Ang Katapusang mga Adlaw

Ang tanan nga wala pa nato madunggi ug atong nasinati na halos dili pa mao ang pasiuna sa sermon nga isangyaw. Kon ang pagpamatuod sa mga Elder ihunong na sa paghatag, ug ang Ginoo moingon ngadto kanila, “Pauli na; Ako na karon ang mosangyaw sa akong kaugalingon nga mga sermon ngadto sa mga nasud sa yuta,” ang tanan nga karon inyong nahibaloan dili kaayo matawag nga pasiuna sa sermon nga isangyaw uban sa kalayo ug espada, mga bagyo, mga linog, ulan nga yelo, ulan, mga dugdug ug mga kilat, ug makahahadlok nga kalaglagan. Unsa may naa kon madaot ang pipila ka mga tren? Makadungog kamo og bantugang mga siyudad, nga karon nahimong idolo sa mga katawhan, nga mounlod sa yuta, molubong sa mga lumulupyo. Ang dagat mobanlas lapas sa iyang mga utlanan, molamoy sa dagkong mga siyudad. Kagutom magkadaghan sa mga kanasuran ug ang nasud moalsa batok sa nasud, gingharian batok sa gingharian ug mga estado batok sa mga estado, sa atong kaugalingong nasud ug sa langyaw nga mga yuta; ug ilang laglagon ang usag usa, dili manumbaling sa dugo ug sa mga kinabuhi sa ilang mga silingan, sa ilang mga pamilya, o sa ilang kaugalingong mga kinabuhi (DBY, 111–12).

Wala gayuy panahon sa milabay nga mga katuigan, wala sukad nga ang tinuod nga simbahan nga gilaglag human sa mga adlaw sa mga Apostoles, nga nagkinahanglan og hugot nga pagtuo ug kalagsik sa diosnon nga mga lalaki ug diosnon nga mga babaye, ug sa mga kahanas, kaalam ug gahum sa Makagagahum nga makig-uban kanila, sama sa gikinahanglan sa mga tawo niining higayona. Wala gayud kana nga panginahanglan, wala gayud moabut ang panahon sa ibabaw sa yuta, gikan sa panahon nga ang simbahan nalaglag, ug ang Priesthood gikuha gikan sa yuta, nga ang gahum sa kangitngit ug ang mga gahum sa yuta ug impyerno nasuko pag-ayo, ug naglagot, ug nagdilaab sa kasuko batok sa Dios ug pagkadiosnon dinhi sa yuta, kay sa karong higayon (DBY, 112).

Ang Yawa supak gayud ni Jesus karon sama nga siya supak sa dihang ang kagubot nahitabo didto sa langit. Ug samtang ang Yawa nagpadaghan pinaagi sa paghimo sa mga tawo nga dautan, si Jesukristo mipadaghan ug mipaligon pinaagi sa paghimo sa mga tawo nga mapainubsanon ug matarung. Ang tawhanong pamilya kada adlaw nagbotar, karon ug unya ug sila gusto nga masayud kon unsa nga partido ang modaog (DBY, 112).

Ang panahon moabut nga ang matag tuhod moluhod, ug ang matag dila mokumpisal ug moila kaniya, ug kon sila nga nagpuyo sa yuta ug mibiaybiay sa Makagagahum nga Binuhat ug sa mga pagpadayag nga gikan kaniya, maulawan ug magpaubos sa ilang mga kaugalingon diha sa iyang atubangan, motuaw, “Adunay Dios! O Dios, sa makausa kami misalikway kanimo ug wala motuo sa imong pulong ug mibaliwala sa imong mga tambag, apan karon naulaw nga miyukbo ug kami nakahibalo gayud nga adunay Dios, ug nga si Jesus mao ang Kristo.” Kining panahona moabut, sa labing siguro. Kita adunay hugot nga pagtuo sa Ebanghelyo ni Ginoong Jesus (DBY, 112–13).

Unsa ang ilang buhaton? Makadungog sila sa kaalam sa Zion ug ang mga hari ug nga mga magmamando sa mga nasud moadto sa Zion sa pagpangutana sa mga pamaagi sa Ginoo, ug sa pagpangita sa mahinungdanon nga kahibalo, kaalam ug pagsabut nga gipakita pinaagi sa mga Santos sa Labing Halangdon (DBY, 113).

Sila kinahanglang moluhod ug mokumpisal nga siya ang Dios, ug nga si Jesukristo, kinsa nag-antus sa mga sala sa kalibutan, mao gayud ang Manunubos, nga pinaagi sa pagpaagas sa iyang dugo iyang gitubos ang mga lalaki, mga babaye, mga bata, mga hayop, mga langgam, mga isda, ang yuta mismo ug ang tanan nga nakita ug nadungog ni Juan nga nagdayeg sa langit [tan-awa sa Pagpadayag 5:13] (DBY, 113)

Sa dili madugay ang kalibutan mausab sumala sa mga pulong sa propeta, ug atong makita ang paghari sa pagkamatarung nga mosulod, ug ang sala ug kadautan magpalayo. Apan ang gahum ug mga baruganan sa yawa, kon kini matawag nga mga baruganan, dili gayud makaapekto bisan og gamay ngadto sa matarung nga pag-abut sa Manluluwas, sila pagabunalbunalan lamang sa hinayhinay, ug kita moabug sa gahum sa dautan. Oo, pinaagi sa gahum sa hunahuna sa hugot nga pagtuo, ug pinaagi sa maayong mga buhat, ang pagpadayon sa Ebanghelyo magkadugang, mokatap, motubo ug mouswag, hangtud nga ang mga kansasuran sa yuta mobati nga si Jesus adunay katungod sa pagmando sa mga kanasuran sama nga siya Hari sa mga Santos (DBY, 113).

Nasayud ba kamo nga kini mao ang katapusang takna sa paghari ni Satanas dinhi sa yuta? Si Jesus moabut aron maghari, ug kamong tanan kinsa nahadlok ug nalisang tungod sa inyong mga kaaway, ayaw na kahadlok kanila, ug pagkat-on sa pagkahadlok nga makapasilo sa Dios, kahadlok nga makalapas sa iyang mga balaod, kahadlok sa pagbuhat og bisan unsa nga dautan sa inyong igsoon, o ngadto ni bisan kinsa nga tawo sa yuta, ug ayaw kahadlok ni Satanas ug sa iyang gahum, ni niadtong kinsa adunay gahum sa pagpatay sa lawas, kay ang Dios mopatunhay sa iyang mga katawhan (DBY, 114).

Sa nagkadako na ang edad sa atong pagpuyo, atong mahibaloan ang katumanan sa panagna, ug ang pagpangandam alang sa ikaduhang paganhi sa atong Ginoo ug Manluluwas nga mopuyo dinhi sa yuta. Atong gipaabut nga ang dangpanan sa mga bakak malaglag, ug kana nga siyudad, nasud, panggobyerno, o gingharian nga wala moalagad sa Dios, ug wala mopatalinghug sa mga baruganan sa kamatuoran ug sa relihiyon, hingpipt nga maguba ug malaglag (DBY, 114).

Ang Milenyum naglangkub niini—ang matag kasingkasing sa Simbahan ug sa Gingharian sa Dios nga nahiusa; ang Gingharian nagtubo sa pagbuntog sa tanan nga mosupak sa pagpalakaw sa langit, ug si Satanas gigapos, ug gisilyohan siya. Ang tanang mga butang ingon ra sama karon, kita mokaon, moinom, ug mosul-ob og sinina (DBY, 115).

Himoa nga ang mga tawo magpakabalaan, ug ang yuta ubos sa ilang mga tiil mabalaan. Himoa nga ang mga katawhan mabalaan, ug mapuno sa Espiritu sa Dios, ug ang tanang hayop ug nagkamang nga butang mapuno sa kalinaw; ang yuta sa kalibutan mohatag sa iyang katambok, ug ang mga bunga niini mahimong pagkaon sa tawo. Kon adunay mas daghang kaputli, mas minos ang panagbangi; kon mas mabination kita sa mga hayop, mas madugangan ang kalinaw, ug ang luog nga kinaiya sa mananap mawala. Kon ang mga tawo dili moserbisyo sa Yawa sa laing higayon samtang sila buhi, kon kini nga kongregasyon aduna niana nga espiritu ug tinguha, dinhi niini nga balay mao ang Milenyum. Himoa nga ang mga lumulupyo niini nga siyudad makaangkon niana nga espiritu, ug himoa nga ang mga tawo niana nga teritoryo makaangkon niana nga espiritu, ug ania ang Milenyum. Himoa nga ang tanang mga tawo … makaangkon niana nga espiritu ug ania ang Milenyum, ug busa kini mokatap sa tibuok kalibutan (DBY, 115–16).

Sa Milenyum, kon ang Gingharian sa Dios matukod na dinhi sa yuta sa gahum, himaya ug kahingpitan, ug ang paghari sa dautan dugay na kaayong nagpatigbabaw mabuntog, ang mga Santos sa Dios adunay kahigayunan sa pagtukod sa ilang mga templo, ug sa pagsulod niini, mahimong, ingnon ta, nga mga haligi sa mga templo sa Dios [tan-awa sa Pinadayag 3:12], ug sila mopahigayon alang sa ilang mga patay. Dayon atong makita ang atong mga higala nga mobarug, ug tingali ang uban nga atong nakaila dinhi. … Ug kita makabaton og mga pagpadayag nga makaila sa atong mga katigulangan balik ngadto ni Amahang Adan ug Inahang Eva, ug kita makasulod ngadto sa mga templo sa Dios ug mopahigayon alang kanila. Dayon [ang mga anak] pagabugkuson ngadto sa [mga ginikanan] hangtud ang kadena mahimong hingpit ballik ngadto ni Adan, aron adunay hingpit nga kadena sa Priesthood gikan ni Adan ngadto sa katapusan sa kalibutan.

Mao kini ang trabaho sa mga Santos sa UIahing mga Adlaw sa Milenyum (DBY, 116).

Ayaw kaayo kabalaka sa Ginoo nga magdali sa iyang buhat. Himoa nga ang atong kabalaka motumong sa usa ka butang, ang pagbalaan sa atong kaugalingong mga kasingkasing, ang pagputli sa atong kaugalingong mga pagbati, ang pagpangandam sa atong mga kaugalingon sa pag-atubang sa mga hitabo nga nagsingabot kanato. Kinahanglan nga kini mao ang atong hunahunaon, mao kini ang atong katungdanan, kini kinahanglan nga mao ang atong inadlaw nga pag-ampo, ug dili magdali nga makakita sa pagbuntog sa dautan (DBY, 117).

Kon ang kalibutan sunugon sulod sa usa ka tuig, o sulod sa liboan ka tuig, dili mahinungdanon kaninyo ug kanako. Kita adunay mga pulong sa kinabuhing dayon, kita adunay pribilehiyo sa pag-angkon og himaya, pagka-imortal, ug kinabuhing dayon, karon naangkon ba ninyo kini nga mga panalangin? (DBY, 117).

Kita adunay Gingharian sa Dios nga tukuron, Zion nga tubson; kinahanglan nga atong balaanon ang atong mga kaugalingon aron kita makaandam nga dad-on sa Simbahan sa Unang Natawo, ug kon kita mouswag kada adlaw ug takna, nan kon kita mamatay kita mahatagan og kaangayan. Apan kon kita magpadayon sa pagpakabuhi, kita kinahanglan nga mahimong mga Santos sa buhat, o mapakyas sa pagdawat sa himaya sa Dios nga ipadayag (DBY, 444).

Ang oras sa Ginoo dili nako kinahanglan nga mahibaloan, apan siya mabination, mainantuson, ug mapailubon, ug ang iyang kasuko hilum nga molahutay, ug magpadayon hangtud ang kalooy hingpit nga mapakita, ug dayon ang paghukom modumala. Wala ako masayud kon unsaon, ni ako buot nga makahibalo karon. Igo na alang kanato ang pagkahibalo unsaon sa pagserbisyo sa atong Dios ug sa pagsunod sa atong relihiyon, ug sa ingon, madugangan ang pagpanalangin sa Dios kanato (DBY, 117–18).

• Sumala ni Presidente Young, unsa nga mga pagsulay ang moabut sa katapusang mga adlaw? Ngano nga kini nga mga paghukom ania sa yuta?

• Unsa ang gisulti ni Presidente Young ang bugtong katarungan nga mahunong ang pagpanggukod batok sa Simbahan?

• Sa unsa nga paagi nga ang gubat sa langit magpadayon gihapon sa yuta karon? Unsa ang gikinahanglan sa “diosnon nga mga lalaki ug diosnon nga mga babaye” sa katapusang mga adlaw?

• Unsa ang reaksyon sa mga tawo sa yuta kon sila “makadungog sa kaalam sa Zion”?

• Unsay angay natong makat-unan nga kahadlokan niining “katapusang takna sa paghari ni Satanas dinhi sa yuta”? Unsaon nato nga dili mahadlok sa mga kaaway sa pagkamatarung?

• Si Presidente Young miingon nga ang dautan “pagabunalbunalan” ug ang pagpadayon sa Ebanghelyo madugangan” pinaagi sa gahum sa hugot nga pagtuo, ug pinaagi sa maayong mga buhat.” Sa unsa nga paagi nga ang hugot nga pagtuo usa ka “gahum sa hunahuna”? Sa unsa nga paagi nga ang maayong mga buhat makabuntog sa pagkadautan? Unsaon nato sa pagtabang sa pagpadayon sa ebanghelyo nga “magkadugang, mokatap, motubo ug mouswag”?

• Sumala ni Presidente Young, unsa ang Milenyum? (Tan-awa usab sa D&P 43:30–31; 88:110.)

• Sa unsa nga paagi nga ang yuta ug ang mga lumulupyo niini mahimong malinawon ug balaan?

• Unsa ang trabaho sa mga Santos sa UIahing mga Adlaw sa Milenyum?

• Si Presidente Young miingon nga kinahanglan nga atong balaanon ang atong mga kaugalingon alang sa Ikaduhang Pag-anhi ni Jesukristo. Unsaon nato aron mahimong balaan? (Tan-awa usab sa Helaman 3:35; D&P 20:31.)

• Ngano nga dili kita mabalaka sa tukma nga pag-abut sa Ikaduhang Pag-anhi?