Amerika Samoa

I le 1863 o Kimo Pelio ma Samuela Manoa---faifeautalai e toalua na auina mai Hawaii---na aumaia le talalelei toefuataiina i atu motu o Samoa. Ona o faalavefau na tutupu i le Ekalesia i Hawaii, o faifeautalai faaopoopo sa la faamoemoe e o’o mai, na lē o’o mai lava, a e na filifili i la’ua uma e aumau pea i le motu. I le 1888 na taunu’u mai ai Iosefa ma Florence Dean e tatala aloaia le misiona. E oo mai i le 1900 i le taimi na vaeluaina ai i se teritori i sisifo, lea na pulea e Siamani ma se teritori i sasa’e, na pulea e Amerika, sa silia ma le 1,000 tagata o le Au Paia o Aso e Gata ai i luga o nei motu.

I le amataga o le vaitau o le 1900, e faaopoopo i le aoaoina atu o le talalelei, na faatulagaina ai e le Ekalesia a’oga ma fesoasoani e fausia Mapusaga o se nofoaga tutotonu e faapotopoto ai. A o sili atu ona mautu le Ekalesia i le ogatotonu o le seneturi lona 20, na toatele tagata Amerika Samoa ua aoaoina tomai ma tulaga faaletaitaiga o le Ekalesia a o auauna ai o ni faifeautalai leipa. I le 1969 na faavaeina ai le uluai siteki i Amerika Samoa.

I le 1977 sa fofogaina ai e Peresitene Spencer W. Kimball fuafuaga e fausia se malumalu i Pago Pago, Amerika Samoa, ae peitai o le nofoaga mo le malumalu na mulimuli ane suia atu i Apia, Samoa. O le Au Paia i Amerika Samoa ua “latou foai e tusa ma a latou mea” (Esera 2:69) e fesoasoani e fausia le malumalu o Apia, lea na faapaiaina i le 1983. Na faaauau pea le tuputupu a’e o le Ekalesia i Amerika Samoa: e oo mai i le 2012 ua lima siteki i Amerika Samoa, ma i le 2019 na fofogaina ai e Peresitene Russell M. Nelson fuafuaga fou mo se malumalu i Pago Pago.

• Igoa Aloaia: Amerika Samoa (Iunaite Setete)/Amerika Sāmoa (Amerika Tele)

• Laumua: Pago Pago

• Aai Aupito Telē: Pago Pago

• Gagana Aloaia: Samoa ma le Igilisi

• Telē o le Laueleele: 199 km² (77 mi²)

• Eria o le Ekalesia: Pasefika

• Misiona: 1 (Se Vaega o le Misiona a Samoa Apia)

• Aulotu: 43

• Malumalu: 1 (Pago Pago)