O Tusitusiga Paia—E Silisili i Lo Le Auro ma E Sili foi ona Suamalie i Lo Le Meli

Sister Susan W. Tanner

Peresitene Aoao o Tamaitai Talavou

Faeasaite a le CES mo Talavou Matutua
11 Setema, 2005
Iunivesite o Polika Iaga

Sister Susan W. Tanner Faafetai atu i le aufaipese matagofie. Matagofie tele le musika ma ua aumaia ai foi le Agaga. Faafetai atu foi i le tatalo amata. Sa ou matauina na talosagaina ia tofu maua e i tatou uma le Agaga i lenei po, ma ia musuia foi i tatou i ni auala e manaomia patino ai e i tatou. O la’u tatalo moni foi lena. Ou te faafetai tele mo le avanoa ua tatou mafuta ai i lenei po. Ae pe a na mafai ona faia i so’u mana’o, semanu ou te moomoo ia pei o faeasaite i aso la, semanu ua ou faanonofo outou i lo’u potu malolo ma tatou talatalanoa vavalalata ai—e pei foi ona ou faia i la’u lava fanau o la outou tupulaga. Masalo ou te amata i le faamatala atu e uiga i la’u tama teine faifeautalai. (Pe le o le mea ea lena e faia e le toatele o tina?) Sa ou ta’u atu ia te ia i se tusi talu ai, o le a ou talanoa atu i le po nei i lo’u fiafia tele i tusitusiga paia. O lana tali lenei:

“Ua ou matua fiafia lava o le a e talanoa Mama e uiga i le suesue i tusitusiga paia! Ou te lagona o se tasi o itu ua tele lo’u suiga ua i ai, o le auala lea ou te suesue ai i a’u tusitusiga paia. Ua ou fiafia lava e suesue i tusitusiga paia i le taimi nei. E ese lava lo’u sagisagi fiafia i taimi uma ou te maua ai se avanoa e suesue ai i ai. E tau le mafai ona ou faamatalaina, vagana ai, e pei lava o le Alema 32:28 lea ua oo ai ina suamalie le upu. Ou te manatu sa masani ona ou fiafia i tusitusiga paia, a o le taimi nei ua ou alofa i ai! Fai mai la’u soa na te iloaina lava pe a ma a’oa’o atu ma pe a ou liliu atu i se mau, aua e sagisagi fiafia o’u mata ona amata ai lea ona susu’e itulau. E ese lo’u fiafia e tali fesili [a tagata] e ala i tusitusiga paia.”

Ou te faamoemoe o mafai ona maua e la’u tama se avanoa e faalogologo mai ai i Ausetalia i lenei savali, ma ia saga uuna’ia ai atili, pe afai e tatau ai, i ana suesuega o tusitusiga paia. E faapena foi, lo’u faamoemoe o le a suamalie foi le upu ia te outou, e faapei foi o ia ma a’u, aua e moni lava o tusitusiga paia “ua silisili ona lelei…i lo le auro, … e sili foi ona suamalie i lo le meli” (Salamo 19: 10).

Suamalie o Tusitusiga Paia

Tou te manatua Tevye, le tamaloa taususu ma ona afafine e toalima i le tala faamusika o le Fiddler on the Roof , lea sa moemiti i le fia mauoa? Mata o le a se mea tou te faamoemoe e fai pe a na fai tou te mauoa? Atonu, o ni mea foi e pei ona ia moemiti i ai. Sa manao o ia ina ia lauiloa, ia i ai sona fale tele, ia lē alu e faigaluega malosi, ma isi mea. Peitai, e le o ona manaoga loloto na. O lana miti sa faamemelo i ai, pe afai e te’i lava ua mauoa, atonu e tulaga ese foi ia i tatou. Manatua lana pese:

“Pe a na ou mauoa, semanu ua
ou maua le taimi ou te lē o maua
E nofo ai i le falesa ma tatalo.
Atonu foi e maua so’u avanoa i le puipui o sasa’e
Matou te talanoaina ai tusi paia ma le au popoto,
Fitu itula i aso uma,
O le mea pito i suamalie lena i lo mea uma.”
(Fatuga na tusia e Sheldon Harnick, “If I Were a Rich Man,” Fiddler on the Roof [1965].)

Pe a na o oe o se mauoa, mata e te faaaluina ou taimi paganoa e suesue ai i “tusi e paia,” po o tusitusiga paia, mo ni itula se tele i se aso? Pe a na o oe o se mauoa, mata o le olioliga aupito suamalie e mafai ona e manatu i ai, o le tele atu lea o taimi mo suesuega loloto o tusitusiga paia?

O le suesue o tusi e paia, e manatu i ai Tagata Iutaia, o se faamanuiaga suamalie—ma o se avanoa sili. O le mea moni, i nisi o tu ma aga faaIutaia, a oo ina amata a’oga a se tamaitiiti i le faa-Torah, e avatu se tofo o le meli i le tamaitiiti a’oga, ina ia ona tuufaatasia le suesue i tusi e paia ma le suamalie. E faamoemoe lea faiga ina ia faamalosia ai le mea o ta’ua i le Salamo: “Ua matua suamalie au afioga i lo’u gutu! ioe, ua sili i lo le meli i lo’u gutu!” (Salamo 119:103).

E faapena foi, ona faatusatusa e le Salamo 19 ia tusitusiga paia i le auro ma le meli. E matagofie le faasagi a le Faisalamo i le upu a le Alii, e pei ona ta’ua i lalo: “E sa’o le tulafono a Ieova, e faafoisia mai ai le agaga; e faamaoni poloaiga a Ieova, e faapotoina ai le ua faigofie.

“E tonu feau a Ieova, e faafiafia ai le loto: e mama poloaiga a Ieova, e malamalama ai mata.

“E mama le mata’u ia Ieova, e tumau e faavavau: o faamasinoga foi a Ieova e moni ia ma tonu uma lava.

“E silisili ona lelei i lo le auro, o le auro e sili ona lelei e tele: e sili foi ona suamalie i lo le meli, o le meli ua sisina ifo.

“Ua apoapoaiina mai ai lau auauna: e tele foi le taui pe a tausi i ai” (Salamo 19:7–11).

O nei faaupuga uma i lenei mau—tulafono, molimau, feau, poloaiga, mata’u (po o le migao), ma faamasinoga—e uiga tutusa uma ma le upu a le Alii, po o tusitusiga paia. E “silisili ona lelei…nai le auro, ioe, o le auro e sili ona lelei e tele: [ma] e sili foi ona suamalie i lo le meli, o le meli ua sisina ifo.”

O nisi taimi ou te mafaufau ai, e ao ina tatou lagona e faapei o Tevye ma la’u tama faifeautalai. Pe ua silisili ea tusitusiga paia ia te i tatou—silisili e pei o le auro ma suamalie e pei o le meli? Pe o tatou taumamafa ai ea, olioli ai, ma mafaufau loloto i ai e pei ona aoao mai e Nifae? (Tagai 2 Nifae 4:15–16.) Pe o tatou faatatau ea ia i tatou e pei ona fautua mai Iakopo? (Tagai 2 Nifae 6:5.) Pe o tatou sailiili atu ea mo upu patino a le Alii mo i tatou—ia aumaia ai le liua, poto, lotomatala, faaaliga, mafanafana, ma le fiafia? Pe ua tatou iloaina o se tasi lea o faamanuiaga aupito suamalie, ma sili ona ofoofogia ua tatou maua?

Fia Taumafa i Tusitusiga Paia

Pe a na tatou saga fia taumamafa pea i tusitusiga paia, semanu ua sili atu ona suamalie ma taua ia i tatou. I ni nai masina talu ai, sa ou malaga ai i Aferika i le nuu e tele ina fia taumamafa ai le Au Paia i meaai, ae o le mea maoa’e, e sili atu lo latou fia taumamafa i le upu a le Alii. I atunuu taitasi e fa sa ou asiasi i ai, sa ou lagonaina ai le mamana o agaga ma le faatuatua tele o tagata. E utiuti lava ni a latou mea o le olaga nei, ae sa mauoa i latou i le faaleagaga. Ua ia te i latou le tala fiafia o le talalelei—upumoni faigofie ma le taua mai tusitusiga paia. Latou te o ma a latou tusitusiga paia ua masaesae i fonotaga taitasi. Latou te aoao mai ai, latou te faitau mai ai, ua latou iloa lelei, ma latou alolofa foi i ai.

I se tasi o sauniga faamanatuga sa alu atu ai se talavou i le pulelaa, e aunoa ma se isi mea, vagana ai ana tusitusiga paia. E pei lava foi o le toatele o isi tupulaga talavou e masani ona lauga, lea e punonou o latou ulu ma femigoia’i o latou vae, ae e ese le mamana o lana savali. Sa ia lauga e uiga i le taulaga, e amata mai i mau mai le Feagaiga Tuai e uiga i le taulaga sa osi i le toto. Ona ia se’e malie atu lea i le 3 Nifae i le Tusi a Mamona, ma sa ia faamatala mai ai mea tuai ua le toe faia ina ua afio mai le Faaola, lea ua manaomia ai le taulaga i le agaga salamo ma le loto momomo. E leai ni ana mea tusitusia sa faaaoga, na o lona malamalama lava i aoaoga faavae. O se faataitaiga tonu lea o le auala e tatau ia i tatou taitoatasi ona aoao atu ai mai tusitusiga paia.

Sa ou toe mafaufau i le Salamo e 19 e tusa ai ma nei Au Paia. O le tulafono a le Alii o mea ia sa liua mai ai i latou. O le molimau lava i le Alii na faafaigofie ai ona maua e nei tagata popoto le tofa loloto. Sa i ai le sulu i o latou mata ma le olioli i o latou loto, aua sa ia te i latou le tulafono, o le molimau, o le feau, ma poloaiga a le Alii. E i ai se isi nuu sa ou asiasi atu i ai, e oo atu lava i le fa itula e savavali mai ai tagata i se fonotaga. E leai ni auala e femalagaa’i ai, o nisi taimi e leai ni seevae, ma nai mea iti e aai ai. O i latou o tagata e ola i faatoaga, ae tele ni tausaga o feagai ma se lamala matautia. Ae sa latou taumamafa lava i afioga a le Atua. Sa “silisili ona lelei … nai lo le auro, … [ma] e sili foi ona suamalie ... i lo le meli.”

I se isi atunuu i Aferika, sa ou iloa ai le toatele o tagata sa pulunaunau ina ia aoaoina i le upu a le Atua. I le aso na matou taunuu ai, sa faaletonu fuafuaga a le malo mo femalagaaiga, ona sa leai se penisini. Sa talitonu le peresitene o le siteki, o le 700 o le au paia sa fuafua e auai mai i la matou faeasaite, ua leai se auala e malaga mai ai. Sa matou faamautinoa atu ia te ia, po o le a le toatele po o le toalaiti foi e o mai, o le a matou aoaoina lava. Ina ua matou savavali atu i le potu sa tapena e fai ai, i le 20 minute a o le’i amataina le sauniga, sa matou vaaia le silia ma le 300 le Au Paia o nonofo ma le faaaloalo, ma faalogologo filemu i viiga sa tata i le laau puleo. Sa matua lofituina a’u i le Agaga. Peitai, a o faagasolo le sauniga, sa i ai se vavega, aua na toe taunuu atu le isi 300 o tagata. Sa latou fia taumamafa i afioga a le Alii. Sa tofu i latou ma tusitusiga paia, ma sa latou mulimuli mai ma le naunautai a o matou aoao atu ia te i latou mai tusi faavae. Ona o a latou faataitaiga, sa ou iloa ai mai se vaaiga fou, lo’u manaomia e a’u lava ia o se tulaga e faaleleia atili. Atonu e toatele i tatou ua pupu loto i oa o le lalolagi. Ou te le iloa pe ua tatou le manatu mamafa pe ua tatou malilie foi ua lava le suesue i upu ma aoaoga faavae ola.

O loo talanoa le perofeta o le Feagaiga Tuai o Amosa, e uiga i se oge i le fia faalogo i le upu—pe i se isi faaupuga, o se fia ‘ai faaleagaga. “Faauta, e oo mai aso ou te tuuina atu ai le oge i le nuu; e le se oge i mea e ‘ai, po o se galala i le fia inu vai, a o le oge i le faalogologo i afioga a Ieova” (Amosa 8: 11). I Aferika, sa ou feiloai ai i le Au Paia e le gata ina fia aai i meaai ma fiainu i le vai, ae sa fia aai i afioga a le Alii. Talu ai ua latou iloa lo latou fia aai faaleagaga, o lea ua latou aoao ai e pei ona aoao mai e Nifae le ala e “fiafia ai i le afioga a Keriso; aua faauta, e faaalia mai ia te outou i le afioga a Keriso mea uma tou te faia” (2 Nifae 32:3).

Manatu i le fia aai faaleagaga tatou te ono lagonaina, pe a na leai ni a tatou tusitusiga paia tatou te fai taumafataga ai. I le gasologa o tausaga, e toatele tagata sa latou le maua se tusi o le tulafono. Manatu i le aiga o Liae, ina ua latou mua’i sosola i le vao, mo se faataitaiga, po o le Au Moleka sa latou “le aumaia ni tusi” (Ominae 1:17), po o taimi foi i le Feagaiga Tuai a o le’i i ai i tagata po o le leai foi o le tusi o le tulafono po o le galo foi, e pei o le taimi na toe aoaoina ai e Esera ma Neemia tagata Iutaia na toe foi mai mai le faatafeaga i Papelonia, i le tusi o le tulafono (tagai Neemia 8:1–13).

Aoao i Lou Talavou ia Alofa i Tusitusiga Paia

O la’u faataitaiga ou te fiafia lava i ai mai le Feagaiga Tuai o Iosia, le tupu—tamaitiiti, lea na nofotupu i le valu o ona tausaga. O lona talaaga o loo faapupula mai ai le aafiaga o se tagata talavou, ua ia iloa le sili atu o tusitusiga paia nai lo auro ma le suamalie foi e sili atu i lo le meli. O tupu uma lava na muamua atu ia Iosia ma suitulaga foi ia te ia, sa amioleaga. Sa le ia te i latou le tulafono, pe sa latou filifili foi e le faitau i ai ma ia le usita’i ai. I le taimi o le nofoaiga a Iosia, sa maua ai e Hilikia, le faitaulaga sili le tusi na leiloa o le tulafono i le fale o Ieova (tagai 2 Tupu 22:8). Sa faitauina atu ia Iosia. Sa nutimomoia le loto o Iosia ma salamo o ia ma tagiaue i luma o Ieova (tagai 2 Tupu 22:19). Ona ia faapotopoto ai lea o lona nuu uma i le malumalu ma faitau atu upu ia te i latou, ma sa latou osifeagaiga faatasi ai o le a latou tausia poloaiga a le Atua:

“Ona faitau atu lea e ia, o latou o faalogologo ai, i upu uma lava o le tusi o le feagaiga na maua i le fale o Ieova.

“Ua tu foi le tupu [faatasi ma lona nuu] i le tulaga ma osi ai le feagaiga i luma o Ieova, e mulimuli atu ia Ieova, ma anaana i ana poloaiga, ma ana tulafono, atoa ma ana sauniga, i le loto atoa ma le agaga atoa, e faamauina foi upu o lenei feagaiga ua tusia i lenei tusi. Ua auga foi i le nuu uma le feagaiga” (2 Tupu 23:2–3).

Oka se tala ina a musuia. E masani ona ou mafaufau pe aisea lava na avea ai Iosia ma se tagata toa, na tali atu i aoaoga i le tusi o le tulafono. Aisea na ese ai lana tali nai lo tupu na muamua ma mulimuli foi i lana nofoaiga? Pe i ai sona faatatauga ia te oe i lou talavou, e uiga i le matua faatauaina o tusitusiga paia e ala lea i le faitauina, gaua’i atu i ai, osi feagaiga e tausia poloaiga o loo ta’u mai ai, ona e ola ai lea i le feagaiga?

Atonu na toe faamanatu e tusitusiga paia ia Iosia ni mea sa ia aoaoina a o le’i sau i le lalolagi, pe na toe fagua ai sona manatua o se aoaoga na ia maua i le mua’i olaga. Na saunoa Elder Maxwell, “Atonu e fusia faatasi mana e faaosofia ai lagona i tusitusiga ma lo tatou manatua, mai le lalolagi o le muai olaga, pe na ona toe aumaia ai foi o o tatou mua’i manaoga ua leva ona faafaileleina iina” (“Teaching by the Spirit—‘The Language of Inspiration,’” in Old Testament Symposium Speeches, 1991 [1991], 1).

Atonu foi o le mafuaaga lena e tele ai ina tatou vaai i apoapoaiga mai tusitusiga paia ina ia “manatua, ia manatua” (Mosaea 2:41; Alema 37:13; ma le Helamana 5:9, 12; 14:30). E le gata ina tatou manatuaina vavega ma le alofa i lenei olaga, ae faapena foi aoaoga mu’amu’a mai lo tatou mua’i olaga. Sa aoao mai e Elder Maxwell, e mafai ona tatou iloa le tele o mea mai lo tatou suesue ma le mafaufau loloto, ona toe manatua vave ai lea o lesona muamua sa tatou aoaoina mai lo tatou Tama Faalelagi.

I se asiasiga a Elder Maxwell i se peresitene o le misiona ma lona aiga i Rusia, sa ia nofo ai i lalo ma talatalanoa ma le fanau teine talavou e toalima a le aiga i se tasi taeao. O le mea muamua lava na ia fesili ai ia te i latou, pe o le a se mau sa latou mafaufau i ai i lena aso. Sa ofo teineiti i le fesili. Sa na ona manatu lava o Elder Maxwell ia, e silisili ona taua e pei o le auro ma sili foi ona suamalie i lo le meli ia tusitusiga paia ia te i latou, e faapei foi o ia. Ae manatu i lena mea. Afai tatou te faia e pei ona ia fautuaina, ma ia i ai pea e le aunoa se mau i o tatou mafaufau, o lona uiga tatou te suesue lava i tusitusiga paia a o tatou savavali atu mai lea vasega i lea vasega, po o le o i mea na fuafuaina, po o le tapena foi o o tatou fale. O le a vave ona amata i o tatou olaga ma faifai ai pea lava. O le a tatou taumamafa ai pea lava pea, ma lē toe i ai se oge faaletagata ma se fia aai faaleagaga. O upu a le Atua o le a “le tusia...i papatusi maa, a o papatusi aano o [o tatou] loto” (2 Korinito 3:3).

E oo lava i fanau laiti o fanau a Elder Maxwell na latou iloa o ia, i lona faamamafaina o tusitusiga paia. Atonu e manatua e le toatele o outou lana savali mulimuli i le konafesi aoao, sa ia faamatala mai ai se taimi na ia asiasi atu ai i fanau a lana fanau i le tuneva o se tasi po. [E taunuu atu] ua alu Robbie e moe. Ina ua taunuu Elder Maxwell, sa valaau atu lona tina, “Robbie, o Tamamatua Neal lea ua i i.” Sa ia faalogo atu i si leo vaivai mai le potumoe o faapea mai, “E avatu a’u tusitusiga paia?” (i le Conference Report, Ape. 2004, 48; po o le Liahona, Me 2004, i. 46). Ia faapei foi o Iosia le tupu—tamaitiiti ma si alii laitiiti o Robbie, e ao ina tatou vave aoao i le popofou o o tatou olaga ia alolofa i tusitusiga paia, ia taumamafa i ai, ma aoao mai ai.

Ua aoaoina foi e nai fanau iti a la ma’ua fanau i le taimi lenei o o latou olaga, e alolofa i tusitusiga paia. Ua ma fiafia lava i la latou tali atu i ai. Mo se faataitaiga, o Iosua e tolu tausaga le matua, e fiafia lava i tagata autu i tala e 11, e masani ona oso mai i le taunuuga o tala taitasi faatusi paia: “Ae o ai la na faasaoina le aso? O Iesu na faasaoina le aso!” Na aoaoina e Iosua se lesona taua: o Iesu moni lava lo tatou Faaola. E oo lava i Lona suafa, o lona uiga o le “faaola”. O le taimi nei i ana tatalo ua tatalo mo tagata na te aoaoina i aso taitasi. Sa tatalo o ia ina ia aua nei toe magoto Peteru, o le isi aso na tatalo ia aua nei malelemo puaa pe a taufetuli i le sami. Sa tatalo foi i le isi aso ina ia agalelei Lamana ma Lemuelu ia Nifae. Na matou faalogo foi o tatalo mo le tamā o Iesu, le Tama Faalelagi. Sa maua talu ai nei e Iosua se kopi o le Tusi a Mamona mai lona taitai i le Vasega Pepe i le Peraimeri. E le’i toe manao o ia e toe faitau atu e lona tina mai le seti faata’ita’i faitau o le Tusi a Mamona. Sa fai atu o ia i lona tina, e sili lona manao i upu tonu lava.

O le isi tama a la ma fanau, o Tanner, e ono ona tausaga, sa ave ana vasega aau i le taumafanafana i le tausaga nei. O le taimi muamua, sa fai lava si ona fefe i le vai. I le aso na tatau ai ona fepuna na o i latou i le itu loloto, e le i faitauina e le aiga a latou tusitusiga paia i le taimi o le taumafataga i le taeao e pei ona masani ai. E ui lava ina popole Tanner, ae sa ia puna lava i le vai loloto. Ae ina ua sau o ia i luga, sa ia faamautionaina e iloa e lona tina lona le fiafia. Sa ia fai atu, “A na manatua e faitau a tatou tusitusiga paia nei i le taeao, semanu ou te le fefe e puna.” Sa lagona e le ma tama teine ua tuua’ia o ia, peitai, sa fiafia i le faatauaina e lana tama o le Agaga ma le mana e aumaia e tusitusiga paia i lona olaga. E mafai ona aumaia e le suesue i tusitusiga paia ia i tatou le malosi e gafataulima ai faigata ia tatou te feagai po o vailoloto ia e tofia tatou te feausi ai (tagai MFF 127:2).

E Mafai ona Suia o Tatou Olaga e Aoaoga Faavae

Na viia e le Aposetolo o Paulo ia Timoteo i lona vave aoaoina i lona olaga, ia iloa ma alofa i tusitusiga paia, ma o le faia o lena, ua faamatala mai ai faamanuiaga silisili e aumaia e tusitusiga paia i o tatou foi olaga:

“Ina o e tamaitiiti ua e iloa Tusi Paia, e mafaia ona faapoto ai ia te oe e iu ai i le ola i le faatuatua ua ia Keriso Iesu.

“O Tusi Paia uma lava e mai le Agaga o le Atua ia, e aoga foi ia e aoao ai, e aoai ai, e faatonu ai, e faapoto ai foi i le amiotonu:

“Ina ia atoatoa ona lelei ai o le tagata o le Atua, ia saunia lava ia i le galuega lelei uma lava” (2 Timoteo 3:15–17).

E ofoofogia faamanuiaga e maua mai i le suesue i tusi paia. E mafai ona “faapoto ai [i tatou] e iu ai i le faaolataga.” E mafai ona faateleina ai lo tatou faatuatua ia Iesu Keriso ma lana fuafuaga [mo i tatou]. E mafai ona aoaoina ai i tatou i o tatou vaivaiga ma le manaomia ona tatou salamo. E mafai ona aoao ai i tatou i aoaoga faavae.

Ua faatele ona saunoa Peresitene Boyd K. Packer: “O aoaoga faavae moni, e malamalama i ai, e suia ai foi uiga faaalia ma amioga. O le suesue i aoaoga faavae o le talalelei, e vave ona faaleleia ai le amio nai lo le faia o suesuega o le amio ina ia faaleleia ai” (i le Conference Report, Ape. 2004, 80; po o le Liahona, Me 2004, 79). O tusitusiga paia e mafai ai ona tatou aoao i aoaoga faavae tonu mai lava i le pogai, lea o le a fesoasoani tatou te atoatoa ai, e pei ona ta’ua e Paulo. E le faapea ua tuai ona amata ma le loto atoa ona taumamafa i ao aoga o loo i ai i tusitusiga paia. O le mea moni, o le po nei foi o se taimi lelei tele lea mo i tatou uma e amata ai.

O se taimi lenei i o outou olaga tou te faia ai faaiuga autu ma le taua mo mea uma—o aoga, galuega, pisinisi, misiona, uo, evaga faamasani, faaipoipoga, fanau, tupe, ituaiga olaga, faamaoni i le auaunaga faale-Ekalesia, ma isi mea. Sa umi ona ou mafaufau ma tatalo pe o le a se mea ou te tautala atu ai, e ono fesoasoani ia te outou taitoatasi i nei tausaga taua e fai ai faaiuga. Tou te manaomia se taiala mo le tagata lava ia. Tou te manaomia se faaaliga patino e fesoasoani i outou lava tulaga patino. Sa aoao mai e Alema “ua aoga tele le talaiga o le upu...ua sili ona aoga ai i manatu o le nuu ai le pelu, po o se tasi mea …o le mea lea sa faapea ai Alema, e tatau ona latou tofotofoina, pe aoga i ai le afioga a le Atua” (Alema 31:5). Ua ou iloa ma ou te tautino atu, afai tatou te “tofotofoina pe aoga le afioga a le Atua,” o le a oo mai lena mafanafana, taitaiga, ma faaaliga patino ia i tatou taitoatasi.

E faapefea ona i o tatou luga lenei aafiaga mamana o le suesue i tusitusiga paia? E valaaulia e tusitusiga paia le Agaga. O le Agaga na te faamafanafanaina ma taiala i tatou. O le Agaga na te aoaoina i tatou ma faaali mai le mafaufau o le Alii ma Lona finagalo mo i tatou. Na saunoa Peresitene Spencer W. Kimball:

“Ua ou faamaonia, a ou le popole i a’u fesootaiga ma le Atua ma foliga mai ai ua leai se taliga e faafofoga mai, ma ua le tulei mai se siufofoga paia, ua ou mamao mamao lava. Afai ou te faatofuina au i tusitusiga paia, ona latalata lea o le va ma toe foi mai le faaleagaga” (Teachings of Spencer W. Kimball, p. 135).

O Tusitusiga Paia e Faamafanafanaina ai i Tatou

I se ata tifaga sa faia faatatau ia C. S. Lewis, sa ia faia ai se faaupuga maoae e uiga i le tatalo, ma ou te manatu e fetaui lelei lava ma le faitauina o tusitusiga paia. Fai mai a ia, “Ou te tatalo aua e le mafai ona ou taofia. Ou te tatalo aua ou te le mafaia se mea. Ou te tatalo aua ou te manaomia ona tatalo i taimi uma e ala ai pe moe foi. E le suia ai le Atua; ae e suia ai a’u” (William Nicholson, Shadowlands, [stage play and screenplay, 1994). E faapena foi lo’u lagona i tusitusiga paia. Ou te liliu atu i ai aua “ou te manaomia i taimi uma.” Ua ou iloa lo’u matua manaomia o afioga a le Atua e fafaga ai lo’u agaga, ma aoao ai a’u i mea uma e tatau ona ou iloa. E suia a’u [e tusitusiga paia].

E toatele outou e manatua ma alolofa i le tala musuia e uiga ia Betsie ma Corrie ten Boom, o le auso Take na faapagotaina i le taua i Nazi Siamani, ma lo la’ua liliu atu i le Tusi Paia ina ua la matua manaomia lava i Ravensbruck, o le falepuipui lauiloa o fafine. Sa faamatala mai e Corrie ia i tatou:

“A o i ma’ua, mai lava i le taeao seia poloaiina e tape moli, so o se taimi matou te le potopoto ai mo se tauvalaauga, o le Tusi Paia o le totonugalemu lea o se li’o lautele o le fesoasoani ma le faamoemoe. E faapei o ni tamaiti ua leai ni aiga e faataali’oli’o i se afi musaesae, matou te li’oli’oina, ma maua ai e o matou loto le mafanafana ma le malamalama. O le tele lava o le pogisa ma faigata e siomia ai i matou, o le atili malamalama foi lena ma moni ma matagofie o le upu a le Atua. ‘O ai se na te faateaeseina mai i tatou i le alofa o Keriso? O le puapuaga ea, po o le atuatuvale, po o le saua, po o le oge, po o le le lavalava, po o le pagatia, po o le pelu?...Leai, ua tatou manumalo a’ia’i i nei mea uma lava, ona o ia ua alofa mai ia te i tatou.’

“Ou te tilotilo solo a o faitau mai e Betsie, ma matauina le susulu mai o le malamalama mai foliga taitasi” (The Hiding Place, [1971], 194–95).

O upu a le Atua sa fafagaina ai ma tausia nei tamaitai. Sa aumaia ai le mafanafana ma le malamalama. Sa sili atu ona taua nai lo auro, ma e sili atu foi ona suamalie i lo le meli.

O Tusitusiga Paia Tatou Te Maua ai Faaaliga

O nisi taimi, o upu tonu lava mai i tusitusiga paia e tali mai ai ma le mana a tatou tatalo. O le faitauina o tusitusiga paia e tatala ai o tatou mafaufau ma loto, i manatu e uuna’ia mai e le Agaga. Ua alagatatau lo tatou mauaina o lena fesoasoani, pe afai tatou te o i tusitusiga paia e saili ai, faanaunau i ai, ma fesilisili ai.

E le masino le oo mai o faaaliga ia Iosefa Samita a o ia faitauina tusitusiga paia ma fesili i fesili musuia. Ua tatou iloa uma lava, o lena Uluai Faaaliga mamalu, o se taunuuga lea o le suesue i tusitusiga paia ma le fesilisili o fesili taua e lenei taulealea e 14 tausaga. Sa manaomia ona ia iloa pe o le fea lotu e moni, ma sa ia faatuatua i le folafolaga o i le Iakopo, o le a tali mai le Alii ia i latou e ole atu ma le faatuatua ia te Ia. Pe ua outou iloa ea o le Vaega e 76 na aumai, ina ua mafaufau loloto Iosefa i tusitusiga o le Evagelia a Ioane e uiga i le faaolataga o tagata? Na tatalaina mai ia te ia le faaaliga o tikeri o le mamalu. I se faitau faanumera a se tasi o tagata atamai o le Ekalesia e faapea:

“E silia ma le 50 pasene o faaaliga i le Mataupu Faavae ma Feagaiga, na maua mai i le taimi o le iloiloga musuia o le Tusi Paia….O loo i ai i galuega faaliliu a Iosefa Samita, se lesona ola i le mataupu o le auala e talia ai pe maua ia faaaliga; a o faatofuina e le Perofeta o ia lava i tusitusiga paia, sa mapuna mai mataupu ma mea sa atugalu ai faapea foi fesili, o le tele lava o taimi e oo atu ai i le malamalama ma le poto atili i le Au Paia o Aso e Gata Ai, i se ituaiga o faaaliga mo le taimi nei” (Robert L. Millet, “Joseph Smith’s Translation of the Bible and the Doctrine and Covenants,” i le Robert L. Millet and Kent P. Jackson, ed., Studies in Scriptures, Volume One, the Doctrine and Covenants [1984], 139).

Sa mulimuli faaaliga a isi perofeta i le mamanu lava lena e tasi. O le Mataupu Faavae ma Feagaiga e 138 na faaalia ia Peresitene Iosefa F. Samita, a o mafaufau loloto o ia i tusitusiga a Peteru e uiga i le lalolagi o agaga.

E tofu i tatou ma le aia tatau mo faaaliga patino. E mafai ona avea tusitusiga paia ma o tatou punavai loloto mo lenei mea. Sa faamatala e se polofesa o le BYU le tala lenei e uiga i se tamaitai na taialaina e le Agaga i ana suesuega o tusitusiga paia. Fai mai le polofesa:

“Sa taialaina se tasi tamaitai e aoao i le auala e lagona ai le siufofoga o le Agaga a o faitauina tusitusiga paia. Sa aoaoina o ia e tootuli e tatalo, e faafetai atu i lona Tama Faalelagi mo tusitusiga paia, ia ole atu ina ia mafuta atu le Agaga a o ia faitau, ona ta’u atu ai lea i le Alii mea na te manaomia mai tusitusiga paia i lena lava aso—e tasi le fesili sa ia manaomia ai se tali, atonu o se taitaiga mo se sootaga, pe o se faamaoniga o se faaiuga. Ona ia tatala ai lea o ana tusitusiga paia...ma amata ona faitau. E le umi lava ona faitau...ae avatu e le Agaga ia te ia le tali sa ia sailia. O nei fesili ma tali i aso taitasi faatasi ai ma tusitusiga paia ma le Agaga, sa faateleina ai lona lagona gofie o musumusuga a le Agaga—ma sa oo ina alofa faavalea o ia i tusitusiga paia.”

“Sa ou faamatalaina lona aafiaga i isi tagata, ma sa latou taumafaia foi lea lava faataitaiga; ma sa matua maofa lava i taunuuga. O mea uma mai faafitauli tautupe e oo i atugaluga o fegalegaleaiga, ua foia. Ma i le faia o lena, sa faateleina lo latou gafatia e lagona ai le siufofoga o le Agaga Paia” (The Power of His Redemption: “Talks from the 2003 BYU Women’s Conference [2004], 326).

O a’u foi ia ua ou alofa ma faalagolago i tusitusiga paia i lo’u olaga. Ua sili atu ia te a’u ona taua nai lo auro. E le faigofie i taimi uma ona oo mai tali mo a’u, ae e oo mai lava. O nisi taimi e oo mai i le filemu ma le mafanafana a o ou faatalitali ina ia malamalama i le finagalo o le Alii po o Lana faatulagaga. A o avea a’u ma se tina talavou, sa uunaia e Peresitene Spencer W. Kimball ia tamaitai o le Ekalesia “ina ia avea ma tagata e atamamai i tusitusiga paia” (“The Role of Righteous Women,” Ensign, Nov. 1979, 102). A na lava le taimi, semanu e mafai ona ou faamatala atu le le mafaitaulia o auala, na fesoasoani ai lo’u mulimuli i lena poloaiga, i le avea ai o a’u ma tina. Afai tou te vaavaai i a’u tusitusiga paia, o le a outou vaai ai i igoa o la’u fanau o tusia i autafa o le tele o mau sa ou iloa e ala i faaaliga, e tatau ona ou fefaasoaa’i ai ma i latou.

Ua faapena foi ona faamanuiaina a’u i upu a le Alii, i la’u auaunaga i le Ekalesia. Ina ua faatoa tofia a’u e avea ma peresitene o Tamaitai Talavou, sa ou saili atu i tusitusiga paia. Sa ou sailia le mafanafana ma se taiala i o’u lagona o le le agavaa, ma le lofituina i se tiutetauave sa matua tele naua nai lo le mea ou te gafatia. O tala faatusi paia e uiga i perofeta ma taitai sa lagonaina foi le le agavaa i o latou valaauga, na ou maua ai le filemu ma sa aoaoina ai a’u, e faalauteleina e le Alii i latou Na te tofia.

O se tasi o ia perofeta, o Enoka, sa faapea mai, “Se a le mea ua ta’uaogaina ai a’u i lau silafaga, aua o au ua na o se taulealea, ma ua inoino foi tagata uma ia te au; ona o le gese o la’u tautala; o lea, aisea ea ua avea ai au ma au auauna?

Ona fetalai mai lea o le Alii ia Enoka: Ina alu ia ma faia e pei ona ou poloaiina ai oe….Ina tatala ia lou gutu o le a faatumuina, ma o le a ou avatu ia te oe upu e te tautala atu ai” (Mose 6:31–32). Sa lagona foi e Mose lona le agavaa, ma sa folafola atu i ai e le Alii, “O a’u foi ou te faatasi ma lou gutu, ou te aoao foi ia te oe i upu e te tautala atu ai” (Esoto 4:12). Sa maua foi e Ieremia le faamanuiaga lenei: “Aua e te fefe…aua ou te ia te oe…[Ma] ua ou tuuina atu a’u upu i lou gutu” (Ieremia 1:8–9).

A o ou suesue, sa patino lava le faamafanafanaina o a’u i folafolaga na tuuina mai i le Faaola. Sa ou lagona, na faamoemoe le Tama Faalelagi mo a’u, ia faatatau na faamanuiaga mo a’u lava ma mea ou te manaomia. “Ua foai mai ia te au e le Alii o Ieova le laulaufaiva o e ua aoaoina, ina ia ou iloa ona faamafanafana i se upu lē ua tigaina” (Isaia 50:4). O lea mau na faasino atu ai a’u i se isi mau lea sa ou tausisi i ai e fai ma a’u autu. “Aua ou te avatu mo outou le upu ma le poto, e leai so latou o e finau mai ia te outou na te mafaia ona tali mai, pe tetee mai ia te outou” (Luka 21:15). O aso taitasi uma o tausaga e tolu ua mavae atu nei, sa ou tatalo ai mo se gutu ma le poto. O lo’u manao silisili (ma o le mea foi lea sa ou lagonaina ai lo’u le agavaa) ia ou iloa le mea e finagalo le Alii ou te aoao atu—ia maua le poto—ona mafai lea ona maua upu e ta’u atu ai lena savali—ia i ai se gutu. O tusitusiga paia ua ou maua ai faaaliga patino, ua taitaiina ai a’u ma faamafanafaina ai a’u i lenei valaauga. O upu a le Alii e “sili atu ona manaomia … nai lo auro... [ma] e sili foi ona suamalie…i lo le meli” i lo’u olaga (Salamo 19:10).

O Tusitusiga Paia Tatou Te Maua ai Molimau

O se tasi faamanuiaga sili ua tatou maua o ni tagata o le Ekalesia, o tusitusiga paia o aso nei, o loo aumaia ai se molimau faaopoopo o Iesu o le Keriso ma o loo toefuatai mai ai le atoaga o aoaoga faavae o Lana talalelei. Ua tofu uuna’ia i tatou e o tatou perofeta o aso e gata ai, ina ia faitau le Tusi a Mamona, ma ola ai i ona mataupu faatasi ai ma le folafolaga o le a oo mai faamanuiaga maoae i o tatou olaga.

Ou te iloa ua tatau ona iloa e tagata uma, o le masina o Aokuso, sa talosagaina ai e Peresitene Gordon B. Hinckley tagata uma o le Ekalesia, ina ia faitau pe toe faitau le Tusi a Mamona ia oo atu i le faaiuga o lenei tausaga faamanatu ua mae’a. O le a so outou manatu aisea ua poloai mai ai lo tatou perofeta ina ia tatou faia lenei mea? Aisea? E tatau ona tofu fesili ifo le tagata ia te ia lava: O le a se mea e tatau ona ou aoao? O le a le auala e moomia ona ou faaleleia ai? O fea o o’u manaomia ai le fesoasoani? O le a tatou iloa lava le mafuaaga patino ma le tulaga manaomia mo lenei faitauga o le Tusi a Mamona. Ona folafola mai ai lea e Peresitene Hinckley ia i tatou “o le a oo mai ai i o outou olaga ma o outou aiga, o se faaopoopoga o le Agaga o le Alii, o se faaiuga ua faamalosia e savavali i le usiusitai i Ana poloaiga, ma se molimau sili atu ona malosi o le soifua moni o le Alo o le Atua” (“A Testimony Vibrant and True,” Ensign, Aug. 2005, 6).

E i ai faatasi le Agaga o le Alii ma le Tusi a Mamona. O a’u uo o Wilford ma Kathleen Andersen, sa avea ma peresitene o le misiona i Guadalajara, i Mekisiko, sa vaaitino lava i le agaga o le Tusi a Mamona. Sa uuna’ia Sister Andersen i le tausaga mulimuli o la la’ua misiona, e aoao lana fanau tama e toatolu i le fale nai lo le ave i se aoga a le malo. Peitai, sa manaomia e ia se fesoasoani e aoao ai i latou i le faaSipaniolo. Sa tatalo o ia ina ia maua se faiaoga talafeagai. Sa ta’ita’i o ia ia Irma Encinas, ua 20 tausaga sa faiaoga ai, ma sa faatoa siitia ane i lo latou aai fou. E faalua ona sau Irma Encinas i le vaiaso e galulue ma lana fanau tama.

E tolu vaiaso o le aoga, ae iloa e Sister Andersen, ua ia faafaigaluegaina se tagata e ono fiafia e aoao atili i la tatou Ekalesia. O lea sa ia faamatala atu ai ia te ia e uiga ia Iosefa Samita ma le Tusi a Mamona. Ona tonu lea ia Sister Anderson, o le a avea le Tusi a Mamona ma mataupu aoaoina i le faaSipaniolo mo lana fanau. Sa faitau leotetele tama taitoatasi i le faaSipaniolo mai tusitusiga paia i aso taitasi o le aoga. Ona faatonuina lea o le faiaoga e fesili i tama e uiga i mea latou te faitauina, ae tali atu e tama i le faaSipaniolo. A o aoao e tamaiti le faaSipaniolo, sa aoao foi Irma Encinas e uiga i le Tusi a Mamona.

Ina ua uma le Kerisimasi, sa sau Irma Encinas ia Sister Andersen ma sa amata ona tagi. Sa manao e ta’u atu ia te ia le mea na tupu. Fai mai a ia, o taimi uma lava e faitau atu ai tama mai le Tusi a Mamona, sa ia vaaia le susulu i o latou foliga. A tapuni a latou tusi, ona vave foi lea ona alu ese le malamalama. Sa ia ta’u atu o lona uso sa la nonofo faatasi, na ia mauaina se kopi o le Tusi a Mamona i le 11 tausaga ua mavae, ae na te lei faitauina. O lenei aafiaga uiga ese, na mafua ai ona la su’eina faatapito lena tusi ua pefupefua i a la’ua fatatusi. Sa la fia iloaina pe o le a lea malamalama na sau mai lenei tusi. Ou te talitonu ua mafai ona outou iloa le i’uga o le tala. Sa amata loa ona la faitauina le Tusi a Mamona, ma mananao ai i faifeautalai e aoaoina i la’ua. Ina ua tuanai le lua vaiaso talu ona fai a l ’ua lesona e faifeautalai, sa papatisoina loa i la’ua.

O La’u Molimau

Ua folafola mai foi e Peresitene Hinckley ia i tatou taitoatasi lena lava malamalama e tasi, pe a tatou faitau i le Tusi a Mamona. Ua ou toe faitauina foi le Tusi a Mamona i nai vaiaso ua mavae atu. Ua toe faamumu ai se molimau o loo mumu i lo’u loto, o Iesu Keriso o le Togiola o le lalolagi. E toetoe lava o fuaiupu uma o loo molimau mai ai ia te Ia. Na saunoa Peresitene Boyd K. Packer, “Mai le silia ma le 6,000 fuaiupu o i le Tusi a Mamona, e silia ma le afa o loo faasino tonu atu ia te Ia” (i le Conference Report, Ape. 2005, 8; po o le Liahona, Me 2005, 8–9).

Sa tulimatai atu tagata o le Tusi a Mamona ia te Ia, ma le faamoemoe i Lana Faaolataga, ma sa latou toe tepa i Lona soifua o faaaoaoga ma le maliu, faatasi ai ma le faamoemoe i Lana Togiola. A o le’i taitai ona fanau mai le Keriso, sa tusia ai e Iakopo, “Po ua e talitonu ea i Tusi Paia? ...Aua o loo molimau ai faamaoni ia Keriso. Faauta, ou te fai atu ia te oe, ua leai se tasi o le au perofeta na tusitusi, pe vavalo, sei iloga ua latou tautala e uiga i lenei Keriso” (Iakopo 7:10–11). Ma ina ua mavae le afio mai o Keriso, sa tusia ai e Mamona: “Ua lelei ia te au mea ua i ai i nei papatusi, aua o perofetaga i le afio mai o Keriso; ona ua iloa foi e o’u tamā, ua taunuu ia mea e tele” (O Upu a Mamona 1:4). Oka se vaaiga lautele ma le ofoofogia e molimauina. A o ou faitau, sa ou iloa o le faatuatua o tagata ia Keriso ma Lana Togiola, latou te onosa’ia ai tiga ma puapuaga, ma faatoilalo ai le agasala ma faaosoosoga. Ua ou iloa o Iesu o le Keriso soifua. Ua ou lagona lo’u fia usu i le pese o Lona alofa faaola (tagai Alema 5:26).

O le toe faitauga foi lenei, sa amata ai ona ou maua se vaaiga o le taua o papatusi—o papatusi apamemea, o papatusi auro e 24, ma faamaumauga o Sa Nifae i papatusi tetele ma papatusi laiti. Sa ou iloa ai e sili atu lo latou taua nai lo auro ia Liae ma ona suli. O loo valaaulia i tatou e Alema i lona fale—e pei ona ou moomoo ai maimau pe a na mafai ona ou faia i le po nei—ma sei o tatou faalogologo atu ai i ana aoaoga i lona atalii o Helamana. O loo ia toe faamanatu atu ia te ia le mafuaaga e taua tele ai nei faamaumauga. Ua ia tuuina atu ia te ia le tiutetauave tele e le gata ia tausia na papatusi, ma faaauau ona ia tusitusi ai, ae ia aoao atu foi upumoni o i ai. Fai mai a ia, “Aua e pei ona faamaoni lenei faasino ala [le Liahona] i le taitaiina o tatou tama i le nuu sa folafolaina, ina ua latou savavali i lona ala, e faapea lava ona avea i tatou i le afioga a Keriso i tala atu o le vanu o le puapuaga, i le nuu e sili ona lelei ua folafolaina pe a tatou savavali i lona ala” (Alema 37:45).

Ua ou mauaina faamanuiaga sa folafola mai e Peresitene Hinckley—o se fuataga sili atu o le Agaga, o se manao ia salamo ma savali ma le faamaoni sili atu i le usiusitai, ma se molimau i le moni o loo soifua le Alo o le Atua. Ou te tatalo ina ia outou faaaogaina lenei taimi i lo outou talavou, e taumamafa ai i tusitusiga paia, ia faatuina se mamanu e mulimuli ai i o outou olaga, ia valaaulia ai faaaliga patino e ala i tusitusiga paia, ma aoao ai i aoaoga faavae ia Iesu Keriso.

“Ou te alofa i le Alii; ma e fiafia lo’u agaga ia te ia” (John Tanner, “I Love the Lord” [Jackman Music Corp.”, 2000], 2; tagai foi i le 2 Nifae 4:15–16). Ou te iloa o loo soifua le Tama Faalelagi ma e lava Lona alofa ia te i tatou, o lea ua tulei mai ai ia i tatou e ala mai i Ana tusitusiga paia. Ou te tautino atu faatasi ma Nifae, “E fiafia lo’u agaga i tusi paia” (2 Nifae 4:15). Ua matua faamalosia la’u molimau e tusitusiga paia, ua aoao ai a’u i upu moni, ua taialaina ai lo’u ala, ma faamafanafana ai a’u i o’u faanoanoaga—ma ou te iloa e faapena foi mo outou. “O tusi paia ua lapata’ia [ai a’u]: ma o le tausiaina...[ua ou maua ai] le taui silisili (Salamo 19:11). [O Tusitusiga Paia] “e silisili ona lelei…i lo le auro, ioe, o le auro e sili ona lelei e tele: [ma] e sili foi ona suamalie i lo le meli, o le meli ua sisina ifo” (Salamo 19:10). I le suafa o Iesu Keriso, amene.