Ikapulo ug Pagpahinungod [Consecration]

Wala gayud ako magtuo bisan sa makadiyot, nga adunay tawo niini nga Simbahan, kinsa wala masayud sa katungdanan sa pagbayad sa ikapulo, ni kinahanglan nga adunay pagpadayag matag tuig kabahin niini nga butang. Anaa ang Balaod—pagbayad og ikapulo (DBY, 174).

Daghan kaayong mga pangutana nga kini nahimo nga makapikal: ang balaod mao nga ang usa ka tawo mobayad sa ikapulo … alang sa pagtukod og Balay sa Ginoo, pagsangyaw sa ebanghelyo, ug pagsuporta sa priesthood. Kon ang usa ka tawo mosulod sa simbahan gusto siyang masayud kon angay pa ba niyang hunahunaon ang iyang mga saput, dagkong mga utang, mga yuta, ug uban pa. Kini mao ang balaod nga mohatag … sa ikanapulo sa iyang kinitaan [tan-awa sa D&P 119:4] (HC, 7:301). Ang balaod sa ikapulo usa ka mahangturon nga balaod. Ang Ginoong Makagagahum wala gayud mohimo sa iyang Gingharian dinhi sa kalibutan nga walay balaod sa ikapulo diha taliwala sa iyang mga katawhan, ug siya dili gayud mohimo niini. Kini usa ka mahangturon nga balaod ang gihimo sa Dios alang sa kaayohan sa tawhanong pamilya, alang sa ilang kaluwasan ug kahimayaan. Kini nga balaod anaa sa Priesthood, apan kita dili gusto nga adunay motuman niini gawas nga sila andam sa paghimo niini (DBY, 177).

Ang mga katawhan wala pugsa sa pagbayad sa ilang ikapulo, sila mobuhat kon gikalipay nila kini, giaghat kini diha kanila isip usa lamang ka katungdanan tali kanila ug sa ilang Dios (DBY, 177).

Wala kita mosugo ni bisan kinsa sa pagbayad sa ilang ikapulo, gawas kon sila andam sa paghimo niini, apan kon kamo magpakaaron-ingnon sa pagbayad og ikapulo, bayad niini sama sa matinud-anon nga mga tawo (DBY, 177).

Ang tanan kinahanglang mobayad sa ilang ikapulo. Ang usa ka kabus nga babaye kinahanglang mobayad sa ikapulo sa iyang manok, kon siya hatagan man og balik sa simbahan kanapulo pil-a sa kantidad nga iyang gihatag (DBY, 178).

Tinuod gayud nga ang mga kabus mas maayo pa nga mohatag sa ilang ikapulo kay sa mga adunahan. Kon ang mga adunahan mobayad pa sa ilang ikapulo kita aduna untay daghan. Ang mga kabus matinud-anon ug walay langay nga mobayad sa ilang ikapulo, apan ang mga adunahan maglisud sa pagbayad sa ila—sila adunay sobra kaayo. Kon siya adunay napulo ka dolyares makabayad siya og usa; kon siya adunay usa lamang ka dolyar makabayad og diyes sentabos; dili kini sakit alang kaniya. Kon siya adunay usa ka gatus ka dolyares tingali makabayad siya og diyes. Kon siya adunay usa ka libo ka dolyares tan-awon niya og makadiyut ug moingon, “ako tingali ning ibayad, hinoon kinahanglan man gayud ning ibayad,” ug dayon siya mobayad sa iyang napulo ka dolyares o sa iyang usa ka gatos ka dolyares. Apan pananglit ang usa ka tawo dato kaayo nga makabayad sa napulo ka libo, tan-awon niya kana og makadaghan ug moingon, “siguro hulaton nako kon makakuha ako og mas dugang pa, ug niana daghan ang akong ikabayad.” Ug sila maghulat ug maghulat, sama sa usa ka tigulang nga tawo sa Silangan; sige siyang naghulat ug naghulat ug naghulat sa pagbayad sa iyang ikapulo hangtud nga siya mibiya niining kalibutan, ug ingon usab niini ang gibuhat sa kadaghanan. Naghulat sila ug padayong naghulat, hangtud, sa katapusan, siya nga gitawag og Kamatayon miabut, ug kini miabut nga wala damha ug mikutlo sa ilang gininhawa, niana patay na sila ug dili na makabayad sa ilang ikapulo, ulahi na kaayo sila, ug mao kini ang nahitabo (DBY, 175).

Dili alang kanako ang pagbarug ug moingon nga ako makahatag ngadto sa Ginoo, kay sa pagkatinuod ako wala gayuy ikahatag. Morag kon tanawon ako aduna. Ngano man? Tungod kay nakita sa Ginoo nga angay akong padad-an, ug mipanalangin sa akong mga paningkamot sa pagpundok sa mga butang nga takus nga tinguhaon, nga maoy gitawag og kabtangan (DBY, 176).

Sa dihang ang akong Bishop mianha aron sa pagsubay sa akong mga kabtangan, gusto siyang masayud kon unsay iyang kuhaon alang sa akong ikapulo. Ako siyang giingnan sa pagkuha sa tanan nga anaa kanako, kay wala nako ibutang ang akong kasingkasing diha sa bisan usa ka butang, akong mga kabayo, mga baka, mga baboy, o bisan unsang mga butang nga iyang kuhaon, ang akong kasingkasing napahiluna diha sa buluhaton sa akong Dios, diha sa kaayohan sa mga katawhan sa iyang halangdon nga Gingharian (DBY, 176).

Kon kita magsunod sa atong relihiyon andam kita nga mobayad sa ikapulo (DBY, 176).

Ang atong kaugalingon dili ato, gipalit kita nga adunay kantidad, iya kita sa Ginoo, ang atong panahon, mga talento, bulawan ug pilak, ang atong trigo ug maayo nga harina, atong bino ug atong lana, atong mga binuhi, ug tanan nga ania sa yuta nga atong naangkon iya sa Ginoo, ug iyang gikinahanglan ang ikapulo niini alang sa pagtukod sa iyang gingharian. Kita maaduna may daghan o diyutay, ang ikanapulo nga bahin kinahanglang ibayad alang sa ikapulo (DBY, 176).

Kon ang usa ka tawo naghunahuna sa paghatag og bisan unsa, ipahatag kaniya ang pinakamaayo nga anaa kaniya. Ang Ginoo mihatag kanako sa tanan nakong naangkon; sa pagkatinuod ako wala gayuy ako, wala bisan usa ka sentimos. Makapangutana ka, “Imo bang gibati samtang ikaw nagsulti?” Oo, tinuod akong gibati. Ang kupo nga ania sa akong buko-buko dili ako, ug bisan kanus-a dili, ang Ginoo mibutang niini sa akong kabtangan uban sa dungog, ug ako misul-ob niini; apan kon iya kining gikinahanglan, ug ang tanan nga ania kanako, ang tanan andam nakong ihatag. Wala ako manag-iya og balay, o bisan usa ka luna sa umahan, kabayo, asno, karwahe, o karomata … apan unsay gihatag sa Ginoo kanako, ug kon iya kining kuhaon, mahimo niyang kuhaon sa iyang kabubut-on, mananghid man siya, o sa walay pupananghid (DBY, 175).

Kining tanan iya sa Ginoo ug kita iya lamang nga mga tinugyanan (DBY, 178).

Wala ako maghunahuna sa adlaw nga hingpit ako nga gawasnon, hangtud ako pagakoronahan didto sa celestial nga gingharian sa akong Amahan, ug mahimo nga gawasnon sama sa akong Amahan sa Langit. Wala pa nako madawat ang akong kabilin isip akong kaugalingon, ug ako naghunahuna nga magsalig hangtud ako kining madawat, kay ang tanan nga ania kanako gipahulam kanako (DBY, 177).

Aniay usa ka binuhat—usa ka tawo—nga gimugna sa Ginoo, gipahimutang, gihulma ug gihimo,—ang matag parte ug bahin sa akong kinatibukang pagkatawo gikan sa akong ulo ngadto sa akong lapa-lapa, gihimo sa akong Amahan sa Langit, ug iyang gikinahanglan ang ikanapulo nga bahin sa akong utok, kasingkasing, ugat, kusog, tinubdan sa kusog, unod, bukog, ug ang akong kinatibuk-ang pagkatawo, alang sa pagtukod og mga templo, alang sa pangalagad, alang sa pagsuporta sa mga misyonaryo ug sa mga pamilya sa misyonaryo, sa pagpakaon sa mga kabus, sa tigulang, sa bakul ug sa buta, ug alang sa pagpundok kanila balik sa panimalay gikan sa mga kanasuran ug sa pag-amuma kanila human sila mapundok. Siya miingon, “Anak, ipahinungod ang ikanapulo nga bahin sa imong kaugalingon alang sa kaayohan ug maayong buluhaton sa pag-amuma sa imong isig katawo, pagsangyaw sa Ebanghelyo, pagdala og mga tawo ngadto sa Gingharian; ipahiluna ang imong mga plano sa pag-amuma ngadto sa dili makaatiman sa ilang kaugalingon; pagdumala sa mga buluhaton niadtong makahimo sa pagtrabaho, ug ang ikanapulo nga bahin igo na kaayo kon kini gipahinungod sa maayo, mainampingon ug maalamong paagi alang sa pagpadayon sa akong Gingharian dinhi sa yuta” (DBY, 176).

Kon ang Ginoo nagkinahanglan sa ikanapulo nga bahin sa akong abilidad nga mahimong ihalad sa pagtukod og mga templo, mga balay-tigumanan, mga balay-tulunghaan, sa pagpa-eskwela sa atong mga anak, pagpundok sa mga kabus gikan sa mga kanasuran sa yuta, sa pagpapuyo sa mga tigulang, bakul ug buta, ug sa pagtukod og ilang mga kapuy-an, aron unta sila mahamugaway sa ilang pag-abut sa Zion, ug sa pagsuporta sa Priesthood, dili akoa ang katungod sa pagpangutana sa Makagagahum kabahin niini, ni sa iyang mga sulugoon kinsa gisangunan niini (DBY, 174).

Gusto nako ang termino nga [ikapulo], tungod kay sa kasulatan kini, ug mas gusto akong mogamit niini kay sa uban. Ang Ginoo mitudlo sa ikapulo; gihimo kini sa panahon ni Abraham, ug ni Enoch ug ni Adan ug ang ilang mga anak wala makalimot sa ilang ikapulo ug mga halad. Sa inyong kaugalingon mahimo kamong mobasa kabahin sa unsay mga gikinahanglan sa Ginoo. Gusto akong mamulong og ingon niini sa makadaghan ngadto sa mga nangangkon nga sila mga Santos sa Ulahing mga Adlaw— kon kita mobaliwala sa atong ikapulo ug mga halad masilutan kita sa Ginoo. Mosalig kita nga kini tinuod nga mahitabo. Kon ibaliwala nato ang pagbayad sa atong mga ikapulo ug mga halad ato usab nga ibaliwala ang uban pang mga butang ug kini mas dakog impluwensya kanato hangtud ang espiritu sa Ebanghelyo hingpit nga mawala kanato, ug maanaa kita sa kangitngit ug dili masayud kon asa kita padulong (DBY, 174).

Ang Ginoo nagkinahanglan sa ikanapulo nga bahin sa iyang gihatag kanako; akoa na ang pagbayad sa ikanapulo nga bahin sa kinitaan sa akong pagbuhi og mga hayop ug sa tanan nga anaa kanako, ug ang tanang mga tawo kinahanglang mohimo sa sama. Ang pangutana mahimong motumaw, “Unsa may gamitan sa ikapulo?” Kini alang sa pagtukod og mga templo sa Dios; alang sa pagpalapad sa mga utlanan sa Zion; pagpadala og mga Elder ngadto sa misyon aron sa pagsangyaw sa Ebanghelyo ug sa pag-atiman sa ilang mga pamilya. Sa dili madugay kita aduna na unyay daghang templo nga maadtoan, ug makadawat kita og mga panalangin, ang mga panalangin sa langit, pinaagi sa pagkamasulundon sa doktrina sa ikapulo. Kita aduna unyay mga templo nga matukod libot niini nga mga bukid, sa mga walog niini nga Teritoryo ug sa mga walog sa sunod nga Teritoryo, ug sa katapusan, libot niining mga walog sa bukid. Nagpaabut kita nga makatukod og daghang mga templo niining daghan kaayong mga walog. Moadto kita sa balay sa pagtuga, ug sa dili pa moadto, mokuha una kita og rekomendasyon gikan sa atong Bishop nga kita nakabayad sa atong ikapulo (DBY, 178).

Akong katungdanan ang pagdumala sa paggamit sa ikapulo nga gibayad sa mga Santos, ug dili kini katungdanan sa matag Elder sa Gingharian kinsa nagtuo nga ang ikapulo iyaha (DBY, 178).

Kon inyong tugutan ang panulay nga mosugyot diha kaninyo nga ako wala mogiya kaninyo sa katarung, ug motugot niana nga hunahuna nga magpabilin diha sa inyong mga kasingkasing, ug mosaad ako kaninyo nga kini modala kaninyo ngadto sa apostasiya. Inyong gitugutan ang inyong kaugalingon sa pagduhaduha kabahin sa mga gipadayag sa Dios, ug kini dili magdugay nga magsugod kamo sa pagbaliwala sa inyong mga pag-ampo, dili na mohatag sa inyong Ikapulo, ug mangita og sayop sa mga may katungod sa Simbahan. Inyong pagausbon kon unsa ang gisulti sa tanang miapostasiya, “Ang Ikapulo wala gamita sa husto” (DNSW, 29 sa Ago. 1876, 1).

“Akong nakita ang komunidad sa mga Santos sa Ulahing mga Adlaw sa panan-awon ug nakakita kanila nga nahan-ay isip usa ka dakong pamilya sa langit; ang matag tawo naghimo sa iyang daghang mga katungdanan sa linya sa iyang trabaho, nagtrabaho alang sa kaayohan sa kinatibuk-an labaw kay sa pagpatuboy sa indibidwal; ug niini akong nakita ang labing maanindot nga kapunongan nga mahunahuna sa tawo, ug ang pinakanindot nga mga resulta alang sa pagpauswag sa gingharian sa Dios ug sa pagpakaylap sa pagkamatarung dinhi sa yuta.” Kini ba nga mga tawo makahimo niining mga butanga? Andam na ba sila karon nga mosunod sumala niana nga patriyarkal nga kapunongan nga pagatukuron taliwala sa mga matinuoron ug matinudanon sa dili pa ang Dios modawat kon unsa ang iyaha? Tanan kita nagkauyon sa punto nga kon matapos kining kinabuhia, ug uban niini ang iyang mga kahasol, kabalaka, gugma sa kaugalingon, gugma sa bahandi, ug gugma sa gahum, ug sa tanang nagkasukwahi nga mga interes nga may kalabutan niining kinabuhia, nga unya, kon ang atong mga espiritu mobalik ngadto sa Dios nga naghatag niini, ubos kita sa matag kinahanglanon nga iyang pangayoon kanato, nga aron kita unya magpuyo nga managkauban isip usa ka dako nga pamilya; ang atong mga tinguha mahimong sa kinatibuk-an, alang sa kaayohan sa tanan. Nganong dili man kita makapuyo sa ingon dinhi niini nga kalibutan? (DBY, 181).

Moabut ba gayud ang panahon nga kita makasugod sa pag-organisar niini nga mga katawhan isip usa ka pamilya? Mahitabo kini. Nasayud ba kita kon unsaon? Oo. … Sa inyong hunahuna mahiusa ba gayud kaha kita? Kon kita mopauli ngadto sa atong Amahan ug Dios, dili ba kita mangandoy nga makauban sa usa ka pamilya? Dili ba kini ang atong pinakataas nga ambisyon ug tinguha nga ilhon isip mga anak nga lalaki sa buhi nga Dios, isip mga anak nga babaye sa Makagagahum, nga may katungod sa panimalay, ug sa hugot nga pagtuo nga anaa sa panimalay, manununod sa Amahan, sa iyang mga butang, iyang katigayunan, iyang gahum, iyang kahalangdon, iyang kahibalo ug kaalam? (DBY, 179).

Ug kon kini nga mga katawhan mahimong usa, usa usab kini sa Ginoo. Dili sila managsama nga tan-awon. Dili kitang tanan adunay abohon, asul, o itom nga mga mata. Ang atong hitsura lahi sa usag usa, ug ang atong panglihok-lihok, mga taras, ug mga paningkamot sa pag-angkon, paggahin ug paggamit sa atong mga oras, mga talento, katigayunan ug bisan unsa nga gihatag sa Ginoo ngari kanato, sa atong biyahe niini nga kinabuhi, managlahi kita sama sa panaglahi sa atong mga dagway. Ang punto nga buot sa Ginoo nga masabtan nato mao ang pagsunod sa iyang tambag ug pagtuman sa iyang mga pulong. Niana ang matag usa pagatudloan aron kita makalihok isip usa ka pamilya (DBY, 180).

Buot kitang makakita og usa ka komunidad nga natukod diin ang matag tawo mahimong mga kugihan, matinud-anon ug mainampingon (DBY, 180).

Ayaw gayud pagtinguha og butang nga dili ninyo makab-ot, pagpakabuhi sumala sa inyong kinitaan (DBY, 180).

Sa dihang ang Ginoo mihatag sa pagpadayag nga nagtudlo kanato sa atong katungdanan kabahin sa pagpahinungod kon unsay anaa kanato, kon ang mga tawo kaniadto nakasabut pa unta sa mga butang ingon nga kini mao, ug mituman niana nga pagpadayag, kini unta dili mosobra o dili mokubos kay sa pagnunot ngadto sa dili ila, kondili ngadto kaniya kinsa mao ang tag-iya. Ug mao gihapon kini karon (DBY, 178).

Ang Ginoo namahayag niini nga kini iyang kabubut-on nga ang iyang mga katawhan mosulod ngadto sa pakigsaad, gani sama sa gibuhat ni Enoch ug sa iyang mga katawhan, diin tungod sa panginahanglan, kinahanglang himoon sa dili pa kita makabaton og kahigayunan sa pagtukod og Sentro sa Stake sa Zion, kay ang gahum ug himaya sa Dios atua didto, ug walay usa gawas sa may putli og kasingkasing ang makapuyo ug mopahimulos niini (DBY, 178).

Adunay lain nga pagpadayag [tingali sa Doktrina ug mga Pakigsaad 42] … nga nag-ingon nga kini katungdanan sa tanang katawhan kinsa moadto sa Zion sa pagpahinungod sa ilang mga kabtangan ngadto sa Simbahan ni Jesukristo sa mga Santos sa Ulahing mga Adlaw. Kini nga pagpadayag … usa sa nag-una nga mga kasugoan o mga pagpadayag nga gihatag ngadto niini nga mga katawhan human sila makabaton og pribilehiyo sa pagorganisar sa ilang mga kaugalingon isip usa ka Simbahan, isip usa ka lawas, isip Gingharian sa Dios dinhi sa yuta. Akong napanid-an kaniadto, ug karon ako naghunahuna, nga kini maoy usa sa katapusan nga mga pagpadayag nga dawaton sa mga katawhan diha sa ilang mga kasingkasing ug masabtan, sa ilang kaugalingon nga kabubut-on ug pagpili, ug tahuron kini isip usa ka kalipay, usa ka pribilehiyo, ug usa ka panalangin nganha kanila ang pagtuman ug paghupot sa labing balaan (DBY, 179).

Adunay daghan nga kabtangan, ug mga bulawan ug mga pilak ilawom sa yuta ug ibabaw sa yuta, ug ang Ginoo naghatag nganha sa usa ug ngadto sa usa—sa mga dautan ug ingon man sa mga matarung—aron tan-awon kon unsay ilang buhaton niini, apan kining tanan gipanag-iya Niya. Siya mitugyan og igo nga gidaghanon ngadto niini nga mga katawhan. … Apan dili kini ato, ug ang tanan natong angay buhaton mao ang pagpaningkamot ug pagsuta kon unsay buot sa Ginoo nga atong buhaton sa mga butang nga ania kanato, ug dayon molihok ug mobuhat niini. Kon kita mobuhat og lain lapas pa niini, o ngadto sa tuo o ngadto sa wala, mitunob kita diha sa supak nga buluhaton. Ang atong makatarunganon nga buluhaton mao ang pagbuhat kon unsay buot sa Ginoo nga atong buhaton nianang iyang gihatag kanato ug gamiton kini sumala sa iyang gimando, ihatag man ang tanan niini, ang ikapulo, o ang sobra (DNW, 23 sa Abr. 1873, 4).

Unsa ka dugay kitang mabuhi una nato mahibaloi nga kita wala diay ikapahinungod sa Ginoo—nga ang tanan Iya sa Amahan sa langit; nga kining mga kabukiran Iya; ang mga walog, mga kahoy, ang tubig, ang yuta; sa katingbanan, ang yuta ug ang kabuhong niini? [tan-awa sa D&P 104:14–18, 55] (DNW, 20 sa Hunyo 1855, 5).

Asa niana ang sakripisyo nga gihimo niining mga katawhan nga sukad ilang gihimo? Walay ingon niana nga butang. Ila lamang nga giilisan ang mas ngil-ad nga kahimtang ngadto sa mas maayo, sa matag higayon nga sila gitandog; ilang giilisan ang ilang pagkawalay kahibalo alang sa kahibalo, ug ang pagkawalay kasinatian alang sa tugbang niini (DNW, 24 sa Ago. 1854, 1).

Kon pananglitan gitawag kita sa pagbiya sa unsay anaa kanato karon, tawgon ba kini nato og sakripisyo? Kaulaw sa tawo nga moingon niini; kay mao gayud kini ang paagi nga madugangan ang iyang kahibalo, panabut, gahum, ug himaya, ug mag-andam kaniya nga modawat sa mga korona, mga gingharian, mga trono, ug mga kayutaan, ug pagakoronahan sa himaya uban sa mga Dios sa kahangturan. Gawas niini nga paagi dili gayud nato madawat ang unsay atong gipangita (DNW, 3 sa Ago. 1854, 2).

Sultihan ko kamo kon unsay buhaton aron maangkon ang inyong kahimayaan, nga dili ninyo maangkon gawas kon kamo mosunod niini nga paagi. Kon ang inyong mga pagbati gibutang diha sa bisan unsa nga butang nga maoy mobabag kaninyo sa pinakagamay aron sa pagpahinungod niini ngadto sa Ginoo, paghimo og pagpahinungod niana nga butang una sa tanan, nga ang pagpahinungod sa kinatibuk-an mahimong hingpit (DNW, 5 sa Ene. 1854, 2).

Unsa ang nakapugong niini nga mga katawhan nga mahimong balaan sama sa simbahan ni Enoch? Makasulti ako kaninyo sa hinungdan pinaagi sa pipila ka mga pulong. Tungod kay dili kamo mougmad og kinaiya nga mahimong ingon: mao kini ang tibuok hinungdan. Kon ang akong kasingkasing dili pa bug-os nga gipahinungod ngadto niini nga buhat, akong ihatag ang akong panahon, akong mga talento, akong mga kamot, ug akong mga kabtangan, hangtud ang akong kasingkasing mouyon; akong himoon ang akong mga kamot nga motrabaho alang sa Dios, hangtud ang akong kasingkasing moyukbo sa pagdawat niini (DNW, 5 sa Ene. 1854, 2).

Nasultihan ko na kamo karon kon unsa nga dalan ang inyong subayon aron maangkon ang kahimayaan. Ang Ginoo kinahanglan mao gayud ang una ug ang pinakalabaw sa atong mga pagbati; ang pagtukod sa iyang kawsa ug gingharian nagkinahanglan sa nag-una nato nga paghunahuna (DNW, 5 sa Ene. 1854, 2).

• Ilha ang kada hugpong sa mga pulong nga si Presidente Young migamit sa pulong nga “ikapulo,” ug unya isulat ang tanan nga iyang gilakip diha sa atong mga obligasyon sa ikapulo. Unsay naglangkob sa ikapulo ug kinsa ang kinahanglan nga mobayad niini? (Tan-awa usab sa D&P 119:3–4.)

• Ngano nga miingon man si Presidente Young nga siya walay ikahatag? (Tan-awa usab sa Mosiah 2:19–24; D&P 104:14–18, 55.) Unsa man ang tinubdan sa tanan nato nga gipahimuslan, lakip na ang atong gibayran og ikapulo? Unsa man gayud ang kinahanglan natong kinaiya kabahin sa nahibilin nga siyam sa ikapulo sa mga kabtangan nga iya sa Dios nga Iyang gisalig ngari kanato? (Tan-awa usab sa Jacob 2:17–19.) Sa unsang paagiha nga kini nga kinaiya makatabang kanato aron makasabut sa Malaquias 3:8–12?

• Basaha og maayo ang 2 Cronicas 31:5–6. Kanus-a man mibayad sa ilang ikapulo kini nga mga katawhan? Unsa may angayan nato nga kinaiya kabahin sa pagbayad sa ikapulo?

• Unsa ang gipasabut ni Presidente Young sa dihang miingon siya nga ang Ginoo “nagkinahanglan sa ikanapulo nga bahin sa … akong kinatibukang pagkatawo”? Sa unsang mga paagi nga kamo sa “inyong kaugalingon makapahinungod sa ikapulo” aron sa pagtukod sa Gingharian sa Dios? Giunsa kamo sa pagpanalangin sa dihang kamo mihatag sa inyong panahon ug mga talento alang sa pagtukod sa gingharian sa Dios nga dugang sa pagbayad sa ikapulo?

• Unsa nga mga sangputanan ang giingon ni Presidente Young sa dili pagbayad sa ikapulo? Sa unsa nga paagi nga ang dili pagbayad sa ikapulo makaapekto sa Simbahan sa Ginoo ug sa indibidwal nga miyembro?

• Unsa ang giingon ni Presidente Young nga gamitan sa ikapulo? Kinsa ang responsable sa pagdumala sa paggamit sa mga pundo sa ikapulo? (Tanawa usab sa D&P 120.) Unsa ang pagtan-aw ni Presidente Young kabahin sa nagduhaduha niadtong mga responsable sa pagdumala sa paggamit sa mga pundo sa ikapulo?

• Unsa ang buot ipasabut sa “komunidad sa mga Santos sa Ulahing mga Adlaw” nga mahimong “usa ka dakong pamilya sa langit” ug mahimong “manununod sa Amahan”?

• Ngano nga ang balaod sa pagpahinungod “usa sa katapusang mga pagpadayag nga dawaton sa mga tawo diha sa ilang mga kasingkasing ug masabtan sa ilang kaugalingon nga kabubut-on ug pagpili, ug tahuron kini isip usa ka kalipay, ug usa ka pribilehiyo, ug panalangin nganha kanila ang pagtuman ug paghupot sa labing balaan”?

• Ngano nga ang Dios mibutang man og mga kabtangan nga ania kanato? Unsa ang atong responsibilidad isip mga tinugyanan sa mga kabtangan sa Dios? Sumala ni Presidente Young, unsa ang atong makatarunganon nga buluhaton” kalabut sa ikapulo ug pagpahinungod? Sa unsang paagi nga ang pagsulay og himo og sobra ka daghan sama ra ka sayop sa paghimo og sobra ka gamay?

• Unsa ang angay natong ipahinungod kon nagpaabut kita nga makadawat sa tanan nga anaa sa Dios? Ngano man? (Tan-awa usab sa D&P 84:38.) Sa unsang piho nga mga paagi kamo makapahinungod sa tanan nga anaa kaninyo ug anaa sa atong Amahan sa Langit? Unsaon niini sa pagpanalangin kaninyo, sa inyong pamilya, sa isig ka miyembro sa Simbahan, ug sa uban nga inyong ikauban?