O Oa e Lē Mafaatauina o le Malumalu Paia

Tatou te o mai [i le malumalu], pe a ou mafaufau i ai, ina ia maua le atoatoa o faamanuiaga o le perisitua…

Ua tatou o mai iinei i lenei Maota Paia e aoao, ia iloa le Atua e pei ona i ai moni o Ia, ma le ala foi e mafai ona tatou mauaina ai e i tatou lava se faaeaga i lona afioaga …

O iinei e amata ai ona tatou faataatia maa o le faavae o se aiga faalelagi e faavavau, aua o iinei i lenei Ekalesia o i ai le mana e fusifusia ai mea o le a fusifusia foi i le Lagi.²

Ae e tatau ona tatou faailoa atu le mea moni i o tatou tagata uma, o e laiti ma e matutua, o totonu o o tatou malumalu paia o faaeega paia i le malumalu, o le taiala mautinoa lea o le fiafia iinei ma le olaga e faavavau i le lalolagi a sau.³

Pe a e ulu atu i se malumalu paia, o le ala lena e te mauaina ai le faaaumea faatasi ma le Au Paia i totonu o le malo e faavavau o le Atua, i le mea e le o toe i ai se taimi. I totonu o malumalu o lou Atua e le faaeeina atu ai ia te oe ni measina o oa faalelalolagi, ae o le tamaoaiga o oa o le faavavau e sili atu ona taugata.

O sauniga o le malumalu ua fuafuaina e se Tama Faalelagi poto sa faaali maia nei mea ia i tatou i nei aso mulimuli e fai ma taiala ma se puipuiga i o tatou olaga, ina ia mafai ai e oe ma au ona maua le faaeaga i le malo selesitila, o le mea e afifio ai le Atua ma Keriso.

Talosia ia ia outou finafinau ma le maelega ma ia taitaiina outou e saunia outou lava ia maua nei oa e le mafaataulia i le maota o le Alii.⁴

E lua vasega o faaaliga: E i ai faaaliga e ono taua o faaaliga vaaia, e pei o faaaliga o loo tusia i totonu o le Mataupu Faavae ma Feagaiga ma isi tusi, sa tuuina mai i le lalolagi. Ma e i ai foi faaaliga e tatou te taua o faaaliga le vaaia. O nei faaaliga e faaali mai ma tuuina mai i na o nofoaga paia lava ua saunia mo le faailoaina mai o sauniga silisili e faasino i le Perisitua Arona ma le Mekisateko, ma o na sauniga o loo i ai i totonu o le maota o le Alii.⁵

I le 1841, sa faaali atu ai e le Alii ia Iosefa Samita “aua ua leai se mea e tasi i le lalolagi e mafai ona sau i ai o Ia ma toefuatai mai ai mea na le iloa ia te outou, po o mea na aveesea e ia, o le atoatoaga lava lea o le perisitua …

“Aua ou te loto ina ia faaali atu i lau ekalesia mea ua natia pea a o lei faavaeina le lalolagi, o mea tau le augatupulaga o le atoatoaga o aso.” (MFF 124:28, 41)

O nei faaaliga, ua faaagaga ma aoaoina ai na o tagata faamaoni o le Ekalesia i totonu o malumalu paia, ua faamatalaina nei mea ua taua o “mea lilo faale-Atua.” Sa fetalai mai le Alii ua Ia tuuina atu ia Iosefa “ki o mea lilo, atoa ma faaaliga ua faamaufaailogaina…” (MFF 28:7.) E fai ma taui i e faamaoni, ua folafola mai e le Alii: “Ou te faaalia foi ia te i latou mea lilo uma, ioe, o mea lilo uma sa natia o lou malo talu mai aso anamua. …” (MFF 76:7.)…

I tusitusiga a le Perofeta o Iosefa Samita o loo maua ai se faamalamalamaga o nei mea ua taua o mea lilo e aofia ai mea sa saunoa i ai le Perofeta faapea o faaeega paia. Sa ia faapea mai i se vaega:

“Sa ou faaaluina le aso i le vaega i luga o le faleoloa, o lo’u ofisa patino lena … i se fono ma [ona ia ta’ua lea o igoa o le tele o uluai taitai], ma aoaoina i latou i mataupu faavae ma faatulagaga o le Perisitua, ma faamamafa i o latou mafaufau mulumuluga, faauuga, faaeega paia ma le fesootaiga o ki e faatatau i le Perisitua Arona, ma faasolo ai lava seia oo i le faatulagaga maualuga o le Perisitua Mekisateko, ma tuu atu ai le faatulagaga e faatatau i Aso mai Anamua, ma fuafuaga uma ma mataupu faavae e mafai ai e soo se tasi ona faamautuina le atoatoa o na faamanuiaga sa saunia mo le Ekalesia a le Ulumatua, ma oo ai ina alu atu ma mafuta i le afioaga o le Elohima i le lalolagi e faavavau.” (Teachings of the Prophet Joseph Smith, p. 237.)

O Peresitene Polika Iaga, i le faataatiaina o le maatulimanu mo le Malumalu i Sate Leki, sa ia faaopoopo mai ai le isi nei malamalamaaga i le uiga o le faaeega paia ma le faamoemoega o le fausia o malumalu e faatatau i ai:

“… O lou faaeega paia, o le mauaina lea o na sauniga uma i totonu o le maota o le Alii, ia e tatau mo oe, pe a e tea atu ma lenei olaga, ina ia mafai ai ona e toe savali atu i le afioaga o le Tama, e pasi atu i agelu o tutu o ni leoleo, … ma maua ou faaeaga e faavavau ae lē o le lalolagi ma seoli.” [Discourses of Brigham Young, sel. John A. Widtsoe (1954), 416.]⁶

Afai o le taliaina o le talalelei e matua taua tele mo le sologa lelei o le agaga e faavavau o le tagata, ua alagatatau foi la ona fesili ifo poo le a le mea e tupu i le miliona ma miliona o i latou ua maliliu e aunoa ma le malamalama i le talalelei po o le fuafuaga a le Alii, lea e ono faaalia ai aafiaga atoa o le togiola. Afai o le galuega a faifeautalai e gata lava i le olaga faaletino, o le a toatele agaga o le a faasalaina e aunoa ma le faalogo. O tagata uma, pe lelei pe leaga, o le a toe tutu, ona o le togiola. “Aua faapei ona oti uma ia Atamu, ua faapea foi ona faaolaina uma ia Keriso.” (1 Kori 15:22.) Ae ua na o i latou lava e salamo ma ua papatiso mo le faamagaloina o a latou agasala o le a atoatoa lo latou aia i le toto faaola o lana togiola. …O le Papatisoga i le faatofuina mo le faamagaloina o agasala, ua na o le pau lea o le ala e mafai ai e le tagata ona talia le talalelei, o se sauniga e faia i le lalolagi nei, ma o le Ata o le Faaolataga, ua saunia ai e lo tatou Tama i lona finagalo e laugatasia ai ana fanau uma, se ala mo tagata uma o lana Ekalesia ma lona Malo i le lalolagi e fai ma “faaola i luga o Mauga o Siona,” e ala lea i le faatinoina o galuega e fai ma sui mo i latou i le lalolagi o agaga, “le falepuipui,” ua le mafai ona latou faatinoina nei galuega mo i latou lava

O lenei galuega mo e ua maliliu lea e faatinoina i totonu o malumalu paia e tagata o le Ekalesia, e avea moni ai i latou e faia nei galuega ma “faaola” ia i latou ua maliliu ae le i maua se malamalama i le talalelei, ina ia mafai ai e latou ona maua le meaalofa atoatoa a le Faaola sa folafola atu i tagata uma e ala i lana togiola. E faasino i lena auaunaga e mafai ona tuuina atu ia i latou i le lalolagi o agaga, e pei foi ona le fesiligia sa faatinoina e le au paia i aso o le Aposetolo o Paulo ma o lea e mafai ai foi ona tatou faatinoina mo o tatou tagata maliliu, sa tuuina mai e ia e talu atu ai e avea ma faamaoniga o le toetu. Sa ia faapea mai: “A faapea, pe faapefea e ua papatisoina ma sui o e ua oti? Afai e moni, e le toe tutu e ua oti, ona o le a ea ua papatisoina ai i latou ma sui o e ua oti?” (1 Korinito 15:29.) Ua fausia malumalu i nei aso ina ia mafai ai ona toe faatino nei galuega sili ona taua mo le galuega o le faaolataga.⁷

[O le Alii] sa fetalai mai o faitotoa o seoli o le a le mafai ona manumalo i le ekalesia a Keriso (Mataio 16:18). O lenei, o faitotoa o seoli e ono mafai ona manumalo i le galuega a le Alii pe ana le tuuina mai sauniga e faatatau i le faaolataga o i latou ua maliliu. I na vaitaimi ao lei i ai le perisitua e faatino ai sauniga faaola o le talalelei i le lalolagi, e faitau miliona i latou sa soifua, o le toatele o i latou o ni agaga faamaoni. A na faapea e leai se ala e faatinoina ai sauniga faaola o le talalelei mo i latou ua maliliu e aunoa ma le malamalama o le talalelei, semanu e manumalo faitotoa o seoli i le fuafuaga a le Tama mo le faaolataga.⁸

[I a tatou galuega o le sailia o gafa] o le a le tatalaina e le Alii se faitotoa seiloga tatou te faia mea uma tatou te mafaia. E tatau ona tatou agai atu i lena papupuni avanoa ona tatau lea ona lava lo tatou faatuatua e fesili atu ai i le Alii e fesoasoani e faamatala mai se avanoa ina ia tatou laasia le isi laasaga. Ma e mafai ona i ai faamatalaga e tuuina atu ia te oe mai sosia e faaalia ai le mea moni, e lē o mamao lava le lagi ma le lalolagi.

O le toatele o outou ua ola i se taimi o lenei olaga sa i ai nisi o e pele ia te outou ua maliliu. Sa i ai ia te outou le mautinoa o le latalata mai, i nisi taimi, o i latou o taumafai e faalatalata mai ia te outou. Ma o nisi taimi latou te aumaia ia te outou ni faamatalaga e le mafai ona outou maua mai i se isi lava ala.⁹

O i ai ia te au se molimau maumaututu sa afua mai i se mea itiiti na tupu lea ou te molimau atu ai e i ai malosiaga i tua atu o lenei olaga o loo galulue faatasi ma i tatou. …

E i ai ia te au le faatuatua faatauvaa afai e te faia mea uma e te mafaia, sailia e oo i lou avanoa mulimuli, o le a fesoasoani le Alii ia te oe e tatala faitotoa ma e saga agai ai pea i luma i le faiga o ou gafa, ma o le a fesoasoani mai le lagi, ma ou te mautinoa lena mea.¹⁰

Afai o le a tatou tutu faatasi i a tatou galuega o le malumalu ma a tatou galuega o le sailia o gafa, o le a le faamalieina i tatou i malumalu ua i ai nei, ae o le a lava galuega mo malumalu o le a fausia, e oo i le tatalaina o faitotoa o avanoa mo i tagata o o tatou aiga i le lalolagi o agaga, ma faapea ai ona avea i tatou ma faaola i luga o Mauga o Siona. O lo tatou toilalo e tutu faatasi o le tatou toilalo foi lea e faaauau o tatou aiga i le faavavau.¹¹

I le faia o galuega e fai ma sui o e ua oti e i latou o faaola i luga o Mauga o Siona, e finagalo le Alii i nei galuega ia faia i le latalata e mafai ai e i latou e leai se pona. E faapei ona ia finagalo i taulaga manu ia sa osia i manu e lē pona, e finagalo foi o ia ia tatou o mai iinei ma le mama ma ia agavaa e faia le galuega, le galuega e fai ma sui, i le avea ai lea ma faaola i luga o Mauga o Siona.

Ma ua matou fautuaina o tatou epikopo ma o tatou peresitene o siteki ina ia matua faaeteete i le sauniaina o o latou tagata ina ia sauniuni mo le mauaina o se pepa faataga o le malumalu ma aua nei faatagaina i latou e le i salamo i a latou agasala e o mai iinei, o i latou ua faia mea sese, [ia lē] o mai foi iinei a o le’i salamo, aua o le faia o lenei mea o le a faaleagaina ai le maota paia. Ou te manatu o le a leai se seoli e sili atu le leaga i le lalolagi nai lo se tasi e sau iinei i le afioaga o lo tatou Tama ma se lagona o le nofosala ma o i ai pea i luga o lena tagata le le mama. O se aafiaga faatamaia ma le faataumaoi lena.¹²

Atonu o le nofoaga paia sili o loo i ai i le fogaeleele e aupito latalata i le lagi o lo tatou malumalu lea, i le tulaga o le tatou ulufale atu i ai ma le le eleelea ma le tulaga o le faia e o tatou epikopo ma peresitene o siteki o se suesuega lelei o i latou uma e talosaga mo se pepa faataga, ina ia iloa ai i le mamao e mafai ai, o loo latou ola i tulaga patino faatonuina [ina ia latou le o mai] i ai ma ni tulaga lē mama e ono faaleagaina ai le agaga lea tatou te mananao ia i ai iina.

Ia manatua nei lena mea. Manatua o o tatou matafaioi paia ma lo tatou faamoemoe ia mafai e i tatou lava ona amata mautinoa o taimi uma tatou te o ai [i le malumalu], tatou te o ma lima mama ma loto mama ma ia tatou aoao atu ia mea i isi. [Tagai Salamo 24:3–4.]¹³

O loo i ai ia i tatou nisi ua mananao e o i le malumalu ina ua faatoa maea ona papatiso. Ua leva ona i ai lenei tulafono tumau… e faapea e tatau ona le itiiti ifo i se tausaga. …O le mafuaaga o le matou fai atu ia le itiiti ifo ma se tausaga o le faamoemoe lea ia faatalanoaina lelei e epikopo ma peresitene o siteki ia mautinoa ua lava se taimi ua latou i ai i le Ekalesia e malamalama lelei ai i muai mataupu faavae o le Ekalesia, ma ua latou iloa aoaoga faavae o le Ekalesia ae tatou te lei faamoemoe ia latou malamalama i sauniga maualuluga, o sauniga ia o le malumalu. O fesili la mo i latou o loo o atu i le malumalu ia le gata mo le agavaa ae faapea foi le saunia e maua sauniga o le malumalu.¹⁴

O le mauaina o faaeega paia e manaomia ai le taliaina o matafaioi e ala i feagaiga,, i se tulaga moni lava o le faatinoina lea po o le tatalaina o feagaiga ia e tatau i tagata taitoatasi ona tauaveina i le taimi o le papatisoga, e pei ona faamalamalama mai e le perofeta o Alema “ua outou fia o mai i le lafu mamoe a le Atua, ma ia ta’ua o lona nuu, ma ua loto ina fesui i a outou avega e ave ina ia mama ai; Ioe, ma ua loto ina faanoanoa faatasi ma e faanoanoa; ioe, ma faamafanafana i e ua tatau i ai le faamafanafanaga, ma laulaututu e fai ma molimau a le Atua i aso uma, ma mea uma, atoa ma nuu uma tou te i ai e oo lava i le oti” (Mosaea 18:8–9). Soo se [tagata] ua saunia e maua na tautinoga e pei ona faailoa mai e Alema ma “faamaualalo i latou lava i luma o le Atua. …ma o mai ma le loto momomo ma le agaga salamo,… ma ua loto malilie e ave i o latou luga le suafa o Iesu Keriso, ma naunautai e auauna atu ia te ia e oo i le iuga” (MFF 20:37), e le manaomia lo latou faatuai e o atu i se malumalu paia ma mauaina ai, e tusa ai ma feagaiga ua latou osia, folafolaga o faamanuiaga silisili ia e faalagolago i le tausiaina o na feagaiga,.¹⁵

E tatau faapefea ona saunia i tatou [e o mai i le malumalu]? Sa tusia e se vane faatagata i luga o faitotoa o le Malumalu i Cardston Alberta, se tautinoga ma se manatu na tusia e Elder Orson F. Whitney e ao ona tatou manatua pea. Sa ia tusia:

Sa maua e Peresitene Iosefa F. Samita le uiga o lena atoatoa ina ua ia saunoa mai: “E le faigofie i tagata ona tuu ese o latou moomooga soona fai, ina ia faatoilalo ai o latou lagona faivavale, ma tuuina atu i latou lava ma o latou loto ma agaga atoatoa i le finagalo o le Atua lea e maualuga atu nai lo i latou e lē aunoa… Pe afai e iloa e alii ma tamaitai o loo latou agai atu i le loloto o le vai ma iu ai ina le saogalemu le mea e tutu ai, e ao ona latou toe foi, aua e mautinoa o le ala o loo latou ui ai o le a taitai ese ai i latou ma aveese mamao mai ai mai le ala sao ma o le a le faigofie ona toe maua. O le talitonuga o le agaga, o le fesootaiga masani e ao ona tatou faia ma le Atua, o le tulaga maualuga o le puipuiga saogalemu o le Au Paia o Aso e Gata Ai.” (Gospel Doctrine, p. 9.) …

O lenei, faatasi ai ma lena mafaufauga loloto … ua ou lagona ai ou te fia tuuina atu lau molimau ia te outou e ala i se mea sa tupu. Na o le fa vaiaso talu ai i itula sesegi o le taeao sa ou faia ai se miti matagofie tele. I lena miti sa foliga mai ai sa ou i ai i le faapotopotoga a le usoga ma sa aoaoina ai e le Peresitene o le Ekalesia, ma a o i ai ma isi i lena potopotoga, sa foliga mai o mea uma lava sa ia saunoa i ai e faatatau lava mo au, … Sa toe oo mai lena miti ia te au i le asō—-sa toe foi mai ia te au ma le manino ma sa lofituina ai au, ma o le savali lenei: “Afai e te manao e te aoao e alofa i le Atua, e tatau ona e aoao e alofa i Lana fanau ma fiafia e auauna atu i Lana fanau. E leai se tasi e alofa i le Atua sei vagana ua fiafia e tautua pe auauna atu, ma sei iloga e alofa i le fanau a lo tatou Tama Faalelagi.”

Ma sa foliga mai ina ua uma ona aoaoina mai lena lesona e le Peresitene, sa matua mamafa i lou mafaufau, sa ia faapea mai, “Uso e, tatou tootutuli i le tatalo.” Ma sa ou ala ina ua uma ona ia tatalo, ma le lagona sili faalelagi faatoa oo ia te au, ma mafaufau pe mafai ona ou faaauau seia mafai ona ou taunuu i le tulaga maualuga o le fiafia e tautua ma auauna atu ma le alofa mo le fanau a le Alii lea sa faamamafaina [i ou luga] i lena lava miti.¹⁶

Faafetai i le Atua mo le faaaliga e ala mai i le mana o le Agaga Paia, lea na te molimauina i lo’u agaga ua ou iloa ma lo’u loto atoa o loo soifua [le Alii], ma o Ia o le Faaola o le lalolagi. Ou te iloa o le [malumalu] o se nofoaga paia ua faapaiaina, e mafai ai ona Ia tuuina i ai Lona ao ona o le paia. Talosia ia outou e o mai iinei, ia o mai ma loto ua faapaiaina, ma mata ma mafaufau ma loto ua tasi i le Atua ina ia outou lagona ai Lona faatasi mai.¹⁷