Usa ka Mensahe gikan sa Unang Kapangulohan

Minahal nga mga Sister:

Agi og pasidungog sa pagpanalangin sa Relief Society diha sa mga kinabuhi sa mga miyembro sa Simbahan, misugo kami sa pag-andam sa Anak nga mga Babaye sa Akong Gingharian: Ang Kasaysayan ug Buhat sa Relief Society. Kami nag-ampo nga kini nga basahon mahimo nga panalangin kaninyo ug sa mga tawo kansang kinabuhi inyong matandog.

Mopahayag kami sa among gugma ug pagdayeg alang kaninyo ug sa pag-ila nga kamo mga hinigugma nga anak nga mga babaye sa Langitnong Amahan ug mapahinunguron nga mga disipulo ni Ginoong Jesukristo. Kabahin kamo sa talagsaong sisterhood sa tibuok kalibutan. Gigiyahan sa inyong motto nga, “Ang gugmang putli dili gayud mopakyas,” nagtabang kamo sa paglig-on sa mga pamilya ug nagtukod sa gingharian sa Dios dinhi sa yuta.

Kami nag-awhag kaninyo sa pagtuon niini nga basahon ug sa pagtugot nga ang walay sukod nga mga kamatuoran ug ang dinasig nga mga ehemplo niini moimpluwensya sa inyong kinabuhi.

Among ipamatuod nga ang Ginoo mipahiuli sa kahingpitan sa ebanghelyo pinaagi ni Propeta Joseph Smith ug ang Relief Society usa ka importante nga bahin niana nga pagpahiuli. Ang mga sister sa Relief Society adunay mahimayaong panulundon. Among giampo nga kini nga basahon mahimo nga importanting kapanguhaan alang sa pagpreserbar niana nga panulundon.