Hugna 13

Mga Journal: “Mas Bililhon Pa kay sa Bulawan”

Ang atong mga journal mga bililhon alang kanato sa personal, ug makahatag usab kini og mga panalangin sa atong mga pamilya ug sa tanang umaabot nga henerasyon.

Gikan sa Kinabuhi ni Wilford Woodruff

Niadtong 1835 si Wilford Woodruff nagsugod sa iyang unang journal, “nagtuo nga kini makaayo ang pagribyu sa atong nangaging kinabuhi ug dili lang atong kahigayunan apan atong katungdanan ang paghino og husto nga asoy sa atong mga gibuhat.” Misulat siya, “Busa kini akong tuyo nga maningkamot sa paghimo og journal sa akong mga paglakaw, nga kon ako sukton mahimo kong makahatag sa akong asoy sa pagdumala.”1 Naghimo siya og journal sulod sa misunod nga 63 ka tuig, naghimo sa iyang katapusang pagsulat niadtong Agosto 31, 1898, duha ka adlaw sa wala pa siya mamatay. Ang mga sinulat sa iyang journal nagbilin og tinuod ug matinud-anong rekord sa iyang personal nga kinabuhi, nagpakitag gugma sa iyang pamilya, sa iyang interes sa iyang mga palibot, sa iyang kakugi sa pagbuhat sa inadlawng buluhaton, sa iyang hugot nga pagtuo sa panahon sa iyang mga pagsulay, ug ang iyang pagpamatuod ug pagsabut sa ebanghelyo. Ang iyang mga sinulat naghatag usab og mga panglantaw sa mga kinabuhi sa ubang mga miyembro sa Simbahan nianang panahona.

Dugang sa iyang pagsulat kalabut sa iyang personal nga kinabuhi ug sa iyang pagpangalagad, si Wilford Woodruff naghimo og giampingan nga rekord sa kasaysayan sa Simbahan. Mipasabut siya: “Nadasig ko ug natandog sa paghimo og journal ug pagsulat sa mga kalihokan niini nga Simbahan taman sa akong mahimo. Wala nako masabti nganong ang akong mga pagbati mainiton kaayo nga mohimo og journal samtang bag-o pa kining Simbahan, apan karon nasabtan na nako. Usahay madungog nako si Brother Joseph o ang Napulog Duha nga nagsangyaw o nagtudlo sa bisan unsa nga baruganan apan ang akong pagbati ingon kalisud sa isda nga wala sa tubig hangtud nga ako kining gisulat. Dayon nindot na ang akong gibati. Makahimo ko pagsulat sa wali ni Joseph usa ka semana gikan sa iyang pagdiskurso hapit gyud sama sa iyang gisulti, ug human kini masulat, mawala kini gikan kanako o mawala gikan sa akong hunahuna. Kadto gasa gyud gikan sa Dios ngari kanako.”²

Isip kabahin sa iyang paningkamot sa pagsulat sa kasaysayan sa Simbahan, si Presidente Woodruff mirekord sa importanting mga detalya gikan sa mga miting nga iyang gitambongan. Sa usa ka miting, mitudlo siya og baruganan nga mahimong maggamit sa mga journal ingon man sa opisyal nga mga rekord sa Simbahan: “Kon moagi sa kusog nga bul-og nga tubig dili kita makaagi makaduha sa samang tubig. Ni kita makagamit makaduha sa samang higayon. Kon kita nakagawas na nianang pultahan, ang gibuhat niini nga miting sirado na gyud hangtud sa hangtud. Dili na gyud kita makagamit sa panahon karong gabhiona pag-usab. Nan dili ba gyud kita motipig og rekord sa atong gibuhat, sa mga pagtulun-an, ug sa tambag diin atong gihatag karon nga miting? Mohimo gyud kita.”³

Pinaagi sa iyang mga journal, si Presidente Woodruff naghatag og mahangturong gasa sa iyang mga kaliwatan ug sa tanang mga miyembro sa Simbahan. Ang Biographer nga si Matthias F. Cowley miingon: “Ang kinabuhi ni Wilford Woodruff puno sa mga katingala. Simpli lamang kini diin gawasnon niyang gipadayag ang iyang kasingkasing ug ang iyang mga tuyo. Ang kaprangka sa iyang mga panultihon, ang iyang pagtagad sa mga detalya, ug ang iyang makugihon nga pagtagad sa kamatuoran nakapahimo tingali kaniya, nga pinakamaayo nga tigsulat sa mga hitabo sa tanang kasaysayan sa Simbahan.”4 Si Elder B. H. Roberts, miyembro sa Unang Konseho sa Seventy ug giila nga historyan sa Simbahan, misulat: “Si Presidente Woodruff nakahatag og pinakaimportanting serbisyo sa simbahan. Ang iyang Journals, regular ug han-ay ug limpyo nga gitipigan ug lig-on nga gibugkos, … naglangkob og orihinal nga pagsulat sa makasaysayon nga bahandi nga dili mabayran. Ang Simbahan utangan niini nga Journals alang sa masaligan nga rekord sa mga diskurso ug mga panultihon sa Propeta sa Bag-ong Dispensasyon—si Joseph Smith—nga alang kaniya mawala unta hangtud sa hangtud. Sama usab katinuod sa mga diskurso ug mga panultihon ni Brigham Young, ug sa ubang nangulong mga elder sa simbahan; [ug] alang sa mga gihisgutan sa importanting miting sa konseho, mga desisyon, mga palisiya, ug daghang opisyal nga mga aksyon nga may pagkapribado, kon wala ang tigsulat sa kasaysayan mahimong dili makakuha og husto nga punto sa daghang mga butang— sa tanan niining pagrespeto kini nga mga Journal ni Presidente Woodruff mga bililhon.”⁵

Kadaghanan sa mga pamahayag niini nga hugna gikuha gikan sa mga rekord sa wali ni Presidente Woodruff nga iyang gisulti sa mga miting sa priesthood. Bisan pa kadaghanan sa iyang mga pamahayag gitumong sa mga elders, ang iyang mga pagtulun-an bililhon alang sa tanang mga miyembro sa Simbahan.

Mga Pagtulun-an ni Wilford Woodruff

Kon atong irekord ang kasaysayan sa atong kinabuhi, mahatagan nato og kaayohan ang atong kaugalingon, ang atong kaliwatan ug ang Simbahan.

Ang rekord ug ang kasaysayan niining Simbahan ug gingharian gikinahanglan sa umaabot nga adlaw. Walay gyuy laing dispensasyon sa yuta nga ang kalihokan niini labaw nga makapainteres kay sa dispensasyon diin kita nagpuyo. …

Tinuod kini nga si Joseph Smith nagtipig og kasaysayan sa iyang kaugalingong kinabuhi ug kadtong uban nga may kalabutan kaniya. Patay nga siya karon, apan ang iyang kinabuhi ug pagpamatuod karon gimantala sa kalibutan. … Si Presidente Young usab [adunay] tigsulat kinsa [mirekord] sa iyang adlaw-adlawng mga buhat ug kinabuhi, diin husto ug maayo. Apan kana nagrekord ba sa kasaysayan sa kinabuhi ug sa mga pagdumala sa Dios uban sa daghang liboan ka mga Apostoles ug mga elder kinsa anaa o maanaa sa tanang kalibutan taliwala sa tanang kanasuran ubos sa langit? Dili, sa pagkatinuod dili. Nan tanan kamong mga elders sa Israel isulat ang inyong kasaysayan ug ang mga pagdumala sa Dios kaninyo sa tanang kalibutan alang sa inyong kaugalingong kaayohan ug sa inyong kaliwatan, alang sa kaayohan sa balay sa Israel, alang sa kaayohan sa mga Judeo ug sa Hentil, alang sa kaayohan sa umaabot nga henerasyon.⁶

Ang uban tingali naghunahuna nga dili importante ang pagsulat o pagtipig og rekord sa atong gibuhat o sa buhat sa Dios, apan nagtuo ko nga kini importante. Kay kon dili pa ang mga propeta dili unta maninguha sa pag-awhag kanato nga magmatinud-anon kabahin niini nga hilisgutan. Ang Ginoo misulti kanato nga unsa ang gibugkos sa yuta pagabugkoson sa langit ug unsa ang gitala sa yuta itala sa langit, ug unsa ang wala mabugkos o matala sa yuta dili mabugkos o matala sa langit [tan-awa sa D&P 128:7–8.] Busa masabut nga importante gyud kaayo nga kita maghupot og tinuod ug matinud-anon nga rekord sa tanang mga butang.⁷

Ang uban moingon nga ang [paghupot og journal] samok kaayo. Apan dili gyud nato tawgon nga samok ang bisan unsa nga makahatag og kaayohan. Gihunahuna ko kini nga bahin sa akong kinabuhi ang gigamit nga panahon sa paghupot og journal ug sa pagsulat sa kasaysayan nga mao ang labing mapuslanon sa tanan.⁸

Bisan kon ang mao lamang nga katuyoan nga atong gihunahuna (sa pagtipig og mga journal) nga makahimo pagsublisubli og basa niini ug aron mabasa sa atong mga anak, takus gyud kini sa oras nga gigamit sa pagsulat sa atong mga journal.⁹

Irekord gyud nato ang mga panalangin sa Dios kanato ug ang atong opisyal nga mga buhat sa Simbahan.

Kada tawo mosulat gyud og mubong kasaysayan sa iyang kinabuhi: sa iyang mga ginikanan, sa iyang natawhan, sa iyang relihiyon, kanus-a siya nabunyagan ug kinsa ang nagbunyag, kanus-a giorden, para unsa ang pag-orden ug kinsa ang nag-orden—paghatag og mubo nga skets sa tanan niyang mga misyon ug ang tanang opisyal nga buhat ug mga pagdumala sa Dios kaniya. Unya kon siya mamatay ug ang mga historian ganahan nga momantala sa iyang kasaysayan, aduna silay mga impormasyon nga magamit. Daghan tingali ang naghunahuna nga bati kini nga buluhaton ug dili importante, apan alang kanako importante kini.¹⁰

Awhagon ko kamo nga isulat ninyo ang tanan ninyong mga panalangin ug tipigi kini. … Gibati ko sa pagsugo kaninyo sa paghimo og rekord sa tanang opisyal nga buhat sa inyong kinabuhi. Kon kamo nagbunyag, nagkumpirma, nag-orden, o nagpanalangin ni bisan kinsang tawo o nangalagad sa masakiton, pagsulat og asoy niini. Kon ang kada tawo mohimo niini, ang Simbahan makahimo og husto nga asoy niini. … Kon ang gahum ug mga panalangin sa Dios gihatag nga kamo nalikay gikan sa kakuyaw, … irekord gyud ninyo kini. Pagtipig og asoy sa mga pagdumala sa Dios kanimo kada adlaw. Gisulat nako ang tanang mga panalangin nga akong nadawat, ug dili nako ibaylo kini sa bulawan.¹¹

Wala ba kitay igong respeto sa Dios sa paghimo og rekord niadtong mga panalangin nga iyang gibubu ngari kanato ug sa atong opisyal nga mga buhat nga atong gihimo sa Iyang pangalan dinhi sa yuta? Nagtuo ko nga mohimo gyud kita.¹²

Ang Kapangulohan sa Simbahan kinsa nagdumala nato karon… nagtipig og kasaysayan sa mga pagdumala sa Dios ug sa tawo uban kanila … diin makapainteres sa minilyon sa umaabut nga mga henerasyon. Apan kini nakapasumangil ba sa daghang liboan ka mga elders ug mga high priest ug mga Apostoles kinsa nagbiyahe sulod sa daghang mga tuig ug nagtukod niini nga Simbahan ug gingharian ug adunay mga gasa sa Espiritu Santo uban kanila aron sila adunay gahum sa pag-ayo sa masakiton ug sa pag-abog sa mga yawa, sa mga buta nga makakita, sa bungol nga makadungog, sa bakol nga makalakaw …, ug mimando sa demonyo nga sila mituman kanila, ug nakaangkon og mga anghel nga magbalantay aron malikay sila sa kakuyaw ug sa kanamatayon? Ako moingon, ang mga elders napanalanginan ba niini nga mga butang ug wala hunahunaa kini nga bililhon irekord? Ang mga elder ba dili maghimo og marka sa pen aron mobilin og asoy nga girekord aron mabasa sa ilang mga anak ug sa umaabut nga mga henerasyon? Ako moingon mohimo gyud sila. Nagtuo ko nga ang Ginoo maningil niini gikan sa atong mga kamot, ug kini bahandianon ug balaan nga kabilin nga takus gyud ihatag sa atong mga kaliwatan.¹³

Mohimo gyud kita og rekord sa mga hitabo kon kini moabut.

Mga tawo kita nga giorden sa Dios aron pagtukod sa Iyang gingharian dinhi sa yuta, magtukod sa Zion, ug mag-andam sa agianan alang sa pag-anhi ni Jesukristo. Karon, dili ba kita maghupot og journal, og rekord, ug kasaysayan sa mga pagdumala sa Dios uban [kanato] kon sila mahitabo matag adlaw sa atubangan sa atong mga mata? Mohimo gyud kita. …

… Imbis nga dili magpakabana niini nga sanga sa atong buhat himoa nga ang kada tawo kinsa makahimo, sa paghupot og journal ug irekord ang mga hitabo nga mahinabo nga inyong makita kada adlaw. Mahimo kini og usa ka bililhon nga kabilin sa atong mga anak ug dakong kaayohan sa umaabot nga mga henerasyon pinaagi sa paghatag kanila sa tinuod nga kasaysayan sa pagtubo ug pag-uswag sa Simbahan ug sa gingharian sa Dios dinhi sa yuta niining katapusang dispensasyon, imbis nga mohatag niini sa atong mga kaaway nga mosulat og bakak nga kasaysayan sa tinuod nga Simbahan ni Kristo.¹⁴

Dili kaayo kita hilig maghunahuna sa ka kaimportante sa mga hitabo kon kini moabut kanato, apan kita bation sa kaimportante niini pagkahuman na. Nagpuyo kita sa usa sa pinakimportanteng henerasyon sukad magpuyo ang tawo sa yuta, ug mosulat gyud kita og asoy niadtong importanteng mga transakyon nga atong makita nga nanghitabo isip katumanan sa mga panagna ug sa mga pagpadayag sa Dios. Adunay daghang mga pagpadayag nga natuman na sa atong panahon, ug samtang kini nahitabo sa among atubangan buot kami nga mohimo og rekord gikan niini.¹⁵

Kinahanglang magsugod gyud og sayo ang mga bata pagtipig og mga journal.

Ganahan kong mosulti sa akong batan-ong mga higala nga dako gyud kini nilang panalangin, ug sa ilang mga anak unya, kon motipig sila og inadlawng journal kon unsa ang mahitabo nila ug sa ilang palibot. Pakuhaa og gamayng notebook ang mga batang lalaki ug mga babaye, pasulata og dyutay niini hapit kada adlaw.

“Unsa may akong isulat?” mangutana ka. Isulat ang bisan unsang bililhong ipreserbar, o ang pinakanindot nga nahitabo nimo; ug kon mosugod ka niini samtang bata ka pa, daw sayon ra kini kon mahimo na kamong batan-ong mga lalaki ug babaye. Kalipay kaha gyud ni ninyo, ug sa inyong mga anak, traynta, singkwenta, o otsenta ka tuig gikan karon, nga manglingkod ug mobasa unsa ang nahitabo sa inyong palibot ug sa inyong pagkabata ug kabatan-on! Dili ba kamo ganahan nga mobasa unsa ang nahitabo sa inyong mga amahan, ug mga inahan, ug mga apohan, sa dihang mga batan-on pa sila ug sa panahon sa ilang mga kinabuhi? Pero ang tumong dili kaayo pag-aghat kaninyo sa paghimo og journal samtang bata pa kamo, kay sa pag-aghat kaninyo sa pagpadayon niini sa inyong pagkahingkod, gani sa tibuok ninyong mga kinabuhi. Gikinahanglan kini pag-ayo sa henerasyon diin kamo nagpuyo, kay kamo nagpapuyo nga ingon ka importante nga henerasyon nga ang mga anak sa tawo sukad makita, ug labaw pa kining mas importante nga magsugod gyud og sayo sa paghupot og journal ug sundon ang gibuhat samtang buhi pa mo, kay sa ubang mga henerasyon nga mobuhat sa ingon.

Mga anak kamo sa Zion, ug ang inyong mga ginikanan gitawag sa Dios aron pagtukod sa Simbahan ni Kristo ug sa Gingharian sa Dios dinhi sa yuta sa katapusang mga adlaw, ug sa dili madugay ang inyong mga ginikanan mamatay, ug mopuli gyud mo sa ilang mga dapit. Mahimo kamong mga amahan ug mga inahan, ug [kamo] mga gagmayng lalaki … mahimong mga propeta, mga apostoles ug mga elders, ug magpakabuhi aron mobiyahe ug mosangyaw sa ebanghelyo, ug magpakabuhi aron modawat sa pulong sa Ginoo. Mao nga gikinahanglan gyud nga kamo maghupot og journal ug mosulat og asoy sa mga pagdumala sa Ginoo uban kaninyo. …

… Karon dako kaayo nakong kalipay ug sa akong pamilya nga manglingkod ug mobasa sa asoy sa among mga pagbiyahe, diin kami niadto, ug unsa ang among nahino, ug sa mga pagdumala sa Dios uban kanamo, ug sa daghang nindot nga higayon nga uban kami sa among mga higala. Mabasa nako sa akong mga journal ang maayong mga pagtulun-an nga akong nadungog daghang mga tuig na ang milabay gikan sa mga Presidente nga sila si Joseph Smith, Brigham Young, Heber C. Kimball, sa Napulog duha ka mga Apostoles, ug sa daghan pang ubang nindot nga mga elders, ug sa makalingaw nga mga higayon nga kami nagkapundok. Kon ang akong batan-ong mga higala magsugod sa pagbuhat niini ug magpadayon niini, mas dako pa kini og bili kay sa bulawan alang kanila sa umaabot nga adlaw.¹⁶

Mga Sugyot sa Pagtuon ug Pagtudlo

Hunahuna kining mga ideya samtang kamo magtuon sa hugna o samtang kamo mag-andam sa pagtudlo. Alang sa dugang nga tabang, tan-awa ang mga pahina v–x.

Ngano man nga ang kang Presidente Woodruff ’nga mga journal importante sa Simbahan? (Tan-awa sa mga pahina 139, 141.) Unsa kaha unta ang isulti ni Presidente Woodruff sa mga tawo kinsa nagtuo nga ang ilang mga journal dili gyud makahimo og kalainan ni bisan kinsa?
Unsa man ang pipila ka mga panghitabo nga nahitabo sa Simbahan sa inyong tibuok kinabuhi? Sa unsa unta nga paagi nga ang inyong rekord niining mga panghitabo makatabang sa inyong mga anak ug mga apo?
Ribyuha ang unang paragrap sa pahina 141. Sa unsa man nga paagi nga ang pamahayag ni Presidente Woodruff niini nga paragrap magamit sa paghupot og journal? Hinuktuki ang epekto sa importanteng mga hitabo nga mawala sa karon ug sa umaabot nga mga henerasyon.
Paklia ang hugna, tan-awa ang nagkalainlaing matang sa importanteng mga impormasyon nga ato gyud nga iapil sa atong mga journal. Sa unsa man nga paagi nga ang maong mga rekord personal nga mihatag nato og kaayohan? Sa unsa man nga mga paagi nga kini mihatag og kaayohan sa atong mga pamilya?
Unsa man kaha ang ganahan ninyong mahibaw-an sa mga kinabuhi sa inyong mga kaliwatan? Unsa man ang gisugyot niini kalabut sa inyong isulat sa inyong journal?
Nganong importante man nga isulat ang mga panghitabo diha dayon human kini nahitabo? (Tan-awa sa pahina 144.) Unsa man ang atong buhaton aron makahigayon paghupot og journal?
Paklia sa mga pahina 144–46 ug ribyuha ang tambag ni Presidente Woodruff sa mga bata ug mga batan-on. Sa unsa man nga paagi nga ang mga ginikanan ug mga apohan makapaambit niini nga mga ideya sa ilang mga anak ug mga apo? Sa unsa kaha nga paagi nga magamit kini ninyo nga mga ideya sa family home evening o family council?

May kalabutan nga nga Kasulatan: 1 Nephi 1:1; Omni 1:17; Mosiah 1:1–6; Alma 37:1–9; Moises 6:5–6