Ua I Ai i Matua Se Tiute Paia BONNIE D. PARKIN Peresitene Aoao o le Aualofa O Tiutetauave Faaleaiga Afai e i ai se mea se tasi ou te manao e tupu mo matua ma taitai o lenei Ekalesia, o lo latou lagonaina lea o le alofa o le Alii i o latou olaga i aso taitasi, a o latou tausia fanau a le Tama Faalelagi. Atonu e le mu lou loto i se mea ou te fai atu ai, ae o mea e musumusu atu ai le Agaga ia te oe. Ia mulimuli i na uuna’iga matagofie. Ou te manatua lelei ina ua tuuina mai le folafolaga i aiga: i le aso 23 o Setema, 1995. Sa ou nofo i totonu o le Tapeneko i le sauniga aoao a le Aualofa. O Peresitene Hinckley le failauga faaiu. Sa ia fofogina mai ai “O Le Aiga: O Se Folafolaga i le Lalolagi”. Sa matua leai se mea e gasē i le potopotoga, peitai sa i ai foi se lagona o le sagisagi fiafia, o se tali atu, “Ioe—matou te moomia lava se fesoasoani mo o matou aiga!” Ou te manatua lo’u lagona e sa’o lelei. Sa tafe ifo loimata i o’u alafau. A o ou tilotilo atu i uso sa i o’u tafatafa, sa foliga mai o o latou lagona fo’i na. Sa tele naua mea sa i ai i le folafolaga, ma sa tau le mafai ona ou faatali se’i maua se kopi ma suesue ai loa. O loo faamautu mai i le folafolaga le mamalu o tamaitai. Ma, o se mea ofoofogia le mua’i tuuina mai i tamaitai o le Ekalesia i le sauniga aoao a le Aualofa—Ou te iloa e faatauaina tele ia tamaitai e Peresitene Hinckley. Ua tatou i ai uma iinei o ni taitai faale-Ekalesia. E pisi tele i tatou. Peitai e tatau lava ona ou manatua—e faapei foi o outou—o lo tatou uluai tiutetauave o o tatou lava aiga. Ia manatua, o o tatou aiga o se tasi lea o nai faamanuiaga tatou te aveina i le faavavau!1 O Newel K. Whitney o se epikopo i le popofou o le Ekalesia i Katelani. E faapei foi o outou epikopo i ona po nei, atonu ai foi sa matua’i pisi lava o ia i le faiga o le mau mea lelei. Peitai, sa a’oa’i o ia e le Alii ma poloaiina ina ia “faatulaga lelei lona aiga” (MFF 93:50; ua faaopoopo le faatusilima). Uso e ma tuagane, e faatatau foi lenei apoapoaiga ia i tatou uma lava. O le toatele o outou o matua po o matua foi o matua, a le o lena, o le a i ai se aso o le a e oo ai i ai. Peitai, pe ua e faaipoipo pe leai, o i tatou uma lava o ni tagata o aiga. Mafaufau mo sina minute i lou lava aiga. O le a se mea e te fiafia ai i ai? O se mea se tasi ou te fiafia ai i lo’u aiga o le, Ou te olioli lava ona e fiafia la’u fanau tama e toafa e faatasitasi. O le a le aoaoga faavae e uiga i le aiga o loo aoao mai e le folafolaga? Ou te fia taula’i atu i se parakalafa e tasi: “I le fuafuaga paia, e tatau ona pulefaamalumalu tama i o latou aiga i le alofa ma le amiotonu ma o i latou e tuuina atu mea e manaomia o le olaga ma le puipuiga mo o latou aiga. O uluai matafaioi a tina o le faafaileleina lea o a latou fanau. O nei matafaioi paia, e ao i tama ma tina ona fesoasoani le tasi i le isi o se paaga tutusa.”2 Ou te fiafia lava i upu, “i le fuafuaga paia”. O le avea ma matua o se vaega o le fuafuaga paia a lo tatou Tama Faalelagi mo Lana fanau. O le avea ai ma matua, ua i ai ia te i tatou matafaioi paia e saunia ai mea e manaomia i le olaga, puipui ma faafailele o tatou aiga. E mafai faapefea i nei taiala e—saunia ai mea e manaomia, puipui, ma faafailele—ona fesoasoani ia i tatou e tausia ni fanau amiotonu? Saunia mea e manaomia O loo faapea mai le folafolaga, o matua e saunia ia “mea e manaomia o le olaga.” Ae o a la mea e manaomia i le olaga? Ioe, o se fale ma meaai i luga o le laulau. Peitai, ona o le fuafuaga faaletalalelei, ua tatou iloa ai e tele atu isi mea. E aofia ai tomai o le olaga—o mea e fausia ai le amio. Se’i o tatou talanoaina nisi o nei mea. Tatou te saunia mea mo a tatou fanau a o tatou aoaoina i latou pe faapefea ona galulue. Se’i ou faamatalaina atu e uiga ia Iakopo le atalii o la’u tama. Sa le i fia alu o ia i le aoga. Sa taumafai e lona tina le anoanoai o auala eseese. Na i’u lava ina faanofo o ia i lalo e lona tina ma fai atu i ai, “O le galuega a lou tama o le alu e faigaluega e su’e mai tupe. O la’u galuega o le nofo lea i le fale e tausi oe ma ou uso ma lou tuafafine. A o lau galuega Iakopo, o le alu lea i le aoga.” Ina ua malamalama Iakopo i le mataupu faavae, sa ia taliaina loa ma alu i le aoga. Tatou te aoao foi a tatou fanau ia galulue e ala i le faamoemoe latou te faia feau ma, pe a oo foi ina talafeagai, ia o e galulue i fafo atu o le aiga. Tatou te fesoasoani i a tatou fanau e saunia mea mo o latou olaga e ala lea i le aoaoina o i latou i le taua o le galue. Ia vave ona amata! Fai mai lo’u toalua o le meaalofa aupito sili na avatu e lona tama ia te ia o le tutoatasi—aua sa ia aoaoina o ia e galue. O le pulea lelei o a tatou tupe e fesoasoani foi lena e avea ai i tatou ma tagata lelei e saunia mea e manaomia. O oulua matua, ia fuafua faatasi e ola i se paketi. Aoao lau fanau i le eseesega o le mana’o [i se mea] ma le manaomia [o se mea]. Aua nei tuuina atu ni avega e le faavaea o mea tautupe i lou toalua. Ina ua fautuaina i tatou e Peresitene Hinckley ina ia o ese mai le aitalafu, e i ai se tamā ou te iloa, sa nonofo i lalo ma lana fanau ua faaipoipo ma fesili atu ia te i latou e uiga i a latou tupe. Sa ofo o ia ina ua ia iloaina, e toalua e matua tetele lava aitalafu. Sa fesili atu o ia ia te i latou pe mafai ona ia fesoasoani i le faiga o se fuafuaga. O a’oa’oga ma le a’oa’o faamasani e mafai ai e matua ona saunia mea e manaomia mo o latou aiga. Tima’i i lau fanau ina ia pu’epu’e mai a’oa’oga uma latou te mafaia. E i ai nisi atunuu e le mafai e le tupulaga ona faia ni faaunega tupe i le Teugatupe Faaagaga mo A’oga, ona e le’i mae’a a latou aoga maualuluga. I le lalolagi i ona po nei, e taua tele i matua ona latou aoao pea. Puipui O le mataupu faavae lona lua ou te fia tautala i ai, o le puipui. Puipui mai i le a? Mai faatama’iga—e le gata i le faaletino ae faapea foi i le faaleagaga. Tatou te puipui pe a tatou aoaoina a tatou fanau e i ai lo latou tāua faalelagi, [tatou te puipui] pe a tatou o faatasi o se aiga i le lotu, pe a fai a tatou afiafi faaleaiga, pe a fai a tatou tatalo faaleaiga, pe a tatou suesue faatasi i tusitusiga paia. O ni mea faigofie tele na mea uma, peitai ou te tautino atu ia te outou e maua ai le puipuiga mamana. Ua aoao mai i le folafolaga, ua i ai i matua le tiute paia e puipuia a latou fanau. E mafai ona faatautala pe sauaina lagona, e pei o le ta’ufaatauvaaina o se toalua po o se tamaitiiti, fai mai e leai se aoga, o le le faaalia ma ta’u atu i ai le alofa. E le o puipuia e tama o latou aiga pe a latou sasa, taia, pe fasi a latou ava po o fanau. Fai mai se uso mai Aferika i Sisifo, a o le’i auai i latou i le Ekalesia, e fasi lava e lona tama lona tina ma le fanau. “O le taimi nei,” fai mai a ia, “ua taulimaina nei i matou [e lo’u tama] ma le faaaloalo ma le agamalu, aua ua malamalama o ia o i matou o fanau a le Atua.” E puipui e matua a latou fanau e ala i lo latou iloaina o uo latou te filifilia. Sa ita se tasi teineitiiti talavou ina ua fesiligia o ia e lona tama e uiga i ana gaoioiga i le afiafi. Sa faamalamalama i ai e le tama, o loo fai mai le folafolaga [i Aiga] e tatau ona avea o ia ma se puipui i lona aiga, ma e alofa o ia i lona afafine ma o le mafuaaga foi lena e manao ai ia mautinoa o loo saogalemu o ia. E tatau foi ona tatou puipuia a tatou fanau mai aafiaga o faasalalauga. Ia iloa mea e matamata ai lau fanau i le televise, o faletifaga ma aiga o a latou uo. Afai e i ai sa outou komepiuta i le fale, ia mautinoa o faaaoga mo mea e “mama, matagofie, logolelei, po o le ta’uleleia foi” (Mataupu Faavae o le Faatuatua 1:13). E puipuia i tatou pe a tatou mulimuli i le perofeta soifua. Na puipuia faapefea outou o se aiga i le mulimuli i le apoapoaiga a Peresitene Hinckley e faitau le Tusi a Mamona? Na ou faitau talu ai nei i se tusi mai se uso i Egelani. Sa ia tusia e faapea: “Sa tauivi lo’u aiga i le tausaga ua tuana’i ma se tama na filifili e le toe alu i le lotu. Sa toaga i lona olaga atoa ma sa i ai foi i au epikopo. Sa tagi atu lo’u loto i le Alii pe o le a se mea e mafai ona ou faia, ina ia aua ai ne’i ou lagonaina le ita ma le inoino. E fai lava la matou afiafi faaleaiga e na o a’u ma le fanau. A o ou i ai i le malumalu, sa uuna’ia a’u ona o le lu’i e faitau le Tusi a Mamona, ina ia aua ne’i faia na o i matou ma le fanau le faitauga tusitusiga paia, ae ia ave le fanau ma tusitusiga paia i lo’u toalua, pe o fea lava le mea o le fale o i ai. O le mea lea, e alu ai la matou solo i po uma i le ta o le 9.00 e su’e o ia. Matou te faitau faatasi ma ia—o le taimi muamua e le’i faitau, ae o le taimi nei o lea ua faitau. O lea ua alu i le lotu, ua sau i a matou afiafi faaleaiga, ma ua ia ta’ita’ia foi a matou talanoaga faaletalalelei. Na avea la’u fanau ma vae o le Alii e aveina atu ai le upu o le alofa togiola i lo’u toalua. O se faamanuiaga tele lea i lo’u aiga.” Faafailele O le taiala lona tolu ma o le toe taiala foi lea, o le faafailele. O a foliga o le faafailele? O le a se faalogona o le faafailele? E faape’ī lona leo? O foliga, lagona, ma le leo o le faafailele e pei o le mau lea “tau lava o le tauanau atu, i le faapalepale, o le agalelei, ma le agamalu; ma le alofa faamaoni” (MFF 121:41–42). Se’i ou faasoaina atu ni nai faataitaiga. Ou te manatu o le faafailele e foliga i le a’oa’i ma le alofa. O se tasi tina talavou na te taofia lana tama pe a le usitai. E tago tuu ona lima faaofuofu i alafau o lana tama ma tilotilo sa’o atu i ona mata ma faapea atu, “Faalogo mai i a’u upu.” E tatau ona tatou aoaoina a tatou fanau e faia filifiliga poto, ae e le mafai ona tatou aveesea taunuuga o a latou mea e fai. Manatua, o le faavae o le fuafuaga a lo tatou Tama Faalelagi o le faitalia. O le a se faalogona o le faafailele? O le tele lava o aoaoga ma le fausiaina o sootaga i aiga, e tula’i mai i nai taimi pupuu e le fuafuaina, i a tatou mea e masani ai i aso taitasi. O le laulau ‘ai o se nofoaga lea e fesoota’i ai le tasi ma le isi; fefaasoaa’i i a tatou gaoioiga i aso taitasi, faalogologo ma tima’i atu e le tasi le isi, ma talie faatasi ai. Ou te iloa o le talie e mama ai se avega. Tama e ma tina pele, fai se taimi se tasi e aai faatasi ai tagata e te alofa i ai. Pe ua uma ai ea le avea o oulua ma matua pe a matutua la oulua fanau ma ta’itasi ma o? E leai, e le uma ai. Peitai, o loo tatou i ai i le galuega o le fatuina o aiga e faavavau. A o ma galulue ma lo’u toalua i le misiona i Egelani, sa o mai se tasi o o ma atalii ma lona aiga e asiasi mai. Ou te manatua lana tala, “Na matou o mai ona e manaomia le faafaileleina o i matou.” O le taimi lava e avea ai oe ma se matua, o le a tumau ai pea lava. Pe le ofoofogia ea lena tulaga? Ina ua uma ona ou faitauina le Tusi a Mamona ia Tesema, sa segia a’u ina ua ou iloaina sa apoapoa’ia foi e Mamona lona atalii matua, o Moronae: “Lo’u atalii e ia e faamaoni ia Keriso . . . ia faaeaina oe e Keriso . . . ia tumau e faavavau i lou loto lona alofa, ma le onosai, ma le faamoemoe o lona mamalu, ma le ola faavavau” (Moronae 9:25). E faape’ī le leo o le faafailele? O nisi taimi e faigata ona maua mai i se tamaitiiti o le tupulaga se tali e sili atu i le tasi se upu. O se fesili lenei ua ou iloaina le matua aoga e suia ai lena mea: “O le a se lu’itau po o se mea aupito sili o oulua feagai i le taimi nei?” O le a tatalaina ai le faitotoa e faasoa mai ai le talavou. Ma afai foi e faasoa mai, ia tau lava o lou faalogologo! Aua e te faamasino atu pe fautua atu pe faia se isi lava mea. Tau lava o le faalogologo. O le a e maofa i sootaga ma noataga vavalalata o le a tula’i mai. Epikopo ma fesoasoani, e mafai ona mamana lenei fesili e tasi pe a outou faatalanoaina le autalavou i a outou uarota. O le faafailele e pei lava o le leo o le tatalo faaleaiga. O se tasi o mea e tumau pea ona ou manatua, o lo’u tama lea a o tootutuli faatasi ma o’u tuagane ma lo’u uso i tafatafa o le moega o o’u matua i si o la’ua tama’i potu, ma faalogo atu ai i le augani atu o lo’u tama i le Tama Faalelagi e faamanuia lo’u tina sa i le falemai. O lo’u faalogo atu i lo’u tama o sasaa atu lona loto, na fesoasoani lea ia te au ou te iloa ai o loo i ai se Atua i le lagi o loo faafofoga mai. Tatalo mo a outou fanau, o a latou aoga ma lo latou puipuiga i le aso. E iloa e a tatou fanau lo tatou alolofa ma o tatou faamoemoega pe a faalogo mai o tatou tatalo mo i latou. Faamalolosia o Aiga I le avea ai ma se taitai, e faapefea ona e faamalosi ma lagolagoina ia aiga o i latou e te auauna atu i ai? E mafai ona e faaaogaina nei taiala—saunia mea e manaomia, puipui,ma faafailele—e faamalolosi ai aiga o lau uarota. E lagolagoina e taitai ia matua i lo latou faamamaluina lea o i latou, ae le o le laa i luma e aveese le matafaioi a matua mai le olaga o se tamaitiiti. E mafai ona avea oe ma se faufautua, faasoa atu mea e fiafia i ai, ae ia gaua’i atu pea i le ala e mananao matua e faataunuu ai se mea. Sa faamatala e se tasi tina: “E tele taimi sa foliga mai ai ia te a’u, o tagata mulimuli lava e fia faalogo i ai le ma fanau tama talavou o a’u ma lo’u toalua. E i ai taimi, e gaua’i atu ai la’u fanau tama i faatosinaga a le tupulaga, ma latou le faalogo ai i matua. Ou te faafetai lava ona o taitai atamamai o le Ekalesia sa fautuaina la ma fanau tama. Latou te le’i aveesea la ma matafaioi o ni matua. Sa latou faalogo atu i ai, ae sa latou lagolagoina la ma’ua taitaiga, ma toe taitai mai ai i latou ia i ma’ua.” E tofu i tatou ma mea e manaomia i o tatou aiga. Na o ni nai upu tima’i mai le loto mo tina o loo faia toatasi le faiva faamātua. Se’i ou faamatalaina atu se tala i se tina e toalima le fanau, ae sa auina atu lona toalua i Iraq i le 2003. Sa ia faamatala mai: “Ina ua alu lo’u toalua i Iraq i le amataga o Fepuari, e tolu a matou taavale lelei sa i ai. Peitai, e oo atu ia Novema, ua leaga uma taavale, ma sa le’i mafai ona toe lipea le lua. O le taimi lava foi lea, na fai mai ai la’u tama ua sefulufitu tausaga e le alu i se misiona aua na te le o mautinoa pe moni le talalelei. Afai na i ai se taimi i lo’u olaga sa ou matua manaomia ai ia faamanuiaga faaleperisitua, o le taimi lena. Ou te le o manatuaina faamatalaga uma pe o anafea ae po o fea foi, peitai e manino lo’u manatuaina o le silia ma le tasi faamanuiaga mai le au perisitua alolofa i lena taimi. Sa ou iloa i taimi uma, e mafai ona ou valaau atu i o’u faiaoga o aiga ma o le a la o mai. Sa leai se tasi o i la’ua e mafai ona faia la’u veni, ae sa mafai ona la tuuina mai se faamanuiaga faaleperisitua sa ou matua manaomia, ma sa la mauaina se tagata e mafai ona faia le taavale.” Sa faia e faiaoga naunautai o aiga se suiga mo lenei aiga, ma e mafai ona latou faia se suiga mo aiga uma e na o le tama pe na o le tina foi, pe a latou iloa i latou, ma latou talitonuina ma tuuina atu i ai faamanuiaga faaleperisitua. Epikopo, taitai vaega o faitaulaga sili, peresitene o korama a toeaina— e manaomia e nei tina ia faamanuiaga faaleperisitua i o latou aiga, e faapei foi o tuafafine maoa’e nofofua. Sa lapata’i mai Peresitene Hinckley e uiga i le “sosolo malie o le pisipisia o le lalolagi” i le 10 tausaga talu ai, ina ua tuuina mai le folafolaga. O lea tautinoga faaperofeta ua toe faamautuina ai “tulaga faatonuina [o le Alii], o aoaoga faavae ma faiga e faatatau i le aiga.”3 I se faatusatusa atu i ai, ua taumafai le lalolagi e faoa ia matafaioi a tamaitai ma tulaga faatina. Ua ta’u atu i tamaitai i ona po nei e manaomia le i ai o ni a latou galuega lelei, o faalapotopotoga e auai, ma ia latou maua ia mea e tausi ai, le fanau. Ua matua faateleina le se’e ese atu o le matafaioi mamalu a le tina. Se’i ou faamanino atu lava le mea lea: e le tatau ona tatou faatagaina le lalolagi e fetuutuuna’ia le mea ua tatou iloa, na tuuina mai ia te i tatou i le mamanu faalelagi. Uso e, se’i ou tautala tuusa’o atu ia te outou mo sina minute. I le avea ai ma uso o le Aualofa O Le Ekalesia a Iesu Keriso o le Au Paia o Aso e Gata Ai, o lo tatou faamanuiaga ma le tiutetauave le faafailele ma lagolago le iunite faaleaiga. O tagata uma lava o se itutino o se aiga, ma e manaomia e aiga taitasi ona faamalosi ma puipuia. O lo’u fesoasoani sili lava e avea ma se tausi aiga, na mua’i oo mai mai lo’u lava tina ma lo’u tina matua, ma sa sosoo ai ma uso o le Aualofa i uarota eseese sa matou nonofo ai. Sa ou aoaoina tomai; sa ou vaaia ai le olioli e maua mai le foafoaina o se aiga e fia mananao isi tagata e nonofo ai. Na amata ia Ianuari 2006, ua i ai taiala fou mo fonotaga ma gaoioiga o le faatamaoaigaina o le aiga, auaiga, ma le tagata lava ia. Ua tele ina mafai ona fetuutuunai ina ia mafai ai e uso uma ona auai i le Aualofa. Taitai o Aualofa e, ia mautinoa o fonotaga ma gaoioiga tou te fuafuaina, o le a faamalolosi ai aiga o uso uma lava. O faiaoga asiasi o se tasi lea auala e lagolagoina ai le aiga. Ou te faamoemoe ua tofu maua e outou uma se avanoa e avea ai ma faiaoga asiasi. O faiaoga asiasi e le gata ina faamalosi ai se uso i le faaleagaga, ae i se tulaga uiga ese, e faafailele ai foi ma iloilo tulaga e manaomia. Taitai o le Aualofa, ia mataala i a outou fonotaga faale-uelefea ma lipoti atu tulaga manaomia faaleagaga ma le faaletino na faailoa mai e o outou faiaoga asiasi. O Le Alofa Mama o Keriso O outou na ua faaipoipo, toe tepa i tua. O le a le mea na e alofa faavalea ai i lou toalua? O le manatuaina o lena mea e mafai ai ona e maua se loto faamagalo. Fefaaalia’i le alofa o le tasi i le isi. E mafai e se ava ona faia se suiga i le olaga o lana tane, a o ia fausiaina lona tulaga talitonuina. E mafai e se tane ona faasusulu se aso aupito pogisa i nai upu faatauvaa lava nei: “Ou te alofa ia te oe.” O se tasi o meaalofa aupito sili e mafai e matua ona avatu i a latou fanau o le faaali atu lea ia i latou e fealofani i la’ua. O la tatou matafaioi o ni matua i le tausiga o fanau amiotonu, o le saunia lea o mea e manaomia, puipui, ma faafailele ma e tatou te faia na mea o ni paaga tutusa. Tatou te faia foi lena lava mea e tasi o ni taitai. O le avea ma se taitai, o se galuega faigata. O le avea ma se matua, o se galuega faigata. E i ai taimi tatou te lotovaivai ai, ae tatou te taumafai lava. Ou te manatu e tele naua mea tatou te aoaoina e uiga i le alofa mama o Keriso i o tatou aiga, faapea foi i le auaunaga i le Ekalesia. I le avea ai o ni matua ma ni taitai, e tatau ona tatou tuuina atu i a tatou fanau le alofa ua tuuina mai e lo tatou Tama Faalelagi ia te i tatou: o le alofa mama. I le Moronae 8:17, e faitauina faapea, “Ua tumu a’u i le alofa, o le alofa faavavau lena.”Faaopoopo atu i ai ma upu a le Alii: “Ia faaoofuina outou i le noataga o le alofa, e pei o le ofu talaloa, o le noataga lea o le atoatoa ona lelei ma le filemu” (MFF 88:125). Ou te valaaulia outou, i mea uma lava tou te fai, ia oofu outou i le ofutalaloa o le alofa, ia siomia lou aiga i le alofa mama o Keriso. I le avea ai ma ni aiga ma ni taitai, ia faamanuiaina outou e le Alii ina ia outou si’osi’o maia i latou tatou te alolofa i ai, i le ofutalaloa o le alofa ina ia mafai ai ona tatou toe foi atu i le afioaga o lo tatou Tama i le Lagi, ma ola faatasi ai ma Ia e faavavau. I le suafa o Iesu Keriso, amene. Faamatalaga 1. Tagai Gordon B. Hinckley, “Olioli i le Avanoa e Galue ma Auauna Atu Ai,” Fonotaga Faaleaoaoga a Taitai i le Lalolagi Atoa, 21 Iuni 2003, i. 23. 2. “O Le Aiga: O Se Folafolaga i le Lalolagi,” Liahona, Oke. 2004, 49. 3. “Ia Tu Malosi e Tetee Atu i Togafiti a le Lalolagi,” Liahona, Ian. 1996, 119.