O Le Faamaoni A’ia’i i le Olaga Atoa Elder Dallin H. Oaks O Le Korama a Aposetolo e Toasefululua Faeasaite a le OAE mo Talavou Matutua 1 Me, 2005 Oakland, Kalefonia O’u uso e ma tuafafine, ou te matuai faafetai lava i le aufaipese mo lena musika musuia ma le faagaeetia, ma e ou te faafetai foi ia Peresitene Steven Edgren mo lena folasaga. Ua ou fiafia lava ou te i ai iinei i Oakland. Mo outou o loo i ai iinei, ma i latou foi o loo i ai i isi nofoaga, ou te faafetai atu i lo outou mafuta mai. Ua ou fiafia e tautala atu i lenei aofia o tupulaga talavou matutua mai le 18 i le 30 tausaga. O le ma tama teine laitiiti o loo i ai i le vaitausaga lea. E faapena foi le toa 15 o fanau e 28 a le ma fanau. O le mea lea, e i ai lo’u fiafia faapitoa i le ta’i 18 e oo i le 30 tausaga le matutua. Ola i le Talalelei i lea Aso ma lea Aso O lo’u lauga atu ia te outou, o le lauga foi lea i le lumanai. O outou o taitai i le lumanai o pisinisi; o aoga; o faasaienisi; o aai, setete, ma malo; faapena foi le Ekalesia. Ae sili atu ona taua, o outou o taitai i le lumanai o aiga o le Ekalesia. I a’u sauniuniga mo lenei afiafi, sa ou suesue ai i se saunoaga na tuuina atu i se faeasaite talu ai nei a le OAE mo talavou matutua. O le aso sa faia ai o le Aso Sa, 6 o Fepuari, ma sa faia i le Marriott Center i le BYU. O le failauga o Elder Russell M. Nelson o le Korama a le Toasefululua. Mo a’u lava ia, o le suesueina o lenei saunoaga sa le gata ina faagaeetia ae sa faamomoiloto foi. O le a outou manatua ai sa talosagaina outou e Elder Nelson “ina ia e mafaufau ia te oe lava, e le o lou tagata o e i ai nei, ae o le tagata e te ono tulai mai ai—i le 50 tausaga mai le taimi nei.” Sa fesili o ia, “O le a le ituaiga tagata tou te mananao ia avea ai, i le 50 tausaga mai le taimi nei?” Ona ia tuuina mai lea o se savali maoae i le “Faatuatua ma Aiga.” Sa ia faamatalaina lona soifuaga faapea ma lana soa pele, o Dantzel. Sa ia faamatala a la’ua tauiviga uumi ina ia aooga. Sa ia ta’ua filifiliga sa la’ua faia ina ua faaipoipo, i le sailia muamua o le malo o le Atua. O le faatuatua, sa ia ta’ua, sa avea ma “taiala o lo [la’ua] soifua faaipoipo.” Sa ia toe ta’ua lona lei auina atu o ni pili mo lana tautua i le faiga o taotoga, sei vagana ai ina ua mae’a lana aoga faafomai i le silia ma le 12 tausaga. O le taimi lena ua toalima le la fanau. Manatu i le faatuatua sa la faaalia ma taulaga sa la osia ina ia agai pea i luma lo latou aiga, a o faamae’a e Dr. Nelson ana sauniuniga faapolofesa mo se taimi umi. (Tagai Faatuatua ma Aiga [faeasaite a le OAE mo talavou matutua, Fep. 6, 2005], 1–2.) Afai sa outou faalogologo i le savali maoae a Elder Nelson i le konafesi ia Aperila, ona outou iloa ai lea o le mafuaaga e momomo ai lo’u loto i lo’u faitauina o lana saunoaga na tuuina atu i le faeasaite a le OAE i le aso 6 o Fepuari na mavae atu nei. I lena saunoaga, sa ia faia ai ni saafiafiga matagofie ua tatau ai mo lana soa faapelepele, ae i le ono aso mulimuli ane ae maliu faafuasei ai o ia. E moni lava, e pei ona aoao mai i tatou e Elder Nelson, o le olaga e i ai nai mea faafuasei e ofo ai, ma e tatau ai ia i tatou taitoatasi, ia le gata e vaavaai atu i luma i le mea e tatau ona tatou i ai i le isi 50 tausaga, ae ia faapena foi ona ola i lea aso ma lea aso ina ia tatou saunia e le aunoa ina nei valaauina faafuasei i tatou e toe foi atu. “Vaai Ina ia Outou Faia” I le vaiaso na te’a nei sa ma talanoa ai ma se tasi o le Korama a le Toasefululua e uiga i ni manatu na oo mai ia i matou e uiga i lauga o le konafesi ia Aperila. Fai mai la’u uo na fai atu se tagata ia te ia, “Sa ou matua fiafia lava i lau lauga.” Sa ma ioe faatasi e le o le ituaiga faamatalaga lea matou te fia mauaina. Fai mai la’u uo, “Ou te lei tuuina atu lena lauga ina ia fiafia ai. O le a lona manatu, o a’u ea o se tagata faafiafia?” Sa auai mai se tasi uso o le matou korama i le talanoaga ma faapea mai, “Ou te manatua ai le tala a se faifeau lelei lava. Ina ua fai atu se tasi o lana aulotu, ‘Sa ou matua’i fiafia lava i lau lauga i le aso,’ sa tali atu le faifeau, ‘O lona uiga la, e te lei malamalama ai.’ ” Masalo tou te manatua o le konafesi ia Aperila sa ou lauga atu ai e uiga i ponokarafi. E leai lava se tasi na ta’u maia ia te au faapea na latou “fiafia” i lena lauga—e leai ma se tasi! O le mea moni, e le o i ai lava ma se mea e fiafia ai se isi e oo lava ia te au ia. Ua ou ta’ua ia talanoaga talu ai nei e aoao atu ai le mataupu faavae o se savali e tuuina atu e se Pulega Aoao i se konafesi aoao—o se savali e saunia i le uunaiga a le Agaga ina ia uuna’ia ai le galuega a le Alii—e le tuuina atu ina ia fiafia ai. E tuuina atu ina ia musuia ai, ia faamalamalama ai, ia luitau ai, pe faasa’o ai foi. E tuuina atu ina ia lagona ai e ala i le uunaiga a le Agaga o le Alii, faatasi ai ma le taunuuga e faamoemoe i ai ia aoaoina le tagata faalogologo mai le lauga ma mai le Agaga, pe o a mea e tatau ona ia fai. Sa malamalama le Tupu o Peniamina i lena mataupu faavae ma sa faamalamalamaina. O lana lauga maoae o loo tusia i uluai mataupu o le tusi a Mosaea i upu nei: “O’u uso e, o outou uma ua faapotopotoina mai faatasi, o outou uma ua mafai ona lagonaina a’u upu, ou te tautala atu ia te outou i le aso nei; . . . Ou te lei poloai atu ia te outou ia o mai iinei e ta’ufaatauvaaina ai upu ou te tautala atu ai, a e peitai, ina ia outou faalogologo mai ia te au ma uai mai o outou taliga ina ia outou lagona, ma o outou loto ina ia malamalama ia te outou” (Mosaea 2:9). E pei ona sa aoao atu e lenei tupu-perofeta, a tatou o mai e faalogologo i se auauna a le Alii, e le tatau ona tatou “ta’ufaatauvaaina upu” e tautala i ai. O lo tatou tiute le tatala o o tatou taliga ma o tatou loto ina ia malamalama. Ma o mea e tatau ona tatou saili e malamalama ai, o mea ia e tatau ona tatou faia e uiga i le savali. Ua ou mautinoa, o le uiga lena o le saunoaga a le Tupu o Peniamina, aua na ia saunoa mulimuli ane i lenei savali maoae, “O lenei foi, afai ua outou talitonu i nei mea uma, ina outou faia ia” (Mosaea 4:10). Faamolemole ia manatua lena mataupu faavae a o o’u tautala atu ia te outou i lenei aso Sapati. “Olaga Toamalie ma le Faamaoni A’ia’i” Ua ou faaulutalaina la’u tautalaga “O Le Faamaoni A’ia’i i le Olaga.” Sa ou nonoina mai lenei ulutala mai se mea sa saunoa i ai Kovana Adlai E. Stevenson o Ilinoi, o se sui tauva o le Vaega Temokarasi mo le peresitene o le Iunaite Setete i le 1952 ma le 1956. O ia o se tagata lelei, ma semanu lava e peresitene pe a na le taufetuli ma se sui tauva lauiloa tele o Dwight D. Eisenhower. I se saunoaga i se Mafutaga o le Militeli a Amerika, sa tuuina atu ai e Stevenson le faaupuga atamai lenei e uiga i le lotonuu. Na ia saunoa o le mea tatou te manaomia “e le o le lagona fitivale ma’ema’eā, ae o se olaga to’amalie ma le faamaoni a’ia’i“ (lauga na tuuina atu i le aso 27 Aokuso 1952, sii mai ia John Bartlett, Familiar Quotations, Boston: Little, Brown and Co., 1955, p. 986). Ou te fiafia lava i le—”e le o le lagona fitivale ma’ema’eā, ae o se olaga to’amalie ma le faamaoni a’ia’i.“ O le a ou faaaogaina lenei faamatalaga o le lotonuu, e fai ma fuafaatatau o le auala e tatau ona tatou ola ai i le talalelei. O nisi tagata e ola i le talalelei faatasi ai ma “lagona fitivale ma’ema’eā,” ma sosoo ai ma taimi uumi e le toaaga mai ai, po o faatinoga foi e faavaeluātai. O le mea tatou te manaomia i le ola ai i le talalelei o se “olaga to’amalie ma le faamaoni a’ia’i.” O le a la le uiga o le usitai i poloaiga, tausia a tatou feagaiga, ma le auauna atu i le Alii ma se “olaga to’amalie ma le faamaoni a’ia’i”? O lona uiga ia 100 pasene le avea ma se Au Paia o Aso e Gata A, ia 100 pasene foi le taimi. I se faaupuga faatusipaia, o lona uiga ia mulimuli i le faatonuga a le Tupu o Peniamina na tuuina atu i lona nuu: “Ou te manao ia outou tutumau ma le le faagaeetia, ia fua mai pea i galuega lelei, ina ia faamaufaailogaina outou mona e Keriso, le Alii le Atua pule aoao” (Mosaea 5:15). O lona uiga ia mulimuli i le aioiga na tuu atu e Tama Liae i se atalii ua solomuli: “E! ana mafai ona e tusa ma lenei vanu, e mau ma ua mausali ma le le mafaagaeetia i le tausiga o poloaiga a le Atua!” (1 Nifae 2:10). O se “olaga faamaoni a’ia’i” e manaomia ai le to’amalie ma le faamaoni a’ia’i, mausali ma le le mafaagaeetia. Tatou te taofimau i a tatou feagaiga ma le taitaiga ma aoaoga a auauna a le Alii, ina ia avea i tatou e faapei ona tusia e le Aposetolo o Paulo, “ia le toe tama ninii i tatou o loo felafoaiina e pei o peau, ma feaveaiina i matagi uma lava o mataupu” (Efeso 4:14). O lo tatou tulaga lena ma le tatou sini. O lena tulaga mausali e manaomia ai lo tatou aloese mai le soona mateletele. O a tatou faatinoga e tatau ona tumau le 100 pasene o se auauna naunautai, ae le o le tagata e fitivale ma na o ni nai taimi e 120 pasene ai. Sa i ai so’u faiaoga atamai i le BYU i le tele o tausaga ua mavae, sa ia aumaia le faauigaga lenei o le tagata fitivale: “O se tagata fitivale o se tagata lea e le o iloa atu lana sini, ae ua na toe faaluaina ana taumafaiga ia ausia ai.” O lena faauigaga sa avea ma se taiala lelei mo a’u i lo’u olaga, ma ou te fautuaina atu ia te outou. Aua e te saili e faamaonia lou faamaoni a’ia’i e ala i le soona fai i nisi o taimi, po o isi foi faamaoniga o le “e paia atu nai lo [le isi].” E totogi a tatou sefuluai, ae tatou te manatua o le sefuluai o se 10 pasene mausali—e le o le 8 pasene aemaise e na o sina taimi, po o le soona fai foi o le foai mo na o sina taimi i le 12 pasene. Ou te manatua ai le atugaluga sa ta’u mai e Peresitene Harold B. Lee ia te au, ina ua ou peresitene i le BYU. E lei leva ona faapaia le Malumalu o Provo, sa ia faamatala mai ai lona atugaluga, ai nei e avea le latalata o lenei malumalu ma mea o le a soona o soo ai foi nisi o tamaiti aoga o le BYU i le malumalu, ae le faia a latou meaaoga. Sa ia uunaia a’u ina ia matou galulue ma peresitene o siteki a le BYU, ina ia mautinoa ua malamalama le au aooga, e tusa lava pe o se mea e taua ma paia e pei o le auauna atu i le malumalu, e tatau lava ona faia i le poto ma le auaua’i lelei ina ia aua ai nei tuulafoa’ia e tamaiti aoga a latou suesuega lea e tatau ona avea ma mea taua e taulai i ai le taimi o loo latou aooga ai i le BYU. Tulaga Matautia o le Soona Tauaveina o Mataupu Faavae Lelei Ua silia ma le sefulu tausaga talu ai sa ou tuuina atu ai se tautalaga e ta’ua “O o Tatou Malosiaga e Mafai Ona Avea ma o Tatou Toilalo” (Ensign, Oke. 1994, 11–19). Sa ou talanoa ai i le mea e tupu pe a tatou aveina se mataupu faavae lelei po o se poloaiga, ma soona faaaoga. Sa ou tuuina atu ni faataitaiga se 20. Ua ou fetuuna’ia se 5 o nei mataupu faavae i la’u aioiga i le taimi nei, ina ia tatou ola i le to’amalie ma le faamaoni a’ia’i ma le to’afilemu i le olaga ae le o le mea lea na ta’ua e Kovana Stevenson “o le lagona fitivale ma’ema’eā.” E talafeagai lelei foi, o la’u faataitaiga muamua e faatatau i le lotonuu. E oo lava i le alofa i le atunuu, afai e soona fai, e mafai ona faataumaoia ai i tatou i le faaleagaga. E i ai nisi tagatanuu, o lo latou lotonuu (e pei ona latou faauigaina) ua matua fitivale tele lava ma uma ai le malosi ua foliga mai ai ua taotaomia ai isi tiute uma, e aofia ai ma le aiga ma le lotu. Mo se faataitaiga, tatou te faalogo i nisi o tagata lotonuu (e pei ona latou ta’ua ai i latou) o loo auai i le lagolagoina o vaegaau tuma’oti, ma faia sauniuniga tuma’oti mo taua. O lo latou lagona mautu soona fai mo se tasi itu o le lotonuu, o le faamanu’aina lea o i latou i le faaleagaga, a o latou solomuli ese mai le mafutaga a le Ekalesia, ma vavaeese mai ai i latou lava mai le pulega a taitai o le malo o e o loo faapea mai ai le tatou mataupu faavae e sefululua o le faatuatua e ao ona tatou usitai i ai. O la’u faataitaiga lona lua e faatatau i tagata ua lofituina atoa i se naunautaiga i se aoaoga faavae patino po o se poloaiga se tasi o le talalelei a Iesu Keriso. E mafai ona faapea o se tulimata’i matua tulaga ese i le galuega o talafaasolopito o aiga, o le matua pisi i faigamalo faitulafono, po o isi galuega tuma’oti. I se savali faagalogata sa tuuina atu i le konafesi o Oketopa i le 1971, sa faatatau ai e Elder Boyd K. Packer le atoaga o le talalelei i se piano. Sa ia ta’u maia e mafai ona “faatosinaina [se tagata] e se ki e tasi,” e faapei foi o se aoaoga faavae latou te mananao e faalogo i ai e “ta ma toe ta ma toe ta.” Sa ia faamatalaina: “O nisi tagata o le Ekalesia o ē ua tatau ona sili atu lo latou iloa, latou te pikiina na o se ki se tasi pe lua e fiafia i ai ma saga tata ai lava. . . . E iu ina latou le iloa e i ai le atoatoaga o le talalelei, . . . [lea ua latou lafoa’ia] ona ua sili ai se nota e fiafia i ai. E oo ina faafefeteina ma faanenefuina, ma taitai atu ai i latou i le liliuese” (Teach Ye Diligently [1975], 44). E mafai ona tatou ta’ua na ituaiga o tagata, e pei ona fetalai mai le Alii e uiga i tagata o le Au Saalutu, “latou te fia iloa nisi vaega o le upumoni, ae le o mea uma” (MFF 49:2). Ma o lea, ou te fai atu ai, ia faaeteete i le ki lena ua fiafia i ai. A e taina se ki se tasi e le maua ai, pe ono faatauma’oia ai foi le sologa lelei atoatoa o le talalelei, ua e aga ese mai ma le to’amalie ma le faamaoni a’ia’i o le olaga. I le lotolotoi o nei faataitaiga o le matautia o le soona faia o mataupu faavae lelei, e tatau ona ou faailoa atu se tasi o o’u faaletonu. Ua outou faalogo i se anaga tuai, “Aua nei avea oe ma tagata muamua e faata’ita’ia mea fou, pe avea foi ma tagata mulimuli e lafoa’ia mea tuai.” A oo la i le tomai ofoofogia o lenei augatupulaga, e pei o komepiuta, ou te masalo o ale tagata mulimuli na lafoa’ia mea tuai. O loo o’u faaaogaina pea lava se laau lomitusi e le alu i le eletise. Ua silia ma le 50 tausaga o o’u tusia a’u tusi ma fatuina ni vaega o a’u lauga i laau lomitusi e le alu i le eletise. I ni nai tausaga ua mavae, sa le toe aoga ai lea ituaiga sa i ai si a’u laau lomitusi feavea’i tuai lelei e le alu i le eletise. Sa amata ona ou sailia se isi laau e sui a’i. E lei faigofie ona maua. O fausaga faatekinolosi sa sosoo mai ma le uluai laau lomitusi, o le laau e alu i le eletise. Ou te lei faaaogaina lava lena fausaga. Na sosoo ai ma masini e ta i ai faamatalaga ma mafai ona lolomi faapea ma komepiuta ma le faatupula’ia o le lavelave o ona aoga, e pei ona masani ai la’u failautusi agavaa, o Margie Knight, sa faia ai le anoano o kopi o lenei lauga. O komepiuta o mea na o loo faatau atu e faleoloa i le taimi lenei, o le mea lena sa le tatau ai ona ou maofa i le sioa mai o alii faatauoloa talavou ina ua ou fesili atu i ai mo se laau lomitusi feavea’i e le alu i le eletise. Sa aumai ma le mitamita e se tasi alii magafagafa se tamai laau lomitusi feavea’i e alu i le eletise, e mafai ona fesiita’i solo ma sulu i lea palaka ma lea palaka aua e māmā, ma sa ia fesili mai pe o le mea lena ou te manao ai. Mulimuli ane, sa ou maua se tama’i faleoloa e i ai le pule faalauulusina, sa ia silafia le mea e ta’u o le laau lomitusi feavea’i e le alu i le eletise. Sa i ai lava se laau se tasi i le potu i tua, ma sa ou matua fiafia lava e faatauina. Sa fai si faaletonu o le pule pe o le a la’u mea o le a fai ai. O lona ava tele na le fesili ai, ae sa ia taumateina. A o ia tuuina mai le laau lomitusi fou feavea’i sa ia faapea mai, “Ua tau le maua le ituaiga lenei. Masalo oe e te tolauapi soo.” O se tala moni! O le a ou faaauau i le faataitaiga lona tolu o le eseesega o le faamaoni a’ia’i ma lagona fitivale soona fai. O se naunautaiga e ositaulagaina mea uma tatou te maua mo le galuega a le Alii, o se faailoga moni lea o le faamaoni a’ia’i. O le mea moni, o se feagaiga lea tatou te osia i nofoaga paia. Peitai, e ao lava ona matua’i li’oli’o mai ma le faaeteete i taulaga ua poloaiina ai i tatou e le Alii ma Ona taitai i le taimi lenei. E ao ona tatou fai atu faatasi ma Alema, “Ou te manao i se a i se tasi mea, tau lava ina ia ou faia le galuega ua valaauina ai a’u?” (Alema 29:6). O tagata e manatu ua le lava le totogiina o a latou sefuluai ma taulaga ma galulue i tofiga ua tofia ai i latou, e faigofie lava ona taitaieseina e faapotopotoga iti faalelotu o loo ofoina atu le mea lea o le a ou ta’ua, “o faleoloa fitivale” mo lo latou naunau e ositaulaga. O le faataitaiga lona fa e aofia ai sini. E i ai le malosiaga tele i le taula’i atu i a tatou sini. Ua tatou vaai uma lava i fua lelei o lena taula’iga. Ae, o le soona taula’i atu foi i sini e mafai ona galo ai i se tagata le taua o auala sa’o e faatino ai. A oo ina tula’i mai lena mea, e ono mafai ona suia le faamaoni a’ia’i fautuaina i se soona fitivale mata’utia. O se vaega lona lima e tatau ona tatou tulitulia ai le ala mausali ma aloese ai i popolega i le soona fitivale i mea tautupe. Ua poloaiina i tatou e foai atu i e matitiva. Pe mafai ea ona faataunuuina lena matafaioi faavae Kerisiano ina ia soona fai? Ioe, e mafai. Ua ou vaai i ai. Masalo ua outou vaaia ni tagata sa faataunuuina le tiute o le foai atu i e matitiva, i se faiga soona fai, ma ua matitiva ai lava ma o latou aiga ona o le faasoasoa atu o a latou meatotino po o taimi sa manaomia mo tagata o aiga. Ia faaaoga se faaupuga ua leva faafaifaatoaga, e le tatau ona tatou ‘aia le sana e toto’. O se faaloloto faapena o le a tatou le mafai ai ona toto ma selesele fua o faaeleeleaga i le isi tausaga, lea e lagolagoina ai o tatou aiga ma foai atu i e matitiva. Sa lapata’i mai foi le Tupu o Peniamina i lona nuu e fafaga i e ua matelaina, faaoofu i e ua le lavalava, ma asiasi atu i e mama’i ma fesoasoani atu ia te i latou (tagai Mosaea 4:26), ma sa ia lapataia i latou “ia faia nei mea uma i le poto ma le auauai lelei; aua e le tatau ona momo’e vave le tagata ia silia le malosi ua ia te ia” (f. 27; tagai foi MFF 10:4). A o ou faaiuina atu a’u faataitaiga e lima, ou te fia tuuina atu se lapataiga. O le mataupu faavae sa ou filifilia ma lagolagoina, faapea e tatau ona tatou tulimata’ia le faamaoni a’ia’i ma aloese i le soona fitivale, e ono mafai foi ona malamalama ai faapea o loo tauātaāta mai ai, e tatau ona i ai le “faaleogalua i mea uma.” E lē o lena. Ua poloaiina i tatou e le Faaola ina ia tatou auauna atu ma o tatou “loto atoa, mafaufau atoa, manatu atoa, ma le malosi atoa” (MFF 4:2), ia “sailia . . . ma le faamaoni ‘oa o le faavavau” (MFF 68:31), ma ia “loto totoa i le molimau ia Iesu” (MFF 76:79). Sa Ia fetalai mai foi, o le a Ia luai ese i tatou mai Lona [fofoga], pe afai tatou te faaleogalua (tagai Faaaliga 3:16). O le manulauti o a’u faataitaiga, e tatau ona tatou mausali ma tumau i lo tatou faamaoni, o a tatou tautinoga, ma a tatou taumafaiga. Tafaoga Faamasani ma le Tafafao Vale Sa ou taumafai e tuuina atu faataitaiga o le taua o se olaga o le faamaoni a’ia’i, ma sa ou lapatai atu i le matautia o le soona faia o mataupu faavae lelei. Afai e lei faamanuiaina lava au i le luitauina o oe ina ia e tilotilo i lau lava amio, atonu o le a aofia ai i la’u toe mataupu. I lana saunoaga i le faauuga a le BYU i le lua vaiaso talu ai, sa ta’ua ai e Elder Earl C. Tingey se tala sa tusia i le lomiga o le Time Magazine e uiga i talavou o la outou tupulaga. O loo ta’ua ai o tausaga mai le 18 i le 25 ua avea ma se “vaega ese lava ma ma’oti o le olaga, o se suiga taufaaofi i le va o le talavou ma le tagata matua, lea e saofa’i ai le tagata mo nisi tausaga, [ma tolopo] . . . le tiutetauave faatagata matua” (Lev Grossman, “Grow Up? Not So Fast,” Time, Ian. 24, 2005, 44). O loo faamatala mai i lea tala, o talavou nei o ni “talavou tumau, . . . o ni Pita Peni se luasefulu ma ona tupu” (i. 42). A tuu lenei faavasegaga i se faaupuga e talafeagai ma lenei aofia o le au faauu o le BYU ma o latou aiga, sa saunoa Elder Tingey i le “le mautonu e i ai i nisi ua faauu mai i kolisi . . . i le taliaina o tiutetauave o le faaipoipo ma le aiga” (lauga i le faauuga, Ape. 21, 2005). O lenei faiga e tolopoina ia tiutetauave faatagata matua, e aofia ai le faaipoipo ma le aiga, e mautinoa lava le matua alia’e mai i o tatou talavou matutua o le AAG. Ua faateleina le averesi o tausaga e faaipoipo ai i le fiasefulu tausaga ua mavae, ma ua faaitiitia fanau e fanauina e ulugalii faaipoipo o le AAG. I le savali a Elder Nelson i le faeasaite i le tolu masina talu ai, o le Faatuatua ma Aiga, sa ia saunoa ai e uiga i lenei mataupu, ma o se vaega foi lena o la’u autu, “O Le Faamaoni A’ia’i i le Olaga.” O le mea lea, o le a faaiu atu ai i le faasoaina atu o ni nai atugaluga e uiga i ni faiga o loo i ai i le taimi nei i fegalegaleaiga a le au nofofua talavou o le AAG i Amerika i Matu. Sa lipotia mai e le au matau atamamai faapea, e toeitiiti lava a mou atu tafaoga faamasani mai lotoa o kolisi, faapea foi ma talavou matutua. Ua suia nei i se mea e ta’u o le “tafafao vale” (tagai Bruce A. Chadwick, “Hanging Out, Hooking Up, and Celestial Marriage,” i Brigham Young University 2002–2003 Speeches [2003], 1–8). Ua outou iloa lelei lava lena mea, ae o le a ou faamatalaina atu ia iloa ai e i tatou ua matutua atu pe latou te le o silafia foi. O le tafafao vale e aofia ai ni alii talavou ma ni tamaitai talavou e faatasitasi i ni gaoioiga faivaega. E matua ese lava mai tafaoga faamasani. Mo le silafia e nisi o outou e le matutua tele atu, atonu e manaomia foi lo’u faamatalaina o tafaoga faamasani. E le pei o le tafafao vale, o tafaoga faamasani e le o se taaloga fai ‘au. O tafaoga faamasani o le o ta’itoalua ia iloa ai le ituaiga mafutaga a le tasi ma le isi ma tautinoga mo se taimi lē tumau e mafai ona oo atu ai i le faaipoipoga, i nisi o tulaga taua ma e seasea ona maua. O le a le mea ua mafua ai ona mou atu ia tafaoga faamasani? Ou te le iloa, ae e mafai ona ou iloa ni nai tulaga moni ua mafua ai: 1. Ua matua malosi le tai fana’e o aganuu i lo tatou lalolagi e faasagatau i sootaga faaleaiga. Mo se faataitaiga, ua faafaigofie ona tatala faaletulafono faaipoipoga ma ua faalēano i le fanauina o fanau. O nei faiga e faatautee i tautinoga e mautinoa lava e lagolagoina ai le tetee o le tiapolo i le fuafuaga a le Tama mo Ana fanau. O lena fuafuaga e faalagolago i le tausiga o feagaiga po o tautinoga. Soo se mea lava e aveesea mai ai i tatou mai tautinoga, e faavaivaia ai lo tatou malosi e auai i le faatinoga o le fuafuaga. O tafaoga faamasani e aofia ai tautinoga, e tusa lava pe na o ni nai itula. O le tafafao vale e leai ni tautinoga e manaomia ai, e le mo alii pe afai o se tamaitai e saunia ni meaai po o se fale. 2. O le mau a tamaitai o loo taumafai ia laugatasia ma alii, ua saofagā i le lē toe i ai o ni tafaoga faamasani. Ona ua faateleina avanoa o tamaitai ma ua tele foi le finau o nisi o i latou, ua mumusu ai foi nisi alii e faia le tulaga taulamua masani, e pei o le talosaga atu mo se tafaoga faamasani, ona o le popole ne’i avea o ia ma se tasi ua faaigoaina i le igoa mata’utia o “alii e vaai maualalo i mafine.” 3. O le tafafao vale o loo faatosina mai i polokalama i TV e uiga i le au nofofua. 4. O le uiga ma le taua o se “tafaoga faamasani” ua suia foi, ona ua matua taugata lava. Ua ou vaaia lea faiga ua amata i a tatou fanau laiti. Pe o le a lava le mafuaaga, ae ua manatu tama o aoga maualuluga e tatau lava ona latou faia se mea tele po o le maoa’e ina ia faaupu atu ai se tafaoga faamasani, aemaise lava o se mea e pei o se siva, ma ua faapena foi ona manatu teine ia latou faia ina ia taliaina. E le gata i lea, o tafaoga faamasani, [ua manatu] e tatau lava ona taugata se mea e fai. Sa ou vaaia nisi o na mea i le lotoa o le BYU i le vaitau o le 70. Ou te manatua sa ou vaai i se isi toalua, o faia se taumafataga i le afiafi e ni uo, i le ogatotonu o le ala i le va o laina taavale i le itu i sauté o le malae lakapi a le BYU. O nei mea uma ua faafaigata ai ona fai ni tafaoga faamasani. Ma, o le tele o le gaogaosa ma le taugata o tafaoga faamasani, o le tuuitiitia foi lena o tafaoga faamasani. Talu ai ua tuuitiitia ma ua lavelave tafaoga faamasani, ua foliga mai ai ua afua ai se manatu, o se tafaoga faamasani ua faaataata mai ai le faamo’imo’i po o le faaauau ai pea ma tautinoga. Ua atili ai lava ona faaitiitia tafaoga faamasani i lena manatu. Ua le o toe maua telefoni vasi ma le taugofie a o outou matua ma matua o o tatou matua lea sa masani ona latou faia. E faapea le faiga o na telefoni: “O a au mea e fai nanei?” “Ta te le o i le tifaga?” Po o le, “Ta te le savalivali i le taulaga?” O nai tafaoga faamasani taugofie faapena, e mafai ona faifai soo ma e le faamata’uina ai, aua e le o faaataata mai ai se tautinoga e ao ona faifai pea. O tafaoga faamasani faigofie ma faifai soo, e mafai ai e alii ma tamaitai ona “iloa le toatele o tagata” i se auala e faigofie ai ona fuafua mo se faaipoipoga i le lumanai. O tafaoga faamasani i aso ia, o se auala matagofie tele e masani ai ma se tagata o le isi itupa. E faamalosiauina ai talanoaga. E mafai ai ona e iloa taulima isi tagata, ma iloa ai foi taulima pe a na oulua. Sa maua ai avanoa e aoao ai le ala e amatalia ai ma tausisia se sootaga faatagata matutua. E leai se mea o na mea e tupu i le tafafao vale. O’u uso e ma tuafafine nofotoatasi, mulimuli i le mamanu faigofie o tafaoga faamasani, ma e te le tau su’eina ai [sau paaga o le lumanai] i polokalama talatalanoa i le Initoneti po o ni tautua fesoasoani e sue ai paaga—o ia mea e lua e mafai ona matua mata’utia po o le le talafeagai foi. E i ai se isi mea moni ua saofagā i le mou atu o feoa’iga faamasani ma le taatele o le tafafao vale. Ua tele tausaga o fautuaina e le Ekalesia ia tupulaga talavou e aua nei tafafao faamasani a o lei atoa le ta’i 16. Atonu o nisi talavou matutua, aemaise lava i alii, ua soona tausia foi lena fautuaga poto ma tonu ai loa e le tafafao faamasani seiloga e atoa le 26 tausaga po o le 36 foi. Alii, afai ua mae’a mai lau misiona ma o loo e mulimulita’ia pea le mamanu mo tama-teine sa fautuaina ai oe ia mulimuli ai a o e 15, ua oo mai le taimi e te laa ai i luga. Ia e lototele, ma vaavaai se isi lua te soa. Amata i ni tafaoga faamasani eseese ma ni tamaitai talavou eseese, ma afai e vaaia ai se tulaga lelei i lena laasaga, ona faamalamalama loa lea. Ua oo i le taimi e faaipoipo ai. O le fuafuaga lena a le Alii mo Ona atalii ma afafine talavou matutua. E taulamua alii, ma ua tatau ia te outou alii ona amata loa. Afai e te le iloa pe o le a le uiga, atonu e ono fesoasoani le faauigaga lea. Sa ou faalogo i ai mai le tama teine a lo’u afafine, ua 18 tausaga le matua. O le “feoa’i faamasani” e tatau ona pasia suega e tolu: (1) fuafua a o lei taitai, (2) totogi le tau, ma le (3) ia tutusa lelei. Tamaitai talavou, tetee atu i le soona tafafao vale, ae uunaia tafaoga faamasani faigofie, ma taugofie, ma faifai soo. Aua le saga faafaigofieina mo alii talavou e tafafao vale ai i ni nofoaga e fai ai e outou tamaitai ni meaai. Aua lava le lagolagoina i latou e na o le ‘ai fua e mananao ai. E le afaina lava se gaoioiga faivaega i nisi taimi, ae a outou vaaia ni alii talavou ua fai ma vaisu le tafafao vale ma le isi itupa, ou te manatu ua tatau ona outou lokaina meaai ma tu’imau le faitotoa. Afai e te faia le mea lea, e tatau foi ona faapipii ai i fafo ma se faaupuga, “O le a tatala mo tafaoga faamasani taitoatasi” po o se mea faapena. Tamaitai talavou, faamolemole ia faafaigofie mo nai alii e matamumuli e faanoi atu se tafaoga faamasani faigofie, ma le taugofie. O se vaega o le faafaigofieina, o le aloese lea mai le faaataata atu faapea o se tafaoga faamasani e matua taua lava. Afai e tatau ona tatou faaoleole i alii talavou e fesili soo atu mo se tafaoga faamasani, e tatau ona tatou amataina se faamoemoega fealoa’i faapea, o tafaoga faamasani e le o fautuaina ai ni tautinoga faifaipea. Ma le mea mulimuli, tamaitai talavou, afai e te musu, ia fai faalelei. Ne’i e faamaina se alii popo’evale ma le matamuli, ma faataumaoia ai lona avea ma paaga talafeagai, ma e ono mafai ai foi ona tiga se isi tuafafine. A’u uo talavou e, matou te fautua atu ina ia faaui atu a outou mafutaga ma le isi itupa i mamanu o tafaoga faamasani, e i ai le mana e i’u atu ai ina faaipoipo, ae le o mamanu o le tafafao vale lea e na o faamoemoega o au taaalo e pei o le soka po o au lakapi pa’i. O le faaipoipoga, e le o se gaoioiga a ni vaega—sei vagana ai ua amata ona toatele mai le fanau. Tuafafine, e foliga mai ua outou fiafia lava ina ua ou matele atu lava i tiutetauave o alii nofofua. E i ai ni nai a’u upu mo tamaitai nofofua. Afai ua na o lou nofonofo ma faatalitali mo se faaipoipoga, tuu loa lou faatalitali. Atonu o le a e le maua lava le avanoa mo se faaipoipoga fetaui i lenei olaga, o le mea lea soia le faatalitali ae amata ona gaoioi. Sauniuni oe lava mo le olaga—tusa lava po o se olaga nofofua—e ala i a’oga, poto masani, ma fuafua. Aua e te faatalitali se’i sunu’i atu le fiafia i ou luga. Saili i ai i le auauna atu ma le aoao. Atiina ae sou olaga. Ma faalagolago i le Alii. O lou faamaoni a’ia’i i le olaga, e ao ai ona e mulimuli i le fautuaga a le Tupu o Peniamina ina ia “valaau i le suafa o le Atua i aso fai soo, ia tutumau foi i le faatuatua i mea e oo mai” (Mosaea 4:11). “Latou te Pulea i Latou Lava” O lea la, tuafafine nofofua, o loo ia te au se molimau atamai o le a valaaulia mai i luga i le taimi lenei. O lo’u toalua, o Kristen, sa avea ma se tagata matua, sa nofo toatasi mo le 35 tausaga ae ma te lei faaipoipo. Ua ou talosagaina o ia e sau ma faamatala atu le mea o i lona loto. Sister Kristen Oaks: Faafetai atu, Elder Oaks. Sa ou faaipoipo i le 50 ma ona tupu o o’u tausaga, ma ua ou lagonaina le avea o au ma se teine faalauiloa mo le “au matutua.” Ae ou te lei amata, ua ou lagona e ta’u atu ia te outou le alofagia tele o outou e lo outou Tama Faalelagi. O loo matou i ai i Oakland, ma sa ou asiasi atu i le nofoaga autu mo tagata asiasi i le isi itu faatasi ma Peresitene Robert Bauman o le misiona. Sa ma matamata ai i le faatusa o Keriso ma le savali o le Keriso soifua, ma sa oo ifo i lo’u loto. O lou taimi lenei. Ia faitaulia e ala lea i le tuuina atu o lou taimi i lou Tama Faalelagi. Ou te fiafia tele i le saunoaga a Peresitene Packer e uiga i le Togiola. O le Togiola e le o se mea e tupu i le mutaaga o o tatou olaga. O se mea e tupu i aso uma o o tatou olaga. Ma ou te faapea atu ai i o tatou uso nofofua, ia faitaulia. E mafai ona matuai tiga lava le nofofua mo se taimi umi, aemaise lava i se lotu o aiga. Ua ou iloaina lea lagona. I lo’u aso fanau lona 50, sa faitau ai e le toalua o lo’u uso le nusipepa. Sa ia fai mai, “Suga, o loo fai mai le pepa e sili atu ou avanoa e fasiotia ai e ni tagata faatupu faalavelave nai lo ou avanoa e faaipoipo ai i le 50 o tausaga.” Na ou iloaina o tafaoga faamasani e faigata ina ua ia aumaia lena faamatalaga, ae aua le fiu. E le o se gaoioiga faatupu faalavelave. Ou te faapea atu foi ia te outou, ia faapaleni. I le avea ai ma se tamaitai nofofua, sa ou agai i luma. Sa maua sou faailoga faafomai ma sa tele lo’u aafiaga i la’u galuega lea na galo ai le avea ma se tagata lelei. Ou te faapea atu i tagata uma o i lenei potu, ia manatua pea o lou valaauga muamua o le avea lea ma se tina po o se tama. Ia atinae na taleni faatausiaiga, o taleni o le alofa ma taleni o le auauna atu. I le avea ai ma se tagata nofofua, sa ou alu e saili ni galuega auauna atu, ma o lea ua ou mauaina nei i afiafi uma i le isi itu o le laulau. Ou te matuai faafetai ai mo lena tulaga. I le faaiuina, ou te mafaufau i taimi tiga i o tatou olaga. O le a tupu lava e tusa lava pe e te nofofua pe ua e faaipoipo. Atonu o loo i ai sau tama o loo ma’i tigaina po o le maliu foi o se tasi e pele ia te oe po o se vaitau foi o le olaga e tuua toatasi ai. Atonu e maliu sau tama po o se tulaga foi e le oo i ai sou malosi, e pei o se ma’i ua umi. Ou te talosagaina oe ina ia e faapaiaina lena i le Tama Faalelagi. I le Helamana 3:35 tatou te faitau ai afai e tuu atu o tatou loto i le Atua, o a tatou mea uma e fai e faapaiaina ai i tatou, ma e soo se taimi lava e avea o se taimi faamanuiaina. O outou o se vaega e sili ona ou fiafia i ai i le lalolagi. E pele tele outou ia te au aua ua ou iloa le lagona e pei ona o loo ia te outou, ma sa ou oo foi i ai mo se taimi umi lava. Ou te manao ia outou iloa o le Ekalesia lenei a le Atua soifua, O Le Ekalesia a Iesu Keriso o le Au Paia o Aso e Gata Ai. O Lana Ekalesia. Ou te faafetai tele ona o loo i ai so tatou perofeta soifua, o Peresitene Gordon B. Hinckley. Ae o le mea sili lava, ua ou iloa o loo i ai so tatou Tama Faalelagi e alofa ia i tatou, ma sa avea o Ia ma a’u uo silisili a o lei i ai se isi e alofa ia te au. Ou te faia ai nei mea i le suafa o Iesu Keriso, amene. Elder Dallin H. Oaks: Faafetai Kristen. O lenei, uso e ma tuafafine, afai ua outou le mautonu i se mea sa ou tautala atu ai, faamolemole faalogo lelei mai lava i le mea lea o le a ou fai atu ai nei. Atonu o oe o se alii talavou ua mamafa ou lagona i mea sa ou tautala atu ai e uiga i le amataina o se mamanu o tafaoga faamasani, lea e mafai ona tau atu ai i le faaipoipoga, po o se tamaitai talavou foi ua popole i mea sa ou fai atu ai e uiga i le manaomia ona faagasolo le olaga. Afai ua e lagona ua e i ai i se tulaga faapitoa, ma e le aoga ia te oe le apoapoa’iga malosi sa ou tuuina atu, faamolemole aua nei e tusi mai ia te au. Aisea ua ou fai atu ai lenei talosaga? Ua ou iloaina, o ituaiga apoapoa’iga tuusa’o ua ou tuuina atu, e afua ai ona anoanoa’i ni tusi mai tagata ua manatu e le o aafia ai i latou i mea sa ou ta’u atua, ma latou te mananao i se faamaoniga mai ia te a’u, o mea sa ou fai atu ai e le faatatau i o latou tulaga faapitoa. O le a ou faamalamalamaina atu le mafuaaga e le mafai ai ona ou avatu se tali e faamalieina ai na ituaiga tusi, i lo’u faamatalaina atu o se aafiaga sa ou i ai ma se tasi tagata sa faaletonu i se tulafono lautele. Sa ou lauga ma ou ta’ua ai le poloaiga, “Aua e te fasioti tagata” (Esoto 20:13). Mulimuli ane sa sau se alii ia te au ma tagi ma fai mai, o la’u tala na fai ua ta’u atu ai ia te ia ua leai se faamoemoe mo ia. “O le a le uiga o lau tala?” sa ou fesili atu ai. Sa ia faamatala mai, sa ia faafoeina se fana taavili i le taimi o le Taua i Korea. I le taimi o se fetauaiga, sa fasiotia ai e lana fana taavili le toatele o fitafita a le fili. Sa faula’i o latou tino oti i luma atu o lana fana lea sa latou tuleia ese ai ina ia mafai ona avanoa le mea e faapapa atu ai a latou fana. Sa ia fasiotia le toaselau, o lana tala lea, ma o lona uiga ua tatau ona alu o ia i seoli aua sa ou talanoa atu i le poloaiga a le Alii o le “Aua e te fasioti tagata.” O le faamalamalamaga sa ou avatu i lena alii, o le faamalamalamaga foi lena ou te tuuina atu ia te outou, pe a e lagona e le o aofia ai oe i mea sa ou fai atu ai. I le avea ai ma se Pulega Aoao, o lo’u tiutetauave o le laugaina lea o mataupu faavae lautele. A ou faia, ou te le taumafai e faamanino atu tuusaunoaga uma. E i ai lava ni nai tuusaunoaga i nisi o tulafono. Mo se faataitaiga, tatou te talitonu e le o solia le poloaiga i le fasiotia ona o se faatonuga faaletulafono i se taua faaauupegaina. Ae aua nei outou fesili mai e avatu so’u manatu i lou tulaga tuusaunoaina. Ua na ona ou aoaoina atu o tulafono masani. Pe o i ai se tuusaunoaga e faatatau ia te oe, o lau lena matafaioi. E tatau ona e galue ai oe lava ia i lo oulua va ma le Alii. Na aoao mai e le Perofeta o Iosefa Samita le mea lava foi lenei i se isi auala. Ina ua fesiligia o ia pe faapefea ona ia puleaina vaega eseese o le Au Paia, sa ia saunoa, “Ou te aoao atu ia te i latou mataupu faavae tonu, ae latou te pulea i latou lava” (i le John Taylor, i le Millennial Star, 15 Nov. 1851, 339). O mea sa faatoa ou tautala atu ai, ua na ona ou aoaoina atu lava o mataupu faavae tonu, ma valaaulia outou uma taitoatasi ina ia galulue ai i nei mataupu faavae e ala lea i le puleaina o outou lava. Uso e ma tuafafine, o se fiafiaga lava le faatasi ai ma outou. Ou te tatalo ina ia molioo atu mea na ta’ua i lenei afiafi i o outou loto ma malamalama ai e ala i le mana o le Agaga Paia ma le faamoemoe lava e tasi lea na tautalagia ai, o le faamanuiaina lea o outou olaga, ia tuuina atu le faamafanafanaga i e o mafatia, ma faamafatia ai e o faafifilemu. O le Ekalesia lenei a Iesu Keriso. Na Ia puapuagatia ma Ia maliu i tiga sili ona matautia o Ketesemane ma Kalevaria ina ia maua ai e i tatou le faamautinoaga o le tino ola pea ma le avanoa mo le ola faavavau. Ou te tatalo ina ia faamanuia i tatou uma taitoatasi e le Alii ma saili e tausia poloaiga a le Alii, ina ia faamaualuluga mea tatou te taulai atu i ai, ia ausia e a tatou faaiuga i aso taitasi le mea na ou ta’ua o se olaga to’amalie ma le faamaoni a’ia’i. O le Ekalesia lenei a Iesu Keriso, ua toefuatai mai i nei aso e gata ai, faatasi ai ma le mana o le perisitua ma le atoatoaga o Lana talalelei. Ou te molimau atu ai i nei mea, a o o’u talosagaina faamanuiaga a le Alii i o outou luga, o a’u uo mamalu, i le suafa o Iesu Keriso, amene.