O Musumusuga a le Agaga

O le Agaga Paia o le sui lona tolu lea o le Aiga Atua, o le Fesoasoani na folafola mai e le Faaola o le a aoaoina Ona soo i mea uma, ma faamanatu mai ia i latou mea uma, o soo se mea lava na Ia fetalai mai ai ia i latou (tagai Ioane 14:26).⁴

O le Agaga Paia e molimau mai i totonu o o tatou loto e uiga i le Tama le Alo.⁵

[O la’u] molimau [ia Iesu Keriso] e oo mai e ala i le mana o le Agaga Paia. O se meaalofa, paia ma matagofie, na folafola mai e ala i le faaaliga mai le sui lona tolu o le Aigaatua.⁶

O le Agaga Paia o le e Molimau Mai i le Upumoni, o le e mafai ona aoaoina [i tatou] i mea e le mafai ona [tatou] aoao atu i le tasi ma le isi. I na upu maoae ma le luitauina a Moronae, o se malamalama i le moni o le Tusi a Mamona ua folafolaina mai “e ala i le mana o le Agaga Paia.” Na tautino mai e Moronae, “Ma o le mana o le Agaga Paia e mafai ona outou iloa ai le moni o mea uma lava” (Moronae 10:4–5).

Ou te talitonu o lenei mana, o lenei meaalofa, ua avanoa mo i tatou i lenei vaitaimi.⁷

E leai se faamanuiaga sili atu e oo mai i o tatou olaga nai lo o le meaalofa o le Agaga Paia—le mafutaga a le Agaga Paia e taialaina i tatou, puipuia i tatou, ma faamanuia i tatou, e alu atu, e pei ona sa i ai, o se malamalama faaniutu i o tatou luma ma se afi mumu e taitaia i tatou i ala o le amiotonu ma le upumoni. O lena mana taiala o le sui lona tolu o le Aigaatua e mafai ona fai ma tatou pe afai tatou te ola agavaa mo ia.⁸

Tatou te manaomia le Agaga Paia i a tatou tiutetauave e tele faaleautaitai. Tatou te manaomia a o tatou aoao atu le talalelei i a tatou vasega ma i le lalolagi. Tatou te manaoamia i le taitaiga ma le aoaoina o o tatou aiga.

A o tatou taitai ma aoao atu i lalo o le faatosinaga a lena Agaga, o le a tatou aumaia le faaleagaga i totonu o olaga o i latou o e o loo tatou nafa [ma le vaaiga]. …

… E matagofie tele fua o aoaoga e faia i lalo o musumusuga a le Agaga Paia. Latou te fafagaina le agaga ma faafailele ai le tagata.

Sei ou tuuina atu se upu faapitoa o fautuaga i matua o e o loo avea ma ulu o aiga: tatou te manaomia le taitaiga a le Agaga Paia i le galuega tele ma le maaleale e a tatou, i le faamalosia o le faaleagaga i o tatou aiga.⁹

Faalogo i uunaiga a le Agaga. Ia lotomaulalo. Atonu e taitaiina atu oe i se tagata e le aao o le Alii ona o lou agaga, ou uiga faaalia, ou lagona, ma lou lotomaualalo.¹⁰

Mai lea taimi i lea taimi, na faatalanoaina ai a’u e sui o le au faasalalau. E toetoe lava o taimi uma na latou fesili mai ai, “E faapefea ona oo mai faaaliga i se perofeta a le Ekalesia?”

Ou te tali atu, e oo mai i le taimi nei e pei lava ona sa oo mai i aso ua mavae. E faatatau i lenei mea, sa ou ta’uina atu i nei sui o le au faasalalau le aafiaga o Elia ina ua maea le latou feiloaiga ma faitaulaga a Paala:

“Faauta mai, ua afio ane Ieova, o le matagi tetele foi ma le malosi ua lepetia ai mauga, ma momomo ai papa i luma o Ieova; e le’i i ai Ieova i le matagi: ua mulimuli i le matagi o le mafuie; e le’i i ai Ieova i le mafuie:

“E mulimuli i le mafuie o le afi; e le’i i ai Ieova i le afi: e mulimuli i le afi o le leo filemu ma le itiiti” (1 Tupu 19:11–12).

O le ala lena e oo mai ai. O loo i ai se leo filemu ma le itiiti. E oo mai o le tali i le tatalo. E oo mai e ala i le musumusuga a le Agaga. E mafai ona oo mai i le taaligoligoa o le po.

Pe ou te fesiligia ea lena mea? E leai lava. Ua ou vaai i ai i le tele o taimi.¹¹

E toetoe lava o taimi uma e oo mai ai ia i tatou le afioga a le Atua, e le o le iliga o ni pu, pe mai i potu fono tetele a le au atamamai, ae i le leo filemu ma le itiiti o faaaliga. O le faalogo atu ia i latou o e saili vale ia maua le poto ma e e tautino mai ma le leotetele a latou fofo [po o vailaau] mo gasegase o le lalolagi, atonu e tali mai se tasi faatasi ma le Fai Salamo, “Ina soia, ma ia outou iloa o au lava o le Atua: …” (Salamo 46:10) ma faatasi ai ma le Faaola, “O le ua i ai taliga e faalogo ai, ina faalogo mai ia o ia.” (Mataio 11:15.)¹²

E faapefea ona tatou iloa mea a le Agaga? E faapefea ona tatou iloa e mai i le Atua? E ala i ona fua. Afai e taitai atu ai i le tuputupu a’e ma le atina’e, afai e taitai atu ai i le faatuatua ma le molimau, afai e taitai atu ai i se auala e lelei atu o le faia o mea, afai e taitai atu i le faaleatua, o lona uiga e a le Atua lea. Afai e faavaivaia ai i tatou, afai e aumai ai i tatou i le pouliuli, afai e faafememea’i ai i tatou ma faapopoleina ai i tatou, afai e taitai atu i le leai o se faatuatua, o lona uiga la e a le tiapolo lea.¹³

E te iloa uunaiga a le Agaga e ala i fua o le Agaga—o le mea e faamalamalama ai, o le mea e atia’e ai, o le mea e lelei ma mautinoa ma faagaeetia ma taitai atu ai i tatou i mafaufauga lelei ma upu lelei ma galuega lelei e a le Agaga o le Atua lea. Ae o le mea e faavaivaia i tatou, lea e taitai atu ai i tatou i auala faasaina—o mea na e a le fili lea. Ou te manatu e manino, ma faigofie lava.¹⁴

Sa faailoa mai e se tasi o tagata atamai le manatu e faapea o le Ekalesia o se fili o le atamai. Afai e faatatau lana faamatalaga i le atamai o se lala o le filosofia ua aoao mai e faapea, “o le aoaoga faavae o le malamalama e matele pe afua uma mai i le mafuaaga moni” ma “o lena mafuaaga o le mataupu faavae mulimuli lea o le mea moni,” o lona uiga la, e ioe, tatou te tetee i se faauigaga papau faapena e faatatau i mea faalelotu. (Upusii mai le Random House Dictionary of the English Language, p. 738.) O se faauigaga faapena e le o faaaofia ai le mana o le Agaga Paia e talanoa mai ia i [tatou] ma e ala mai ia i [tatou].

Ioe tatou te talitonu i le atina’e o le mafaufau, ae o le poto e le na o le pau lea o le puna o le malamalama. O loo i ai se folafolaga, e tuuina mai i lalo o uunaiga mai le Silisili Ese, ua faailoa mai i nei upu matagofie: “O le a tuu atu e le Atua ia te outou le poto e ala i lona Agaga Paia, ioe, e ala i le meaalofa lē mafaamatalaina a le Agaga Paia.” (MF&F 121:26.)

O tagata o e faitio i le galuega a le Alii, o le au atamamai e pei ona ta’ua ai, o e faalumaluma, e na o le valea e tautatala mai ai e uiga i faaaliga faaleagaga. Latou te le’i faalogo i le siufofoga o le Agaga. Latou te le’i faalogo i ai aua latou te le’i saili i ai ma saunia i latou lava ia agavaa i ai. Ona, faapea ai lea o le malamalama e na o le mafaufau lelei ma galuega o le mafaufau e maua mai ai, ua latou teena le malamalama lea e sau mai i le mana o le Agaga Paia.

O mea a le Atua e malamalama i ai e ala i le Agaga o le Atua. O lena Agaga e moni. Ia i latou o e ua aafia i galuega a le [Agaga] o le malamalama e maua mai ai, e pei lava le moni o le malamalama lea e maua mai e ala i le faagaoioia o sane e lima. Ou te molimau atu e uiga i lenei mea. Ma ou te mautinoa o le toatele o tagata o le Ekalesia e mafai foi ona molimau mai ai. Ou te uunaia i tatou uma taitoatasi ia faaauau ona galueaina se loto ia ogatasi ma le Agaga. Afai o le a tatou faia o lea mea, o le a faamanuiaina o tatou olaga. O le a tatou lagona se sootaga ma le Atua lo tatou Tama Faavavau. O le a tatou tofo i le suamalie o le olioli lea e leai lava se isi auala e maua ai.

Ia aua ne’i maileia i tatou e faamatalaga taufaasese a le lalolagi, lea e matele lava i mea le lelei ma e masani ona maua mai ai fua oona. Ia tatou savavali ma le faatuatua i le lumanai, ia tautala ma le mautinoa ma atiina a’e se uiga faaalia o le talitonu. A o tatou faia lena mea, o le a avatu ai e lo tatou malosi le malosi i isi.¹⁵

Ou te talosaga atu ina ia tatou saili e le aunoa i le uunaiga a le Alii ma le mafutaga a Lona Agaga Paia e faamanuia ai i tatou i le faatumauina o a tatou taumafaiga i se tulaga maualuga faaleagaga. O na tatalo e le faapea o le a le taliina mai.¹⁶

Ata

o le aiga o loo suesue i tusitusiga paia

O le Alii na fetalai e faapea, afai tatou te tausia poloaiga, “O le a avea le Agaga Paia ma [a tatou] soa e lē aunoa” (MF&F 121:46) e siitia i tatou i luga, e aoao i tatou, taitai i tatou, faamafanafana i tatou, ma lagolago i tatou. Ina ia maua lenei mafutaga, e tatau ona tatou ole atu mo ia, ia ola mo ia, ma ia faamaoni i le Alii.¹⁷

“E faapefea ona e faatumauina le Agaga o le Alii ia te oe i taimi uma?” Ia, e te ola agavaa i ai; e te ola agavaa mo le Agaga o le Alii. O le mea lena e te faia. Ma o le a e maua ai. … O le ola sa’o lava. Ia aloalosa mai mea eleelea. Ia aloalosa mai ponokalafi. Ia aloalosa mai mea nei e tosoina oe i lalo. O tusi e te faitau ai, o mekasini e te faitau ai, o vitio e te matamata ai, o polokalama o le televise e te matamata ai, o faaaliga e te alu i ai, o ia mea uma e i ai se aafiaga ia te oe ma o le a i ai pe afai e te tuu atu oe lava i faatosinaga a na ituaiga o mea faatuinanau ia ua faia ina ia e mativa ai ae mauoa ai se isi tagata. Ia aloalosa mai na mea.¹⁸

Tou te tuuina i o outou lava luga i Aso Sa taitasi se faafouga o lau tautinoga ma feagaiga ina ia ave i o outou luga le suafa o le Alii o Iesu Keriso. Pe na outou mafaufau ea i lena mea, i le taua o lena mea, i le uiga o le tauave i o tatou luga o le suafa o le Alii o Iesu Keriso faatasi ai ma se tautinoga ma se folafolaga e tausi i Ana poloaiga? Ma ua Ia faia se tautinoga ma se folafolaga ia te oe o le a Ia tuuina mai Lona Agaga e faatasi ma oe. O se mea matagofie tele lena mea.¹⁹

O se faamanuaiga maoae lava le i ai o le auaunaga faatosina a se sui o le Aiga Atua, i le mauaina o lena meaalofa i lalo o aao o i latou o e galulue i le pule paia. Afai tatou te faaauau pea ona savavali i le mama, e mafai ona tatou olioli i le faataunuuga o le folafolaga na tuuina mai e le Alii ina ua Ia fetalai mai: “O le a avea le Agaga Paia ma āu soa e lē aunoa, ma o lou tootoo o le a avea ma se tootoo lē feliuliuai o le amiotonu ma le upumoni; ma o lau puleaga o le a avea ma se puleaga tumau-faavavau, ma e aunoa ma ni ala faamalosia, o le a tafe mai ia te oe e faavavau ma faavavau lava.” (MF&F 121:46.)²⁰

• Aisea tatou te manaomia ai le Agaga Paia? (Tagai i le vaega 1 ma le 2.) O anafea na e lagona ai le aoao atu ma le taiala o oe e le Agaga Paia? O a ni mea ua e aoaoina mai i na aafiaga?

• O le a se mea e mafai ona tatou aoao mai i le faamalamalamaga a Peresitene Hinckley o le ala e oo mai ai faaaliga i le perofeta? (Tagai i le vaega e 3.) Aisea e taua ai le iloa e masani ona fesootai mai le Agaga Paia i “se leo filemu itiiti”? O le a se mea ua e aoaoina mai i ou lava aafiaga e uiga i le iloaina o fesootaiga mai le Agaga Paia?

• Toe faamanatu “fua o le Agaga” lea na aotele mai e Peresitene Hinckley i le vaega e 4. E mafai faapefea ona fesoasoani nei aoaoga ina ia tatou iloa ai faatosinaga a le Agaga? O a ni tulaga e matautia ai le talitonu “o le poto … ua na o le pau lea o le puna o le malamalama”? O a ni aafiaga na e maua i le mauaina o le malamalama faaleagaga?

• O a ni ou lagona a o e mafaufau loloto i le aoaoga a Peresitene Hinckley o loo i le vaega e 5 e uiga i le mafutaga a le Agaga Paia. O a ni auala ua faamanuiaina ai oe e le Agaga Paia?

1 Korinito 2:9–14; 1 Nifae 10:17; 2 Nifae 31:17–18; Mosaea 3:19; Moronae 8:25–26; MF&F 11:12–14

“Afai tatou te alolofa ia i latou o loo tatou aoaoina, tatou te tatalo mo i latou uma taitoatasi. Tatou te faia mea uma tatou te mafaia ina ia iloa ai mea latou te fiafia i ai, o mea e faataunuuina, o mea e manaomia, ma popolega. Tatou te fetuunaia a tatou aoaoga ina ia fetaui ma mea latou te manaomia, e tusa lava pe tele ai se taimi ma ni taumafaiga e alu ai. Ia tatou matauina pe a le auai mai i latou ma faailoa i latou pe a latou auai mai. Tatou te ofoina atu le fesoasoani pe a manaomia” (O Le Aoao Atu, E Leai Se Isi Valaauga e Sili Ai [1999], 34).