Matua ma Fanau
E ta’u atu e le fuafuaga sili o le fiafia a lo tatou Tama Faalelagi ia te oe po o ai oe ma le faamoemoega o lou olaga.
O’u tuafafine pele, e ma’eu le matagofie o le i ai o lenei sauniga fou o le konafesi aoao mo tamaitai o le Ekalesia e ta’i valu tausaga ma matutua atu. Ua tatou faalogo i savali musuia mai taitai tamaitai ma mai ia Peresitene Henry B. Eyring. Ma te fiafia lava ma Peresitene Eyring e galulue i lalo o le taitaiga a Peresitene Russell M. Nelson, ma ua tatou tulimatai atu i lana malelega faaperofeta.
I.
O fanau o le tatou meaalofa aupito sili lea ona taua mai le Atua—o lo tatou uluola e faavavau. Ae ua tatou ola i se taimi ua toatele ai tamaitai e moomoo e leai sana vaega i le fanauina ma le faafaileleina o fanau. E toatele talavou matutua ua faatuai ona faaipoipoga seia faamalieina manaoga faaletino. O le averesi o le tausaga e faaipoipo ai tagata o le Ekalesia ua siitia i le silia ma le lua tausaga, ma o le aofai o pepe e fananau mai i tagata o le Ekalesia ua pa’u i lalo. O le Iunaite Setete ma nisi o malo ua feagai ma se lumanai o le toalaiti o taimaiti e tutupu ma avea ma tagata matutua e lagolago ai le aofai o tagata matutua e litaea.1 E silia ma le 40 pasene pepe e fananau mai i totonu o le Iunaite Setete e tina e le faaipoipo. O na fanau e lamatiaina. O nei faiga taitasi ua le tusa ai ma le fuafuaga paia o le faaolataga a lo tatou Tama.
II.
Ua malamalama tamaitai o le Au Paia o Aso e Gata Ai o le avea ma se tina o lo latou faamuamua silisili lea, lo latou olioli sili. Sa saunoa Peresitene Gordon B. Hinckley e faapea: “O tamaitai mo le tele o vaega e vaai i lo latou faamalieina aupito silisili, lo latou fiafiaga aupito silisili i le fale ma le aiga. Ua totoina e le Atua i totonu o tamaitai se mea paia lea na te faamatalaina mai ia lava i le malosiaga leleoa, i le faaleleiga, i le filemu, i le lelei, i le amio mama, i le upumoni, i le alofa. Ma o nei uiga auau mama ofoofogia uma, e maua ai lo latou faailoaga sili ona moni ma sili ona faamalieina i le tulaga faatina.”
Sa faaauau lana saunoaga, “O le galuega aupito silisili o le a faia e soo se tamaitai o le a faia lea i le faafaileleina ma le aoaoina ma le ola ai ma le uunaiaina ma le tausiga o lana fanau i le amiotonu ma le upumoni. E leai ma se isi lava mea o le a faatusalia i lena, e tusa lava po o a ana mea e fai.”2
Tina, tuafafine pele, matou te alolofa ia te outou mo tagata ua avea ai outou ma le mea o loo outou faia mo i matou uma.
I lana malelega taua i le 2015 ua faaulutalaina “O Se Talosaga i O’u Tuafafine,” sa saunoa ai Peresitene Russell M. Nelson:
“E le mafai ona atoa le malo o le Atua ma e le mafai lava ona atoa e aunoa ma tamaitai o e osia feagaiga paia ona tausia lea, o tamaitai o e e mafai ona tautatala atu ma le mana ma le pule a le Atua!
“O le asō, … tatou te manaomia ni tamaitai o ē iloa le ala e faia ai mea taua ia tutupu e ala i lo latou faatuatua, ma o ē e puipuia ma le lotototoa le ola mama ma aiga i se lalolagi ua tumu i le agasala. Tatou te manaomia ni tamaitai o ē o tuuto atu i le leoleoina o fanau a le Atua i le ala o feagaiga agai atu i le faaeaga; o tamaitai e iloa le ala e maua ai faaaliga patino, o ē malamalama i le mana ma le filemu o faaeega paia o le malumalu; o tamaitai o ē iloa pe faapefea ona valaau atu i mana o le lagi e puipui ma faamalolosia fanau ma aiga; o tamaitai o ē aoao atu ma le lē fefefe.”3
O nei aoaoga musuia e faatatau uma i le “O Le Aiga: O Se Folafolaga i le Lalolagi,” lea e toe faamautu ai e lenei Ekalesia toefuataiina le aoaoga faavae ma faiga masani e totonugalemu i le fuafuaga a Le Foafoa a o lei foafoaina e Ia le lalolagi.
III.
Ia o le a ou talanoa atu nei i le vaega talavou ifo o lenei aofia. O’u tuafafine talavou pele, ona o lo outou malamalama o le talalelei toefuataiina a Iesu Keriso, ua tulagaese ai outou. O lo outou malamalama o le a mafai ai ona outou tutumau ma faatoilaloina faigata o le tuputupu ae. Mai lou talavou, ua e auai ai i ni galuega faatino ma polokalama ua atiaeina ai au taleni, e pei o le tusitusi, tautala, ma fuafuaga. Ua e aoaoina e nafa oe ma au amioga ma le auala e tetee atu ai i faaosoosoga o le pepelo, faimamago, gaoi, po o le faaaoga o ava malosi ma fualaau faasaina.
O lo outou tulagaese sa iloaina i se suesuega a le Iunivesite o Karolaina i Matu e uiga i talavou Amerika ma tapuaiga. Sa i ai i se tusiga a le Charlotte Observer le ulutala, “E sili atu ona taulimaina e talavou Mamona: Ua maua i suesuega e sili i latou i talavou i le taulimaina o tulaga faatagata matua.” Sa faai’uina lenei tusiga e faapea “E sili le Au Mamona i le aloese mai amioga lamatia, lelei tulaga i a’oga ma le lelei o uiga faaalia e faatatau i le lumanai.” O se tasi o tagata sailiili i le suesuega, sa faatalanoaina le toatele o a tatou talavou, sa saunoa, “I le salafa o vaega uma sa matou tilotilo i ai, sa i ai se mamanu manino: E muamua lava Mamona.”4
Aisea e sili ai ona outou taulimaina faigata o le tuputupu ae? Tamaitai talavou, o le mafuaaga ona ua outou malamalama i le fuafuaga sili o le fiafia a lo tatou Tama Faalelagi. E ta’u atu e lenei mea po o ai oe ma le faamoemoega o lou olaga. O talavou e i ai lena malamalamaaga e muamua i le foiaina o faafitauli ma e muamua foi i le filifiliina o le sa’o. Ua e iloa e mafai ona e mauaina le fesoasoani a le Alii i le faatoilaloina o faigata uma o le tuputupu ae.
O le isi mafuaaga e sili ona outou mataalia ai ona tou te malamalama o outou o fanau a se Tama Faalelagi e alofa ia te outou. Ou te mautinoa ua outou masani i la tatou viiga matagofie “Fanau ua Leoleo Mai le Atua.” O le fuaiupu muamua lenei ua tatou usuina uma ma talitonu i ai:
E lua ni aoaoga i lena fuaiupu: Muamua, e latalata mai lo tatou Tama Faalelagi ia i tatou ma leoleo i tatou i ao ma po. Mafaufau i ai! E alofa le Atua ia i tatou, e latalata mai o Ia ia i tatou, ma e leoleo e Ia i tatou. Lua, e fiafia o Ia e faamanuia i tatou pe a “tonu mea [tatou] te fai.” E maeu lea faamafanafanaga i le lotolotoi o o tatou popolega ma faigata!
Ioe, tamaitai talavou, ua faamanuiaina outou ma e ofoofogia outou, ae ua pei outou o fanau uma a le Tama Faalelagi i lo outou manaomia ona “tauivi e fai le mea sa’o.”
E mafai lava ona ou tuu atu iinei fautuaga i le tele o mea eseese, ae ua ou filifili e talanoaina na o ni mea se lua.
O la’u fautuaga muamua lava e faatatau i telefoni feaveai. I se sailiiliga talu ai nei faalemalo na maua ai e silia ma le afa o talavou i le Iunaite Setete na fai mai o loo latou faaaluina le tele o taimi i a latou telefoni feaveai. E silia ma le 40 pasene na fai mai sa latou lagonaina le popole ina ua tuueseina a latou telefoni mai ia i latou.6 E sili atu ona taatele le mea lenei i teine nai lo tama. O’u tuafafine talavou—ma tamaitai matutua foi—o le a faamanuiaina o outou olaga pe afai tou te faatapulaaina lou faaaogaina ma le faalagolago i telefoni feaveai.
O la’u fautuaga lona lua e sili atu le taua. Ia agalelei i isi. O le agalelei o se mea e toatele a tatou talavou o loo faia. O nisi o vaega o talavou i nisi o atunuu ua faaali maia le auala mo tatou uma. Ua musuia i tatou e faatinoga o le agalelei a o tatou tagata talavou ia i latou o e manaomia le alofa ma le fesoasoani. I le tele o auala, e te avatu ai lena fesoasoani ma faaali atu lena alofa i le tasi ma le isi. Matou te moomoo ia mulimuli tagata uma i la outou faataitaiga.
I le taimi lava e tasi, ua tatou iloa ua faaosooso ai e le fili tatou uma ia agaleaga atu, ae o loo tele pea faataitaiga o lenei mea, e oo lava i fanau ma le autalavou. O le agaleaga faifai pea ua lauiloa i le tele o igoa, e pei o le saua, taupulepule faatasi e faasaga i se tasi, po o le auau faatasi e tetee i isi. O nei faataitaiga e faatupu ai ma le iloa le tiga i tagata o vasega po o uo. O’u tuafafine talavou, e le fiafia le Alii pe a tatou faatiga pe agaleaga i isi.
O se faataitaiga lenei. Ou te iloa se alii talavou, o se tagata sulufa’i iinei i Iuta, sa taufaalili i ai [tagata] ona o le ese o ia, e aofia ai i nisi taimi le faataitaiina o le tautatala i le gagana moni [a le tama talavou]. Sa sauaina o ia e se kegi o talavou e tulaga lelei atu seia oo ina tali atu i ai o ia i se ala na mafua ai ona falepuipui o ia mo le silia ma le 70 aso a o iloiloina mo le tipoti atu i lona atunuu. Ou te le iloa po o le a le mea na faaosofia ai lenei vaega o talavou, o le toatele o i latou o le Au Paia o Aso e Gata Ai e pei o outou, ae e mafai ona ou vaaia le aafiaga o lo latou agaleaga, o se aafiaga matautia ma lamatia ai se tasi o fanau a le Atua. O ni faatinoga iti o le agaleaga e mafai ona oo ai i ni taunuuga matautia.
Ina ua ou faalogo i lena tala, sa ou faatusaina i le mea sa saunoa i ai lo tatou perofeta, Peresitene Nelson, i lana faigalotu talu ai nei mo le autalavou i le lagolagi atoa. I le talosagaina o outou ma isi uma talavou e fesoasoani i le faapotopotoina o Isaraelu, sa ia saunoa ai: “Ia tulaga ese; ia ese mai le lalolagi. Ua e iloa ma ou iloa e tatau ona avea oe o se malamalama i le lalolagi. O le mea lea, ua manaomia oe e le Alii ia foliga e pei, ia leo e pei, amio e pei, ma laei e pei o se soo moni o Iesu Keriso.”7
O le autau a le autalavou lea na valaaulia outou e Peresitene Nelson ia auai ai o le a le agaleaga i le tasi ma le isi. O le a latou mulimuli i le aoaoga a le Faaola e aapa atu ma ia agaalofa ma manatu mo isi, e oo lava i le liliu atu o le isi alafau pe a tatou lagonaina ua agaleaga mai se tasi ia i tatou.
I se saunoaga o se konafesi aoao e uiga i le taimi lenei ua toatele outou ua fananau mai ai, sa viia ai e Peresitene Gordon B. Hinckley “tamaitai talavou lalelei o ē o loo tauivi e ola i le talalelei.” Sa ia faamatalaina i latou, e pei ona ou lagona e faamatala ai outou:
“E agalelei i latou i le tasi ma le isi. Latou te saili e faamalosi e le tasi le isi. O i latou o se faamamaluga i o latou matua ma aiga latou te o mai ai. O loo latou latalata atu i le tulaga faatamaitai ma o le a tauave i o latou olaga atoa ia tulaga lelei ia e uunaia i latou i le taimi nei.”8
I le avea ai ma se auauna a le Alii, ou te fai atu ia te outou tamaitai talavou, o loo manaomia e le lalolagi lo outou lelei ma le alofa. Ia agalelei i le tasi ma le isi. Na aoao mai Iesu ia i tatou ia tatou fealofani ma ia taulimaina isi e pei ona tatou mananao e taulimaina ai i tatou. A tatou tauivi e agalelei atu, tatou te latalata atili atu ai ia te Ia ma Lana faatosinaga alofa.
O’u tuafafine pele, afai o loo e auai i soo se agaleaga po o le vaai maualalo—na o oe pe faatasi ma se vaega—ia filifili nei loa e sui ma uunaia isi ia sui foi. O la’u fautuaga lena, ma ou te tuu atu ia te outou o se auauna a le Alii o Iesu Keriso ona na uunaia a’u e Lona Agaga e tautala atu ia te outou i lenei mataupu taua. Ou te molimau atu o Iesu Keriso, o lo tatou Faaola, o le na aoao mai i tatou ia fealofani e pei ona Ia alofa mai ia i tatou. Ou te tatalo o le a faapea lava ona tatou faia, i le suafa o Iesu Keriso, amene.