Kapitulo 18

Ang Awit sa Kasingkasing

Kon manganta kita sa mga himno sa Zion diha sa tukma nga espiritu, naghalad kita og mga pag-ampo ngadto sa Ginoo ug nagdapit sa impluwensya sa Espiritu Santo nganha sa atong mga kinabuhi ug sa mga kinabuhi sa uban.

Gikan sa Kinabuhi ni Heber J. Grant

Si Presidente Heber J. Grant ganahan kaayong mokanta sa mga himno sa Zion, bisan kon maglisud siya og kanta nga may duyog. Niadtong Abril 1900, samtang nag-alagad siya isip sakop sa Korum sa Napulog Duha ka mga Apostoles, mipahinungod siya sa tibuok pakigpulong ngadto sa kamahinungdanon sa pagkanta og mga himno. Niini nga pakigpulong, nga iyang gihatag atol sa kinatibuk-ang komperensya sa Deseret Sunday School Union, mipaambit siya og mga istorya mahitungod sa iyang mga paningkamot nga makakat-on sa pagkanta:

“Sa tibuok nakong kinabuhi, ganahan gyud ko nga mokanta. Sa bata pa ako mga dies anyos ang panuigon miapil ko og klase sa pagkanta, ug ang propesor misulti nako nga dili gyud ko makakat- on sa pagkanta. Pipila ka tuig ang milabay [usa ka tawo] misulti nako nga makakanta ko, apan miingon siya nga ganahan siya nga mga kwarenta ka milya ang iyang gilay-on samtang buhaton ko kini….

“Sa bata pa ko, sunod sa akong kaugalingong inahan, walay laing babaye nga nagpakita og interes nako, mihatag kanako og samang tambag sa usa ka inahan o daw naghigugma nako kay sa gibuhat ni Sister [Eliza R.] Snow. Gihigugma nako siya sa tibuok nakong kasingkasing, ug ganahan sa iyang himno, ‘O Amahan Ko.’ Miingon ko mga upat na ka bulan ang milabay ngadto ni Brother Horace S. Ensign nga andam ko nga mogahin og upat o lima ka bulan sa akong libreng oras basta makakat-on lang ko sa pagkanta nianang usa ka himno. Siya misulti kanako nga bisan kinsa makakat-on sa pagkanta kon mopadayon. Ako siyang giingnan nga kon adunay usa ka butang nga anaa kanako mao kadto ang pagka mapadayonon. Busa misugyot ko nga manglingkod mi ug magsugod ko sa akong unang leksyon sulod sa duha ka oras niana nga awit. Nagpadayon gyud ko sa mga leksyon kabahin niini sukad niadto….

“Mihimo ko niini nga mga pakigpulong tungod kay mibati ako nga kinahanglan kita nga moawhag sa atong kabatan-onan sa pagkat- on sa pagkanta. Ingon sa usa ka mag-aawit, nawala kanako ang trentay tres ka tuig sa akong kinabuhi. Gisultihan ko dihang dies anyos pa ko nga dili gayud ako makakat-on sa pagkanta. Wala ko makakat-on hangtud kwarentay tres ka tuig ang pangidaron, ug migahin ko og upat o lima ka bulan sa pagsulay sa pagkat-on sa pagkanta sa mga himno nga, ‘Ang Dios naglihok diha sa misteryoso nga paagi, ’ ug ‘O Amahan Ko.’ Nakakat-on ako una tungod sa mga sentimento ug sa akong gugma alang sa tagsulat, ug ang lain tungod kay si kanhi Presidente Wilford Woodruff ganahan niini labaw pa kay sa bisan unsa nga himno diha sa basahon sa himno.”

Pagkahuman gayud sa paghatag niini nga mga pakigpulong, si Elder Grant mikanta sa himno “O Amahan Ko.” Dayon miingon siya: “Aduna koy usa lang ka tumong karong gabhiona sa pagpamulong ug sa pagkanta, ug kana mao ang pag-awhag sa batan-ong mga lalaki ug batan-ong mga babaye sa dili pag-usik sa trenta o kwarenta ka tuig sa ilang kinabuhi una pa mosulay sa pagkanta…. Pinaagi sa mapadayonong paningkamot ang usa ka tawo makakaton sa pagkanta nga wala gani kahibalo sa musika o unsa pa, sama sa akong kahimtang.”¹

Mga Pagtulun-an ni Heber J. Grant

Ang awit sa kasingkasing mao ang usa ka pag-ampo ngadto sa Ginoo.

Ang pagkanta usa ka talagsaon kaayo nga bahin sa pagsimba sa mga Santos sa Ulahing mga Adlaw.²

Ang pagkanta sa atong sagrado nga mga himno, nga gisulat sa mga sulugoon sa Dios, adunay gamhanang epekto diha sa pagkabig sa mga tawo ngadto sa mga baruganan sa ebanghelyo ug sa pagpasiugda og kalinaw ug espirituhanong paglambo. Ang pagkanta usa ka pag-ampo ngadto sa Ginoo, ingon sa Iyang gisulti: “Kay ang akong kalag mahimuot sa awit sa kasingkasing; oo, ang awit sa mga matarung mao ang usa ka pag-ampo ngari kanako, ug pagatubagon uban sa usa ka panalangin diha sa ilang mga ulo.” [D&P 25:12.]³

Ang akong kalag kanunay nga mahimuot sa pagpaminaw sa pagkanta, nga nahimong ganahan gayud kaayo niini sa tibuok nakong kinabuhi, ug nahimuot nga makahimo karon sa pag-ampo ngadto sa Ginoo “diha sa mga awit sa kasingkasing.” Kini akong opinyon nga kon kitang tanan makahinumdom sa mga pulong sa Ginoo, nga ang awit sa mga matarung mao ang usa ka pag-ampo ngadto kaniya, ug pagatubagon uban sa usa ka panalangin diha sa ilang mga ulo, ug makanunayong mangaliya sa atong Langitnong Amahan diha sa matahum nga mga awit sa Zion, matinud-anon ug matinuoron nga mosubli diha sa atong mga kasingkasing sa mga mensahe sa atong matahum nga mga himno, nga kita may katungod sa pagbaton sa gisaad nga mga panalangin, diin akong giawhag ang mga Santos sa pagsulay ug sa pagbaton.⁴

Kinahanglan natong likayan ang mga awit nga nagtudlo og sayop nga doktrina.

Atong hinumduman ang matang sa mga awit nga gusto sa Ginoo, mga awit nga may Ebanghelyo diha niini. Nakatambong ko og mga komperensya diin akong nadungog ang tulo o upat ka mga awit, nga may mga pulong nga wala nako mauyoni. Maayo kini nga pagkakanta apan dili kini maayo nga doktrina.⁵

Kon unsa ka nindot ang musika diin ang sayop nga doktrina gikanta, ingon usab kini ka piligro. Mohangyo ko ngadto sa tanang mga Santos sa Ulahing mga Adlaw, ug ilabi na sa atong mga koro, nga dili gayud mokanta sa mga pulong sa usa ka awit, bisan unsa pa kini ka nindot ug ka madasigon, diin ang mga pagtulun- an wala mahiangay sa hingpit sa mga kamatuoran sa ebanghelyo….

… Walay tinagsa nga mag-aawit, o organisasyon sa mga magaawit, diha sa Simbahan, ang mopasundayag gawas kon ang mga pulong hingpit nga nahiuyon sa mga kamatuoran sa ebanghelyo, ug mahatag gikan sa kasingkasing sa mag-aawit. Sa laing mga pulong, ang atong mga awit kinahanglan gayud nga tinud-anay nga “mga pag-ampo ngadto sa Ginoo.” [Tan-awa sa D&P 25:12.] Kon kita mabinantayon sa pagkanta lamang sa ingon nga mga awit, dayon makasiguro kita sa mga panalangin nga gisaad sa Ginoo, kay ang iyang mga saad mga “tinuod ug matinud-anon ug ang tanan matuman.” [Tan-awa sa D&P 1:37.]⁶

Ang pagkanta sa mga himno makadala og usa ka malinawon ug langitnong impluwensya ngari sa atong mga kinabuhi.

Mapasalamaton ko sa Ginoo alang sa pagdasig sa iyang Espiritu ngadto sa daghan kaayong mga tawo diha sa pagsulat sa matahum nga mga musika nga anaa kanato alang sa atong mga himno…. Unta ang Dios mopanalangin sa atong mga kompositor ug mga magbabalak kinsa naghatag kanato sa ingon nga dinasig nga mga pulong ug sa ingon nga makapadasig, matahum nga musika.⁷

Masaligon ako nga ang mga himno sa Zion, kon kantahon uban sa tukma nga espiritu, makadala og usa ka malinawon ug langitnong impluwensya sa atong mga panimalay, ug makatabang usab diha sa pagsangyaw sa ebanghelyo ni Jesukristo.⁸

Walay laing mas makapahimuot ug makapadasig kay sa musika diha sa panimalay, ug sukad ko nakakat-on sa pagkanta, kami sa kasagaran adunay usa ka himno sa among balay sa matag buntag sa dili pa ang pag-ampo sa pamilya. Sa pagkatinuod aduna gayuy makapahimuot nga impluwensya nga nagauban sa pagkanta sa mga awit sa Zion, ug kini akong opinyon nga ang mga Santos kinahanglan nga mohimo sa pagkanta nga kabahin sa ilang pagsimba sa pamilya.⁹

Dili nato kalimtan ang atong mga himno kon moadto kita sa balay alampoanan. Pakantaha ang tibuok katiguman; ug sa tanang paagi ipasinati sa mga sakop sa koro ang matahum nga mga mensahe nga anaa diha sa atong mga himno.¹⁰

Nakahinumdom ko sa usa ka insedente nga nagpakita sa unsa nga paagi nga ang awit adunay gahum sa paghupay sa masukanong mga pagbati ug mopahiuli sa panagdait ngadto sa mga kasingkasing sa tawo kinsa puno sa espiritu sa panagbingkil. Nahitabo kini daghang mga tuig ang milabay ug naglakip sa usa ka away tali sa duha ka hamtong ug matinud-anon nga mga igsoon kansang pagkasakop masubay ngadto sa mga panahon sa Nauvoo. Kining mga tawhana puno sa kaligdong ug debosyon ngadto sa buhat sa Ginoo. Naagian na nila ang daghang mga kalisdanan sa Nauvoo, ug nag-antus sa mga pagpapahawa ug pagpanggukod batok sa mga Santos, ingon man sa mga kalisdanan sa pagka pioneer, nga may kalabutan sa unang pagpuyo sa kasadpan. Kining mga tawhana nag-away nga may kalabutan sa negosyo, ug sa katapusan nakahukom nga ilang sulayan nga magpatabang ni Presidente John Taylor sa pagsulbad sa ilang mga kabangian.

Si John Taylor nianang panahona mao ang presidente sa Konseho sa Napulog Duha ka mga Apostoles. Kining mga igsoon matinuorong misaad nga matinud-anon silang mosunod sa unsay desisyon nga mahimong mahatag ni Brother Taylor…. Wala dayon nila isulti kaniya kon unsay ilang kabangian, apan mipasabut nga grabe na ang ilang away ug mihangyo kaniya sa pagpaminaw sa ilang istorya ug sa paghatag sa iyang desisyon. Si Presidente Taylor maandamong miuyon. Apan siya miingon: “Mga igsoon, una pa nako paminawon ang inyong problema, ganahan kaayo ko nga mokanta og usa sa mga awit sa Zion alang kaninyo.”

Karon si Presidente Taylor usa ka maayo kaayo nga mag-aawit, ug sa matahum nga paagi ug uban sa espiritu mihubad sa atong sagradong mga himno.

Siya mikanta og usa sa atong mga himno ngadto sa duha ka mga igsoon.

Sa pagkakita sa epekto niini, siya miingon nga wala gayud siyay nadunggan nga usa sa mga awit sa Zion nga wala niya makadasig sa pagpadayon og kanta, ug busa mihangyo kanila sa pagpaminaw samtang mikanta siya og lain. Miuyon gayud sila. Daw ang duha parehong giganahan niini; ug, human makanta ang ikaduhang awit, miingon siya nga nakadungog siya nga kulang kuno sa swerte ang dili pares nga mga numero ug mao nga uban sa ilang paguyon mokanta siya og usa pa gyud, nga iyang gihimo. Dayon sa iyang kinomedya nga paagi, siya miingon: “Karon, mga igsoon, dili ko buot nga kapuyon mo, apan kon mosugot mo, ug maminaw sa usa pa ka himno, mosaad ko nga mohunong na sa pagkanta, ug maminaw sa inyong problema.”

Ang istorya nagpadayon nga sa dihang si Presidente Taylor nahuman sa ikaupat nga awit, ang mga igsoon nanaghilak, mibarug, naglamanohay, ug mihangyo ni Presidente Taylor sa pagpasensya kanila tungod sa pagdisturbo kaniya, ug sa paggamit sa iyang panahon. Mibiya dayon sila nga wala gani niya masayri kon unsay ilang mga kabangian.

Ang pagkanta ni Presidente Taylor nakapahiuli sa ilang mga pagbati ngadto sa usag usa. Ang espiritu sa Ginoo misulod sa ilang mga kasingkasing, ug ang dagkong mga babag nga mitumaw taliwala kanila nahanaw ug nahimong walay pulos. Ang gugma ug panag-igsoonay napalambo diha sa ilang mga kalag. Ang walay nada nga mga butang nga ilang giawayan nawad-an og bili diha sa ilang panan-aw. Ang mga awit sa kasingkasing mipuno kanila sa espiritu sa panag-uli.¹¹

Sila si Elder J. Golden Kimball ug Charles A. Welch, wala sa duha ang miangkon nga maayong mokanta, samtang nagmisyon didto sa Habagatang mga Estado, mamunyag na unta og pipila ka mga kinabig; ang mga manggugubot nagpundok, ug ang mga igsoon gipasabut nga kon ipadayon nila ang ilang mga tinguha sa pagbunyag nga ang mga manggugubot molabay nila ngadto sa suba. Ang mga igsoon determinado sa pagpadayon bisan unsa pa may mahitabo. Hinoon sa wala pa mibuhat sa ingon, nanganta sila og usa ka awit. Ang awit daw adunay dakung epekto ngadto sa mga manggugubot nga hapit na gani wala sila kalihok. Ang mga igsoon mipadayon sa ilang mga pagbunyag, ug dayon miadto sa layo-layo aron sa pagpahigayon sa pagkumpirma sa nabunyagan. Usa ka mensahe miabut gikan sa mga manggugubot nga naghangyo kanila sa pag-adto ug sa pagkanta pag-usab niana nga awit, ug ang hangyo gituman. Ang lider sa mga manggugubot, nga si Joseph Jarvis, sa wala madugay nagpasakop sa Simbahan, ug misaysay ngadto ni Elder Kimball nga ang mensahe sa himno, ug ang pagdasig nga nag-uban sa pagkanta, ingon nga gisaysay sa ibabaw, mikabig kaniya ngadto sa Ebanghelyo. Ang nahinumduman ni Brother Kimball mao nga kana nga himno mao ang “Truth Reflects Upon Our Senses.” [Tan-awa sa Mga Himno, no. 273.]¹²

Adunay dakong mawala diha sa mga panimalay sa mga tawo sa dili pagkanta sa mga awit sa Zion. Daghang mga misyonaryo ang mihikaw sa ilang kaugalingon sa kalig-on ug gahum ug abilidad sa paghimo og maayo, ug sa pagbaton og mga higala, tungod kay dili mahibalo unsaon pagkanta…. Ang mga awit sa Zion makadala og usa ka maayong impluwensya nganha sa atong mga panimalay.

Dili ang kabatid nga inyong naangkon maoy modala sa lig-on nga pagtuo ngadto sa mga kasingkasing sa mga tawo, apan kini mao ang Espiritu sa Makagagahum nga Dios nga nagpainit sa inyong mga kasingkasing, ug sa inyong tinguha alang sa kaluwasan sa mga kalag. Si Brigham Young miingon nga ang Espiritu sa Ginoo mas labaw pa nga makakabig sa mga tawo kay sa kabatid sa mga tawo [tan-awa sa Deseret News, 9 sa Peb. 1854, 4]. Ug ako moingon nga ang pagkanta sa mga awit sa Zion, bisan tuod sa dili hingpit nga paagi, uban sa pagdasig sa Dios, mas epektibong motandog sa mga kasingkasing sa matinuoron kay sa maayong pagkakanta nga wala ang Espiritu sa Dios. Kanta uban sa Espiritu sa Dios. Higugmaa ang mga pulong nga inyong gikanta. Akong gihigugma ang mga awit sa Zion.¹³

Mga Sugyot alang sa Pagtuon ug Panaghisgutan

Ngano nga importante man nga mokanta kita sa mga himno sa Simbahan? Ngano nga kinahanglan kita nga mokanta sa mga himno bisan kon dili kita maayo nga mag-aawit?
Sa unsa nga mga paagi nga ang pagkanta sa mga himno makatabang kanato sa pagsimba sa Ginoo diha sa panimalay ug diha sa mga sakrament miting ug sa uban pang mga miting sa Simbahan?
Sa unsa nga paagi nga ang “awit sa matarung” usa ka pag-ampo ngadto sa Ginoo?
Unsa ang “tukma nga espiritu” alang sa pagkanta sa mga himno? Ngano nga “ang mga himno sa Zion, kon gikanta uban sa tukma nga espiritu, makadala og usa ka malinawon ug langitnong impluwensya”?
Sa unsa nga mga paagi nga ang mga himno nakatabang kaninyo? Unsa nga mga himno ang adunay espesyal nga impluwensya sa inyong kinabuhi? Ngano nga kini nga mga himno mas makahuluganon nganha kaninyo?
Unsa ang pipila ka mga kaayohan sa pagkat-on sa mga himno sa Simbahan nga dili kaayo pamilyar nato? Ngano nga makatabang man ang pagsag-ulo sa mga pulong sa mga himno?
Ngano nga ang mga himno sa Simbahan ug sa mga awit sa Primary maoy labing angay nga musika alang sa mga sakrament miting ug sa ubang mga miting sa Simbahan?
Ngano nga ang sayop nga mga pagtulun-an piligro man kon gikanta kini sa matahum nga musika? Ngano nga importante man ang paglikay sa musika nga may “mga pagtulun-an [nga] wala mahiuyon sa hingpit nga mga kamatuoran sa ebanghelyo”?
Sa unsa nga paagi nga ang mga ginikanan makatabang sa ilang mga anak sa pagkat-on ug sa paghigugma sa mga himno sa Zion? Sa unsa nga mga paagi nga ang mga ginikanan makagamit sa mga himno ug mga awit sa Primary sa pagtudlo sa ebanghelyo ngadto sa ilang mga anak?