“O Se Mauga o se Lu’itau”

I le 1977 sa faasilasilia ai e le Peresitene o le Ekalesia, Peresitene Spencer W. Kimball fuafuaga e fausia se malumalu i Pago Pago, Amerika Samoa, e tautuaina Au Paia i le Pasefika i Saute. Sa taliaina e taitai i le lotoifale o motu o Samoa, Tahiti, Toga ma Fiti le luitau e sailia se vaega o tupe ma aufaigaluega mo le fausiaina. “Ua tuuina mai ia i tatou se mauga o lu’itau, ae e ao lava ona tatou a’ea,” na tali mai ai Victor Cave o Tahiti. “E mafai e tagata ona faia; o loo ia i latou se faatuatua maoa’e.”

Na taliaina e le au paia le lu’itau, a e sa faatuai le suatiaina o le eleele ona o faigata na feagai mo le mauaina o le pepa aloaia o le eleele mo le malumalu. I le taimi lava lea, na filifili ai taitai o le Ekalesia e fausia ni malumalu laiti latalata i le toatele o le Au Paia. Ia Aperila 1980, na fofogaina ai e Peresitene Kimball o le a fausia malumalu i Toga ma Tahiti---ma i Apia, Samoa--- nai lo i Pago Pago. Na moomia ona faaaogaina le faatuatua e le Au Paia i Amerika Samoa, ma toe fetuunai ai i lenei suiga o le nofoaga o le malumalu. Sa tuuina atu pea e au paia le saofaga agalelei mo le fausiaina o le malumalu i Apia. O se tasi o i latou ia o Eugene Reid, le peresitene o le Siteki o Pago Pago, Samoa i le taimi lea. “Sa ou ta’u atu i lo’u aiga … e moomia ona tatou faia se mea mo le Alii,” sa ia fai mai ai.

E ui lava sa faamamaluina i latou e auauna atu i le Alii i soo se nofoaga, sa faamoemoe foi Au Paia o Amerika Samoa e ono maua i se aso se malumalu o Pago Pago. I le toeitiiti atoa le 30 tausaga mulimuli ane ai, na fofogaina ai e le Peresitene o le Ekalesia, Peresitene Russell M. Nelson o le a i ai. “Sa ou tagi i le lotomaualalo ma faafetai mo lenei faamanuiaga matagofie,” na faapea mai ai Andrew Autele, o se peteriaka o le siteki i Pago Pago. “Sa ou lagonaina le alofa taumasuasua o lo tatou Tama Faalelagi mo le Au Paia o lo matou motu.”