Japan

Ang Simbahan ni Jesukristo sa mga Santos sa Ulahing mga Adlaw unang mipadala og mga misyonaryo ngadto sa Japan sa 1901. Bisan og ang politikal nga tensyon misira sa Japan Mission tali sa 1924 ug 1948, ang mga miyembro sa Simbahan mipadayon sa pagbansay sa ilang hugot nga pagtuo, sa pagpakigbahin sa ebanghelyo, ug sa pagtukod sa Simbahan sa Japan. Sa dihang ang Simbahan mibalik ngadto sa Japan sa katapusan sa Ikaduhang Gubat sa Kalibutan, usa ka gamay nga pundok sa matinud-anong mga kinabig nga Hapon, pipila ang nabunyagan, nakaplagan nga nag-uban og miting sa kanunay.

Sukad sa Ikaduhang Gubat sa Kalibutan, ang Simbahan sa Japan nakasinati og inanay apan nagpadayon nga pag-uswag. Ang mga Santos nga Hapon nagpakita og dako nga debosyon ngadto sa gipahiuli nga ebanghelyo. Sa 1965, daghang misakripisyo sa panahon ug sweldo aron sa pagbiyahe ngadto sa templo sa Hawaii. Sa mga 1970, kini nga debosyon migiya ngadto sa pagtukod sa usa ka templo sa Tokyo––ang unang templo sa Asya ug ang una sa tulo sa Japan. Ang mga Santos sa Japan karon naghimo og importante nga mga kontribusyon ngadto sa ilang mga komunidad ug nasud. Sama pananglit, sa 2011, human sa linog sa Silangang Japan ug sa tsunami nga miguba sa daghang mga dapit, ang mga Santos nga Hapon migahin og daghang mga oras sa pag-apud-apod og makahupay nga mga gamit [relief supplies] ug sa pagtabang sa ilang mga silingan sa pag-ayo sa nangadaot.

Ang kasaysayan sa Simbahan sa Japan usa sa lig-on nga pagtuo nga mipatigbabaw lapas sa nasudnong mga utlanan ug politikal nga mga panagbangi. Ang hugot nga pagtuo sa mga Santos nga Hapon nagpamatuod sa gahum sa gipahiuli nga ebanghelyo sa pagbugkos kanato isip “mga kauban na sa katawhan sa Dios, ug sakop na sa iyang kabanay” (Mga Taga-Efeso 2:19).

• Opisyal nga Ngalan: Japan/Nihon-koku/Nippon-koku

• Ulohan: Tokyo

• Labing Dako nga Siyudad: Tokyo

• Opisyal nga Pinulongan: Hinapon

• Gilapdon sa Yuta: 364,485 km² (140,728 mi²)

• Gilapdon sa Simbahan: Amihanang Asya

• Mga Mission: 6 (Fukuoka, Kobe, Nagoya, Sapporo, Tokyo, Habagatang Tokyo)

• Mga Kongregasyon: 268

• Mga Templo: 4 (Fukuoka, Okinawa, Sapporo, ug Tokyo)