“Ola e Tusa ai Ma Ou Avanoa”

Sa aoaoina e Iosefa Samita ia tuafafine o le Aualofa e uiga i lo latou mamalu faatamalii o ni afafine o le Atua, ma fesoasoani ai ia te i latou ia malamalama e alofa le Atua ia te i latou ma e i ai faamoemoega maualuga mo i latou e faataunuuina. O tamaitai i le Ekalesia e i ai a latou matafaioi taua i le fuafuaga a le Tama mo le faaolataga—e tutusa lava le taua ma matafaioi o loo tauaveina e alii o ē umia le perisitua. Ua faamanuiaina e le Alii ia tamaitai i se naunauga i lo latou natura e auauna atu ma faamanuiaina isi, ma ua Ia faamatuu atu ia i latou se tiutetauave paia e faaaoga a latou meaalofa e fesoasoani ai e laveai Ana fanau.

O nisi taimi e galo ai i tamaitai lo latou mamalu faatamalii ma latou gauai atu ai i faafiafiaga ma faaosoosoga a le lalolagi. O le popole e uiga i lenei tulaga, sa lagonaina ai e Sister Mary Ellen Smoot, le peresitene aoao lona sefulutolu o le Aualofa, ma ona fesoasoani o Sister Virginia U. Jensen ma Sheri L. Dew se tulaga manaomia e fesoasoani i tamaitai o le Ekalesia ia manatua lo latou faasinomaga. I se fonotaga aoao a le Aualofa, sa latou faaalia ai le uiga o le avea ai o ni afafine o le Atua:

“O i tatou o afafine agaga faapeleple o le Atua, ma o o tatou olaga e i ai uiga, o faamoemoega, ma faasinomaga. I le avea ai o se usoga i le lalolagi atoa, o lea ua faatasia ai i tatou i le faamaoni ia Iesu Keriso, lo tatou Faaola ma le Faataitaiga. O i tatou o tamaitai o le faatuatua, amio mama, tofa loloto, ma le alofa o e:

“Faateleina a tatou molimau ia Iesu Keriso e ala i le tatalo ma le suesue i tusitusiga paia.

“Sailia le malosi faaleagaga e ala i le mulimuli i uunaiga a le Agaga Paia.

“Gauai atu i tatou lava i le faamalolosia o ulugalii, o fanau ma aiga.

“Iloa le tamalii o le tulaga faatina ma olioli i le tulaga faatamaitai.

“Fiafia e auauna atu ma faia galuega lelei.

“Fiafia i le olaga ma le aoaoina.

“Tu atu mo le upumoni ma le amiotonu.

“Lagolago le perisitua o le pule a le Atua i le fogaeleele.

“Olioli i faamanuiaga o le malumalu, malamalama i lo tatou taunuuga paia, ma taumafai ina ia faaeaina.”²

Sa faamanatu mai foi e taitai perisitua i tamaitai lo latou natura paia ma tiutetauave paia. Sa saunoa Elder M. Russell Ballard o le Korama a Aposetolo e Toasefululua: “Matou te talitonu ma faamoemoe i lo outou lelei ma le malosi, lo outou gauai atu i le mama ma le lototele, lo outou agalelei ma le lototoa, lo outou malosi ma le tumau ai. Matou te talitonu i la outou misiona o ni tamaitai o le Atua. … Matou te talitonu o le a le mafai e le Ekalesia ona ausia mea e tatau ona ausia e aunoa ma lo outou faatuatua ma le faamaoni, o lo outou natura faananau i ai e faamuamua le manuia o isi nai lo outou lava, ma lo outou malosi faaleagaga ma le naunautai. Ma matou te talitonu o le fuafuaga a le Atua mo outou o le avea lea o outou ma tupu tamaitai ma ia maua faamanuiaga silisili lea e mafai e soo se tamaitai ona maua i le olaga nei po o le faavavau.”³

A ola ia tamaitai e tusa ai ma o latou avanoa ma gafatia o ni afafine o le Atua, ua latou saunia i latou lava mo faamanuiaga o le ola faavavau. O le taunuuga mamalu lenei o loo teuina e le Atua mo Ona afafine faamaoni.

Na aoao mai le Perofeta o Iosefa Samita, “O se natura mo tamaitai le i ai o lagona o le alofa moni.” O le faavaeina o le Aualofa, na ia ta’u atu ai i tuafafine, “Ua tuuina nei outou i se tulaga e mafai ai ona outou galulue e tusa ai ma na tigaalofa ua totoina e le Atua i o outou loto.”⁴ Ina ia fuga mai le alofa moni a’ia’i i o latou loto, e tatau i tamaitai ona tuufaatasi lo latou alolofa na fananau mai ma i latou ma le faatuatua ia Iesu Keriso ma Lana Togiola. Na faamatala mai e Peresitene Henry B. Eyring, o se fesoasoani i le Au Peresitene Sili, e faapea o lenei alofa moni a’ia’i o le measina lea a le Aualofa:

“O le a ou tautala atu ia te outou … e uiga i le measina maoae na pasi mai ia te outou e i latou na mua i malae i le Aualofa. O le vaega … lea e foliga mai ia te au e aupito sili ona taua ma e tumau pea, o le alofa moni e i ai i le fatu o le sosaiete ma e tatau ona sau i le loto, ina ia avea o se natura moni, o sui auai taitoatasi. O le uiga o le alofa moni ia i latou e sili atu i le na o se lagona o le agalelei. O le alofa moni e fanau mai i le faatuatua i le Alii o Iesu Keriso, ma o se aafiaga o Lana Togiola i loto o tagata auai. …

Ata

Peresitene Henry B. Eyring

“O lenei sosaiete e aofia ai tamaitai o o latou lagona o le alofa moni e puna mai loto ua suia e ala i le faaagavaaina mo na lagona ma tausia feagaiga e na o le Ekalesia moni a le Alii e maua ai. O o latou lagona o le alofa moni e maua mai ia te Ia e ala i Lana Togiola. O a latou galuega o le alofa moni e taialaina e Lana faataitaiga—ma e maua mai i le lotofaafetai mo Lana meaalofa e lē uma o le alofa mutimutivale—ma le Agaga Paia, lea na Ia auina mai e mafutaina Ana auauna i a latou misiona o le alofa mutimutivale.”⁵

O lenei talatuu o le alofa moni na amata i tuafafine i Navu, o ē sa punouai i le faatulagaina o galuega alofa ma mauaina feagaiga o le malumalu. Sa faaauau i Uinita Kuota ma le alasopo faigata i le Vanu o Sate Leki. Sa lagolagoina ai tamaitai o le Au Paia o Aso e Gata Ai a o latou faato’aina tuaoi o nuu, onosaia sauaga faaupufai ma taua a le lalolagi, ma faatumauina le faamoemoe i le taimi o le pa’ū tele o le tamaoaiga. Sa musuia ai le alofa ma le agalelei i le aiga ma taumafaiga e aapa atu ai i le lalolagi atoa. Sa faaosofia ai tuafafine o le Aualofa a o latou auauna atu i falemai ma a o latou fesoasoani i le vaetamaina o fanau, teuina o le saito, fesoasoani alofa, ma le uelefea. O loo faaauau pea ona faaosofia e le alofa mama o Keriso ia tuafafine o le Aualofa i ona po nei, a o latou faapotopoto e aoao atu ma tautuaina e le tasi le isi, ma a o latou fefaamalosia’i ma vaavaaia auaua’i le tasi ma le isi.

Ua avea tamaitai uma o le Au Paia o Aso e Gata Ai o se vaega o lenei talatuu o le alofa ma ua i ai le tiutetauave ma le avanoa e faasoa atu ai lenei talatuu i isi.

O le talafaasolopito o se tasi aiga o loo faaalia ai le pasi mai o le talatuu o le Aualofa mai le tina i le afafine mo augatupulaga. Ua taufai teufatuina e afafine taitoatasi le mautauave a le Aualofa, “E le uma le alofa.”

Na amataina le talatuu ia Elizabeth Haven Barlow, o lē na auai i le Ekalesia i le 1837. Na avea Elizabeth ma se sui auai o le Aualofa a Tamaitai o Navu, i le aso 28 o Aperila, 1842, ma sa ia faalogo i le Perofeta o Iosefa Samita o aoao atu ia mataupu faavae na faavae ai le faalapotopotoga. O nei aoaoga na lagolagoina ai o ia i le gasologa o le olaga na aofia ai le aafia i tagata faatupu faalavelave ma sauaga, fanauina o se tamaitiiti i le taimi o le malaga i le Vanu o Sate Leki, ma le tausia o se aiga laiti a o faamisiona lana tane. Sa avea o ia ma se peresitene o le Aualofa i Bountiful, Iuta, mai le 1857 i le 1888, e tolu tausaga a o lei maliu i le 81 o ona tausaga.

Na faaauau le tala i lana tama teine o Pamela Barlow Thompson. Sa valaauina Pamela ma lona toalua e nofomau i Panaca, i Nevada, lea sa avea ai o ia ma peresitene o le Aualofa. Sa faiaoga o ia i tamaitai i tomai faatausiaiga, e aofia ai le faaaogaina o se masini ofoofogia: o le laau su’isu’i. A o latou nonofo ai i Nevada, sa fasiotia lona toalua. Ona toe foi ai lea o ia ma lona aiga toatele i Bountiful, Iuta, lea sa toe valaauina ai o ia e galue i le au peresitene o le Aualofa.

Sa pasi atu e Pamela lenei talatuu i lana tama teine o Theresa Thompson Call. E lei leva ona faaipoipo Theresa, ae siitia atu ma lona toalua i Mekisiko. O le tele o lona olaga, sa galue ai o se peresitene o le Aualofa ma se fesoasoani i le au peresitene o le Peraimeri i le taimi lava lea e tasi. Sa lauiloa o ia i lana auaunaga alofa, e avatu meaai i e sa manaomia le fesoasoani. Sa ia faia se faiga masani o le aveina o keke i toeaiina ma olomatutua tuaoi i o latou aso fanau. I se tasi aso, sa galo ai ia te ia se aso fanau o se tuaoi seia mae’a aiga o le afiafi. O lona tuuto i le mataupu faavae faapea “e le uma le alofa,” sa ia toe faaola ai le afi o le ogaumu ma toe faia ai se keke. Ina ua taunuu atu o ia i le faitotoa a ua leva lena po, sa tagi le tuafafine ma fai mai, “Sa ou faatalitali atu mo oe i le aso atoa, ma ua toeitiiti lava a fai la’u faaiuga ua e faagaloina a’u i lenei taimi.”

Sa fiafia foi Theresa, le tama teine a Athelia Call Sears i le Aualofa. Na te faanatinati lava e fai lana auliga i taeao o Aso Lua taitasi ina ia mafai ai ona alu i le fonotaga a le Aualofa i le afiafi o le Aso Lua. I le 70 o ona tausaga, sa valaauina o ia e avea ma peresitene o le Aualofa i le uarota. O se taimi sa manaomia ai e uarota ona fai suegatupe mo masini ma gaoioiga, sa ia taitaia ai tuafafine o le Aualofa i le sailiga o se tupe ia lava e faatotoga ai le umukuka mo le falelotu, faatasi ai ma se $1,000 faaopoopo mo le epikopo e faaaoga i isi manaoga o le uarota.

O Athelia Sears Tanner, o se afafine o Sister Sears, sa valaauina o se tina talavou e avea ma peresitene o le Aualofa a le uarota. O le tele o lana auaunaga alofa sa aofia ai le vaaia ma le aveina o meaai i tina failele fou. O se faiaoga ua masani e i ai se molimau malosi ia Iesu Keriso, sa ia faafaileleina lana fanau e toa 13 ma sa ia auauna atu foi i isi ma laveaiina agaga i vaega eseese o le Aualofa i lona soifuaga atoa.

Sa faaauau pea ona i ai le talatuu o le alofa moni i lenei aiga. O fanau teine uma a Sister Tanner sa galulue ma le faamaoni i le Aualofa, ma ua mulimuli foi fanau a ana fanau i faataitaiga a o latou tina.⁶

O le auaunaga alofa o le talatuu faaleagaga lea a sui auai uma o le Aualofa. E pei ona sa faamatala mai e Peresitene Eyring: “E te pasiina atu le talatuu pe a e fesoasoani i isi ia maua le meaalofa o le alofa moni i o latou loto. Ona mafai ai lea ona latou pasiina atu i isi. O loo faamaumauina le talaaga o le Aualofa i upu ma fuainumera, ae o le talatuu e pasi atu mai le loto i le loto.”⁷

Ina ua mavae ona toe faitauina le tele o faataitaiga o tagata e i ai le faatuatua tele, fai mai le Aposetolo o Paulo, “O i tatou foi, o loo ua vagavagaia e le faapotopotoga o e matamata mai e faapea ona toatele ina tatou tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le ala tanu o i o tatou luma, ma ia vaavaai atu ia Iesu o le na te taitaiina ma le na te faaatoatoaina le faatuatua.”⁸

O loo siosiomia tamaitai o le Ekalesia e se ‘au tele o molimau, e aofia ai le “Tina mamalu o Eva” ma le “toatele o afafine faamaoni o ē sa soifua i augatupulaga ma tapuai i le Atua moni soifua.”⁹ O afafine faamaoni o le Atua latou te ola e tusa ai ma o latou avanoa e ala i le mulimuli i tulaga aao o nei molimau, ua latou lafoai faafitauli ma faaosoosoga e faasalaveia ai i latou ae taufetuli i le tuuga ua faatuina e le Alii i o latou luma.

Ua i ai i tupulaga uma ni tamaitai tamalii, agaalofa, faatuatua, ma paia. E ui e toaitiiti nisi o nei tamaitai o le a tusia faamaumau o latou igoa i le talafaasolopito, ae e silafia lelei i latou e le Tama Faalelagi. Ma o lenei, e pei ona ta’ua ai e Eliza R. Snow, ona pau lea o le mea e sili ona taua: “E toatele uso e le o iloa a latou galuega i talaatu o mea latou te nonofo ai, ma atonu foi e le o patipatia iina, ae o le a le eseesega e maua ai? Afai e talia e le Atua au galuega, po o le a lava le faatauvaa o tiute, ae afai na faatinoina ma le faamaoni, e le tatau lava ona e lotovaivai ai.”¹⁰

O le tala lenei o se tasi o le mau faataitaiga o uunaiga a tuafafine faamaoni o le Aualofa. I lenei tala, sa pa’i atu ai se luutaga o tamaitai i le olaga o se talavou matua e igoa ia Lynne. Ona sa vaai Lynne i nei tuafafine o auauna atu, sa ia naunau ai e faia foi le mea lava lea e tasi ina ua avea o ia ma se tasi o le Aualofa.

Ina ua lata ina luasefulu tausaga o Lynn, sa la iloaina ma lona tina ua ma’i tigaina le toalua o lona tina i se aai mamao. Sa vave ona la o i se vaalele e asi o ia, peitai sa maliu o ia a o lei taunuu atu i la’ua. Sa faamatala mulimuli ane e Lynne le mea na tupu ina ua la toe foi ane i le fale:

“A o ma savavali atu ma lo’u tina ua matuai le lavavā ma loto ua nutimomoia, i lalo o sitepu o le vaalele, sa savavali mai [se] tamaloa ma se fafine sa tutu i le malaevaalele ma fusi i ma’ua. O le peresitene o le paranesi ma le peresitene o le Aualofa. …

“O aso na sa matua fenumiai ai a ma tauivi e taulima le mea moni ua oti [le toalua o lo’u tina]. … Peitai, sa i ai lava se uso iina, sa faatalitali le leoa i tua atu—e ave feau, e tali le faitotoa, e u’uina o ma’ua lima a o fai a ma telefoni i o ma aiga ma uo. Sa i ai i latou iina e fesoasoani i le teuina o a ma’ua ato, ma taulima mea sa tatau ona fai.

“O na mea uma, sa ou atiina ae ai se uiga o le lotofaafetai sa ou le iloa pe mafai faapefea ona ou toe totogi atu i na uso pele. Sa ou taumafai ma le naunautai e mafaufau i se ala, peitai sa oo ina ou fiu.”

Na mavae ni tausaga, ina ua faaipoipo Lynne ma i ai sana fanau laiti e toatolu, sa valaauina o ia e galue i le au peresitene o le Aualofa. E i ai taimi sa ou tau mafaufau ai pe mafai ona ia gafataulimaina ia mea e manaomia o lona valaauga. Peitai sa ia manatuaina le auaunaga sa ia tuuina atu ia te ia ina ua maliu le toalua o lona tina. “Ia,” sa ia mafaufau ai ia te ia lava, “o lo’u taimi lenei.” Sa ia faamatalaina ona aafiaga nei:

“Sa i ai se fafine i le uarota na maliu lana tama teine e sefulufa ona tausaga. Sa talosaga mai le fafine ia te au e faatau se ofu manaia e faaofu ai le tino o lana tama e sauniuni ai mo lona falelauasiga. Sa mafai ona ou faia—ma sa ou iloaina o se aafiaga matagofie tele. Ua oo i lo’u taimi e auauna atu ai, e faapei foi ona auauna mai [isi uso] ia te au.

“Sa i ai se olomatua i le uarota sa nofo na o ia ma sa i ai o ia i se tulaga matautia mo le tolu aso ona ua ova le inuina o ana fualaau. Sa ma mauaina ma le isi fesoasoani o ia o loo ola pea i lona fale e mautotogi ai, ma sa ma faamamaina o ia a o lei taunuu mai le taavale a le falemai. Ona ma nonofo ai lea e fufulu—puipui ma le fola—o lona fale i le vailaau. O lo’u taimi foi lea.

“Sa i ai se tina talavou i le uarota, o se tasi o a’u uo, sa faafuasei ona oti lana tama, o se teineitiiti lalelei e tolu tausaga, ona o se fula sa uma ai lona ola a o le’i iloa e fomai le matuia tele o lona ma’i. Sa ma o ma le isi fesoasoani i le fale i le taimi lava na matou maua ai le tala i le oti o si teineitiiti o Robin. Ina ua ma latalata atu i le faitotoa o le poletito pa valavala, sa ma faalogoina le tamā (e le auai i le Ekalesia) o tagi masusu a o tautala i le telefoni i lona tina. Ina ua tepa a’e i luga, sa ia vaaia i ma’ua, ma tagi masusu lava, ma tautala atu i le telefoni: ‘O le a le afaina, Tina. O lea ua o mai fafine Mamona.’ Ua toe oo mai foi lo’u taimi.”

Sa ta’ua mulimuli ane e Lynne ina ua fesili tagata ia te ia po o le a sona manatu i le Aualofa, ma sa ia faamatala atu ia i latou ona aafiaga i lona mauaina ma le tuuina atu o le auaunaga. Fai mai a ia: “O lo’u lagona loloto lena i le Aualofa. Ma le mafuaaga.”¹¹

I le lalolagi atoa, o lagona foi na o tamaitai o le Au Paia o Aso e Gata Ai e uiga i le Aualofa, “e matua loloto lava.” E faapei o Lynne, ua faamanuiaina i latou mai auaunaga a le Aualofa, ma ua latou iloa o lo latou taimi lenei e auauna atu ai ma le alofa moni ma le faatuatua. Latou te tuuina atu lenei auaunaga i matafaioi eseese—o ni afafine, ava, tina, uso, uso o tina po o tuafafine o tamā, faiaoga asiasi, taitai o le Aualofa, tuaoi, ma uo. O nisi o la latou auaunaga e aumai i le tali atu i tofiga mai taitai o le Ekalesia, a o nisi o a latou auaunaga e aumai i uunaiga lilo mai le Agaga Paia. O le vaaia o “tapasaina i latou e se ao maoae o molimau,” ua saunia i latou e “fetaomi atu ma le onosai i le tausinioga ua faataatia mai luma mo i latou].”

Sa uunaia e Peresitene Iosefa F. Samita, le Peresitene lona ono o le Ekalesia, ia tamaitai o le Au Paia o Aso e Gata Ai ina ia “outou taitai i le lalolagi aemaise lava le taitaiina o tamaitai o le lalolagi, i mea uma e tauleleia,o mea uma e foliga i le Atua, o mea uma lava e siitia ae ai ma mama mo le fanau a tagata.” Na ia saunoa, “Ua valaauina outou i le siufofoga o le Perofeta a le Atua e faia lea, ina ia silisili, ina ia tautaua ma maoae, ia sili ona mama ma faamaoni i le mea moni.”¹²

I le talafaasolopito atoa o le Ekalesia toefuataiina a le Alii, sa ola soo tamaitai o Keriso i lenei tulaga faatonuina. E faapei o Eseta, sa latou faamaoni ma lotototoa a o fetaiai ma luitau faigata. Sa latou mauaina le faamoemoega o o latou olaga, e faapei ona faia e Eseta ina ua fesili atu lona tausoga o Moretekai ia te ia, “O ai ea na te iloa o le a afio mai o Ia i lona malo i se taimi pei o lenei?”¹³ E pei o Neemia i le Feagaiga Tuai, sa latou lei solomuli mai o latou tiutetauave paia. Ina ua taumafai fili o Neemia e faaosooso o ia ia aveese mai i lona tiute e toe fauina ia pa o Ierusalema, sa ia tali atu, “O loo faia se galuega maoae, o lea e mafai ai ona ou sau i lalo: aisea o le a taofia ai le galuega, pe a ou tuua, ae sau i lalo ia te oe?”¹⁴ Sa faaosoosoina pea o ia e ona fili, peitai sa tumau malosi ma faamaoni o ia i lana galuega taua. Sa taumafai le lalolagi e faatauanau tamaitai o le Ekalesia e lafoai a latou misiona na aumai i le Atua, peitai e le’i “o mai i lalo” tuafafine faatuatua o le Aualofa.

O le poloaiga ina ia taulamua i mea uma e logoleleia, o mea faale-Atua, faagaeetia, ma mama, o se mea faigata tele. E faigata i taimi uma. Peitai e le o tuulafoaiina lava tuafafine o le Aualofa i le taliaina o lenei poloaiga. O i latou o se vaega o se faalapotopotoga sili, na faavaeina e le pule o le perisitua ma ua faamalosia i aoaoga ma folafolaga a perofeta. O i latou o ni afafine faapelepele o le Atua ua i ai ni tiutetauave paia. O i latou o ni tagata o le feagaiga a le Tamai Mamoe, “ua faaauupegaina i le amiotonu ma le mana o le Atua i le mamalu tele.”¹⁵ A o latou soofaatasi ma isi Au Paia faamaoni ma aoao mai faataitaiga a i latou na mua i malae, e mafai ona latou manumalo mai luitau o le olaga nei. E mafai ona latou fesoasoani e fausia le malo o le Atua i le lalolagi atoa ma i o latou aiga. E mafai ona latou fai atu, “O lo tatou taimi lenei—lo tatou taimi e auauna atu ai ma tusia se mataupu i luga o lautusi o le talaaga o le Aualofa.” Faatasi ai ma le faamautinoaga o le alofa o le Tama Faalelagi mo i latou ma se molimau i le mana o le Togiola a Iesu Keriso, e mafai ona latou tula’i a’e i luga atu o mafaufauga ma faamoemoega masani ma avea ma se vaega o “se mea uiga ese.”¹⁶

E mautinoa lava folafolaga a le Alii pe a mulimuli ia tuafafine i fautuaga na Ia tuuina mai i le uluai peresitene o le Aualofa: “E moni ou te fai atu ia te outou, o i latou uma e mauaina lau talalelei o atalii ma afafine i latou i lo’u malo. … Ia e tuuese mea a lenei lalolagi, a ia saili i mea a se lalolagi sili atu. … Pipiimau atu i feagaiga ua e osia.”¹⁷ Ina ua ta’u atu e le Perofeta o Iosefa Samita i tuafafine o le Aualofa ia “ola e tusa ai ma o [latou] avanoa,” sa ia tuufaatasia lena apoapoaiga ma se folafolaga: “O le a le mafai ona taofia agelu mai le avea ma a outou aumea mamae. … Afai e mama outou, e leai se mea na te taofia.”¹⁸