Tatesui Sato: Tokotaha Liliu Lea ʻi he Kotoa ʻo ʻEne Moʻuí

ʻĪmisi

Ko e papitaiso ʻo Sató

Naʻe hoko ʻa e Tau Lahi ʻa Māmani Hono Uá ke ʻikai lava ai ʻa e Kāingalotu kei talavou tokolahi ʻo e Siasí ʻo ngāue fakafaifekau. Naʻe feinga ha niʻihi ke maʻu ha ngaahi faingamālie ke vahevahe ʻa e ongoongoleleí lolotonga ʻenau ngāue fakakautaú. Naʻe tokolahi ʻa e kau papi ului ki he Siasí ʻi Siapani naʻe akoʻi kiate kinautolu ʻa e ongoongoleleí ʻe he kau sōtia ko ʻení.

Hili ha taimi nounou mei he ʻosi ʻa e taú, naʻe ʻi ai ha Kāingalotu ʻo e Ngaahi ʻAho Kimui Ní ʻi he ngāue fakakautau ʻa e ʻIunaiteti Siteití—kau ai ʻa e lafitani kei talavou ko hono hingoá ko Poiti K. Pēkā—naʻá ne vēkeveke ke vahevahe ʻa e ongoongoleleí mo Tatesui Sato, ko ha tangata Kalisitiane naʻe nofo ʻi Nalumi. Kuo lau ʻe Sato kimuʻa fekauʻaki mo e Kāingalotu ʻi he Ngaahi ʻAho Kimui Ní peá ne manatu ki he ngaahi ʻīmisi fakaʻofoʻofa ʻo e Temipale Sōlekí ʻoku tuʻu fehangahangai mo e ngaahi moʻunga kuo ʻufiʻufi ʻe he sinoú mei muí. Naʻe lea faka-Pilitānia lelei ʻa Sato, naʻá ne hoko ko e tokotaha fakatonulea maʻá e kau sōtiá ʻi heʻenau akoʻi ʻa e ongoongoleleí ki hono fāmilí mo e ngaahi kaungāmeʻá. ʻI he ʻaho 7 ʻo Siulai 1946, naʻe kau ʻa Sato mo hono uaifi ko Saioó ʻi he ʻuluaki kau papi ului fakalotofonua ʻe toko tolu naʻe papitaiso hili ʻa e taú.

Hili ha taimi nounou mei hono papitaiso ʻo Sató, naʻá ne kamata ngāue ko ha tokotaha fakatonulea ʻi he misioná. ʻI he ngaahi taʻu hono hokó, naʻe liliu ʻe Sato ʻa e fanga kiʻi tohi tufa lahi mo e ngaahi naunau kehe ʻa e Siasí ne pulusí kau ai ʻa e lea ʻa ʻEletā Sēmisi E. Talamesí ko Sīsū ʻa e Kalaisí. ʻI he 1949 naʻe ʻaʻahi ʻa ʻEletā Mātiu Kauli ʻo e Kōlomu ʻo e Kau ʻAposetolo ʻe Toko Hongofulu Mā Uá ki he ʻapi ʻo Sató, ʻo fakanofo ʻa Tatesui ko ha kaumātuʻa, mo vaheʻi ia ko ha tokotaha fakatonulea mo liliu lea maʻá e kakai Siapaní “ʻi he kotoa ʻo [ʻene] moʻuí.” Kimui ange aí naʻe liliu ʻe Sato ʻa e Tohi ʻa Molomoná, Tokāteline mo e Ngaahi Fuakavá, Mataʻitofe Mahuʻingá, mo e ngaahi ouau ʻo e temipalé.