O Amataga

Peresitene James E. Faust

Fesoasoani Lua i le Au Peresitene Sili

Faeasaite a le OAE mo Talavou Matutua • 7 Me, 2006 Inisititiuti o Mataupu Faalelotu a le Iunivesite a Iuta

Peresitene James E. Faust Faafetai atu, Peresitene Price, mo na faaupuga agalelei. Na ta’u mai e Peresitene Hugh B. Brown ia te au i se tasi taimi, “E leai se afaina o le faalogo i nei mea lelei e uiga ia te oe, pe afai e te le manavaina i totonu.”

E atoa i le afiafi nei le fa o vaiaso talu ai na ou pau ai i lalo. O lea ua ou faasolosolo manuia; ae tatau lava ona ou faaeteete i lo’u femigoia’i. Ou te aumaia ia te outou alofaaga ma moomooga o Peresitene Gordon B. Hinckley ma Peresitene Thomas S. Monson. O loo manuia lava Peresitene Hinckley, o loo manuia. I lo’u lava manatu e leai se isi tulaga e sili atu nai lo le mea o i ai nei o ia. O le mea moni lava, e matuai maeu le manino o lana tofa ma lona malosi o loo i ai nei.

O le a le umi sa’u tautalaga i le afiafi nei. E sili ia te au le tuu atu o le avanoa ia te outou le autalavou e fegalegaleai ai, ma ou te uunaia outou ina ia faapena ona fai. O le a tatou faia se faamavaega faapitoa i lenei afiafi, afai tatou te taufai faatofa atu le tasi i le isi i le maea ai o le afiafi, e mafai ona outou lulu lima. Ua ou vaai atu i le toatele o tamaitai talavou lalelei ma alii talavou aulelei, ma ou te faapea atu i alii talavou, “Pupula o outou mata!” Ma e ou te toe fai atu i alii talavou: “Afai tou te faia ia galuega, o le a ou tuuina atu le faatuatua.”

Ou te talisapaia le avanoa ou te lauga atu ai ia te outou le au aooga ma paaga i lenei faasalalauga faasatelite. O se fiafiaga sili foi le feiloai atu i faiaoga o le inisititiuti ma o outou taitai, o nisi ua faamanuiaina ai a’u i le tele o tausaga talu ona matou masani.

Ou te fia faaaogaina e avea ma a’u autu se vaega o le savali a Paulo i Tesalonia: “Le au uso e, e ua alofagia e le Alii . . . na filifili le Atua ia te outou nai le amataga ia faaolaina i le faapaiaina e le Agaga, ma le talitonu i le upumoni” (2 Tesalonia 2:13). Ua ta’u mai i i e Paulo, na filifilia outou mai le amataga. E tele amataga. O nisi o outou ua amata nei a outou matafaioi taua faaleaoaoga. O le auala e te amata ai ae pe o fea foi e te agai i ai e silisili ona taua lena. Fai mai Paulo, sa filifilia outou i le faaolataga “i le faapaiaina e le Agaga ma le talitonu i le upumoni.” Se’i o tatou saga talanoa e uiga i amataga.

O Le Amataga

E mafai ona avea lenei mea ma se amataga mo oe i le afiafi nei.

A o o’u talavou e masani ona ou alu i tuuga tamo’e i le aoga maualuga faapea foi i le iunivesite mulimuli ane. E masani ona matou koleni ma le ma’elega mo le tuuga. Matou te lu’iina i matou lava e ala i lo matou taufetuli i le mamao e sili atu nai lo le mea e fai ai le tuuga. Matou te faaeteete i meaai matou te aai ai. E tele mea matou te faia e sauniuni ai i matou lava mo a matou tauvaga. Ae o tuuga pupuu, e sili atu le taua o le amataga. Matou te fuaina ma le faaeteete le mea matou te tutu ai—ona toe siaki foi lea a’o le’i tuuina a matou fasipoloka amata i le tulaga e faaoso mai ai. Matou te tu’itu’ia a matou fasipoloka amata i le palapala, ona matou tutu ai lea i tulaga e amata ai ma tamoemoe atu i luma ma tua mo ni nai taimi ina ia taufaamasani ai. E masani lava pe faalua pe faatolu ona faataitai le faaosoga. Sa matou iloaina afai matou te le saunia ma faia se amataga lelei, e le mafai ona i ai so matou faamoemoe e mua se isi i luma. Na tuuina mai e le Aposetolo o Paulo lenei aoaiga matagofie: “Tou te le iloa ea, o e tausinio i le ala tanu, e tausinio uma i latou, a e maua le taui e le toatasi? Ia faapea ona outou tausinio, ina ia outou maua” (1 Korinito 9:24). Ia, o le taui, o le ola faavavau.

Ua ou iloaina e toetoe lava o soo se mea e ausia, o le vaega e aupito sili ona faigata o le amataga lea. Na fai mai se alii poto, “O le tagata ua afa se galuega o loo fai, o lona uiga sa ia faia se amataga.”¹ O lo’u tama o se loia ma o se faamasino foi. Ina ua amata faata’ita’i ona ou galue faaloia, sa ia lapata’ia a’u: “Ia mautinoa ua sa’o tagi tusitusia i le amataga. Afai e sa’o ia tagi tusitusia, o le a matua sologa lelei le faamasinoga.”

O Amataga Fou

Ou te faafetai lava mo amataga fou uma. E mafai ona avea itula taitasi uma ma se amataga fou. E mafai ona avea aso taitasi uma ma se amataga fou. E mafai ona avea masina taitasi uma ma se amataga fou. E mafai ona avea tausaga taitasi uma ma se amataga fou. Ioe, e mafai ona avea minute taitasi uma ma se avanoa e faaleleia ai.

Na tuuina mai e Dale Carnegie le fautuaga lelei lava lenei ia i tatou: “Aua e te fefe e fai le mea sili e te mafaia i mea e foliga mai o ni galuega laiti. O taimi taitasi uma lava e te faatoilaloina ai le tasi, e faateleina ai foi lou malosi. Afai e te faia lelei nai galuega laiti, e foia lava e galuega tetele i latou lava.“

O Avanoa Fou

I nai tausaga ua mavae sa i ai ni kamupani tetele sa soofaatasia, o pisinisi ua gau, ma faiga faaalatua i mea tau pisinisi. O iinei i le Iunaite Setete, sa tatou onosa’ia ai mea matautia na tutupu i le aso 11 o Setema ma ona aafiaga ina ua mavae. Sa feagai foi i tatou ma lologa, o afa, mafui’e, ma isi faalavelave matuia i le lalolagi atoa. O se taimi o lapataiga ma faaleoleo. Peitai, o i latou na lava le lototetele, lava le magafagafa, lava le fatufatua’i, ma lava le atamamai, sa matua faateleina lava avanoa. E mapuna mai i mala matautia taitasi uma lava se avanoa. Ina ua mu le fale suesue o Thomas Edison, sa amata loa lava i le aso na sosoo ai ona ia toe fausia, ma o se fale sa sili atu.

I Leicester i Egelani, o loo i ai ni upu o loo vaneina i luga o le puipui o se falesa tuai, o se faaupuga matagofie lava. E faapea le faitauina o ia upu: I le tausaga e 1653 ina ua faatafunaina pe faaleagaina foi mea uma i lenei atunuu, sa faavaeina ai e Sir Robert Shirley Baronet, ma fausia lenei falesa. E tuuina atu le faaneetaga tele i le tamalii na faia le mea silisili i taimi sa matuai sili ona leaga, ma sa faamoemoe ina ia mafai ona faia mea lelei a o feagai ma mea e sili ona matautia.”²

O nisi taimi a o tatou feagai ma amataga fou, e moomia ai ona suia pe toe fetuuna’i lo tatou ala pe afai e le o avanoa mo i tatou se sini po o se filifiliga sa tatou mafaufau i ai. Mo se faataitaiga, atonu e le taliaina oe i le aoga sa e manao lava e te a’oga ai, pe ua tapunia foi le faitotoa i le faamoemoega tau galuega sa e manao e tulimata’i, pe ua filifili foi se tagata faapitoa i lou olaga e faaipoipo i se isi tagata. O taimi faapena, e taua ai lou iloa o loo i ai isi filifiliga o loo avanoa mo oe ma e mafai foi ona i ai ni amataga fou. E moni lava, a tapuni mai le tasi faitotoa, o le a matala mai le isi faitotoa.

Sa i ai nisi o a matou uo talavou sa aoaoina le faiga o le pisinisi e valita ai auala e ala i le faigaluega ai lea i se kamupani valita mo ni tausaga. Sa foliga mai e le maua ni avanoa i tofiga pule faapea ma le avanoa e umia ai i totonu o lena kamupani, o lea sa tonu ai loa o le a amataina la latou lava kamupani. E moni sa tele ni toatuga. O se tasi o toatuga o le le lava lea o le tupe faavae. O lona uiga e tatau ona latou faia se faaunegatupe e faalava ai le tupe faavae e faagaoioia ai. E tatau foi ona lava se tupe mama latou te maua, e totogi ai le tului o le faaunegatupe. Sa latou sailia le fautuaga a se uso o lo latou tama, o se tamalii e manuia ana pisinisi, ma sa ia fai atu ia te i latou, “O le taimi lenei. E le toe i ai lava se isi taimi e sili atu. O la’u fautuaga ia te outou, o le gaoioi loa.” Sa latou gaoioi loa, ma o le faafoeina ma le faaeteete o si a latou tupe faavae utiuti sa i ai, sa mafai ai ona latou amataina le pisinisi ma sa matua faamanuiaina lava i le tausaga muamua.

A’u uo talavou pele e, o le 2006 ma tausaga uma lava taitasi o se tausaga mo avanoa fou. Sa faataatia e Charles Dickens le faavae mo lana tusi, A Tale of Two Cities i le folasaga lea: “O se vaitaimi pito sili lava lena, o se vaitaimi pito leaga foi lea, o le vaitausaga o le atamai, o le vaitausaga o le faavalevalea, o le vaitaimi o le talitonu, o le vaitaimi foi o le le fia talitonu i se mea; o le vaitau o le Malamalama, o le vaitau foi o le Pogisa, o le totogo a’e o le faamoemoe, o le taumalulu foi o le lotovaivai; sa folasia i o tatou luma mea uma, sa augapiu foi ma se mea i o tatou luma.”

O Le Lototoa e Suia Ai

E leai se mea e tumau. E suia mea uma. Tatou te manaomia le lototoa e faia ai suiga talafeagai i o tatou olaga. Sa fautuaina mai e le faitofa magafagafa o Bruce Barton e faapea: “O faatinoga uma lava e i ai le faafeagai, e gau atu le tai ma toe fana’e mai, o le tofotofoga foi ma le sese, o le suiga—o le mamanu lea o le olaga. O se taunuuga o le soona talitonu, o le atuatuvale; e fanau mai le atuatuvale, le vaaiga e manino atu, o le faamoemoe fou. E mapuna mai i le faamoemoe, le alualu i luma.”³

Mo i latou o e mafai ona fetuuna’i, o e e mafai ona lolo’u, o e e mafai ona fesuia’i, o e e mafai ona faaleleia, o loo i ai se avanoa tele. O nisi taimi tatou te manaomia ai le malosi, ina ia aua nei o tatou faamatuu atu i o tatou atuatuvalega. E manaomia ai i lea tulaga le lototoa.

Sa ta’ua e Nehru, le taitai maoae o Initia: “E leai lava se mea ola o loo i le lalolagi e tumau ona le suia. E suia natura uma mai lea aso i lea aso, o lea foi minute i lea minute, e na o e ua oti e le toe ola ma ua fifilemu. E gaoioi foi le vai mama, ma afai e te taofia, o le a to’a. E faapena foi i le ola o le alii [ma le tamaitai] ma le ola o se atunuu.”⁴

O Amataga Fou Faaleagaga

Talu ai ona o le agaga o le auga taua lea o gaoioiga uma a le tagata, o lea e matua taua ai lava ona i ai ni o tatou faafouga faaleagaga e faifai soo ma faifai pea. E tatau ona tupu ia i tatou i vaiaso taitasi pe a tatou aai ma feinu i le faamanatuga. O vaiaso taitasi tatou te maua ai ni avanoa fou e faaleleia atili ai, e aoao ai, ma faia ni uo fou. E mafai ona tatou faaaogaina luitau fou mo galuega faafaifeautalai i a tatou uo ma tuaoi. O aso taitasi uma lava tatou te maua ai se avanoa fou e suesue ai i tusitusiga paia.

Ou te fia fautuaina atu ni amataga se lima, o ni fuataga taua ia o le a matuai faamaninoina ai le ala e tafe mai ai i aso taitasi le “vai ola” mai le puna tonu o le vai, o le Togiola lava Ia.

1. Ia i ai ni fesootaiga i aso taitasi e aofia ai le tatalo. O se tatalo faamaoni, ma le loto, o se fesootaiga fetalia’i lea o le a tele sona sao e tafe mai ai pea Lona Agaga e pei o le vaifofo e fesoasoani i tofotofoga, o faigata, o mafatiaga ma mea tiga e feagai ma i tatou uma. O le a le lelei o le tulaga o a tatou tatalo faalilolilo pe a na ona Ia faafofoga i ai? Pe a tatou tatalo, e tatau ona tatou mafaufau o loo latalata mai o Ia; e tumu i le atamai, malamalama, alofa, ma le alofa mutimutivale; o le auga lea o le mana, ma o loo i ai faamoemoega sili mo i tatou taitoatasi.

2. Ia tuu atu se auaunaga le faatuaoia i aso taitasi i se isi. O soo o le Keriso paia e tatau ona faamasinoina i a latou amioga po o galuega ae le o mea latou te fai mai ua talitonu i ai. O le fuafaatatau tonu o le auauna atu o loo maua lea i le Mataio: “Aua na faia e outou i le tasi o e aupito itiiti . . . , o a’u lea na outou faia i ai” (Mataio 25:40). O i latou e sili atu lo latou mafaufau i isi tagata nai lo i latou lava, ma faia galuega lelei o le auauna atu, o tagata aupito sili na ona fiafia i taimi uma. E moni lava, e pei ona matauina e se alii poto, “O le tagata e ola na o ia lava ma mo na o ia lava, e ono faaleagaina o ia e i latou o loo latou fegalegalea’i.”⁵

3. Taumafai i aso taitasi e faateleina le usiusitai ma le faaatoatoaina i o tatou olaga. O lona uiga e tatau ona tatou taumafai ma le mataala i aso uma e tausia poloaiga a le Atua. O lona uiga, o le mataituina o o tatou mafaufauga ma mea e fai ma o aso taitasi “e taumafai ia faapei o Iesu,” e pei ona ta’u mai i le pese a le Peraimeri.⁶ Talu ai ona o le Togiola atoatoa a Iesu, ua mafai ai ona faaatoatoaina tagata amiotonu (tagai MFF 76:69). E pei ona apoapoai mai Iesu lava Ia: “Pe faapefea la outou amio e tatau ai? E moni, ou te fai atu ia te outou, e pei lava o a’u nei” (3 Nifae 27:27).

4. Ia tuuina atu i aso taitasi se faalauiloaina o Lona paia. Ina ia i ai se sootaga patino a le tagata ma le Matai i aso taitasi, e ao ona avea i tatou ma Ona soo ma faalauiloa atu Lona taua i o tatou olaga. E pei ona faamanatu mai e le Tupu o Peniamina ia i tatou, “Aua pe faapefea ona iloa e le tagata le alii e lei auauna i ai o ia, o le tagata ese foi ia te ia, ma ua mamao i manatu ma manao o lona loto?” (Mosaea 5:13).

5. Ia auai i le suesueina o tusitusiga paia i aso taitasi. O lenei mea e manaomia ai ni fuafuaga faataatitia ma le amio pulea, peitai o le suesue i tusitusiga paia o le a faamalosia ai lo tatou faatuatua ma fesoasoani ai ina ia tatou saga ola atoatoa ai i le talalelei. Na saunoa mai Peresitene Spencer W. Kimball: “Ua ou iloaina afai ou te manatu mama i a’u sootaga ma le Atua, ma a oo ina foliga mai e leai se isi o faafofoga mai, ma leai se siufofoga paia o tulei mai, o lona uiga ua ou matua mamao, mamao ese lava. Afai ou te faatofuina a’u i tusitusiga paia, ona faaitiitia ai lea o le mamao ma toe foi mai ai le faaleagaga.“⁷

6. Ia Faia Se Mea. Ua fai i tatou e le televise ma se malo o tagata matamata. O tauvaga sili lava i taaloga i le lalolagi e aumai fua i o tatou fale e aunoa ma se totogi. Ua tatou mauaina ia musika aupito sili ona lauiloa i alaleo faasalalau faalauaitele. E mafai ona tatou faalogologo ia Itzak Perlman o tata le vaiolini. E mafai ona tatou lagona le leomalie maoae, o Pavarotti, i le usuina o pese lauiloa a Caruso: o le “Torna Surriento,” “La donna e mobile,” “Questa o quella,” ma matamata atu ia te ia a o usuina. Peitai, o le avea ma tagata matamata, e laitiiti lava pe leai foi se galuega tatou te faia ai. E pei ona fai mai le Aposetolo o Iakopo, e ao ina avea i tatou ma “e anaana i le upu, a e aua le na ona faalogologo i ai“ (Iakopo 1:22).

Ou te popole ua avea i tatou ma se augatupulaga o faitioga. E tau sili atu lo’u alofa ia i latou o e taumafai tusa lava pe tautevateva nai lo i latou e le taitai lava ona taumafai. Fai mai Theodore Roosevelt e uiga i le au faitio ma i latou o e anaana ma fai: “E le o le tagata e faitio e taulia, e le o le tagata na te ta’u maia le tautevateva o le tagata malosi, po o le mea semanu e sili lona faatinoga e le tagata na faia. O le ta’uleleia e faasino tonu i le tagata o loo i totonu o le malae, ua iloga ona foliga i le pefu ma le afu ma le palapala; o le e taumafai ma le lototoa; e i ai ona sese; e toilalo ma toe toilalo ma toe toilalo foi, aua e leai lava se taumafaiga e aunoa ma se sasi ma se toilalo; peitai o le tagata tonu lava o loo taumafai e faia le galuega; na te iloa le naunautaiga tele, o le faamaoni naua; o le e faaalu lona taimi i se mafuaaga tatau; na te iloa i le faaiuga le fiafia ona o se tulaga maualuga ua ausia, po o le toilalo foi ona o le sailiga o se manumalo maoae, ma o le a le faitaulia lava o ia ma i latou o e fefefe e taumafai o e latou te le iloa ona manumalo pe faiaina.”⁸

Sa ou faaaluina lo’u olaga i se malae ou te ola ai, ma ou te le’i faatagā fusu ai ma faafitauli o le olaga. Ua ou aoao mai i lenei aafiaga e sili atu ona atoatoa ma tamaoaiga le olaga ma sili atu mo i latou e le fefefe e faia se amataga fou. Na ou iloa ai foi, o le tomai maoa’e faanatura e le laumaua, ma o le tele lava o taui sili ona tamaoaiga o le olaga e maua e i latou o e sauniuni ma le faaeteete. O le saunia ma le tumau maua’i e sili atu ona taua nai lo le poto. Na ta’ua ma le malamalama lelei e Herbert George Wells, “O mea ua tuana’i, o le amataga lava lea, ma o mea uma o i ai ma sa i ai, ua na o se amataga o mea e mafai ona fai.“⁹

I ni nai tausaga ua mavae sa ou auai ai i se konafesi faalesiteki. A o le’i amataina isi sauniga o le konafesi, sa faia se ma fonotaga na o ma’ua ma le peresitene o le siteki, sa manao ma te talanoa i se faafitauli i le va o ia ma se tasi o ana fautua maualuga. Pe tusa ma se 10 tausaga ua tuanai, sa aafia ai le fautua maualuga lenei i se agasala matuia, ma o le faasalaga sa tatau ona i ai o le tape lea o lona igoa mai le Ekalesia. E lei ta’uta’uina atu lava e le fautua maualuga lea agasala. E ui i le le ta’uta’uina atu ma naunau e talia le faasalaga o le a mulimuli mai ai, sa faia e le fautua maualuga mea uma na te mafaia i lona malosi e faasa’o ai le mataupu ma ola ina ia olioli ai i faamanuiaga o le Ekalesia. E le’i iloa e le peresitene o le siteki le solitulafono mai le fautua maualuga, ae mai se isi tagata lea na talosagaina le peresitene ina ia natia. Sa manatu le peresitene o le siteki e ao ona ia tausisia lea faatuatuaga.

I se sauniga faitele sa i ai le fautua maualuga, sa lauga ai le peresitene o le siteki e faatatau i le salamo. Sa matuai tuusa’o atu lava ana saunoaga i le tagata e toatasi—o lena fautua maualuga—ma aioi atu ai ma faatauanau atu ina ia sau lava ia i lona loto malie, e ta’uta’u atu lana solitulafono, ma amata savalia loa le ala i le salamo.

Sa tiga lo’u loto ona o le fautua maualuga aua ana faapea e sau lava ia ina ua faatoa tupu le faafitauli, semanu e oo mai i lena taimi ua uma ona foia le mataupu. E mafai lava ona i ai sona amataga fou. Peitai, a aunoa ma lona ta’uta’u atu ma naunau e talia le faasalaga, e le mafai lava ona i ai se amataga fou. E moni lava, o le salamo o se tasi lea o mataupu faavae sili o le talalelei. E leai lava se tasi e atoatoa, ma tatou te manaomia uma lava ona faaaoga lenei mataupu faavae mai lea taimi i lea taimi. Peitai, o i latou sa aafia i solitulafono matuia, o se mataupu faavae e lavea’i ai le ola. O le umi ona tatou o ifo i lalo i le auala sese, o le tele foi lena ona faigata ona toe foi mai ma agai atu i le ala sa’o.

Ou te fia faailoa atu lo’u agaga talisapaia ona o mataupu faavae togiola o le talalelei matagofie a Iesu Keriso. O mataupu faavae sa aoao mai e Iesu ua avanoa mo i tatou uma lava. A tatou ola ai i nei mataupu faavae, o le a tatou maua se molimau mautinoa o le paia o lenei galuega. Ou te talitonu, e pei ona fai mai Paulo, ua alofagia outou e le Alii, aua na filifili le Atua ia te outou nai le amataga ia faaolaina (tagai 2 Tesalonia 2:13). E pei ona aoao mai e Alema, ua ia i tatou valaauga paia “na saunia talu le faavaeina o le lalolagi” (Alema 13:5). E aofia ai le auaunaga faafaifeautalai, tulaga faatina, tulaga faatama, ma le auauna atu i le Ekalesia.

O lo’u avanoa ma le faamanuiaga lenei le tuuina atu o la’u molimau ma faamanuiaga. Ou te faia o se tasi o molimau faapitoa, e tautino atu ai ia te outou faatasi ai ma le talitonuga maumaututu uma o lo’u tagata ma vaega uma o lo’u tino mai lo’u tumua’i seia oo i o’u alofivae, o Iesu o le Keriso ma le Togiola o le lalolagi ma lo tatou Faaola, o le ao o lenei Ekalesia. Ou te iloa o loo latalata o ia i le taitaiga o lenei Ekalesia. Ou te iloa o loo avanoa Lona agaga mo i tatou uma taitoatasi faapea i o tatou valaauga. O loo soifua o Ia. E le fesiligia lena mea. E mafai ona ou tautino atu faatasi ma lena lava talitonuga maumaututu ma le mautinoa, e faapei o le uso o Iareto. Ina ua ia vaai i le tamatamailima o le Atua, o loo tusia, e lei toe talitonu o ia, aua ua ia iloa (tagai Eteru 3:6, 19).

Ua ou iloa, ma ou te tautino atu i upu a Peteru. Ina ua amata ona pauu ese atu nisi o le Au Paia, ma ua amata ona tau faavaivai le Faaola ma fetalai atu i le Toasefululua, “Pe tou te fia o ese foi?” Ona tali atu lea o Peteru: “A matou o ea ia te ai? o ia te oe upu o le ola e faavavau. Ua matou talitonu, ma ua matou iloa o oe o le Keriso, o le Alo o le Atua soifua” (Ioane 6:67—69). E ala foi i lena lava pule e tasi, ou te molimau atu ai e faatatau i Lona paia ma Lona tagata, ma ua ou iloaina ma se mautinoa e sili atu i lo le iloa tatou te maua mai i le vaai o o tatou mata, aua ua tuuina mai ia te i tatou e le Agaga ia iloa ma le mautinoa e sili atu nai lo o tatou sane faaletino.

Ou te fia talosagaina i o outou luga se faamanuiaga faaaposetolo, o outou o tupulaga talavou ofoofogia, o outou o tagata o le folafolaga, ma ou te tatalo ina ia outou saunia outou lava mo lo outou taunuuga maoae, ina ia outou ola i mataupu faavae o le amiotonu ma le upumoni, ina ia taialaina outou e le Agaga Paia faatasi ai ma le folafolaga ua outou iloa e uiga i le Agaga Paia, o le mana lava lena tou te iloa ai le moni o mea uma. O le a se isi folafolaga e sili atu mo se tamaitiiti aoga nai lo lena—ia olioli i le mafutaga ma le Agaga Paia? Ou te talosagaina lena faamanuiaga i o outou luga ma tatalo ina ia leoleo outou e lo tatou Tama Faalelagi i lo outou ulufafo ma lo outou ulufale ma taialaina o outou vae i ala o le upumoni ma le amiotonu, ma ia sili atu lo outou atamamai nai lo o outou tausaga, ma ia outou mataala i lo outou taunuuga sili ma lo outou folafolaga sili. Ou te tuuina atu ai lenei molimau ia te outou ma talosagaina nei faamanuiaga i o outou luga i le suafa o le Alii o Iesu Keriso, amene.

Faamatalaga

1. Horace, Epistles, book I, epistle ii, line 40.

2. Tusitusiga o loo i le faitotoa i sisifo o le The Church of the Holy Trinity i Staunton Harold Chapel Leicestershire, Egelani; see www.boultbee. freeserve.co.uk/bfh/shc.htm.

3. I le The International Dictionary of Thoughts (1969), 117.

4. Jawaharlal Nehru, i le International Dictionary of Thoughts, 118.

5. Charles Henry Parkhurst, i le International Dictionary of Thoughts, 659.

6. “O Loo Ou Taumafai e Avea e Pei o Iesu,” Tusipese a Tamaiti, 40.

7. “What I Hope You Will Teach My Grandchildren” (address to seminary and institute personnel, Brigham Young University, July 11, 1966), 6; see also The Teachings of Spencer W. Kimball, ed. Edward L. Kimball (1982), 135.

8. Address at the Sorbonne, Paris, France, Apr. 23, 1910, in “Citizenship in a Republic,” chap. 21 of The Strenuous Life, vol. 13 of The Works of Theodore Roosevelt (national ed., 1926), 510.

9. The Discovery of the Future (1901).