira, e mai te mea aita te reira, aita ïa e Ekalesia a Iesu Mesia i te Feia Mo‘a i te Mau Mahana Hopea Nei.

Noa’tu eaha ta tatou mau tao‘a, mai te mea aita e autahu‘araa mo‘a e te mau oro‘a e faati‘ahia e ta’na mau taviri, e «faufaa ore-roa ïa » te fenua nei, te mau tumu no te oraraa tahuti, e te mau ohipa taato‘a a teie Ekalesia, ia au i ta te mau papa‘iraa mo‘a i parau, ei tu‘atiraa i te opuaraa rahi mure ore a te Metua.⁴

I teie matahiti faahanahanaraa no te 200raa o te mahana fanauraa o te peropheta Iosepha Semita e te 175raa o te faanahonahoraa o te Ekalesia, te hinaaro nei au i te faaite i to‘u iteraa papû e to‘u aau mehara no te reira: oia ho‘i te faaho‘i-faahou-raa mai o te autahu‘araa mo‘a, teie mana hanahana, teie tao‘a mana-hau-a‘e, e te ohipa rahi o ta’na e rave i roto i to tatou oraraa e i na pae e piti o te paruru.

Te ohipa faufaa a teie autahu‘araa i roto i te faatu‘atiraa o te mau tau e o te tau e a muri atu, ua ravehia ïa e te Faaora ma te papû a faanaho ai Oia i Ta’na Ekalesia i roto i te tahuti nei. Ua parau Oia i Ta’na Aposetolo paari a‘e o Petero e, « E e horo‘a’tu ho‘i au i te mau taviri o te basileia o te ao ra ia oe: e ta oe e haamau i raro nei, e haamau-atoa-hia ïa i te ao. »⁴ E ono mahana i muri mai, haere atura Oia e o Petero, Iakobo e o Ioane i ni‘a i te mou‘a i reira Oia i faahuru-e-hia’i i mua ia ratou. I reira te mau peropheta o te mau tau tuuraa evanelia i mutaa ihora, oia ho‘i o Mose e o Eliaha,⁵ i te fâraa mai ma te hanahana e i horo‘a mai ai i te mau taviri rau e te mau mana o tei vai ia ratou ra.

Tera râ, ua taparahi-pohe-vitiviti-roa-hia taua mau Aposetolo ra e aore râ, ua iriti-ê-hia mai ni‘a’tu i te fenua nei e te mau taviri o te autahu‘araa’toa, e te autahu‘araa atoa no na matahiti 1.400 ei hopearaa no te reira e aita faahou te mana o te Atua i rotopu i te tamarii a te taata nei. Area râ, taa-ê noa’tu i te semeio o teie tau apî e te aamu faahiahia, te faahanahana nei tatou i teie pô i te ho‘iraa mai o te mau ve‘a o taua mau tau râ i to tatou nei anotau e te faaho‘i-faahou-raa mai o te mau mana o ta ratou i mau na no te haamaitairaa o te mau taata atoa.

I te ava‘e me 1829, a iriti ai Iosepha Semita i te Buka a Moromona, ua ite oia i te parau no te bapetizoraa. Ua paraparau oia i to’na papa‘i parau ia Olive Kaudere, e ua taparu ‘u‘ana raua i te Fatu no teie nei ohipa. Teie ta Olive i papa‘i: « Ua rotahi to maua varua i roto i te pure, ia ite maua e, nahea maua ia farii i te mau haamaitairaa no te bapetizoraa e no te Varua Maitai... Ua imi ‘oi‘oi maua i... te mana o te autahu‘araa, e te mana no te faatere i taua autahu‘araa ra. »⁶

Ei pahonoraa i taua « pure mana ra », ua fâ mai Ioane Bapetizo, ma te faaho‘i mai i te mau taviri e te mau mana o te Autahu‘araa a Aarona tei horo‘ahia i to tatou feia apî tamaroa i roto i teie amuiraa i teie pô. Tau rii hebedoma i muri mai, ua ho‘i mai Petero, Iakobo e Ioane no te faahomai i te mau taviri e te mau mana o te Autahu‘araa a Melehizedeka, oia’toa te mau taviri o te faatereraa aposetolo. Ua patuhia te hoê hiero ia nehenehe te tahi mau ve‘a o te ra‘i ia haere mai, i reira, ua tupu i te 3 no Eperera, 1836, te hoê ohipa mai tei tupu na i ni‘a i te Mou‘a no te Faahuru-ê-raa, te hoê ohipa mai ta te peresideni Hinckley i faaau i te « Niniiraa o Kirtland » no te heheuraa, i reira te Faaora Iho, o Mose, o Eliaha, e o Elia i fâ mai ai ma te hanahana i te peropheta Iosepha Semita e Olive Kaudere ma te faaho‘i mai i te mau taviri e te mau mana o to ratou mau tau tuuraa evanelia i ni‘a i teie nei mau tane. Ua opani teie nei fâraa na roto i teie tuuraa parau mana-rahi: « No reira, ua tuuhia’tu te mau taviri no teie tau tuuraa i roto i to orua na rima. »⁷

E ere i te mea maere i to te peropheta Iosepha tuuraa i roto i te mau hiro‘a o to [tatou] faaroo e, « Te ti‘aturi nei matou e, [hou] te taata e a‘o ai i te evanelia e hou oia e faatere ai i te mau oro‘a no te reira, e mea ti‘a ia’na ia ma‘itihia e te Atua na roto i te tohu e te tuuraa rima o te feia i haamanahia. »⁸ Oia mau, e rahi atu â te titauraa a te faatereraa na roto i te mana mo‘a i te hoê noa faaauraa a te taata. Eita teie mana mo‘a e faatupuhia e te mau haapiiraa a te mau ekalesia e aore râ, a te hoê tomite o te hoê amuiraa. Aita roa, i roto i te ohipa tei haamanahia e te Atua, e mea ti‘a ia roaa te mana rahi a‘e i to te mau taata i roto i te mau amuiraa e aore râ, i ni‘a i te mau puromu e aore râ, i roto i te mau haapiipiiraa evanelia – o ta te tahi feia imi parau-ti‘a i ite e i faaite a‘e na e o tei faatupu atoa i te faaho‘i-faahou-raa mai.

Oia mau, te vai ra te tahi mau taata i taua tau ra, aita ratou i hinaaro ia parau to ratou mau orometua e, ua farii ratou i te mana, tera râ, te rahiraa o te taata, te imi ra ratou i te mana autahu‘araa horo‘ahia mai e te Atua, e no reira, ua pe‘ape‘a ratou ia feruri e, i hea e iteahia ai ia ratou te reira.⁹ No reira, i roto i taua huru varua ra, ua riro ïa te faaho‘iraa mai o te mana autahu‘araa na roto ia Iosepha Semita, ei tamărûraa i te pe‘ape‘a roa i roto i te mau taata tei feruri atoa i te mana‘o ta Charles Wesley i parau ma te taiâ ore.

E mea ohie roa te faatoro‘araa o te mau episekopo
Na roto noa i te mana‘o o te tane e aore râ, o te vahine:
Ua faatoro‘a o Wesley ia Coke,
Nava‘i râ i faatoro‘a ia Wesley ?¹⁰

No te pahono i teie uiraa fifi roa, tatou i roto i te Ekalesia a Iesu Mesia i faaho‘ihia mai, e nehenehe ta tatou e faatoro i te reni mana autahu‘araa e mauhia ra e te hoê diakono apî roa i roto i te paroita, te episekopo e peresideni nei i ni‘a ia’na, e te peropheta o te peresideni nei i ni‘a ia tatou paatoa. E haere teie reni i ni‘a roa mai te hoê fifi mutu ore e tae roa’tu i te mau melahi ra tei tonohia mai e te Tamaiti a te Atua, Oia iho atoa o te mau nei i teie horo‘a faito ore no te ra‘i mai.

E te hinaaro mau nei tatou i to te reira mau haamaitairaa – ei Ekalesia, ei taata e ei utuafare i roto i te Ekalesia nei. Teie te hoê faahoho‘araa:

Ua paraparau iho nei au i te aamu o te Ekalesia i te anotau o Kirtland. I te matahiti 1836 et 1837, ua faaruru teie Ekalesia apî tei faati‘ahia i te fifi rahi – no te pae faufaa moni, no te pae politita e te mau tafifiraa i rotopu i te mau melo iho. I roto i teie nei arepurepuraa, ua faauruhia Iosepha Semita ia tono i te tahi mau tane itoito (i te taato‘araa no te Pŭpŭ Tino Ahuru Ma Piti Aposetolo) e poro-haere. E opuaraa taia ore, e taahiraa faauruhia, o tei paruru i te Ekalesia i te mau fifi rahi o taua anotau ra area râ, i te haamataraa, ua riro ïa ei hopoi‘a rahi no te Feia Mo‘a – mauiui no te feia o tei haere e poro e ei mea mauiui-roa’tu no te feia o tei faaea mai i te fare.

Teie te faahitiraa a Elder Robert B. Thompson:

« Ua tae mai te mahana revaraa no te mau peresibutero i Peretane, ua [tapae] atu vau i te fare o te taea‘e [Heber C.] Kimball no te haapapû i te mahana e [haamata‘i oia i to’na tere], no te mea, ua mana‘o vau e, e haere atu vau na muri iho ia’na no te roaraa e piti e aore râ e toru hanere maile, e tapae roa’tu ai i te fenua Canada no ta‘u ohipa i taua tau ra.

« No te mea e te hamama-rii ra te opani, ua tomo atu vau, e ua horiri to‘u tino i te mea o ta‘u e ite ra. Ma te mana‘o e e riro vau ei taata ooni, e mea ti‘a ïa ia‘u ia haere i rapae area râ, aita i nehenehe ia‘u ia ha‘uti. Te faaroo nei au i teie metua tane i te pûpûraa i to’na varua i... [te Atua, ma te taparû], Ia’na ‘tei aupuru i te manu, e tei faaamu i te oreba fanau‘a ia ta‘i ratou, ia haamana‘o e ia faaamu i ta’na mau tamarii e ia haapa‘o i te mau hinaaro o ta’na vahine ia haere ê atu oia. I reira, ua tuu oia i to’na na pu‘e rima i ni‘a i to ratou mau upoo na roto i te mana o tei tuuhia ia’na i roto i to’na piiraa mai te mau paterealeha ra, e ua horo‘a i te mau haamaitairaa a te hoê metua tane i ni‘a ia ratou... ma te titau i te utuuturaa e te parururaa a te Atua, a haere ai oia e poro i te evanelia i te hoê fenua ĕê. A [horo‘a ai oia i teie mau haamatairaa] e au to’na toparaa reo e ua mo‘e i roto i te oto no te feia e haaati ra [ia’na] o te [tamata nei i te haapuai ia ratou iho mai ta te mau tamarii, e ma te fifi atoa ho‘i]... Ua faaitoito faahou oia area râ, ua oto roa to’na aau no te faanuu atu â... Ua faaea rii oia, e... ua manii te roimata i ni‘a i to’na papari‘a, ei faaiteraa i te mau mana‘o o to’na aau. Ua parau te taea‘e Thompson e, e ere to‘u aau i te mea puai no te haavi ia‘u iho. Ua ta‘i atoa râ vau, e ua amui atu i to‘u mau roimata i to ratou. I te reira taime ua mauruuru vau i to‘u iteraa i teie ohipa i tupu. »¹¹

Ua tupu tamau noa teie huru ohipa e rave rahi taime, tauasini taime i roto i te Ekalesia a Iesu Mesia i te Feia Mo‘a i te Mau Mahana Hopea Nei – te hoê feaaraa, te hoê titauraa, te hoê piiraa, te hoê ati, te hoê ma‘i, te hoê peperaa, te hoê pohe. Ua ite atoa vau i teie mau mea i roto i taua mau taime ra. Ua ite au i te mana o te Atua i roto i to‘u utuafare e i roto i to‘u mau piiraa. Ua ite na vau i te diabolo i te haavî-raa-hia e i te mau mea rii tumu i te haamamu-raa-hia. Ua ite au i te auraa no te haavîraa i te mau fifi rarahi e i te mau faataupupuraa. Ua ite au i te auraa no te melahi o te pohe i te « fariu-ê-raa. »¹² Te fariiraa i te mana e i te faaohiparaa i te mana o « te Autahu‘araa Mo‘a, ia au i te Haapa‘oraa a te Tamaiti a te Atua »,¹³ o te hoê ïa haamaitairaa rahi roa no‘u e no to‘u utuafare i roto i teie nei ao. O te auraa ïa o te autahu‘araa ia tatara ana‘ehia i roto i te mau parau e i te mau iteraa.

Na roto i te aau mehara no teie mau haaamaitairaa, te apiti nei au ia outou e i te hoê pŭpŭ himene no te feia ora e no tei pohe i te himeneraa i roto i teie matahiti faahanahanaraa, « Auê te taata i Parau ia Iehova ! »¹⁴ – e o tei parau ia Adamu, Gabiriela, Mose e Moroni, Eliaha, Elia, Petero, Iakobo e Ioane, Ioane Bapetizo e rave rahi atu â.¹⁵ Oia mau « ua faatahinu-mau iho â Iesu i taua peropheta e taua Hi‘o ra. »¹⁶ Ia faaherehere maitai tatou, te feia apî e te feia paari, te mau tamaroa e te mau tane, te mau metua tane e te mau tamaiti i te autahu‘araa tei faaho‘ihia mai na roto ia Iosepha Semita, e na roto atoa i taua taata ra i faaho‘ihia mai ai te mau taviri o te autahu‘araa e te mau oro‘a, te mana no te huru atua e faaitehia mai ai e mai te mea aita râ, eita ïa e faaitehia mai.¹⁷ Te faaite papû nei au no ni‘a i te faaho‘i-faahou-raa mai te autahu‘araa, e « te huru mau » o te Ekalesia a te Atua o tei vai tamau na, na roto i te i‘oa o te Taata no’na teie autahu‘araa, oia te Fatu o Iesu Mesia ra, amene.

Te mau nota

1. I roto i te Conference Report, eperera 1937, 121.

2. « Priesthood Restoration », Ensign, atopa 1988, 71.

3. « Where Is the Church ? » devotional address, Brigham Young University, 1 no mati 2005, 8.

4. Mataio 16:19.

5. A hi‘o Mataio 17:1-3.

6. Faahitihia i roto Richard Lloyd Anderson, « The Second Witness of Priesthood Restoration », Improvement Era, septepa 1968, 20; haapapûraa i tuuhia’tu.

7. PH&PF 110:16; hi‘o atoa irava 1-15.

8. Hiro‘a Faaroo 1:5; haapapûraa apitihia’tu.

9. A hi‘o David F. Holland, « Priest, Pastor, Power », Insight, tau haapoheraa 1997, 15-22 no te hi’opo’a maitai i te mau parau no ni’a i te autahu’araa e vai i Amerika i te tau no te faaho’i-faahou-raa mai.

10. Faahitihia i roto i C. Beaufort Moss, The Divisions of Christendom: A Retrospect (n.d)., 22.

11. Faahitihia i roto i Orson F. Whitney, Life of Heber C. Kimball (1945), 108-9.

12. PH&PF 89:21.

13. A hi‘o PH&PF 107:1-3.

14. Te mau Himene, no. 16.

15. Ua paraparau o Iosepha Semita i te mau peropheta e te mau ve‘a e rave rahi no tera pae mai i te paruru. No tahi pae o ratou tei faaitehia i roto i te papa‘iraa mo‘a, a hi‘o PH&PF 128:20-21.

16. Te mau Himene, no. 16.

17. A hi‘o PH&PF 84:19-21.