O MEAALOFA A LE AGAGA MO TAIMI FAIGATA

Elder Henry B. Eyring

O Le Korama a Aposetolo e Toasefululua

Faeasaite a le OAE mo le Autalavou Matutua • 10 Setema, 2006 Iunivesite o Polika Iaga

Elder Henry B. Eyring Ou te faafetai mo le musika matagofie ma le Agaga ua aumaia ai. Ou te faafetai mo lenei avanoa ua tatou mafuta ai i lenei afiafi. O le toatele o outou o loo i ai i le Marriott Center i le Iunivesite o Polika Iaga. E fiaafe isi o loo faafofoga mai ma maimoaina i atunuu eseese o le lalolagi. E le o mafai ona ou iloa atu outou uma, peitai e mafai e lou Tama i le Lagi. Na te silafia lou igoa ma mea e te manaomia. Na te silafia lou loto. E tofu outou ma lu’itau uiga ese. Ou te tatalo ina ia musuia a’u ou te tautala atu i upu e finagalo o Ia tou te faalogo ai.

Faamanuiaga ma Luitau o Aso Mulimuli

Faatasi ai ma o tatou uiga tulaga ese uma, e i ai ni nai mea e laugatasia ai i tatou uma. O loo tatou i ai uma i le suega faataitai o le olaga. Ma, pe o fea lava tatou te nonofo ai, o le a matua faateleina lava le faigata o lena suega. Ua tatou i ai nei i le tisipenisione mulimuli o taimi. Sa vaai perofeta a le Atua i nei taimi mo le meleniuma. Sa latou vaaia e i ai mea matagofie e tatau ona tutupu. O le a i ai se toefuataiga o le talalelei a Iesu Keriso. O le a toe faafoi mai le Ekalesia, faatasi ai ma perofeta ma aposetolo. E tatau ona auina atu le talalelei i nuu uma, o ituaiga, gagana ma tagata. O le mea aupito ofoofogia i mea uma, o le Ekalesia moni ma ona tagata, e tatau ona agavaa mo le afio mai o le Faaola i Lana Ekalesia, ma Ona soo ua faaatoatoaina.

Peitai, sa vaai foi perofeta moni, o le a matamataita Satani i aso mulimuli. O le a i ai taua ma tala i taua. O le a oo mai le atuatuvale ona o lena mea. O le a uma le lototoa o le toatele. O le a i ai le amioleaga tele. Ma o le a faasese e Satani le toatele.

Ae, e fiafia, ona e toatele o le a lē faatoilaloina. E toatele foi o le a lē faaseseina. O le mea moni, o lo outou i ai iinei e faalogologo mai i lenei po, o se faamaoniga lena tou te mananao tou te i ai ma i latou o le a le faatoilaloina, ma o le a le faaseseina foi. Ou te faamoemoe e aoao atu outou, i auala e mafai ai ona outou ausia lena sini fiafia ma le viia.

O Le Agaga Paia o le Ki Lea

O le ki mo i tatou taitoatasi o le talia ma le tausisia lea o le meaalofa ua folafola mai mo i tatou e le Atua. O outou na o tagata o le Ekalesia moni a Iesu Keriso, o le a manatua, ina ua uma ona e papatiso, sa folafola atu ia te oe e auauna faamaonia a le Atua e mafai ona e mauaina le Agaga Paia. Atonu na lagonaina e nisi o outou se mea na tupu ina ua faataunuuina lena sauniga. O le toatele lava o outou ua lagonaina aafiaga o le faataunuuina o lena folafolaga i o outou olaga. O le a ou faamatala atu i le po nei pe faapefea ona e iloa lena meaalofa, pe faapefea ona mauaina i aso taitasi o lou olaga, ma pe faapefea foi ona faamanuiaina ai oe i le lumanai.

Sa e lagonaina le faamaoniga lē leoa i lou loto ma lou mafaufau, ua i ai se mea moni. Ma sa e iloaina, o se musumusuga lena mai le Atua. O nisi o outou, atonu na oo atu [lena lagona] a’o aoaoina oe e faifeautalai a’o loma lou papatisoga. Atonu foi na oo mai i se taimi o se lauga po o se lesona i le lotu. Atonu foi ua oo mai i lenei po, ina ua ta’ua pe usuina foi i se pese se mea moni, e pei ona ou lagonaina ina ua ou faalogologo i le usuina, e pei foi ona lagonaina e nisi o outou. O le Agaga Paia, o le Agaga o le Upumoni. E te lagonaina le filemu, faamoemoe, ma le olioli pe a tautala atu i lou loto ma lou mafaufau, e moni se mea. E toetoe foi o taimi uma lava, ou te lagonaina ai se maniti o le malamalama. E faate’aeseina o’u lagona uma o le pogisa. Ma faatuputeleina ai le mana’o e fai le mea sa’o.

Na folafola mai e le Alii o le i ai o na aafiaga, e moni ia mo oe. O Ana upu nei, o loo tusia i le Mataupu Faavae ma Feagaiga:

“E moni, e moni, ou te fai atu ia te oe, ina faalagolago ia i lena Agaga, e ta’ita’i e fai mea lelei—ioe, e fai ia faamaoni, ma savali ma le lotomaulalo, ia faamasino ma le amiotonu; ma o lo’u lava Agaga lea.

“E moni, e moni, ou te fai atu ia te oe, ou te tuuina atu ia te oe se vaega o lo’u Agaga, o le a faamalamalamaina ai lou mafaufau, e faatumuina foi lou agaga i le olioli” (MFF 11:12–13).

Ua folafola mai e le Alii, o i latou ua taliaina le meaalofa o le Agaga Paia i o latou olaga, o le a le faaseseina lava. Sa Ia fetalai mai ma le mautinoa ia te oe ma a’u, o ē ola i le taimi ina ua saunia ai le Ekalesia mo le taimi e toe afio mai ai o Ia. O le folafolaga lea mai le Mataupu Faavae ma Feagaiga:

“E faataunuuina foi i lea aso, ou te sau ai i lo’u mamalu, le faataoto na ou fai atu ai e uiga i taupou e toasefulu.

“Aua o e popoto ma sa talia le upu moni, ma avea le Agaga Paia mo latou taitai, a e le’i faaseseina—e moni ou te fai atu ia te outou, e le taia latou i lalo ma lafoina i le afi, a e tumau pea i latou i lea aso.

“E tuuina atu foi le lalolagi e fai mo latou tofi; e faatoateleina ma faamalosia foi i latou, ma a latou fanau e ola a’e i le faaolataga e aunoa ma le agasala.

“Aua o le a faatasi le Alii ma i latou, e i o latou luga foi lona mamalu, e fai foi o ia mo latou tupu ma o latou faitulafono” (MFF 45:56–59).

Faaaliga mai le Agaga

A o e faalogoina na upu i lenei lava itula, atonu foi ua e lagonaina ai se isi taimi na e maua ai se faaaliga mai le Agaga na faapea ona folafola atu ia te oe. E faamatala mai e na upu se ata o le aso e mafai ai ona tatou faatasi ma le Faaola, o lē na fetalai e uiga i taupou e toasefulu ma Lona toe afio mai—ae o le taimi lena i le mamalu. Ma e faamatalaina ai foi se aso e mafai ai ona tatou mafuta ma Ia ma tatou maua Lona mamalu i o tatou luga. Mai mea uma e molimauina e le Agaga Paia, ma ua e lagonaina foi, e leai se mea e sili atu ona taua ia te i tatou nai lo o Iesu o le Keriso, o le Alo soifua o le Atua. Ma e leai foi se mea e tutusa ma lea tatou te lagonaina ai le malamalama, faamoemoe, ma le olioli. O lona uiga, e le o se mea e ofo ai pe a tatou lagonaina le aafiaga o le Agaga Paia, ua mafai foi la ona tatou lagonaina ua suia o tatou natura, ona o le Togiola a Iesu Keriso. Tatou te lagonaina le faateleina o le manao e tausia Ana poloaiga, e faia mea lelei, ma fai mea tonu.

E toatele outou ua lagonaina lena tulaga mai o outou aafiaga faifai soo ma le Agaga Paia. Mo se faataitaiga, i le galuega faamisiona, o nisi o outou e tatau ona e faalagolago i le Agaga ina ia e maua upu e aoao atu ai mea o loo moomia e tagata. E sili atu nai lo le faatasi, ma atonu foi o aso uma lava, e i ai ia te oe le faamanuiaga na faapea ona maua e Nifae ma Liae i tagata i la la’ua misiona, lea o loo faamatala mai i le Helamana:

“Ma ua oo ina tala’i atu e Nifae ma Liae i sa Lamana ma le mana tele ma le pule, aua ua tuuina mai le mana ma le pule ia te i laua ina ia la tautala atu; ma ua foaiina mai ia te i laua upu la te fai atu ai—

“O le mea lea na la tautala atu ai, ua iu ina taufaiofo ai sa Lamana, ma ua mautinoa ai i latou, ua iu ina papatisoina i le salamo sa Lamana e toavalu afe o e na i le nuu o Sara’emila ma ona tuaoi, ma ua mautinoa ai e i latou le leaga o uputuu a o latou tama” (Helamana 5:18–19).

E ui lava atonu e le faamanuiaina oe i se seleselega faavavega, ae na tuuina atu e le Agaga Paia ia te oe upu, ina ua gauai atu lou loto i le galuega a le Alii. E i ai taimi patino o lau misiona e faalausosoo mai ai se aafiaga faapena. Afai e te toe manatu i na taimi ma mafaufau loloto i ai, o le a e manatua ai o le faateleina o lou manao e te usitai i poloaiga, na faasolosolo malie mai. Sa e lagonaina ai le tuuitiitia o lou tau gauai atu i faaosoosoga. Ua e lagonaina le faateleina o lou manao e usitai ma auauna atu i isi. Sa e lagonaina se alofa ua tele atu mo tagata.

O se tasi o aafiaga o le mauaina soo o se faaaliga mai le Agaga Paia, o le suia lea o lou natura. Ma o lea, mai lena auaunaga faamaoni i le Matai, ua le gata ina e maua ai le molimau a le Agaga Paia o Iesu o le Keriso, ae ua e vaaia ai foi le faamaoniga i lou lava olaga, e moni le Togiola. O lena ituaiga o auaunaga, lea e aumaia ai le ta’a’iga a le Agaga Paia, o se faataitaiga lea o le totoina o le fatu, lea na faamatala mai e Alema:

“O lenei foi, faauta, ona ua outou tofotofoina, ma totoina le fatu, ma ua fefete, ua totogo foi, ma ua amata ona tupu, tou te iloa ai lava o le fatu lelei ia.

“A o lenei, faauta foi, po ua outou mautinoa ea? Ioe, ua outou mautinoa lena mea, a ua to’a lo outou faatuatua. O lenei foi, ona ua outou mautinoa, aua ua outou iloa ua faateleina o outou loto i le upu, ua outou iloa ua totogo ae ia, ua amata ona faamalamalamaina ai o outou mafaufau, ua amata foi ona faateleina i o outou manatu.

“O lea, e le moni ea lenei? Ou te fai atu ia te outou, ioe, aua ua malamalama. O se mea foi ua malamalama, ua lelei, aua e iloagofie; o le mea lea tou te iloa ai ua lelei. O lenei foi, faauta, ina ua uma ona outou tofotofoina lenei malamalama, po ua outou mautinoa ea?

“Faauta, ou te fai atu ia te outou, e leai. E le tatau foi ona outou tuu ese lo outou faatuatua, aua ua na ona faaaogaina e outou lo outou faatuatua e totoina le fatu, ina ia outou tau tofotofo e iloa ai pe lelei le fatu.

“Faauta foi, pe a amata ona tupu le laau, tou te faapea, sei tatou tausi ai ma le faaeteete tele, ina ia mau aa, ina ia tupu ae, ma fua mai ni fua mo i tatou. O lenei foi, faauta, afai tou te tausi i ai ma le faaeteete tele, e mau aa, ma tupu ae foi, ma fua mai ni fua” (Alema 32:33–37).

Mauaina o Faaaliga i Aso Uma

O lenei, pe ana faapea e na o oe ma a’u lea ta te talanoa (ou te moomoo maimau pe ana mafai), i se mea e te saoloto ai e fesili mai i soo se mea na e manao e fesili mai ai, e mafai ona ou mafaufau i sau tala faapea: “Oi Brother Eyring, sa ou lagonaina lava nisi o mea sa e faamatala mai. Sa pa’i mai le Agaga Paia i lo’u loto ma lo’u mafaufau mai lea taimi i lea taimi. Peitai, ou te manaomia i taimi uma, pe afai ou te le manao e toilalo pe faaseseina foi. Mata e mafai lena mea? Mata e mafai, ma afai e mafai, o le a se mea e manaomia ina ia maua ai lena faamanuiaga?”

Ia se’i o tatou amata i le vaega muamua o lau fesili. Ioe, e mafai. Soo se taimi lava ou te manaomia ai lena faamautinoaga—ma ou te manaomia foi mai lea taimi i lea taimi—ou te manatua ai se au uso e toalua. Sa feagai Nifae ma Liae ma isi auauna a le Alii sa latou galulue, ma tetee ogaoga. Sa galulue i latou i se lalolagi ua matua faateleina le amioleaga. Sa latou feagai ma ni taufaasese mata’utia. O lea ou te lototele ai—ma e mafai foi e outou—mai upu o le fuaiupu lea e tasi o le Helamana. O loo maua le faamautinoaga i le tala i mea uma na tutupu i se tausaga atoa, e toetoe lava ina lē o se mea e ofo ai le tusitala. Faafofoga foi:

“O lona fitusefulu ma le iva o tausaga ua amata ona i ai le finauga tele. A e peitai, ua oo ina tala’i atu e Nifae ma Liae ma o laua uso e toatele o e na iloa le uiga moni o mataupu, aua ua maua faaaliga i aso fai soo, o le mea lea na latou tala’i atu ai i le nuu, na faaiuina ai lo latou finauga i lea lava tausaga” (Helamana 11:23).

E tele a latou faaaliga na maua i aso taitasi. O lea, ia te oe ma a’u, o le tali lena o lau fesili muamua. Ioe, e mafai ona lava le mauaina o le mafutaga ma le Agaga Paia e maua ai ni faaaliga se tele i aso taitasi. O le a lē faigofie. Peitai, e mafai. O le tulaga e manaomia, o le a eseese mo tagata taitoatasi aua tatou te amata mai le mea o tatou i ai nei i o tatou lava aafiaga i le olaga. Mo i tatou uma lava, o le a i ai pe le itiiti ifo foi i le tolu mea e manaomia. E leai se mea o na mea e mafai ona maua ma faatumauina mai se aafiaga se tasi. E tatau ona faafouina e le aunoa.

Faatuatua i le Atua

Muamua, o le mauaina o le Agaga Paia e manaomia ai le faatuatua i lo tatou Tama Faalelagi ma Lona Alo Pele, o Iesu Keriso. O le manatua o se aafiaga faaleagaga matagofie i sina taimi ua mavae, lea na e faamaonia ai le moni o lena mea, ua lē lava lena. E manaomia lou mautinoa o lou faatuatua i taimi o faigata, lea e mafai ona oo mai i soo se taimi o le aso po o le po, pe a e ole atu mo le uunaiga a le Agaga. Ona tatau ai loa lea ona e le maluelue i lou lagona mautinoa, o loo soifua le Atua, e faafofoga mai o Ia i lau alaga mo se fesoasoani, ma o le a faia foi mo oe e le Faaola toetu mea sa Ia folafola mai e fai mo Ana auauna i Lana galuega i le olaga nei. E te manatua:

“A maliu mai le Fesoasoani, o le ou te auina mai ia te outou mai le Tama, o le Agaga lea e tupu mai ai le upu moni, o le maliu mai mai le Tama, o ia lava e molimau ia te au” (Ioane 15:26).

Sa maua e le auso o Nifae ma Liae faaaliga e tele i aso taitasi. O loo faaalia i faamaumauga, sa la iloaina vaega moni o aoaoga faavae. Mai i aoaoga faavae moni uma, e leai se mea e sili atu ona taua ia te oe ma a’u nai lo le natura moni o le Atua le Tama ma Lona Alo, o Iesu Keriso. Ona o lea, ou te saga fo’i atu ai pea lava i tusitusiga paia. Ona o lea, ou te fo’i ai ma saga fo’i i le tatalo. Ona o lea, ou te saga fo’i ai foi e ‘ai ma inu i le faamanatuga. Ma, e sili atu i lo mea uma, ua ou iloa ai le Atua ma Iesu Keriso e ala i le tausia o poloaiga ma tautua i le Ekalesia. O le galue ma le filiga i le Ekalesia, tatou te iloa ai e le gata i uiga o le Atua ae alolofa ai foi ia te Ia. Afai tatou te mulimuli i Ana poloaiga, o le a tupu lo tatou faatuatua ia te Ia, ona mafai ai foi lea ona tatou agavaa e maua Lona Agaga e faatasi ma i tatou.

O le faatuatua malosi i le Atua e sili ona maua mai i le auauna atu ia te Ia e le aunoa. E le o tatou uma ua maua ni valaauga i tofi o le Ekalesia. Atonu o nisi o outou e le’i valaauina i se mea i se tulaga aloaia, ae e maua e tagata uma o le au paia le anoanoai o avanoa e auauna atu ai i le Atua. Mo se faataitaiga, ua autausaga o tatou faalogoina le fasifuaitau, “o tagata uma lava o se faifeautalai.” E le o se filifiliga lena mea. O se tulaga moni o lo tatou auai. O la tatou filifiliga, o le tautala atu i isi e uiga i le talalelei pe leai. E faapena foi, o tagata taitasi o le ekalesia ua i ai le matafaioi e vaai ma tausia ē matitiva o loo siomia ai i tatou. O nisi o na mea, tatou te faia lava na o i tatou. O nisi, tatou te faia faatasi ma isi o le au paia. O le mafuaaga lena o a tatou taulaga anapogi ma isi galuega faatino o le auauna atu. O la tatou filifiliga, o le fai lea o se tonu pe tatou te auai faatasi ma le Alii ma isi o Ona soo i o tatou taimi, e faapei ona faia e Ia ma Ona soo i le taimi o Lana galuega i le tino nei.

O le toatele o i tatou e i ai valaauga o ni faiaoga o aiga po o faiaoga asiasi. O loo i ai i na valaauga se avanoa tele e tuputupu a’e ai i le faatuatua, e auina mai e le Alii le Agaga Paia i Ana auauna faatauvaa. E fausia ai le faatuatua ma faafouina lo tatou faatuatua ia te Ia. Ua ou vaai i ai, ma e faapena foi i le toatele o outou. Sa ou maua se telefoni mai se tina mafatia i se setete e mamao lava mai le mea na ou i ai. Fai mai a ia, ua siitia lana tama teine e le’i faaipoipo i se isi aai, e mamao ese mai lona aiga. Sa ia lagonaina mai sina fesootaiga laitiiti na maua ma lana tama, e i ai se mea na matuai faaletonu lava. Sa popole le tina mo le saogalemu o le ola mama o lana tama teine. Sa ia aioi mai ia te au ou te fesoasoani i lana tama.

O lea na ou maua ai le faiaoga o aiga mo lana tama teine. Sa ou valaau atu ia te ia. E talavou o ia. Ae sa fagua uma i la’ua ma lana soa i le po, e le gata i le popole i le teine, ae faapea foi i le musumusuga e faapea ua aga atu o ia i le faia o ni filifiliga e oo mai ai le faanoanoa ma le faavauvau. Sa na o le musumusuga a le Agaga, na la o atu ai e vaai o ia. O le taimi muamua, sa le manao le teine e faamatala ia i la’ua se mea e uiga i le tulaga o i ai o ia. Sa aioi atu i la’ua ia te ia, ina ia salamo ma filifili e mulimuli i le ala ua aumai e le Alii mo ia, ma mea na aoaoina ai o ia e lona tina ma lona tama e mulimuli ai. Sa ia iloaina, a o faalogologo, na o le pau le auala na ono mafai ai ona la iloa mea ua la iloaina i lona olaga, o le Atua. Na oo atu se tatalo a se tina i le Tama Faalelagi, ona auina atu ai lea o le Agaga Paia ma se feau i faiaoga o aiga.

E sili atu i le faatasi ona ou faalogo i taitai perisitua o faapea mai, sa musuia i latou e o atu i se tagata o loo manaomia le fesoasoani, ae o atu ua foi mai ai faiaoga o aiga po o faiaoga asiasi. O lou toalua o le o loo ma faatasi mai i lenei po, o se faataitaiga lea. Sa i ai se matou epikopo o le na faapea mai ia te au i se tasi taimi, “E te iloa, e fai ma faalavelave ia te au—pe a ou maua se musumusuga ou te alu i se tagata, ae ou te alu atu ua foi mai ai lou toalua.” O le a tupu lou faatuatua pe a e auauna atu i le Alii i le tausiga o fanau a le Tama Faalelagi, o se faiaoga a le Alii i o latou aiga. O le a tali atu au tatalo. O le a oo ina e iloaina mo oe lava o loo soifua o ia, e alofa o Ia ia te i tatou, ma Na te auina mai musumusuga ia i latou i le amataga o le faatuatua ia te Ia, ma faatasi ai ma le naunau e auauna atu ia te Ia i Lana Ekalesia. Ia mafuta vavalalata i le Ekalesia pe afai e te manao ia tupu lou faatuatua i le Atua. Ma a oo ina tupu, o le a faapena foi lou tomai e te maua ai le folafolaga sa tuuina atu faapea e mafai ona e maua meaalofa a le Agaga.

Tulaga Manaomia ina Ia Mama

O le tulaga manaomia muamua o le faatuatua i le Alii o Iesu Keriso ma lo tatou Tama Faalelagi. O se tulaga manaomia lona lua mo le mafutaga faifai pea ma taitaiga mai le Agaga Paia, o le mamā lea. E tatau ona alo ese le Agaga mai ia i latou e le mama. E te manatua le ata faanoanoa o lena mea i le talafaasolopito o tagata i le Tusi a Mamona:

“Ona o la latou amioletonu, ua amata ai ona tauau ina toaitiiti le ekalesia, ma ua amata ona latou le talitonu i le agaga o valoaga ma le agaga o faaaliga, ma ua faafesagai faamasinoga a le agaga o faaaliga, ma ua faafesagai faamasinoga a le Atua ma i latou.

“Ua latou iloa foi ua vaivai i latou e pei o latou uso o sa Lamana, ma ua le toe faasaoina i latou e le Agaga o le Atua; ioe, ua alo ese o ia ia te i latou, aua e le afio le Agaga o le Atua i malumalu e le paia” (Helaman 4:23–24).

O le auala e maua ai le Agaga Paia, o le faaaoga lea o le faatuatua ia Keriso i le salamo. E mafai ona tatou mama e ala i le ola agavaa mo aafiaga o le Togiola a le Faaola. O feagaiga na ofoina atu i le papatisoga e auauna faamaonia a le Atua, e aumaia ai lena faamamaina. Tatou te faafouina a tatou tautoga e tausia na feagaiga i taimi taitasi tatou te aai ai ma feinu i le faamanatuga. Ma o le filemu o loo tatou sailia uma, o le mautinoa lea ua tatou mauaina le faamagaloga mo a tatou agasala o le lē faia po o le faia foi.

O le Faaola o ia lea na tuuina atu i ai le aia tatau e aumaia ai lena faamagaloga ma aumaia ai lena faamautinoaga. Sa ou aoaoina, e tuuina mai e le Alii le faamautinoaga i le taimi sa’o lena ua Ia filifilia, ma Na te faia foi i Lana lava ala. Ma sa ou aoaoina foi e fesili atu ia te ia i le tatalo. O le auala e tasi Na te aumaia ai lena faamautinoaga e ala mai lea i le Agaga Paia. Afai e faigata ona e lagonaina le Agaga Paia, atonu e tatau ona e manatunatu ma le faautauta pe o i ai se mea e tatau ona e salamo ai ma maua ai se faamagaloga.

Afai ua e lagonaina le uunaiga a le Agaga Paia i lenei aso po o lenei foi afiafi, e mafai ona e faaaogaina o se faamaoniga o loo aoga le Togiola i lou olaga. Ona o lena mafuaaga ma le tele o isi, o le a lelei mo oe le tuu atu o oe lava, i nofoaga ma galuega e faapea ona valaaulia ai uunaiga a le Agaga Paia. O le lagonaina o le uunaiga a le Agaga Paia, e taufai aoga ai auala e lua: o le Agaga Paia e na o malumalu mama e nofo ai, ma o le taliaina o le Agaga Paia e faamama ai i tatou e ala i le Togiola a Iesu Keriso. E mafai ona e tatalo ma le faatuatua ia iloa le mea e fai, ina ia faamamaina ai ma agavaa ai mo le mafutaga ma le Agaga Paia ma le galuega a le Alii. Faatasi ai ma lena mafutaga, o le a faamalosia ai oe e tetee atu i tofotofoga ma maua le mana e iloa ai mea taufaasese.

Faamoemoega Mama

O se tulaga manaomia lona tolu mo le mafutaga ma le Agaga Paia, o le faamoemoega mama. Afai e te fia maua meaalofa a le Agaga Paia, e ao ona e manao i ai mo mafuaaga sa’o. O ou faamoemoega, e tatau o ni faamoemoega o le Alii. Afai e manatu faapito ou faamoemoega, o le a e iloa le faigata ona e maua o na meaalofa a le Agaga, ia na folafola atu ia te oe.

O lena mea moni o se lapataiga ma o se aoaoga aoga foi. Muamua, o le lapataiga: E tiga le finagalo o le Atua pe a tatou sailia meaalofa a le Agaga mo o tatou lava faamoemoega ae le mo Ana. Atonu tatou te le o iloagofie o tatou faamoemoega. Peitai, e i ai nisi o i tatou o le a matuai tauaso lava, e pei o le tamaloa sa saili e faatau mai le aia tatau i meaalofa a le Agaga. Tou te manatua le tala faanoanoa i se tagata e igoa ia Simona ma le aoa’iga a Peteru:

“Ua vaaia foi e Simona, o le faaee o lima o aposetolo ua foai atu ai le Agaga Paia, ona aumai ai lea e ia o tupe ia te i laua,

“Ua faapea mai, Au mai ia te au foi lena pule, ina ia maua le Agaga Paia e le tagata ou te faaee i ai o’u lima.

“A ua fai atu Peteru ia te ia, Ia fano lau ario faatasi ma oe, aua ua e manatu e faatauina le mea foaifua a le Atua i tupe.

“E leai sau mea po o sou tofi i lenei mea; aua e le tonu lou loto i luma o le Atua.

“O lenei, ia e salamo i lou nei leaga, ma e faatoga atu i le Atua, pe mafaia ona faamagaloina le manatu o lou loto.

“Aua ua ou iloa ua e i ai i le au oona, ma i le ta’ui o le amioleaga.

“Ona tali atu lea o Simona, ua faapea atu, Faatoga ia oulua i le Alii mo a’u, ina ia le oo mai ia te au se mea e tasi o ia mea ua oulua fai mai na” (Galuega 8:18–24).

O le mea moni na iloa e Simona ona lava faamoemoega piopio. Atonu e le faigofie tele ia i tatou taitoatasi. E toetoe lava o taimi uma e sili atu i le tasi o tatou faamoemoega. O nisi foi atonu e fefiloi, o mea e finagalo ai le Atua ma mea foi tatou te mananao i ai. E le faigofie ona tuueseese.

Mo se faataitaiga, manatu o loo e i ai i le po a o le aso e sosoo ai sau suega i le aoga, po o se faatalanoaga mo se galuega fou. Ua e iloa o le a matua fesoasoani tele le taitaiga a le Agaga Paia. Ua ou iloa mai se mea foi na ou oo i ai, mo se faataitaiga, e silafia e le Agaga Paia ni auala faamatematika e faaaoga e su’e ai tali o faafitauli i suesuega faasaienisi o le vevela ma isi malosiaga, o se lala o saienisi. O au o se tagata aoga sa tauivi ma le fisiki [physics] e suesue mai se tusi, lea o loo ia te au pea. Ou te teuina mo mafuaaga o talafaasolopito ma le faaleagaga. Pe tusa o le afa i lalo o le itulau (e mafai lava ona ou faaali atu ia te outou le mea o loo i ai i le itulau), i le totonugalemu o ni nai matematika, sa i ai la’u faamaoniga manino, e moni le mea sa ou faitauina. O le lagona tonu lava lea sa oo mai ia te a’u, a o ou manatunatu loloto i mau a le Alii ma sa faatele foi ona oo mai talu mai lena taimi. O lea, sa ou iloa ai sa malamalama le Agaga Paia i soo se mea e sa’o, i mea e ono fesiligia ai a’u i se suega o le faasaienisi o le vevela ma isi malosiaga.

E mafai ona outou mafaufau sa tofotofoina au ou te ole atu i le Atua e auina mai ia te au le Agaga Paia i le taimi o le suega, ina ia aua ai nei o’u toe suesue. Sa ou iloa e mafai ona Ia faia, ae ou te le i ole atu ia te Ia. Sa ou lagona e finagalo o Ia ina ia ou aoao e taumafai. Semanu e na te auina mai lava le fesoasoani i le suega, ae ou te fefe atonu e le o Lona faamoemoe lena. E tele foi taimi sa outou faia ai lena lava filifiliga e tasi. Atonu sa e faia ina ua faatalanoaina oe mo se galuega. Atonu foi na tupu a o e sauniuni mo se lauga pe faia se lesona faafaifeautalai. E i ai pea lava, le avanoa e ono i ai sou faamoemoega manatu faapito mo oe lava, lea e le taua tele i le Alii.

Mo se faataitaiga, ou te ono manao i se togi lelei i se vasega, a o la e manao o Ia ina ia ou aoao e galue malosi e auauna atu i isi. Atonu ou te manao i se galuega ona o le totogi po o le mamalu, a o la e finagalo o Ia ou te faigaluega i se isi mea ina ia manuia ai le olaga o se isi ou te le o iloa. E moni lava, e i ai ona faamoemoega ua outou faafofoga mai ai o o’u lauga atu i lenei po. Na te silafia oe. E mafai ona i ai so’u manao e faafiafia oe pe uuna’ia foi oe. Peitai, sa ou taumafai e taofi lo’u manao ae gauai atu i Lona finagalo.

Sa ou vaaia se tamalii o faia lena mea. Sa suia ai lo’u olaga. Sa i ai se uso o le Au Pulega Aoao na malaga mai e saunoa i se konafesi, lea sa ou nofo ai i luga o le tulaga. Sa ou i ai i le au peresitene faaleperisitua i le siteki. Sa ou iloaina mea sa tauivi ma aiga ma tagata o le au paia. Sa faatoa taunuu mai lea tamalii, o se Pulega Aoao, mai se tofiga sa malaga ai foi i Europa. Na vaivai o ia. Sa tulai o ia e saunoa i le sauniga. Sa foliga mai ia te a’u, o la e feosoosofa’i solo mai lea mataupu i lea mataupu. I le taimi muamua, sa ou lagona le alofa ia te ia. Sa ou manatu ua le mafai e ia ona tuuina mai se lauga matagofie e pei o isi ana saunoaga i le tele o taimi.

Ina ua mavae sina taimi, sa faagaeetia a’u ina ua ou iloa, a’o feosoosofa’i o ia mai lea autu i lea autu e le feāiāa’i, sa pa’i atu o ia i tulaga manaomia o loo tauivi ma tagata matitiva taitasi uma ma aiga ia sa matou taumafai e fesoasoani i ai. Na te le’i silafiaina i latou ma o latou tulaga manaomia. Ae sa silafia e le Atua.

E maeu lo’u faafetai, aua o lona faamoemoega e le o le tuuina mai o se lauga maoae, po o le vaai atu foi i ai faapea o se perofeta mamana. Atonu sa ia faia le mea ou te faamoemoe e fai e oe ma a’u e le aunoa. Atonu ai na fai sana tatalo faapea: “Le Tama e, ou te manaomia Lau fesoasoani. Ua ou vaivai. Faamolemole ia taitai a’u e le Agaga Paia. Faamanuia i nei tagata. Ou te alofa ia te i latou. Ua na ona ou ole atu ina ia mafai ona ou faia Lou finagalo e fesoasoani ai ia te i latou.”

Na afio mai le Agaga Paia i lena po. Ma sa faia le finagalo o le Alii. Na faaalu e le Pulega Aoao lona soifua atoa e fafagaina ai ia lava ma isi i le upu lelei a le Atua. Sa ia auauna atu ma le faamaoni i le Matai. O ia o se molimau faapitoa a Iesu Keriso, aua sa ia totogiina le tau ina ia avea ai ma molimau. O na mea uma, na afua mai i le tausisia o ona faamoemoega ia pipii atu i le malosi na te mafaia, i le finagalo o le Alii. O le mea lena na mafai ai e le Alii ona auina atu musumusuga a le Agaga Paia i Lana auauna, ma faamanuiaina ai tagata.

Alofa Mama o Keriso

E moni lava ou te le malamalama i uiga uma o upu o i le mau: “O le alofa mama o Keriso.” Peitai, o le uiga e tasi lenei ou te iloa: o se meaalofa ua folafola mai mo i tatou, pe a galue le Togiola a Iesu Keriso ia i tatou. O le meaalofa, o le manao i mea e manao i ai o Ia. Afai o lo tatou alofa o le alofa lea Na te lagonaina, o le alofa mama lea aua e mama o Ia. Ma a oo ina tatou lagona, o lo tatou naunautaiga mo tagata ua agai atu ina ogatusa ma Lona [alofa], o se tasi lena o auala e mafai ai ona tatou iloa ua faamamaina i tatou. A tatou tatalo mo meaalofa a le Agaga, ma e tatau lava, o se tasi [o meaalofa] o le a ou talosagaina, ia mafai ona mama o’u faamoemoega, ia ou manao i mea e manao o Ia i ai mo fanau a lo tatou Tama ma a’u foi, ma ia ou lagonaina ma ta’u atu, o le mea ou te manao i ai ia faia Lona finagalo.

O uiga na ia te a’u o nei upu a Moronae:

“O lenei o’u uso pele e, afai e leai se alofa ia te outou, e le aoga lava outou, aua e le uma le alofa. O le mea lea ia outou uumau ai le alofa, ua silisili i mea uma, aua e faaleaogaina mea uma—

“A o le alofa moni, o le alofa mama lea o Keriso, e tumau ia e faavavau; o i latou uma foi ua maua ua i ai lea alofa i le aso gataaga, e lelei ia te i latou.

“O le mea lea, o’u uso pele e, ia outou tatalo atu ai i le Tama ma le malosi uma o le loto, ina ia faatumuina outou i lenei alofa ua foaiina mai ia te i latou uma o e ua fai ma soo faamaoni o lona Alo o Iesu Keriso, ina ia avea outou ma atalii o le Atua, ina ia foliga i tatou ia te ia pe a faaalia mai o ia, aua tatou te iloa atu ia te ia e pei lava ona i ai nei o ia, ina ia ia te i tatou lenei faamoemoe, ina ia faamamaina i tatou, e pei ona mama o ia. Amene” (Moronae 7:46–48).

Ou te tuuina atu la’u molimau o loo soifua le Atua le Tama, o se Tamalii mamalu ua faaeaina. O Ia o le Tama o o tatou agaga. O i la’ua ma Lona Alo Pele, ua toetutu ma ua faamamaluina, sa afifio ifo i le taulealea o Iosefa Samita i se vao o laau i Niu Ioka. Sa i ai i la’ua iina. Sa fetalai atu le Tama ia Iosefa, ma sa mua’i ta’u atu o ia i lona igoa ona faailoa atu ai lea o Lona Alo. Na oo mai avefeau o le lagi e toefuata’i uma mai ki faaleperisitua o le pule. Sa faaliliuina e Iosefa Samita le Tusi a Mamona, e ala i le meaalofa ma le mana o le Atua. Sa tusia i papatusi e perofeta anamua, ma sa tuuina atu e se tasi o i latou ia Iosefa ma toe aveina ina ua mae’a le faaliliuga. O loo i ai nei ki o le perisitua i le fogaeleele i le taimi nei. I le avea ai o se molimau a Iesu Keriso, ou te molimau atu ia te outou ou te iloa o loo soifua o Ia, ma o loo taitai e Ia Lana Ekalesia.

Ou te tatalo i le malosi uma o lo’u loto, ia tali atu a outou tatalo ina ia ogatasi ma tulaga manaomia e maua ai le Agaga Paia. Ou te tatalo foi, ia outou tumau ma le faamaoni seia oo i le iuga, o lena foi iuga, mo outou, o le a viia.

Ou te tuuina atu a’u faamanuiaga ia te outou, ina ia talia a outou olega mo meaalofa a le Agaga e auauna atu ai i le Alii. Ma ou te alofa foi ia te outou. I le suafa o Iesu Keriso, amene.

© Puletaofia e le Intellectual Reserve, Inc. Ua taofia aia tatau uma. Lolomiina i le ISA. Faamaonia le faaPeretania 6/05. Faamaonia le faaliliuga: 06/05. Faaliliuga o le “Gifts of the Spirit for Hard Times.” 00941 890