O Faaiuga e Iloa ai le Taunuuga Peresitene Thomas S. Monson Fesoasoani Muamua i le Au Peresitene Sili Faeasaite a le CES mo Talavou Matutua • 6 Novema, 2005 • Iunivesite o Polika Iaga O outou o se potopotoga maoa’e, o se tupulaga filifilia, ua potopoto mai i le Marriott Center i le Iunivesite o Polika Iaga ma le tele o isi nofoaga. Ua faamamaluina a’u i lo tatou mafuta ai, ma ou te manao ina ia outou iloa e leai lava se isi nofoaga i le fogaeleele e sili atu lo’u fia i ai i lenei afiafi [nai lo lenei]. Ua ou taulimaina lenei tofiga ina ua mavae sa’u tatalo faatauanau. Ou te manaomia lo outou faatuatua; ou te talosagaina foi a outou tatalo. A o ou vaavaai atu ia te outou o loo potopoto iinei ma mafaufau foi ia i latou o potopoto i isi nofoaga, ona ou manatua ai lea o o outou matua. E tele tausaga sa ou maua ai avanoa e toetoe o vaiaso uma, e auai i konafesi faalesiteki ma ou nofo ai i se fale o se peresitene o le siteki, po o se fesoasoani o se peresitene. O nisi taimi, e i ai ni mea malie e tutupu. E i ai taimi, e le iloa e se tamaitiiti po o se teineitiiti, ua faaaoga e se Pulega Aoao le potumoe ma le moega o [lona] Tama ma [lona] Tina, ae tolotolo atu i le moega i le vaveao faapea o le a momoe ma Tama ma Tina—ae te’i ma fememea’i e le o le tulaga lena o i ai. I se tasi taimi i le tele o tausaga ua mavae, i sa’u asiasiga i le Siteki o Indianapolis, ou te manatua Peresitene Lowe, sa i ai i le Iunivesite o Purdue iina, sa ia faapea mai ia te a’u, “Uso Monson, e te fia sau i lo matou aiga tatou te nonofo ai i le po o le Aso Toonai, pe e te manao e vave faate’a lena fasefulu maila i lau taavale ona e nofo lea i lo’u fesoasoani i Indianapolis?” Sa ou tali atu, “Peresitene Lowe, ua tuneva le po, ma afai e le afaina ia te oe, o le a ou nofo i lou fesoasoani i Indianapolis.” I le taeao na sosoo ai sa faafeiloa’i a’u e Peresitene Lowe i le ta o le valu ma sa ia faapea mai, “Uso Monson, sa e faia se faaiuga musuia.” Sa ou fesili, “Na musuia faapefea?” “Oi,” sa ia tali mai ai, “e i ai lo’u atalii e nofo aoga i le iunivesite, ma sa ma faamoemoe, e te tofa i lo ma potu i le po o le Aso Toonai. Peitai, ma te le’i iloa, ma sa matua ma le mafaufauina lava, na sau lo’u atalii mai le aoga i le lua i le vaveao, ma sa sau i le faitotoa i luma, savali mai i luga o le sitepu i lo ma’ua potumoe, ki le moli ma ee, ‘Ei!’ ” Ou te le iloa pe o ai tonu semanu e te’i i lena mea pe a na faapea ou te nofo i le peresitene o le siteki—po o le alii aoga po o a’u! Masalo ua sili foi ona tatou te le i iloa. Ia, a’u uo talavou e, oka se matagofie o le olaga o loo tatali maia outou! Atonu o le a le avea oe ma se John Cabot, e folau atu i le vasa ma se faatagaga aloa’ia mai le tupu e saili nuu fou, po o se Kapeteni James Cook, lea sa maua i ana folauga “ni nuu mamao e ese lava le faaleoga o o latou igoa.”1 Peitai, e mafai ona avea outou ma tagata sailiili i le agaga, ma se anavatau e faaleleia atili lenei lalolagi e ala i le sailia ia maua auala sili atu e ola ai ma faatino ai mea e fai. O le agaga o le saili o mea fou, pe o le laualuga o le fogaeleele, le lautele o le vanimonimo, po o mataupu faavae o le ola ta’uta’ua, e aofia ai le atiina ae o le malosi e taulima ai ma le lototele ia faafitauli, [taulima] ma le fiafia le faanoanoa, [taulima] ma le lotomaulalo le manumalo. E toatele outou ua masani i le tala faamusika o le “Fiddler On the Roof.” Ou te fiafia lava i ai. E ’ata le tagata e matauina le tamā o se aiga Iutaia e i Rusia, a o taumafai e taulima suiga o le olaga na aumaia e ona afafine lalelei ma sa matua aafia ai lava o ia. Latou te matua usuina ma le malosi ma le faalēano i ai upu nei, “Faasoa e, Faasoa e, su’e mai so’u toalua.” Ae usu atu le tali a le tamā o Tevye, “Pe a na o a’u o se mauoa.” E tagi le tagata matamata pe a faalogo atu i le musika matagofie o le “Le Laoso, Le Lagoto,” ma e foliga mai na te talisapaiaina le alofa o Tevye i lona nuu moni pe a usu mai e le au faatino le “Anatevka.” O le fiafia o le siva, o le fati o le musika, ma le maoa’e o le faiga o le tala na mou uma atu lava le taua, ina ua tautala Tevye, ma ia te a’u lava ia, o le savali tonu lena o le tala. Sa ia aofa’i mai ona afafine i ona autafa, ma i le siosiomaga faigofie o lona tagata faatauvaa, na ia apoapoa’i atu ai ia i latou a o manatunatu i lo latou lumanai. “Ia manatua,” na lapatai atu ai Tevye, “i totonu o Anatevka, ua tatou iloa i tatou lava, ma mea ua finagalo le Atua tatou te oo i ai.” O i tatou o Au Paia o Aso e Gata Ai, ua tatou iloa i tatou lava, ma mea ua finagalo le Atua tatou te oo i ai. Faalogo foi i mea moni ua aoaoina ai i tatou e le uluai tusi a Mose, ua ta’ua o le Kenese: “Na fetalai le Atua, Ina tatou faia ia o le tagata i lo tatou faatusa, ia foliga ia i tatou....Ona faia lea e le Atua o le tagata i lona faatusa, o le faatusa o le Atua na ia faia ai o ia; na faia e ia o i laua o le tane ma le fafine. Ua faamanuia foi e le Atua ia te i laua” (Kenese 1:26–28). “Faia i le faatusa o le Atua.” E le mafai ona tatou taofi ma le faamaoni i lenei talitonuga maumaututu e aunoa ma lo tatou iloaina o se lagona maoae o le malosi ma le mana. O i tatou o ni Au Paia o Aso e Gata Ai, ua tatou iloa sa tatou ola a e tatou te le i o mai i le fogaeleele, o le olaga faitino o se taimi e faata’ita’i ma vaavaaia ai pe mafai ona faamaonia lo tatou usiusitai i poloaiga a le Atua, ma tatou agavaa ai mo le mamalu Selesitila. Ioe, ua tatou iloa lo tatou faasinomaga ma le mea o loo finagalo ai le Atua mo i tatou. Peitai, e le faapea o lena malamalama ua mautinoa ai lo tatou taunuu manuia i lo tatou tini o le ola e faavavau. Pe tusa ma le afa seneturi talu ai, sa i ai i le lalolagi atoa se tulaga fai ifo o le tele o vaega o le olaga. Ua tatou matauina sootaga e le mama, o suesuega e aunoa ma se alofa, silafia e aunoa ma se uiga, pisinisi e aunoa ma se onomea, tapuaiga e aunoa ma se taulaga, fiafiaga e aunoa ma se lotofuatiaifo, upufai e aunoa ma se faavae, ma le tamaoaiga e aunoa ma ni galuega. Atonu, e sili le faamatalaga o o tatou aso e le tusitala lauiloa o Charles Dickens, ina ua ia tautala i se vaitau ua silia ma le lua seneturi talu ai. E amata lana tala faamama’i o le A Tale of Two Cities faapea: E pito i sili i taimi uma, e pito i sili foi ona leaga, o le vaitau o le atamai, o le vaitau foi o le faavalevalea, o le vaitau o talitonuga, o le vaitau foi o le le fia talitonu, o le vaitau o le Malamalama, o le vaitau foi o le Pouliuli, o le tautotogo o le faamoemoe, o le taumalulu foi o le faavaivai, sa i o tatou luma mea uma, o lenei foi ua leai.” O lou lalolagi lenei. Ua i ou lima lou lumanai. E faalagolago ia te oe le taunuuga. O le auala i le faaeaga, e le o se alatanu e le faatuaoia le vaaiga, e le faatuaoia le saosaoa ma ni tomai e le suesueina. Ae, e iloa i le tele o magaala ma mea e liliu ai, o pioga faafuase’i ma saosaoa faatulafonoina. O le a su’esu’eina lou tomai avetaavale. Pe ua e saunia ea? O loo e agai atu nei i le ala. E te le’i ui mai muamua i lenei auala. O le mea e lelei ai, ua saunia e le Tufuga Sili o le Alatanu, o lo tatou Tama Faalelagi lea, ia se faafanua o le ala o loo ta’u mai ai le ala e mulimuli ai. Ua Ia tuuina faailoilo i le ala e taiala ai oe i lou taunuuga. Atonu ua e iloa nisi o Ana faailoilo: • “Ia e ava i lou tama ma lou tina” (Esoto 20:12). • “Suesue i tusi; aua. . . o tusi ia o loo molimau ia te au” (Ioane 5:39). • “Ia outou muai saili le malo o le Atua ma lana amiotonu” (Mataio 6:33). • “Ia mama outou” (3 Nifae 20:41). Ua tuu foi e lena tiapolo ni faailoilo i le auala e taofia ai lou alualu i luma, ma tata’i ai oe mai le ala o le upumoni i auala ‘alo o le agasala. O ana auala ‘alo e tau atu i se taunuuga mate. Ua e iloa ana faailoilo: • E le afaina e na o si tasi lava. • E le tiga ai se isi na o a’u lava. • O lo’u lava alofa, ma o lo’u ola foi e pule ai lava a’u. • Ua sui le olaga. Ua tatou vaai nei i le tiutetauave e fai ai filifiliga, i lena tulaga matautia o fetaula’igaala o le olaga. O loo faatalitali mai ma le onosa’i lē o le a tosoina oe i lalo mo se po pogisa, se faanaunauga vaivai, o se mafaufau fetōtōa’i, ma se mafaufau fenumia’i. Pe ua outou saunia ea e fai ia faaiuga i le fetaula’iga o ala? E le lava le malosi o lo’u faamamafa atua faapea, o faaiuga e iloa ai le taunuuga. E le mafai ona e faia ni faaiuga faavavau e aunoa ma taunuuga e faavavau. Se’i ou tuuina atu lava se fuafaatatau faigofie e mafai ai ona fua i ai au faaiuga. E faigofie lava ona manatua, ae o nisi taimi e faigata ai ona faatino: E le mafai ona e sa’o i le faia o le mea sese; e le mafai foi ona e sese i lou faia o le mea e sa’o. E muamua lava ona lapata’ia oe e le aunoa e lou loto fuatiaifo e pei o sau uo ae na te le’i faasalaina oe e pei o se faamasino. Na apoapoa’i mai le Alii i se faaaliga na tuuina atu i le Perofeta o Iosefa Samita i Katelani, i Ohio, ia Me 1831, “O mea foi e le faamanuiaina, e le mai le Atua, a o le pouliuli. O mea mai le Atua o le malamalama lava lea” (MFF 50:23–24). O nisi tagata valea ua le amanaiaina le atamai o le Atua, ae ua mulimuli atu i faatosinaga fesuisuia’i taufaasese, o le faatosina mai o tulaga lauiloa faa’ole’ole ma le faamalieina i lena taimi. O na amioga e tai pei lava o le tulaga mata’utia na oo i ai Esau, lea na faatauina lona tofi o le ulumatua i se atasema tunu e tasi. Mo se faataitaiga, ou te fia faamatala atu le taunuuga o se sailiiliga sa faia e se faalapotopotoga faatuatuaina ma lipoti atu i se mekasini a le atunuu.2 Sa faaigoaina le sailiiliga faapea, “E Te Manao ai, mo le Sefulu Miliona Tala?” Se’i ou fai atu foi ia te oe na lava fesili e tasi sa fesiligia i le sailiiliga: • Mo le sefulu miliona tala tinoitupe, e te tuua ai ea lou aiga mo le olaga atoa? • E te faaipoipo ea i se tagata e te le i alofa i ai? • E te lafoa’ia motu ai ea au uo uma? • E te nofo ea i le falepuipui mo se tausaga ona o se moliaga e le sa’o? • E tatala ea ou ofu i nofoaga faitele? • E te talia ea se galuega mata’utia e 1 mai le 10 e ono faaumatia ai lou ola? • E te fia avea ma tagata ‘aisi mo se tausaga? Mai tali a tagata, e 1 pasene o le a tuua o latou aiga, 10 pasene o le a faaipoipo e aunoa ma le alofa, 11 pasene o le a lafoa’i a latou uo, 12 pasene o le a talai ofu i nofoaga faitele, 13 o le a falepuipui mo se tausaga, 14 pasene o le a taliaina galuega mata’utia, ma le 21 pasene o le a ‘aisi mo se tausaga. A oo ina pulea e le tupe ia taga fai, ae le pulea i le amio mama, ona liliuese lea o le tagata mai le Atua. O le liliuese mai le Atua e tula’i mai ai feagaiga malepelepe, o miti ua le faataunuuina, o moomooga ua le taulau, o fuafuaga ua le ausia, o faanaunauga ua le tini, o faamoemoega ua olopalaina ma olaga ua faaleagaina. O se oneone mimiti lena o le toilalo, ou te aioi atu ia te oe ina ia aloese ai. O oe o se tofi tautupu. O le ola faavavau i le malo o lo tatou Tama, o lau sini lea. O se sini faapea, e le ausia i se taumafaiga mamalu se tasi, ae o le taunuuga lea o se olaga atoa o le amiotonu, o se faaputuga o filifiliga poto, o se faamoemoega tumau. E pei lava o le togi maualuga o le “A” i le lipoti o le aoga, o se vasega faigata e manaomia i le kolisi, o le taui o le ola faavavau e manaomia ai taumafaiga. E i ai se talafatu e uiga ia Euclid ma Farao ma le teomateri [geometry]. Fai mai sa faagaeetia Farao i faamatalaga ma aoaoga a Euclid, ma sa manao e aoao le teomateri, ma sa malie Euclid e faiaoga ia te ia. Sa suesue o ia mo sina taimi ona valaau atu lea o ia ia Euclid ua tuai tele lea faiga mo ia. O ia o se Farao; e tatau lava ona i ai se ala e faigofie atu mo ia. E le i manao o ia e alu uma lona taimi i le aoaoina o le teomateri. Ona faaleo atu lea e Euclid o lenei upumoni maoae. Fai mai a ia: “Lau afioga, e leai se ala faatupu e aoao ai le teomateri.”3 A’u uo pele, e leai se ala faatupu i le faaolataga ma le faaeaga. E leai se auala faatupu i soo se taumafaiga. O le togi o le “A” o le taunuuga lea o autu taitasi, o fesili taitasi, o vasega taitasi, o suega taitasi, o pepa taitasi o kuata. O lea foi la, o tatalo taitasi ma le loto, o sauniga o Lotu taitasi e te auai, o uo agavaa taitasi, o faaiuga amiotonu taitasi, o galuega auauna atu taitasi e faia, e taimua uma lava i lena sini o le ola faavavau. I ni nai masina talu ai, ina ua ou toe taliu mai i se tofiga i Siamani, sa ou sioa atu ai i fafo i le faamalama o le vaalele ma ou maofa i fetu sa faatautaia ai le ala o le faigamalaga. Sa ou mafaufau ia te outou ma le avanoa tatou te feiloai ai i le po nei. Sa ou mafaufau i le upumoni, “O o tatou mafaufauga e pei o fetu; e le mafai ona pa’i iai ou lima. Peitai...e te filifilia e fai ma ou taiala, ma o le mulimulita’i i ai, o le a e tau ai i lou taunuuga.”4 O a mafaufauga a mulimuli ai, o le a e maua ai na faamanuiaga o loo e sailia, o se loto fuatiaifo toamalie, o se loto e tumu i le filemu, o se aiga e alolofa, se aiga fiafia? Se’i ou fautuaina atu le tolu lenei: Filifili ma le faaeteete au uo. Fuafua lou lumanai ma se faamoemoega. Faavaa lou olaga i le faatuatua Muamua: Filifili ma le Faaeteete Au Uo. I se sailiiliga na faia i ni uarota ma ni siteki sa filifilia o le Ekalesia, na matou aoaoina ai se mea moni e sili ona taua. O tagata na e faaipoipo a latou uo i le malumalu e masani lava ona faaipoipo i le malumalu, ae o tagata e le faaipoipo a latou uo i le malumalu e masani lava ona le faaipoipo foi i le malumalu. O aafiaga o se uo a se tasi e foliga mai o le uunaiga sili lea ona malosi nai lo le aafiaga o matua, o aoaoga i potuaoga po o le latalata atu foi i se malumalu. Tatou te matele i le avea faapei o i latou tatou te faamemelo i ai. E pei lava o le tala faamama’i a Nathaniel Hawthorne, “The Great Stone Face,” tatou te faataita’ia uiga, e oo lava i amioga a i latou tatou te faamemelo i ai—ma e masani lava o a tatou uo. Ia faamasani ma i latou e pei o oe, o e le o fuafua mo na o sina taimi e fetaui i ai, ia ni sini papa’u po o ni faamoemoega vaaapiapi, ae ia fuafua mo na mea e sili atu ona taua—o faamoemoega ia e faavavau. O loo tusia i luga o le puipui o le Fale Apitaga Faamanatu i le Iunivesite o Stanford le upu moni: “O mea uma e le faavavau e puupuu, ae o mea uma e faavavau e le laiti.”5 I talaatu o lau li’o o uo faalelalolagi, ou te uunaiina oe ina ia faauo atu i lou Tama Faalelagi. Ua saunia o Ia e tali mai i tatalo a lou loto. O le avea ai ma Tama o lou agaga, ma sa foafoaina oe i Lona lava faatusa, i le silafiaina o le mutaaga mai le amataga, o Lona atamai o le a le toilalo ma o Lana fautua e moni lava e faavavau. Ia e faauo ia te Ia. E i ai se isi uo taua e tatau ona e maua, o le epikopo lena o lau uarota. Ua valaauina o ia e le Atua e ala i valoaga ma le faaee atu o lima, e i latou o i ai le pule. E i ai lana aia i le fesoasoaniga faalelagi i le tuuina atu lea ia te oe o fautuaga ma le taitaiga. Ia e faauo ia te ia. Ou te manatuaina lelei ia luitau na fetaiai ma talavou i le uarota sa ou pulefaamalumalu ai i se taimi a o avea a’u ma se epikopo. I se tasi afiafi na oo atu ai se tamaitai talavou lalelei lava ma lana uo tama i lo’u ofisa matou te talatalanoa. Sa matuai alofa le tasi i le isi, ma ua amata ona lofia i la’ua e faaosoosoga. A o matou talatalanoa, sa folafola atu e le tasi i le isi o i la’ua e tetee atu i faaosoosoga ma ia tausia faasilisili i o la mafaufau le sini o se faaipoipoga i le malumalu. Sa ou fautuaina atu i ai se auala e mulimuli i ai ma ua ou lagona le faagaeetia e faapea atu: “Afai e i ai lava se taimi e te lua oo ai i se tulaga e fetuunai ai ma moomia ai se malosiaga faaopoopo, ia oulua valaau mai ia te au, e tusa lava po o le a le taimi.” I se tasi vaeluapo i le 1 i le vaveao na tatagi ai le telefoni: “Epikopo, o Susana lenei. O e manatua lou fai mai ou te valaau atu i soo se taimi ou te lagona ai le faaosoosoina o au? Ia, epikopo, o lea ua ou oo i le tulaga lena.” Sa ou fesili i ai po o fea o i ai, ma sa ia faamatalaina mai o loo i se tasi o paka matautia e tutu ai taavale i le Vanu o Sate Leki. Sa la savavali atu i ai ma lana uo e fai se telefoni i se telefoni sa lata ane i ai. Sa le fetaui le tulaga mo le tuuina atu o se fautuaga, ae sa moomia le fesoasoani, ma sa talisapaia e i la’ua. Ou te le ta’ua pe faafia ona valaau atu Susana. Ae peitai, ina ua tiliva atu e le tufa meli lana tusi valaaulia o le faaipoipoga i lo ma fale ma sa faitauina e Sister Monson, “Ua valaau faaaloalo atu le Susuga a Jones ma le faletua ina ia oulua auai mai i le taumafataga o le faaipoipoga a le la tama teine o Susana,” sa ofo o ia, “Faafetai i le Alii!” Ina ua ou vaai i le tamai faaupuga sa tusia i le pito i lalo sa faitauina, “Faaipoipoina i le Malumalu o Sate Leki,” sa ou faapea ifo ma le filemu, “Faafetai i le lagi mo le malosi o talavou o le Au Paia o Aso e Gata Ai.” Filifili au uo ma le faaeteete. Lua: Fuafua ma se Faamoemoega Lou Lumanai. Na saunoa le alii maoae o Thomas Carlyle: “O se tagata e leai se faamoemoega i le olaga, e pei o ia o se vaa e leai se foeuli, ua tiaiina, ua na o se mea noa, ua leai se uiga. O le i ai o se faamoemoega i le olaga, ma le mauaina, e tuu atu ai se malosiaga i musele ma le faiai i lau galuega e pei ona tuuina atu e le Atua ia te oe.”6 I le tele o tausaga ua tuanai sa ou auauna atu ai o se peresitene o le misiona. E 450 a’u faifeautalai maelega sa i ai. Ina ua ma toe taliu atu i le Aai o Sate Leki ina ua mavae le tolu tausaga, sa tau fai si o ma ofo ma lo’u toalua pele i se tasi afiafi a o ma toe faitauina a ma faifeautalai, ma faatoa iloa ai e i ai nisi o tamaitai faifeautalai e le’i maua lava se soa e faavavau. Sa ma fuafua loa o le a ma faia le mea ma te mafaia e fesoasoani atu i ai. Sa ou fai atu ia Sister Monson, “Frances, sei o ta fuafua ma se faamoemoe ma valaaulia se toatolu pe toafa o a ta faifeautalai tamaitai lelei i lo ta fale. O le a ta faia se gaoioiga lea e mafai ai ona latou ta’uina mai po o ai alii faifeautalai nofofua uma lava ua mae’a misiona latou te fia valaaulia i se tamai faeasaite i lo ta fale. Ona ta faaali atu lea i ai ata o le misiona, ma o le a ta faatulagaina ia nofoa ina ia mafai ona latou fefaamasaniai lelei ai.” O le mea lea sa faia, ma e mafai ona ou faapea atu o tamaitai uma e toafa sa valaaulia sa matuai talia fiafia le lu’i. Sa ma teuina pea lava i totonu o atigipusa seevae ia ata e ta’i lima i le fitu inisi o faifeautalai taitoatasi. E fa atigipusa seevae faapena sa ia i ma’ua, e tofu uma ma ata o faifeautalai. A o nonofo faataliolio ai nei tamaitai e toafa i lo ma potu malolo, sa ou fai atu ia i latou uma, “Ia, o se meaalofa lenei. Sailiili i nei pusa ata ma ta’u mai po o fea o nei ata o loo i ai se alii talavou e sili ona e manao e valaaulia e sau i lenei faeasaite.” Ia te au, o se vaaiga tulaga ese lea. Ou te manatu e na o le pau le auala e mafai ona ou faamatalaina ai o le faia lea o se fesili. Ua outou vaai i tamaiti i le taeao o le Kerisimasi? Sa matou faia e pei ona fuafuaina ma valaaulia ia alii e toafa na filifilia ina ia faatasi ma nei tamaitai e toafa i lo ma fale, ma sa matou maua se afiafi maoae. I le faaiuga o le afiafi, sa ou matauina ai le isi toalua o i latou o savalivali lemu lava i lo matou auala taavale, ma sa ou fai atu ia Sister Monson, “Manaia tele lenei vaaiga.” Sa la savavali felataa’i. E le’i umi ae ou maua se telefoni mai le alii talavou. Sa ia faapea mai, “Peresitene Monson, e te manatua na ou folafola atu ia te oe afai loa o le a ou alofa naunau i se tamaitai o le a ou ta’uina atu ia te oe?” Sa ou fai atu, “Ioe, alii.” Sa ia faaauau, “Peresitene, ua ou alofa naunau.” Sa ou tali atu, “Manaia; ia te ai?” Sa ia fai mai, “E te le mateiaina lava.” Sa ou faaeteete; ou te le’i mateina. Sa ou fai atu, “Ta’u mai e oe.” Ona ia ta’uina mai lea o le igoa o le tuafafine faifeautalai lea sa la savavali faatasi ma uulima mai i le matou pati i lena afiafi. Ua 42 nei tausaga talu ona faaipoipo i la’ua ma e toalima le la fanau ma fanau e toatele a le la fanau. O nisi o outou o loo lagona mai lo’u leo ua uma ona faaipoipo; o isi o loo faaauau pea ona saili lena tagata faapitoa latou te fia mafuta i le faavavau. Mo outou o loo i le vaega lea mulimuli, i lau sailiga mo le alii po o le tamaitai o loo e moemiti i ai, atonu e sili ona lelei lo outou faalogo i le fautuaga na tuuina mai e King Arthur i le tala faamusika o le “Camelot.” I le feagai ai ma se faafitauli tuga, e mafai ona fetaui tonu le saunoaga a King Arthur ia i tatou uma ina ua ia tautino mai, “E le tatau ona faaleagaina e o tatou naunauga a tatou miti.”7 Ia outou mulimuli i lenei fautuaga taua. Ou te uunaia oe ina ia tumau mausali i ou faatulagaga. Ou te aioi atu ia te oe ina ia aua ne’i e maluelue. A o o’u laitiiti sa i ai so’u faiaoga o le Aoga Sa e ese lo’u fiafia i ai lea e le’i leva ona maliu talu ai nei. O lona igoa o Lucy Gertsch. O Lucy e ese le lelei ma le tausaafia. Sa talafeagai mo ia se soa agavaa, ae peitai e leai ma se tasi na oo atu ia te ia. Ua vave le mavae atu o tausaga ma ua oo atu Lucy i le tulaga e le faaipoipo ai lava. Ae ina ua oo o ia i le fasefulu ma ona tupu, sa ia feiloai atu ai ia Dick. Na vaai loa i ai oso ma le alofa. Ae tasi le faafitauli: o Dick e le o se tagata o le Ekalesia. Pe na gauai atu ea Lucy i le mea sese ua faia pea o le faaipoipo ona o le naunau, ma le faamoemoe o le a i ai se aso o le a avea ai o ia ma se tagata o le ekalesia? E le’i faapena Lucy. Sa sili atu ona atamai o ia nai lo lena. Sa ia ta’u atu ia te ia, “Dick, ou te manatu e te lelei, ae ta te le fiafia lava i le feoai faamasani.” “Aisea e le mafai ai?” sa ia tali atu ai. “Aua e le o oe o se Mamona.” “E faapefea ona avea au ma se Mamona? Ou te fia eva faamasani ia te oe.” Sa ia suesueina le talalelei. Sa ia taliina ana fesili. Sa maua sana molimau ma sa papatisoina loa. Ona ia faapea atu lea, “Lucy, o lea ua avea au ma tagata o le ekalesia, ua mafai nei la ona ta faaipoipo.” Sa tali Lucy, “Oi, Dick, ou te alofa tele ia te oe. O lenei ua avea oe ma tagata o le Ekalesia e leai se isi mea e sili ona faamalieina ai oe nai lo se faaipoipoga i le malumalu.” “O le a le umi e faatali ai lena mea, Lucy?” “Pe tusa ma se tausaga, pe afai ta te ausia ia tulaga manaomia.” I le tasi le tausaga mulimuli ane na ulufale atu ai Lucy ma Dick i le Maota o le Alii. Sa ola faamaoni Lucy i le fuaiupu: Lototele e avea ma se Mamona; Lototele e tutoatasi; Lototele ia mausali se faamoemoega; Lototele ia faailoa atu.8 Fuafua ma se faamoemoega lou lumanai. Tolu: Faavaa Lou Olaga i le Faatuatua. I le totonugalemu o le fenumiai o taimi, o feteenaiga o mafaufau ma faigata o le olaga i aso taitasi, e avea se faatuatua mausali ma taula i o tatou olaga. E mafai e tamaiti laiti ona tuuina mai ia i tatou ni faataitaiga mananaia o le faatuatua. I se taimi ua mavae sa ou tusia ai i lalo mai mekasini a lo tatou atunuu se tuufaatasiga pupuu o “Tusi a Tamaiti [na tusi] i le Atua.” Sa malie tele. Na tusia e le alii o Mareko: “Le Atua Pele, sa ou faatalitali mo le tautotogo, ae le’i oo mai lava. O le a le mea ua tupu? Aua ne’i galo.” O le isi tamaitiiti na tusi faapea: “Le Atua Pele, afai na e faia le tulafono o tamaiti e aveina i fafo le lapisi, faamolemole ia sui.” Na tusia e Miki: Le Atua Pele, afai e te vaavaai mai i le Lotu i le Aso Sa, o le a ou faaali atu ia te oe o’u seevae fou.” Na tusia e Jeff: “Le Atua Pele, E matuai maoae lava le auala e te tuuina ai fetu i le tulaga tonu. Aisea e le mafai ai ona e faia faapena i le masina?” O Joyce na tusi atu: “Le Atua Pele, Faafetai atu mo le tuagane pepe, ae o le mea na ou tatalo atu ai o se tamai maile.” Ou te fiafia i le tusi lenei mai ia Mataio: “Le Atua Pele, sa ou faitau i lau tusi ma ou te fiafia i ai.” Ona ia fesili lea, “Ou te fia tusia se tusi i se aso e i ai ituaiga tala faapena. O fea na maua mai ai ou manatu? Alofa tele atu.”9 O le faatuatua moni e moomia ai le naunautai, ma o le ituaiga naunautaiga e moomia ai lea na faaalia e se tamaitai e 21 tausaga le matua e aoga i se kolisi, o le na folafola mai: “Ua lofia lo tatou tupulaga, i soo se auala o fesootaiga, o popolega tetele ma laiti—o se taufaamatau laitiiti o le le mauaina o se paaga pe afai e le faaaogaina e se tasi se vailaau fulunifo patino, po o le fefe i le le taliaina pe afai e le gauai atu i se faatulagaga maualalo o amioga ona o “uiga masani o le lalolagi.” O le toatele o i tatou e taliaina le manatu faapea ‘E le mafai ona e faasagatau i le faigamalo,’ ma le ‘Ola i le atoatoaga o le olaga i le taimi nei, aua o taeao o le a faaumatia ai i tatou e le taua niukilia po o nisi faalavelave matautia faapena.’ Ua lava lo’u matua e talitonu ai i le Atua, e talitonu ai i le mamalu ma le malosi o Lana foafoaga, o le tagata, ma ua lava lo’u iloa, e le o le le malamalama, e iloa ai e le o tuua na o au i nei lagona. “Ua fai mai nisi faapea e le pei o isi augatupulaga ae o tatou e leai se misiona i le olaga—o mea uma lava ua tuulima mai ia i tatou. E le’i lava ona tausiaina faalelei i tatou, ma ua matitiva ai i le faaleagaga. Ou te le fia tamaoaiga i le faalelalolagi ae aunoa ma le faaleagaga—ma e le mafai ona ou ola na o au.” Ia manatua o le faatuatua ma le masalosalo e le mafai ona i ai uma i le taimi e tasi i le mafaufau e tasi, aua e tulieseina e le tasi ia le isi. Ia mausali i lou faatuatua. Ou te mafaufau i se tala na ou faitau i ai i le faletua o se tasi o o tatou uluai paionia. O lona igoa o Catherine Curtis Spencer. O lona toalua o Orson Spencer, o se alii mataalia, ma aoaoina lelei. Sa ola a’e o ia i Boston ma sa aoaoina ma sa lelei lona atiina ae. E toaono le la fanau ma Orson. Ina ua tuua Navu, sa fai ifo lona soifua maloloina ona o aafiaga o le tau ma faigata. Na tusi atu Elder Spencer i matua o le tamaitai ma talosaga atu i ai pe mafai ona toe foi atu latou te nonofo faatasi a o ia fausiaina se fale mo ia i Sisifo. Na tali atu i laua: “Tuu atu ia te ia e lafoai i lona faatuatuaga, ona mafai lea ona toe foi mai—ae le mafai seiloga na te faia.” E le’i lafoaia e Sister Spencer lona faatuatua. Ina ua faitau atu ia te ia le tusi a ona matua, sa ia fai atu i lona toalua ina ia aumai lana Tusi Paia ma sa ia faitau ai mai le tusi a Ruta: “Aua e te finau ia te au ina ia ou tuulafoai ia te oe; ia le mulimuli atu ia te oe; aua o le mea e te alu i ai, ou te alu ai foi; o le mea e te nofo ai, ou te nofo ai, e fai lou nuu mo’u nuu; e fai lou Atua moAtua” (Ruta 1:16). Na agi mai le afa, ma tutulu luga o taavale toso, ma sa taofiofi e uo ia apa taususu i luga a’e o le ulu o Sister Spencer ina ia malu ai o ia. O nei tulaga, e aunoa ma se upu na faitio ai, na moeiini ai ona mata mo le taimi mulimuli.10 E ui atonu e le talafeagai ona faamaimauina o tatou ola i le galuega a lo tatou Atua, ae mautinoa lava e mafai ona tatou faaali atu lo tatou alolofa mo Ia e ala i le lelei o le auala tatou te auauna atu ai ia te Ia. O Ia le na te faafofogaina a tatou tatalo, o Ia le na te matauina a tatou gaoioiga e le lagonaina, o le a tauia faaaliali i tatou pe a tulai mai se tulaga manaomia. Afai e oo mai le masalosalo ia te oe, ia tau lava ina e fai atu i na manatu masalosalo, faasoesa, ma faatautee: “Ua ou manatu ou te tumau i lo’u faatuatua, faatasi ma le faatuatua o o’u tagata. Ou te iloa o loo i ai iina le fiafia ma le lotomalie, ma e ou te le faatagaina manatu le talitonu, manatu masalosalovale i le faaleagaina o le fale o lo’u faatuatua. Ou te tautino atu faapea e le mafai ona ou faamalamalamaina vavega o le Tusi Paia, ae ua ou taliaina le afioga a le Atua. Ma te le’i mafuta ma Iosefa, ae ou te talitonu ia te ia. E le’i oo mai lo’u faatuatua e ala i le faasaienisi, ma o le a ou le faatagaina le mea ua ta’ua nei o le faasaienisi e faaleagaina. Afai e suia lo’u mafaufau e uiga i le Atua ma Lana galuega, e na o musumusuga mai le Atua o le a suia ai.” Faavaa lou olaga i le faatuatua. Afai e te filifilia ma le faaeteete au uo, fuafua lou lumanai ma se faamoemoega, ma faavaaina lou olaga i le faatuatua, o le a e mauaina le mafutaga a le Agaga Paia. O le a e maua se faamoemoe susulu atoatoa. O le a e molimau e ala i ou aafiaga i le moni o le folafolaga a le Alii: “O au le Alii, ou te alofa mutimutivale ma faapalepale i e matata’u ia te au, ma fiafia lava e faamamalu i e auauna mai ia te au i le amiotonu ma le upumoni e oo i le iuga. E sili lava lo latou taui, e faavavau foi lo latou mamalu” (MFF 76:5–6). Ou te molimau atu ai i nei upumoni atoatoa ma tuuina atu faamanuiaga a lo tatou Tama Faalelagi i luga o outou taitoatasi, i le suafa o Iesu Keriso, le Alii, amene. Faamatalaga 1. Fatuga a Joan Whitney ma musika na saunia e Alex Kramer, “Far Away Places,” 1948. 2. Tagai James Patterson and Peter Kim, The Day America Told the Truth: What People Really Believe About Everything That Really Matters (1991). 3. Euclid to Ptolemy I, from Proclus, Commentary on Euclid, Prologue. 4. Carl Schurz, address, Boston, Ape. 18, 1859. 5. http://religiouslife.stanford.edu/memorial_church/inscriptions.html 6. Tagai Harold B. Lee, i le Conference Report, Oct. 1952, 17; Thomas S. Monson, i le Conference Report, Ape. 1982, 84. 7. Alan Jay Lerner and Frederick Loewe, Camelot, 1960. 8. Thomas S. Monson, i le Conference Report, Ape. 2000, 70; po o le Ensign, Me 2000, 54; tagai foi Mark E. Petersen, i le Conference Report, Ape. 1952, 104. 9. I le Stuart Hample and Eric Marshall, comp., More Children’s Letters to God (1967); Hample and Marshall, Children’s Letters to God: The New Collection (1991). 10. Tagai Nicholas G. Morgan, “And Thus History Was Made,” Improvement Era, Iulai 1940, 399; tagai foi Preston Nibley, Exodus to Greatness (1947), 132–35.