Ave i o Tatou Luga le Suafa o Iesu Keriso

O’u uso e ma tuafafine talu ai nei, ao o’u mafaufau loloto i le poloaiga a Peresitene Russell M. Nelson e valaau le Ekalesia i lona igoa faaalia, sa ou sue i le mea lea na faatonuina ai sa Nifae e le Faaola e uiga i le igoa o le Ekalesia.¹ Ao o’u faitau i upu a le Faaola, sa taia a’u i le ala na Ia fetalai atu ai i tagata “ina ia ave i o latou luga le suafa o Keriso.”² O lenei mea na mafua ai ona ou tilotilo ia te a’u lava ma fesili, “O o’u tauaveina ea le suafa o le Faaola e pei ona Ia finagalo ou te faia?”³ Ou te fia faasoa atu i le asō nisi o musumusuga sa ou mauaina i se tali i la’u fesili.

Muamua, ina ia ave i o tatou luga le suafa o Keriso o lona uiga tatou te tauivi ma le faamaoni e vaai e pei ona silasila mai le Atua.⁴ E faapefea ona silasila mai le Atua? Na saunoa mai Iosefa Samita, “A o faamasinoina ma tausalaina e le tasi vaega o tagata le isi e aunoa ma le alofa tunoa, ua silasila mai le Matua Sili o le vanimonimo i luga o le aiga atoa o tagata ma se popole faatama ma le manatu faamatua” aua “o Lona alofa e le mafuatiaina.”⁵

O ni nai tausaga ua mavae, na maliu ai lo’u tuafafine matua. Sa faigata lona olaga. Sa ia tauivi ma le talalelei ma e lei malosi moni foi [i le lotu]. Na lafoai e lona toalua le la faaipoipoga ma tuua o ia e tausia se fanau laiti e toafa. I le afiafi na ia maliu ai, i se potu faatasi ai ma lana fanau, sa ou faia sona faamanuiaga ia toe foi filemu atu ai i le aiga. I lena taimi na ou iloa ai ua masani ona ou faamatalaina le olaga o lo’u tuafafine i tulaga o ona faafitauli ma le lē toaga. A o ou tuuina ou lima i luga o lona ulu i lena afiafi, na ou mauaina se aoaiga malosi mai le Agaga. Sa matuā faailoa mai lava ia te a’u ma faataga a’u ina ia ou vaai atu ia te ia e pei o silasila mai le Atua ia te ia—e le pei o se tasi o le na tauivi ma le talalelei ma le olaga ae o se tasi na taulimaina ni faafitauli faigata ou te lei mauaina. Sa ou vaai ia te ia o se tina matagofie o le, e ui i faafitauli maoae, na tausia se fanau aulelei ma ofoofogia e toafa. Sa ou vaai ia te ia o se uo i lo matou tina lea na faaaluina se taimi e vaaia ai ma avea ma se soa ia te ia ina ua maliu lo matou tama.

I le taimi o lena afiafi mulimuli ma lo’u tuafafine, ou te talitonu na talosagaina a’u e le Atua, “E le mafai ona e vaai atu i tagata uma o siomiaina oe o se tagata paia?”

Na aoao mai Polika Iaga:

“Ou te fia uunaia le Au Paia … ina ia malamalama i alii ma tamaitai i le tulaga o latou i ai, ae le o le malamalama ia i latou i le tulaga o e i ai.”⁶

“Ua faafia ona faia le tala lenei—‘Ua faia e sea tagata se mea sese ma e le mafai ona ia avea ma se tagata o le Au Paia.’ … Tatou te faalogo i ni nai palauvale ma pepelo … [pe] ua solia le Sapati. … Aua le faamasinoina ia tagata, aua e te le iloaina le fuafuaga a le Alii mo i latou. … [Ae,] ia onosai ia i latou.”⁷

E mafai e se tasi o outou ona vaai faalemafaufau atu i lo tatou Faaola o tuuina oe ma au avega e pasia o Ia e aunoa ma Lona silafiaina? Na silasila atu le Faaola i le Samaria, le tagata mulilua, le ao lafoga, le lepela, tagata e le atoatoa le malosi o le mafaufau, ma le tagata agasala i fofoga lava e tasi. O i latou uma o ni fanau a Lona Tama. Ua togiolaina i latou uma.

E mafai e se tasi ona vaai faalemafaufau atu o Ia liliuese mai se tasi ma le masalosalo i lo latou nofoaga i le malo o le Atua pe mai soo se tasi o mafatia i soo se tulaga?⁸ Ou te le mafaia. I fofoga o Keriso, e taua tele agaga taitasi. E leai se tasi na muai faauuina ia toilalo. O le ola e faavavau e mo tagata uma.⁹

Mai le aoaiga a le Agaga i autafa o le moega a lo’u tuafafine, sa ou aoaoina ai se lesona maoae: pe a tatou vaai e pei ona Ia silasila mai, o le a tatou manumalo faalua—faaolaina o i latou tatou te pai atu i ai ma faaolaina i tatou lava.

Lua, ina ia ave i o tatou luga o le suafa o Keriso, e le gata i lo tatou vaai e pei ona silasila mai le Atua, ae e tatau ona tatou faia Lana galuega ma auauna atu e pei ona Ia auauna mai. O loo tatou ola i poloaiga sili e lua, gauai atu i le finagalo o le Atua, faapotopoto Isaraelu, ma “faasusulu atu” lo tatou malamalama “i luma o tagata.”¹⁰ Ua tatou maua ma ola i feagaiga ma sauniga o Lana Ekalesia toefuataiina.¹¹ A tatou faia lenei mea, e faaee mai e le Atua i o tatou luga le mana e faamanuia ai i tatou lava, o tatou aiga, ma olaga o isi.¹² Fesili ifo ia te oe lava ia, “O o’u iloa ea se tasi e lē manaomia ni mana o le lagi i o latou olaga?”

O le a faia e le Atua mea ofoofogia i totonu o i tatou pe a tatou faapaiaina i tatou lava.¹³ Tatou te faapaiaina i tatou lava e ala i le faamamaina o o tatou loto.¹⁴ Tatou te faamamaina o tatou loto pe a tatou faalogo atu ia te Ia,¹⁵ salamo ia tatou agasala,¹⁶ ia liua,¹⁷ ma alofa atu e pei ona Ia alofa mai.¹⁸ Na fesili mai le Faaola ia i tatou, “Aua afai tou te alolofa atu i e ua alolofa mai ia te outou, se a ea se taui tou te maua ai?”¹⁹

Sa ou iloaina talu ai nei e uiga i se aafiaga i le soifuaga o Elder James E. Talmage lea na mafua ai ona ou tu ma mafaufau i le auala o o’u alofa ma auauna atu ai ia i latou o siomiaina a’u. I le avea ai ma se polofesa talavou, ao lei avea o ia ma se Aposetolo, i le taimi o le matuai pepesi o le faama’i o le diphtheria o le 1892, na iloa ai e Elder Talmage se aiga e le masani ai, e le o ni tagata o le Ekalesia, o e nonofo lata ane ia te ia ma o e na mafatia i le faama’i. Sa leai se tasi na manao e tuu i latou i se tulaga lamatia i le o i totonu o le fale ua pisia. Peitai, na vave lava ona agai atu Elder Talmage i le fale. Sa ia mauaina ni tamaiti se toafa, o se lua ma le afa tausaga ua maliu i luga o le moega, o se lima tausaga ma le sefulu tausaga o loo matuā mafatia i tiga, ma se sefulutolu tausaga ua vaivai. Na mafatia foi matua i le faanoanoa ma le vaivai.

Na faaofuina e Elder Talmage le ua maliu ma e o loo ola pea, salu ia potu, ave i fafo ofu palapalā, ma susunu ia ieie ua aafia i le faama’i. Sa ia galue i le aso atoa ona toe foi mai lea i le taeao na sosoo ai. Na maliu le [tamaitiiti] sefulu tausaga i le po. Sa ia siiina le teineitiiti lima tausaga. Sa tale toto o ia ma aafia ai foliga ma lavalava [o Elder Talmage]. Sa ia tusia, “Sa le mafai ona ou tuuese atu o ia mai ia te a’u,” ma sa ia siiina o ia seia oo ina maliu o ia i ona lima. Sa ia fesoasoani e tanuina tamaiti uma e toatolu ma faatulaga ia meaai ma lavalava mama mo le aiga faavauvau. I lona toe foi atu i le fale, na tiaiese e Elder Talmage ona ofu, faamālū i se vailaau o le zinc, aveese mai o ia mai lona aiga, ma sa mafatia i sina vaega o le faama’i.²⁰

E toatele soifua o siomiaina i tatou o loo aafia. E tauave e le Au Paia le suafa o le Faaola i o latou luga e ala i le avea ma tagata paia ma auauna atu i tagata uma po o fea lava ae po o ai foi i latou—e faasaoina ola pe a tatou faia lenei mea.²¹

Mulimuli, ou te talitonu o le ave i o tatou luga o Lona suafa e tatau ona tatou faalagolago atu ia te Ia. I se fonotaga sa ou auai ai i se tasi Aso Sa, na fesili ai se tamaitai talavou i se mea faapenei: “Na faauma talu ai nei i ma’ua ma la’u uo tama, ma sa ia filifili e tuua le Ekalesia. Sa ia ta’u mai ia te a’u e lei i ai se taimi sili ona ia fiafia ai e pei o lenei. “E faapefea ona tupu lenei mea?”

Na tali e le Faaola lenei fesili ina ua Ia fetalai atu ia sa Nifae, “Ae afai ua le atiae [lou olaga] i luga o la’u talalelei, ma ua atiae i luga o galuega a tagata, po o luga o galuega a le tiapolo, e moni ou te fai atu ia te outou [o le a outou] maua le olioli ia [outou] galuega mo se tau, ma e toe itiiti ane oo mai le iuga.”²² E leai lava se olioli tumau i fafo atu o le talalelei a Iesu Keriso.

Ae peitai, i lena fonotaga sa ou mafaufau ai e uiga i le toatele o tagata lelei ou te iloa na tauivi ma ni faafitauli maoae ma ni poloaiga lea sa matuai faigata lava mo i latou. Sa ou fesili ia te a’u lava ia, “O le a se isi mea e ono fetalai atu ai le Faaola ia i latou?”²³ Ou te talitonu Na te fesili atu, “E te [faatuatuaina] a’u?”²⁴ I le fafine na maua i le puna toto, na Ia fetalai atu ai, “Ua e ola i lou faatuatua; ina alu ia oe ma le manuia.”²⁵

O se tasi o mau e sili ona ou fiafia i ai o le Ioane 4:4, lea e faitauina, “E ao ina ui atu o ia i Samaria.”

Aisea ou te fiafia ai i lena mau? Ona e lei manaomia e Iesu ona malaga i Samaria. E le fiafia tagata Iutaia i Ona aso i tagata Samaria ma faimalaga i se auala faataamilo i Samaria. Peitai na filifili Iesu e malaga atu iina e folafola atu i luma o le lalolagi atoa mo le uluai taimi o Ia o le Mesia folafolaina. Mo lenei savali, e le gata na Ia filifilia se vaega ua lafoaia, ae o se fafine foi—ma e le na o soo se fafine ae o se fafine o loo ola i le agasala—o se tagata na mafaufauina i lena taimi e sili ona le taualoa. Ou te talitonu na faia e Iesu lenei mea ina ia mafai e i tatou taitoatasi ona malamalama e le aunoa o Lona alofa e sili atu nai lo o tatou popolega, o tatou manu’aga, o tatou vaisu, o tatou masalosaloga, o tatou faaosoosoga, a tatou agasala, o tatou aiga ua malepelepe, o tatou faanoanoaga ma atuatuvalega, o tatou ma’i tigaina, lo tatou mativa, lo tatou sauaina, lo tatou faavauvau, ma lo tatou tuuatoatasi.²⁶ E finagalo o Ia i tagata uma ia iloa e leai se mea ma e leai se tasi e le mafai ona Ia faamaloloina ma aumai i le olioli tumau.²⁷

Ua lava Lona alofa tunoa.²⁸ Na o Ia lava na afio ifo i lalo o mea uma. O le mana o Lana Togiola o le mana lea e faatoilalo ai soo se avega i o tatou olaga.²⁹ O le savali a le fafine i le vaieli e faapea na Ia silafia o tatou tulaga faalesoifuaga³⁰ ma e mafai ona tatou savavali faatasi ma ia e le aunoa e tusa lava po o fea o tatou tutu ai. Ia te ia ma mo i tatou taitoatasi, ua Ia fetalai mai ai, “A o se inu i le vai ou te avatu ia te ia, e le toe fia inu ia e faavavau; a o le vai ou te avatu ia te Ia, e avea i totonu ia te ia o le vaipuna, e puna i luga i le ola e faavavau.”³¹

I soo se malaga lava o le olaga, aisea o le a e fia liliu ese ai mai le Faaola e toatasi o le ua i ai le mana uma e faamalolo ai ma laveaiina oe? Po o le a lava le tau e tatau ona e totogiina ina ia faatuatua atu ai ia te Ia ua talafeagai lava. O’u uso e ma tuafafine, sei o tatou filifili ia faatele lo tatou faatuatua i le Tama Faalelagi ma lo tatou Faaola, o Iesu Keriso.

Mai le taele o lo’u agaga, ou te molimau atu ai O Le Ekalesia a Iesu Keriso o le Au Paia o Aso e Gata Ai o le Ekalesia a le Faaola, o loo taitaiina e le Keriso soifua e ala i se perofeta moni. Ou te tatalo o le a tatou tauaveina ma le faamaoni i o tatou luga le suafa o Iesu Keriso—e ala i le vaai e pei ona Ia silasila mai, i le auauna atu e pei na Ia auauna atu ai, ma i le faatuatuaina ua lava Lona alofa tunoa e aveina atu ai i tatou i le aiga ma le olioli tumau. I le suafa, o Iesu Keriso, amene.