Talateú

Fekumi ki he tataki ʻa e Laumālie Māʻoniʻoní ʻi hoʻo teuteu ke faiakó. Ako ʻi he faʻa lotu ʻa e vahe kuo ʻoatú ke ke falala lahi ange ai ki he mahino ʻokú ke maʻu ki he ngaahi akonaki ʻa Palesiteni Sinoú. ʻE toe fakamātoato mo ongo ange hoʻo faiakó ʻi he taimi kuo tākiekina fakatāutaha ai koe ʻe heʻene ngaahi leá (vakai, T&F 11:21).

Kapau ʻokú ke akoʻi ha lēsoni ʻa e Lakanga Taulaʻeiki Faka-Melekisētekí pe Fineʻofá, ʻoku totonu ke ʻoua naʻá ke tuku e tohí ni ki he tafaʻakí pe teuteu ha lēsoni mei ha toe nāunau kehe. Filifili ʻi he faʻa lotu mei he vahé, ʻa e ngaahi akonaki ko ia ʻokú ke ongoʻi ʻe ʻaonga taha ki hoʻo kalasí. ʻOku ʻi ai ha ngaahi vahe ʻe niʻihi ʻoku hulutuʻa e nāunau ia aí ke lava ʻo akoʻi lolotonga e taimi kalasí.

Poupouʻi e kau akó ke ako e vahé kimuʻa he lēsoní pea ō mai mo ʻenau tohí. ʻI heʻenau fai iá, te nau mateuteu lelei ange ke kau ʻi ha fealēleaʻaki pea mo nau fefakamāmaʻiʻaki.

ʻI hoʻo fakafeʻiloaki e vahé pea ʻi he lolotonga e lēsoní, feinga ke ke fakatupu ha ʻātakai ʻe lava ke ongo ai e Laumālié ki he loto mo e fakakaukau ʻa e kalasí. Ke kamata ʻa e lēsoní, tokoni ke tukutaha e tokanga hoʻo kalasí ʻi he ngaahi akonaki ʻo e vahé. Fakakaukauʻi e ngaahi meʻá ni:

• Lau pea aleaʻi e konga ʻi he kamataʻanga ʻo e vahé ko e “Mei he Moʻui ʻa Lolenisou Sinoú.”

• Aleaʻi ha fakatātā pe potufolofola mei he vahé.

• Mou hivaʻi fakataha ha himi ʻoku fekauʻakí.

• Vahevahe nounou mo kinautolu ha meʻa naʻá ke aʻusia fakatāutaha fekauʻaki mo e tefitó.

ʻI hoʻo faiako mei he tohí ni, fakaafeʻi ʻa e niʻihi kehé ke nau vahevahe atu ʻenau ngaahi fakakaukaú, fai ha ngaahi fehuʻi pea mo nau feakoʻiʻaki. ʻI he taimi ʻoku nau kau longomoʻui mai aí, te nau toe mateuteu ange ai ke ako mo maʻu ha fakahā fakatāutaha. Fakaʻatā e ngaahi fealēleaʻaki leleí ke hokohoko atu, ʻo laka ange ʻi haʻo feinga ke akoʻi kotoa e ngaahi akonakí. Fakaʻaongaʻi e ngaahi fehuʻi ʻi he vahe takitaha ke poupouʻi ʻaki ʻa e fealēleaʻakí. ʻOku ʻi ai ha ngaahi fakatokanga he vahe takitaha ʻoku fekauʻaki mo e ngaahi fehuʻi ko iá. ʻE lava ke ke faʻu pē foki haʻo ngaahi fehuʻi ʻoku fakatefito he niʻihi ʻokú ke akoʻí.

ʻE ʻoatu ʻe he ngaahi meʻa ko ʻeni ke fili mei aí ha toe ngaahi fakakaukau kehe:

• Kole ki he kau akó ke vahevahe ʻa e meʻa ne nau ako mei heʻenau ako fakatāutaha e vahé. ʻE tokoni ke fetuʻutaki ki ha niʻihi ʻo e kau akó lolotonga e uiké ʻo kole ange ke nau ō maí kuo nau mateuteu ke vahevahe ʻa e meʻa ne nau akó.

• Vahe ki he kau akó ke nau lau ha ngaahi fehuʻi kuo filifili mei he fakaʻosinga ʻo e vahé (fakafoʻituitui pe fakakulupu iiki). Kole ange ke nau kumi ʻa e ngaahi akonaki ʻi he vahé ʻoku fekauʻaki mo e ngaahi fehuʻí. Hili iá pea fakaafeʻi kinautolu ke vahevahe mo e toenga ʻo e kulupú ʻa ʻenau ngaahi fakakaukaú mo e ngaahi ʻilo ʻoku nau maʻú.

• Mou lau fakataha ha ngaahi konga kuo filifili mei he fakamatala ʻa Palesiteni Sinou ʻi he vahé. Kole ki he kau akó ke nau vahevahe atu ha ngaahi sīpinga mei he folofolá pea mei he meʻa kuo nau aʻusiá, ʻoku fakafōtunga mai ai e meʻa ne akoʻi ʻe Palesiteni Sinoú.

• Kole ki he kau akó ke nau fili ha konga ʻe taha pea nau lau fakalongolongo ia. Fakaafeʻi kinautolu ke nau fakakulupu ʻo tautau toko ua pe toko tolu mo e kakai ne nau fili ʻa e vahe takitaha pea nau aleaʻi e meʻa kuo nau akó.

ʻE mahuʻingamālie taha pē e ngaahi akonaki ʻa Palesiteni Sinoú ki he kau ako ko ia ʻoku nau vahevahe atu ia mo e niʻihi kehé pea fakaʻaongaʻi kinautolu heʻenau moʻuí. Fakakaukauʻi e ngaahi meʻá ni:

• Fehuʻi ki he kau akó pe ko e hā ha founga ʻe lava ke nau fakaʻaongaʻi ai e ngaahi akonaki ʻa Palesiteni Sinoú ʻi honau ngaahi fatongia ko e mātuʻá pe kau faiako fakaʻapí pe faiako ʻaʻahí.

• Poupouʻi e kau akó ke nau vahevahe ha niʻihi ʻo e ngaahi akonaki ʻa Palesiteni Sinoú ki honau fāmilí mo e kaungāmeʻá.

• Fakaafeʻi e kau akó ke nau fakahoko e meʻa kuo nau akó pea nau vahevahe ʻenau nagahi aʻusiá ʻi he kamataʻanga ʻo e kalasi hokó.

Fakamāʻopoʻopo nounou pē ʻa e lēsoní pe kole ki ha taha pe toko ua ke nau fakahoko ia. Fakamoʻoni ange ʻo kau ki he ngaahi akonaki kuo mou aleaʻí. ʻE lava foki ke ke fakaʻaongaʻi e niʻihi kehé ke nau vahevahe ʻenau fakamoʻoní.