“E Le Uma le Alofa”

Na vevela le taua i Europa i le 1914. E oo ifo i le taimi ua mae’a ai le taua ia Novema 1918, ua toatele malo ua auai i le taua, lea na lauiloa o le Taua Muamua o le Lalolagi. O le vaitau lena, semanu e faamata’uina e le inoino ma le le onosa’i ia lagona alofa mai tamaitai o le Aualofa, ma na tuuina atu e Sister Emmeline B. Wells ma ona fesoasoani le savali lenei i tamaitai uma i le Ekalesia:

“Auauna atu i le agaga o le alofa ma le onosai i a outou tane ma a outou fanau; ia leoleoina le fanau; aua nei faatagaina i latou e talia le agaga o le faamaualuga po o le inoino i soo se atunuu po o soo se tagata; aua nei tuu atu i o latou lima ni auupega; aua nei faatagaina i latou e taaalo i ni taua pe fai ma mea fiafia le faataitai o le oti i le taua; toto i o latou loto le agaga o le lotonuu i le atunuu ma le tagavai, ae fesoasoani ia i latou ia latou lagonaina o i latou o fitafita o le lagi ma afai e moomia ona latou faaaogaina auupega e puipuia ai le saolotoga o le atunuu ma aiga, o le a latou faia lava e aunoa ma le faalotolotolua po o le inoino. … Aoao atu mataupu tau le filemu o le malo [ma] ia sili atu ona maelega i le vaavaaiga o e le tagolima nai lo le taimi muamua.”⁵

I le auina atu ai o lenei savali, sa uunaia ai e Sister Wells ia tamaitai ina ia faatino le alofa moni, e faapei ona sa aoaoina mai e le Perofeta o Iosefa Samita i le silia ma le 70 tausaga talu ai. Sa ia faamalosiau atu ia i latou ina ia onosai i a latou fanau ma ia agalelei atu i o latou tuaoi—e aofia ai ma e ita mai—ma ia auauna atu ia i latou e manaomia le fesoasoani. Sa mulimuli tamaitai o le Aualofa i lenei fautuaga. Sa latou saili ia maua ma faasoa atu le alofa mama o Keriso, lea sa latou iloa o le a le uma lava.⁶ O lenei alofa o le a lagolagoina ai i latou i vaitau o taua ma le filemu.

I le taimi o le Taua Muamua a le Lalolagi , sa galulue faatasi ai ma le loto atoa le Aualofa ma faalapotopotoga a le nuu e pei o le Aufono o le Puipuiga a le Malo ma le Koluse Mumu a Amerika. Sa galulue ia tamaitai i le gaosiga o meaai ma le faasaoina, sailigatupe, galuega faamama, galuega mo le soifua manuia o tamaiti, ma isi auaunaga. Sa mataalia i latou ma malolosi i le galulue soosoo tauau ai i nei taumafaiga faalenuu. Peitai, sa faamanatu atu ia i latou e le perofeta e le tatau ona galo ia i latou le faapogai faalelagi o le Aualofa.

Ata

Peresitene Iosefa F. Samita

Na saunoa Peresitene Iosefa F. Samita, le Peresitene lona ono o le Ekalesia, e ui o faalapotopotoga faalelalolagi o “mea e fai e tamaloloa, pe faia foi e fafine,” o le Aualofa “na faia faalelagi, faatagaina faalelagi, faatuina faalelagi, faauuina faalelagi e le Atua ina ia auauna atu ai mo le faaolataga o agaga o tamaitai ma alii.” E le i manao o ia “e vaai atu i se taimi ua mulimuli la tatou Aualofa, pe fealumi ma isi ma galo ai lo latou lava faasinomaga e ala i le faafefiloi ma isi faalapotopotoga a fafine ia ua tulai mai. … E mo outou,” na ia ta’u atu ai i tamaitai o le Aualofa, “e taitaia le lalolagi aemaise lava ia taiulu i tamaitai o le lalolagi, i mea uma e tauleleia, o mea uma e faale-Atua, o mea uma e faagaeetia ma mama i fanau a tagata. O outou o le ulu, ae le o le si’usi’u.”⁷ Sa faasoa mai e Sister Emmeline B. Wells lenei vaaiga mamao. Sa ia taialaina le Aualofa i le galulue faatasi ai ma isi faalapotopotoga, ae sa ia fesoasoani foi e tausisia le faamoemoega tupito ma le natura paia o le sosaiete.

E le gata i le galulue ai ma isi faalapotopotoga, sa faia foi e tamaitai o le Aualofa ni mea eseese e i latou lava ma a latou uarota e saunia ai oloa ma su’e ai tupe mo i latou e manaomia le fesoasoani. O nisi tamaitai sa latou su’iina ma faatau atu lavalava, o talieleele, ofu tamaiti, o ie lalaga, ma pulou ma solovae su’ilima. O nisi sa latou tausia ma faatau atu ia povi ma mamoe.

Sa iloaina e se tamaitai i Tooele, Iuta, o se ie sa ia su’ilalagaina na avatu ai le faaolatotoga i se aiga Peretania i le taimi o le taua. Na faia e lenei tamaitai o le Aualofa le ie su’ilalaga i le 1906, ma tuu ai i totonu se pepa o i ai se faaupuga, ma auina atu i San Francisco, Kalefonia e fesoasoani ai i tagata na aafia i se mafuie matautia. Ina ua mavae le sefulutasi tausaga, sa tuuina atu lenei ie su’i lalaga i le Koluse Mumu ma auina atu ai i Peretania Tele. Ina ua maua e le tagata na avatu i ai lenei ie se pepa sa i ai se faaupuga, sa ia auina atu sana tusi faafetai ma faapea atu, ua matua “aoga lava le ie su’ilalaga aua ua oti lo’u toalua i le taua.” Ua tuua o ia ma se fanau e toavalu ma le leai o se galuega, sa ta’ua ai e lenei fafine ua oti lana tane, “Ona pau lea o se mea ou te mafaia e ola ai.”⁸

E toatele tamaitai Peretania sa ofofua mai e su’isu’i ma lalaga mo fitafita, peitai sa leai ni a latou tupe e faatau ai ie sa latou manaomia. Sa saofaga atu ma le naunautai ia Aualofa a Kanata ma Amerika i se teugatupe mo faalavelave faafuasei e fesoasoani ai. Sa latou auina atu tupe i paranesi taitasi i Peretania Tele ina ia mafai ai e tamaitai Peretania ona faatau ni ie e su’i ai ieafu, o tagaaluga, ma lavalava.

Ina ua uma ona faatauina atu e le Aualofa a latou saito na totoe i le malo o le Iunaite Setete i le 1918 (tagai mataupu 4), sa matauina e Sister Wells, “I nei tausaga uma sa leai so tatou tulaga manaomia tele e faaaoga ai ia saito ma fatu sa faaputuputu mo le faamoemoega sa mamanuina ai, ae o le ao pogisa sa faamalumalu mai i le lalolagi e pei ona i ai nei, ua mafai ai ona tatou iloa atu le tofā faaperofeta a Peresitene Iaga, i lona valaau mai i tamaitai e teu ma faasao ia fatu mo se taimi e manaomia ai.”⁹

O le faatauina atu o saito na tele atu mea na faia ai nai lo le na ona avatu ai o meaai mo tagata sa fia aai. Sa fautuaina e Sister Clarissa S. Williams, o le sa avea ma se tasi o fesoasoani ia Sister Wells i le au peresitene, ina ia teuina e le Aualofa le tupe mai le faatauga i se teugatupe tutotonu ma ia latou faaaogaina le tului e faatupeina ai taumafaiga e faaleleia atili ai le soifua maloloina o fafine ma tamaiti. Mulimuli ane, ina ua avea Sister Williams ma peresitene aoao lona ono o le Aualofa, sa ia vaaia le faaaogaina o na tupe mo na faamoemoega.

I le faaiuga o le Taua Muamua a le Lalolagi , e toatele aiga ma tagata na manaomia le fesoasoani—tautupe, faaletino, faalelagona, ma faaleagaga. Ina ia foia nei manaoga, sa faavaeina ai e le Aualofa le Matagaluega o le Tautua Lautele a le Aualofa i le 1919, ma sa lagolagoina atoa e Peresitene Heber J. Grant, le Peresitene lona fitu o le Ekalesia. Na avea ia Sister Amy Brown Lyman, o le na avea mulimuli ane ma peresitene aoao lona valu o le Aualofa, ma faatonusili o le matagaluega. O le Matagaluega o le Tautua Lautele, na galulue faatasi ai le Aualofa ma uarota ma siteki i taumafaiga e pei o le fesoasoani atu i fafine ma teineiti sa manaomia le fesoasoani e sailia ni galuega ma tuuina atu tamaiti mo le vaetamaina. Peitai, o lona faamoemoega autu lava, o le saunia lea ma tuuina atu aoaoga faatino mo aiga. Fai mai Sister Lyman, o le Matagaluega a le Tautua Lautele a le Aualofa, e le o se “ofisa e tuuina atu ai fesoasoani” ae o se “matagaluega o le auauna atu,” e faamamafa ai “le suesueina o tulaga faaleaiga, faia o fuafuaga ma paketi, faatulagaina o le fesoasoani i nofoaga o i ai le popolega mo aiga o le AAG, ma le aoaoina o tagata faigaluega.”¹⁰

Faatasi ai ma lenei sini i le mafaufau, sa amatalia ai e le Matagaluega o le Tautua Lautele se polokalama faaleaoaoga i le uelefea o aiga. Sa aooga ia tagata o Siteki i lenei vasega, ona latou toe o ai lea i a latou uarota ma nuu ma aoao atu ai. E silia ma le 4,000 tamaitai sa aoaoina ai.

Na amata i le 1902, ona lagolagoina e le au peresitene aoao o le Aualofa se polokalama mo le aoaoina o tamaitai tausi soifua. E oo atu i le 1920, ua matua faateleina aoaoga faapolofesa mo tamaitai tausi soifua, o lea na faavaeina ai e le Aualofa se polokalama e aoao ai i latou e fesoasoani i le au tausi soifua. O lenei vasega e tasi le tausaga, lea na amata i le Falemai o le AAG i le Aai o Sate Leki, Iuta, e lei totogia ni pili a’oga. Ae, sa manaomia ona tuuina atu e le au aooga ia aso e 30 e tautua fua ai i o latou nuu. Ina ua mavae le 4 tausaga, lea na aoaoina ai le 46 o i latou e fesoasoani i le au tausi soifua, sa le toe faia loa e le Aualofa le polokalama ae ua tuuina atu la latou lagolago i kosi a le Koluse Mumu mo tausi soifua i aiga. E pei foi o nisi o polokalama, sa faaaogaina e le Aualofa lenei polokalama e faafetaiaia ai manaoga faaletino patino i lena taimi, ona tuu atu ai foi lea o le galuega i isi ofisa.

Sa faamalosiauina e taitai o le Aualofa ia tamaitai e faaauau pea ona auauna atu le tasi i le isi i ala o le alofa moni, e pei ona sa latou faia mai le amataga o aso i Navu. Sa tausia e tamaitai e mama’i, su’isu’i mo i latou sa manaomia ni lavalava, ma tuuina atu le faaolatotoga i isi auala ia i latou e manaomia. Mo se faataitaiga, i le 1921, sa i ai se vaega o le Au Paia o Aso e Gata Ai Aremania sa nonofo i Take, ma sa tatau ona latou tuua o latou fale. Sa fesoasoani Joseph W. Booth, o le peresitene o le Misiona a Palesitina-Suria, e avatu i latou i Alepo, Suria, lea sa ia faatulagaina ai se paranesi ma se Aualofa pe tusa ma le 30 tamaitai. O le tele o nei tamaitai sa matitiva, ae sa latou manatu o lo latou avanoa lenei ma o lo latou tiute i le avea ai ma tamaitai o le Aualofa, e auauna atu ai ia i latou e sili atu ona manaomia nai lo i latou. O lea sa latou faapotopoto faatasi ai ma su’i ni lavalava mai le 100 iata o ie na faatau mai e Peresitene Booth. Sa latou saunia foi ni meaai mo le au sulufai fiaaai.

Ia Aperila 1921, na suitulaga ai Sister Clarissa S. Williams ia Sister Emmeline B. Wells e avea ma peresitene aoao o le Aualofa. O lona tautua ai i le au peresitene ma Sister wells, na saunia ai o ia mo luitau o le a oo mai. Sa lauiloa o ia i ona tomai i mea tau faalapotopotoga ma lona alofa ma le faauo i tagata uma.

Sa popole Sister Williams e uiga i le maualuga o le fuainumera o tina ma pepe e maliliu. Sa popole foi o ia i le laitiiti o avanoa mo e sa i ai manaoga faapitoa ma le maualalo o le tulaga o le olaga mo le toatele o tamaitai. I lana taitaiga poto ma le tomai, sa faaauau ai taumafaiga a le Aualofa e faaitiitia nei faafitauli. I le 1924, faatasi ai ma le lagolago ma le faamalosiau mai taitai aoao o le perisitua ma le lotoifale ma Sister Williams, sa faatuina ai e le Aualofa a le Siteki o Cottonwood se falemai mo failele. Sa avea mulimuli ane lenei falemai ma se vaega o se upega fesootai o falemai a le Ekalesia.

Sa vaaia e Sister Williams se tulaga manaomia tele mo le faalauteleina o le “soifua maloloina, avanoa, ma se tulaga siitia o le olaga mo i latou tatou te fesootai.” Fai mai a ia, “o sea tiutetauave mo le faaleleia atili lautele e aofia ai se tapenapenaga toto’a, aoaoga faamasani, galuega mo le a’otauina, ma le faatinoga o le galuega.”¹¹ O nei taumafaiga sa fesoasoani e faafetaia’ia ai mea sa manaomia i le taimi nei, ma tuu atu ai i epikopo se avanoa e saunia ai le fesoasoani mo aiga sa manaomia le fesoasoani. Sa latou saunia foi le Ekalesia e tali atu i faigata na oo mai i nai tausaga mulimuli ane.

I le silia ma le sefulu ma ona tupu tausaga ina ua mavae le Taua Muamua a le Lalolagi , sa galulue le Aualofa e faaleleia atili le tulaga na ola ai tamaitai ma aiga, ma taulai atu i le soifua maloloina, o galuega, ma a’oga. Sa faaauau foi e le Aualofa ona faamalosiauina le amiotonu o le tagata lava ia ma galulue i le alofa moni. Ona gotouga ifo ai lea o le lalolagi i se pau tele o le tamaoaiga e aunoa ma se lapataiga, i le faaiuga o le 1929.

Sa toe faamalolosia foi tagata ma aiga i se taimi o mafatiaga e ala i uiga auau mama sa aoaoina i le Aualofa. Sa maua e tamaitai o le Au Paia o Aso e Gata Ai le malosi i lo latou faatuatua i le Tama Faalelagi ma Iesu Keriso, sa utuvai mai o latou tomai o le faalagolago i le tagata lava ia, ma sa galulue e faailoa atu le alofa moni i o latou loto. O nei mataupu faavae sa taialaina ai i latou, sa mafai ai ona latou tausia i latou lava ma o latou aiga a o aapa atu i isi.

I le 1928, sa valaauina ai e Peresitene Heber J. Grant ia Sister Louise Y. Robison e avea ma peresitene aoao lona fitu o le Aualofa. Sa le o se mea fou ia Sister Robison ia luitau faaletamaoaiga. Sa ola a’e o ia i se fale laau faatauvaa i le faoaaai o Scipio, Iuta, lea sa ia aoao ai i le faiga o faatoaga, o togalaau, su’isu’i, galue malosi, ola i si mea itiiti, ma le loto fiafia.

O le fitu tausaga a o le’i valaauina Sister Robison e avea ma peresitene aoao o le Aualofa, sa vaetofia ai o ia e Peresitene Grant e avea ma fesoasoani lua i le au peresitene aoao o le Aualofa. Sa ia lagonaina ma le naunautai lona lē agavaa, e pei ona sa toe ta’ua ai e lana tama teine:

Ata

Peresitene Heber J. Grant

“Ina ua alu Tinā i le ofisa o Peresitene Grant ina ia vaetofia, sa tonu lava lona lagona sa lei malamalama [peresitene] i ona tomai, o lea sa ia ta’u atu ai ia te ia o le a fiafia lava o ia na te faia le mea sili i soo se mea o le a faatonuina o ia e fai, ae sa manao ia na silafia e utiuti lona a’otauina, ma e matua laitiiti foi se tupe ma lona tulaga faaagafesootai, ma sa fefe o ia o le a le avea o ia ma faataitaiga ua faamoemoeina e tamaitai o le Aualofa i se taitai. Sa ia faaumaina i le faapea atu, ‘Ua na o a’u o se fafine faatauvaa!’ Sa tali mai Peresitene Grant, ‘Sister Louizy, o le 85% o fafine o la tatou Ekalesia o fafine faatauvaa. Ua matou valaauina oe e fai ma taitai ia i latou.’ ”¹²

Na faamalosiauina i upu a Peresitene Grant, ma sa faasoa atu ai e Sister Robison ana meaalofa tulagaese ma auauna atu ai ma le loto atoa, muamua o se fesoasoani ona avea ai lea ma peresitene. Sa atamai o ia, sa agaalofa, ma sa galue malosi. O le utiuti o lona a’otauina aloaia ma le leai o ni oa faalelalolagi, sa mafai ai e ia ona malamalama ma fesoasoani atu ia i latou e faapena foi o latou tulaga. O ana fautuaga i le au tausiaiga ma tina sa talafeauga ma agalelei. Sa malamalama o ia i le tauivi e ola i se paketi utiuti, ae sa ia iloaina foi le taua o le uunaiga a se tina i le aiga. O lea sa ia faamalosiauina ai tina ina ia faia mea uma sa latou mafaia e nonofo ai i le fale ma a latou fanau nai lo le tuua o i latou ae o e faigaluega.

Sa faavaeina e le malo o le Iunaite Setete le tele o polokalama faaolatotoga e taumafai ai e suia le mafatiaga tau i le tamaoaiga. Sa umi se taimi, sa galulue ai le Matagaluega o le Tautua Lautele a le Aualofa faatasi ai ma ofisa o nuu i le tautuaina o aiga sa manaomia le fesoasoani, peitai sa faatupulaia le manaomia nai lo le mea sa gafataulimaina e le matagaluega. Sa vaaia e se tasi o le aufaigaluega ua faatupulaia aiga sa ia galue ai mai le 78 i le 1929 i le silia ma le 700 i le 1934.¹³

Sa talisapaia e le Ekalesia ia taumafaiga a ofisa o le malo. Fai mai Sister Robison sa faia e le malo o le Iunaite Setete “se mea ofoofogia” e fesoasoani ai i tagata sa manaomia le fesoasoani. Peitai, sa auai faatasi o ia ma taitai perisitua i le faapea atu sa tatau i tagata o le Ekalesia ona faaauau pea ona uunaia uiga faatauaina faavae o le ola faalagolago o le tagata lava ia. Fai mai a ia: “Ua ivasefulutolu tausaga o fai mai lava le Aualofa tatou te tausia o tatou tagata e le tagolima. Ou te le iloa pe ua tatou faalagolago tele i le Malo i le taimi nei.”¹⁴

Ia Aperila 1936, sa folasia mai ai e le Au Peresitene Sili se polokalama uelefea a le Ekalesia i le lalolagi atoa. O lea polokalama na tu ai le Ekalesia i se tulaga sili atu e fesoasoani ai i tagata lē tagolima o le ekalesia. I le konafesi aoao ia Oketopa 1936, sa faamalamalama mai ai e Peresitene Heber J. Grant le faamoemoega o le polokalama.

“O lo tatou uluai faamoemoega lava” na ia saunoa ai, “o le faatuina lea, i le mea e mafai ai, o se faiga e le toe i ai le fetuu ona o le paie, le toe i ai le amioleaga o le maua fua o se mea, ae ua toe faatuina le tutoatasi, o le galulue, o le ola faasoasoa lelei ma le faaaloalo i o tatou tagata. O le faamoemoega o le Ekalesia, o le fesoasoani lea i tagata ia fesoasoani ia i latou lava. E ao ona avea le galue ma mataupu faavae laualuga e taitaiina ai olaga o tagata o la tatou Ekalesia.”¹⁵

Na mavae ni tausaga, sa toe ta’ua ai e Peresitene Thomas S. Monson, le Peresitene lona sefuluono o le Ekalesia, lenei aoaoga. “Manatua,” na ia saunoa ai, “O le fesoasoani a le Ekalesia ua mamanuina e fesoasoani ai i tagata ia fesoasoani ia i latou lava. O le faaleleia o tagata o le tiutetauave lava lena o le tagata ma le aiga, e fesoasoani i ai le korama o le perisitua ma le Aualofa. O loo taumafai e atiina ae le tutoatasi, ae le o le ola faalagolago. E saili le epikopo e fausia le amiosa’o, faaaloalo o le tagata ia te ia lava, mamalu, ma le faatuatuaina o le amio i tagata taitasi e fesoasoani i ai, ina ia tau atu ai i le gafataulimaina atoatoa e le tagata lava ia.”¹⁶

O se tasi o mataupu faavae taiala o le polokalama o le uelefea, o tamaitai o le Aualofa ma uso o le perisitua e tatau ona galulue soosoo tauau. Sa fesoasoani Peresitene Harold B. Lee, le Peresitene lona sefulutasi o le Ekalesia i le faavaeina o le polokalama uelefea a o avea o ia ma peresitene o le siteki. Na ia saunoa:

“O le faamoemoega aupito taua e tatau ona ausia e [le polokalama uelefea a le Ekalesia] o le siitia lea o se agaga o le galulue faatasi ma le lotogatasi i le Ekalesia atoa.

“I le tulaga e galulue soosoo tauau ai Faalapotopotoga a le Aualofa i Uarota ma Korama o le Perisitua ma Au Epikopo, o le tulaga lena ia i ai se polokalama [uelefea] i lena uarota.”¹⁷

O le matafaioi a le peresitene o le Aualofa sa sili ona taua, na saunoa i ai Epikopo Joseph L. Wirthlin, a o avea ma Epikopo Pulefaamalumalu o le Ekalesia i lena taimi: “Ou te mafaufau, e na o le tasi lava le tagata e mafai ona alu i se aiga, faavasega mea e manaomia, ma tauaaoina atu ma le faautauta. O lena tagata o se tasi e mafai ona tatou filifilia e valaauina o se pule o aiga, o se peresitene lea o le Aualofa. … O le mea moni lava, o nei tamaitai ofoofogia e i ai foi o latou lava aiga, ua latou oo foi i aafiaga faatina ma le puleaina o aiga.”¹⁸

Sa faatulagaina lelei Aualofa uma e tauave se matafaioi iloga i taumafaiga mo le uelefea i uarota. I lalo o le taitaiga a epikopo, sa latou iloiloina ai manaoga o aiga ona saunia lea o fualaau aina suamalie ma fualaau faisua ua faamamago ma tuuapaina, o lavalava ma moega e tusa ai ma manaoga. Sa i ai se taimi, o tamaitai sa tuufaguina fualaau aina suamalie sa talosagaina e ofo atu ia fagu lona sefulu uma i le polokalama uelefea. Sa manatua e Sister Belle S. Spafford, le peresitene aoao lona iva o le Aualofa, le aoina o fualaau aina suamalie sa toulu i le matagi, ma teuina i fagu, ma tuuina atu i tamaitai sa manaomia. O lenei avanoa mo le auaunaga, sa matua talisapaia lava mo le faamoemoega o le Aualofa.

O taitai o Aualofa o se vaega taua tele o le polokalama uelefea a le Ekalesia. I tulaga aoao, siteki, ma uarota, sa latou auai i fonotaga a komiti o le uelefea, ma sa latou uunaia faaiuga ma faamaopoopoina taumafaiga. Sa taua lenei faamaopoopoga a o faatupulaia le uelefea o faatoaga a le Ekalesia, o falegaosimea, faletusi autu, ma isi meatotino. Sa tuufaatasia le Matagaluega a le Tautua Lautele a le Aualofa ma le Uelefea a le Ekalesia ma le Tautua Lautele i le 1969.

Mai le 1939 i le 1945, sa lofituina le tele o le lalolagi i le Taua Lona Lua. O le tele lava o polokalama a le Ekalesia sa aafia ai i lenei taua a le lalolagi. Ia Mati 1940, sa fono ai Peresitene J. Reuben Clark Jr., Fesoasoani Muamua ia Peresitene Heber J. Grant, ma peresitene o ausilali e toe iloilo ia polokalama ma gaoioiga uma. Sa latou otootoina faamoemoega faavae e fa mo vaega taitasi o le Ekalesia: “e faaitiitia ai le ‘avega ua faupu’e i luga o tagata o le au paia i le lagolagoina o gaoioiga faalelotu, ia tuuitiitia ai avega a epikopo, ia tipi ai polokalama ia e manaomia ai falelotu tetele, ma le taugata, ma ia faagaoioia ai le Ekalesia e tusa ai ma ana tupe maua.” Sa talosagaina le Aualofa ma isi faalapotopotoga e “tuufaatasi, soalaupule, faaitiitia, ma faafaigofie, ma fetuunai a latou galuega ina ia galulue faatasi ai ma le Au Peresitene [Sili] ia ausia faamoemoega o loo ta’ua i luga.”¹⁹

Na feagai tamaitai o le Aualofa i Europa ma le faatafunaga tele ona o le Taua Lona Lua a le Lalolagi. Sa latou faaalia foi le lotototoa viia i le auauna atu lea o le tasi i le isi e ui lava i tulaga matuia. Sa latou faaauau pea ma le faatuatua ma faalagolago i a latou molimau ma le Togiola a Iesu Keriso. O o latou soifuaga ma molimau mai lenei vaitau e matuai musuia moni lava.

Ina ua mae’a le taua, sa tusia e Maria Speidel, o le sa peresitene i le Aualofa a le Itu o Siamani Stuttgart:

“O tausaga e lima ua mavae atu o ni tausaga faigata ma ua matou matua lotomaualalo ai lava. O lo matou faatuatua i le Alii ma a matou molimau i lana Ekalesia, sa avea ma poutu o le malosi. Sa ia alofamutimutivale ia i matou ma e ui lava ina tele naua mea sa pagatia ai, ae sa ia tuuina mai ia i matou se fuataga o lona malosi. O nisi o i matou sa leiloloa uma a matou oa faalelalolagi, o mea faitino uma sa pele ia i matou, ma ina ua matou fai atu ‘E sili ai le savavali faatasi ma le Atua i le pogisa nai lo le aunoa ma ia i le malamalama,’ ua matou iloa le mea lea matou te tautala atu ai. …

“… Matou te usuina ma le olioli pese o Siona ma tuu atu lo matou faatuatuaga i le Alii. Na te faaleleia mea uma.”²²

O Gertrude Zippro, o se tasi peresitene o le Aualofa, sa savavali ma le Atua i le pogisa i le tele o po e faaalia le alofa ma auauna atu i ona uso. Sa nofo o ia i Holani i se taimi sa i ai le atunuu i lalo o le vaavaaiga a le militeli. Talu ai e tele ina tutu ia leoleo ma suesue ia tagata feoa’i, sa ia tauaveina lana faailo igoa ina ia mafai ai ona asiasi atu i Aualofa a paranesi i le itu.

Fai mai le tama tama a Sister Zippro, o Ioane na “oo ina matua faateleina le matautia o le feoa’i i le po a o faaauau ona pulea e le fili mo tausaga e lima.” I lona manatua ai o le tuuto o lona tina, sa ia fai mai, “Mata tou te talitonu i le lototele o lo’u tina i na tulaga ma alu i le tele o taimi i lana uila i le po e asiasi i se isi paranesi?” Na ia tomanatu ai: “Po o a lava ona lagona po o tulaga e i ai, na te faia lava lana matafaioi. Oka se tamaitai ma se taitai ina a maoae! E leai so’u masalosalo na filifilia lava o ia e le Alii e avea ma Peresitene o le Aualofa i lena taimi.”

Sa matauina e Sister Zippro, “Atonu sa atoatoa lona faatuatuaga i le Alii na alu ai i lea taimi ma lea taimi i na tulaga, ma lona le iloaina po o a faafitauli o le a la fetaia’i.”²³

I Tenimaka, sa sili atu le tulaga o le Au Paia nai lo le tele o isi atunuu. Sa maua a latou meaai, o lea sa latou fefaasoaai ai ma o latou tuaoi sa le maua ni mea. Fai mai Eva M. Gregersen, le peresitene o le Aualofa a le Misiona a Tenimaka: “Sa matou tauaveina i le taimi o le taua le galuega o le fesoasoani i lo matou nuu tuaoi matelaina, o Nouei. Sa matou tuuina atu faatasi ma le ofisa o le misiona ia tupe mo lenei faamoemoega, ma o masina taitasi sa matou auina atu ai le tele o afifi mananaia ma meaai i o matou uso ma tuagane i Nouei, o ē sa le mafai e upu ona faamatala le agaga faafetai.”²⁴

O Peresitene Hugh B. Brown o se molimau sa vaaitino i lea alofa moni. Sa avea o ia ma peresitene o le Misiona a Peretania mai le 1937 i le 1939, o se taitai faamaopoopo mo le au tautua a le Au Paia o Aso e Gata Ai i Europa mai le 1939 i le 1945, ma sa toe peresitene foi i le Misiona a Peretania mai le 1945 i le 1946. Na avea mulimuli ane ma se tasi o le Korama a Aposetolo e Toasefululua ma le Au Peresitene Sili. Sa ia lipotia mai e uiga i le galuega na ia vaaia i tuafafine o le Aualofa i le taimi o le Taua Lona Lua a le Lalolagi:

“E fiaselau tamaitai o le Aualofa i le tafa o le taua sa feagai ma tulaga matautia, o tofotofoga ma faigata, e faatusatusa i mea sa feagai ma o tatou alii i le malae o le taua. Sa faaauau pea ona galulue nei tamaitai a o feagai ai ma faigata na toetoe ina a le gafataulimaina. …

“O le tootuli e tatalo faatasi ma nei tamaitai ma faalogo atu o latou faafetai atu i le Atua mo nai o latou faamanuiaga faatauvaa, mo le faasaoina o o latou ola ma ola o a latou pele, ma nai mea iti latou te ola ai ma o latou fale e leai ni faamalama, o se musumusuga ma se a’oa’iga i le toatele o i tatou e tele naua oa faalelalolagi ae tele ina faitio i le le maua o ni nai mea iti o le olaga.”²⁵

Sa tuuina atu e Hedwig Biereichel, o se tamaitai i Siamani Sisifo, ia meaai mo ni pagota Rusia o le taua sa matelaina, e ui lava semanu e faafalepuipuiina ai o ia ma lona aiga pe tafanaina ai foi ona o lena galuega alofa.²⁶ I ni tausaga mulimuli ane, sa faatalanoaina ai o ia e uiga i ona aafiaga, e pei foi o le toatele o isi sa onosaia faigata faapena i le taimi o le Taua Lona Lua a le Lalolagi. I le faaiuga o faatalanoaga taitasi, sa fesili le fai faatalanoaga, “Na faapefea ona e tausia se molimau i nei faigata uma?” Sa aoteleina e le fai faatalanoaga ia tali uma i le faamatalaga lenei: “Ou te lei tausia se molimau i na taimi—o le molimau na tausia a’u.”²⁷

Ina ua muta le Taua Lona Lua a le Lalolagi i le 1945, sa matua mafatia tamaitai o le Aualofa i le lalolagi atoa i le faanoanoa. Peitai, sa latou faaauau pea ona auauna atu le tasi i le isi, faamalolosia aiga, ma lagolagoina molimau i na taimi uma.

I le avea ai o se molimau o le tele o le mafatiaga ma le auaunaga lē manatu faapito, na tautino mai ai e Sister Amy Brown Lyman:

“[O la’u] molimau sa avea ma o’u taula ma o’u toomaga, o lo’u lotomalie i taimi o le olioli ma le fiafia, ma o’u faamafanafanaga i taimi o le faanoanoa ma le lotovaivai. …

“Ou te faafetai lava mo le avanoa ua ou maua e auauna atu ai … i le Aualofa lea sa ou galue ai ma le fiafia tele ma le faamalieina ma ona sui auai e fia afe, i le tele o lo’u olaga faatagata matua. Sa ou asiasi i o latou fale, moe i o latou moega, ma aai faatasi ma i latou, ma sa ou aoaoina ai le matagofie o o latou uiga, o lo latou le manatu faapito, o o latou loto malamalama, lo latou faamaoni, ma a latou osigataulaga. Ou te faamamaluina e sili atu i lo’u malosi, lenei usoga maoae a tamaitai o le auaunaga.”²⁸

I taimi o tofotofoga ma le le mautonu, sa mulimuli ai tamaitai o le Aualofa i le lalolagi atoa i le apoapoaiga a Mamona ina ia “uumau i le alofa, ua silisili i mea uma.” Sa latou faatinoina lo latou malamalama mautinoa e faapea e ui ina “faaleaogaina mea uma … a o le alofa moni, le alofa mama lea o Keriso, e tumau ia e faavavau.”²⁹ Ua alu aso ma sau foi aso, o latou faamaoni pea lava i la latou mautauave: “E le uma le alofa.”