Faamanatuga

I le po ao loma Lona Faasatauroga, na faatasi ai Iesu Keriso ma Ana Aposetolo ma faavaeina le faamanatuga (tagai Luka 22:19--20). Ina ua mavae Lona Toetu mai, sa faavaeina e le Faaola le faamanatuga i sa Nifae (tagai i le 3 Nifae 18:1–11). O aso nei o le faamanatuga o se sauniga lea e tagofia ai e tagata o le Ekalesia le falaoa ma le vai e faamanatu ai le taulaga togiola a Iesu Keriso. O lenei sauniga o se vaega taua o le tapuaiga ma le atiina ae faaleagaga. E ala i lenei sauniga, e faafou ai e tagata o le Ekalesia ia feagaiga na latou osia ma le Atua i le taimi na papatisoina ai i latou.

Ina ua Ia faavaeina le faamanatuga, na fetalai Iesu Keriso, “O lo’u tino lenei, ua foaiina atu mo outou; tou te faia le mea nei e fai ma faamanatuga ia te au. … O lenei ipu o le feagaiga fou i lo’u toto, ua faamaligiina mo outou.(Luka 22:19–20). O le faamanatuga e maua ai se avanoa mo tagata o le Ekalesia e mafaufau loloto ai ma manatua ma le agaga faafetai le soifua, auaunaga, ma le Togiola a le Alo o le Atua. O le falaoa ua tofitofi o se faamanatu o Lona tino ma Lona tiga faaletino---ae maise Lona mafatiaga i luga o le satauro. E mafai foi ona manatua ai, ona o Lona alofa mutimutivale ma lona alofa tunoa, o le a toe tutu mai ai tagata uma ma maua ai le avanoa mo le ola e faavavau faatasi ma le Atua.

O le vai e manatua ai na faamaligi e le Faaola Lona toto i le mafatiaga loloto faaleagaga ma le tiga, na amata i le Faatoaga o Ketesemane ma faaiu i luga o le satauro. I le faatoaga na Ia fetalai, “Ua matua tiga lou loto e oo i le oti’ (Mataio 26:38). O le usiusitai atu i le finagalo o le Tama, na sili atu Lona mafatia nai lo le mea e mafai ona tatou malamalama i ai: “[Na] sau le toto mai ona pu afu uma, ona [sa] tele naua o lona mafatia mo le amioleaga ma mea inosia a ona tagata.” (Mosaea 3:7). Na Ia mafatia mo agasala, faanoanoa, ma tiga o tagata uma, ma saunia ai le faamagaloga o agasala mo i latou e salamo ma ola ai i le talalelei (tagai 2 Nifae 9:21--23). Na ala mai le faamaligiina o Lona toto, na faaolaina ai e Iesu Keriso tagata uma mai lea ua ta’ua e tusitusiga paia o le “uluai sala” o le solitulafono a Atamu (Mose 6:54).

O le tagofia o le faamanatuga o se molimau i le Atua faapea o le manatuaina o Lona Alo o le a oo i tua atu o le taimi puupuu o lena sauniga paia. O se vaega o lenei sauniga o se folafolaga ia manatua pea o Ia ma o se molimau o le naunautaiga faaletagata ia tauave i ona luga le suafa o Iesu Keriso ma ia tausia Ana poloaiga. I le tagofia o le faamanatuga ma le faia o nei tautinoga, ua faafouina ai e tagata o le Ekalesia le feagaiga na latou osia i le papatisoga (tagai i le Mosaea 18:8–10; Mataupu Faavae ma Feagaiga 20:37).

O se taui, e faafouina e le Alii le faamagaloina o agasala na folafolaina ma mafai ai e tagata o le Ekalesia ona ‘maua pea Lona Agaga e faatasi ma i latou’ (Mataupu Faavae ma Feagaiga 20:77). O le mafutaga faifaipea ma le Agaga o se tasi lea o meaalofa silisili i le olaga faaletino.

I le sauniuniga mo le faamanatuga i vaiaso taitasi, e faaalu ai e tagata o le Ekalesia le taimi e iloilo ai o latou olaga ma salamo i agasala. Latou te le manaomia ona atoatoa ina ‘ai ai ma inu i le faamanatuga, ae e tatau ona i ai so latou agaga o le lotomaualalo ma le salamo i o latou loto. O vaiaso taitasi latou te tauivi ai ia saunia mo lena sauniga paia ma se loto momomo ma se agaga salamo (tagai 3 Nifae 9:20).

Tusifaamaumau Ou Lagona Uunai

Savali Faaopoopo