Faatomuaga
O Harold B. Lee, o le Peresitene lona sefulutasi o le Ekalesia ma e sili atu i le tolusefulu tausaga o avea ma Aposetolo, sa ia molimau faamaualalo ma se loto ua faatumulia, “O loo soifua le Atua, o Iesu o le Togiola o le lalolagi”1 Faatasi ma se molimau maumaututu i tausaga o auaunaga, na ia faapea mai ai, “O la’u tatalo faamaulalo ia maua e tagata uma i mea uma le malamalama atoatoa e uiga i le taua o le togiola a le Faaola mo tagata uma, o le na tuuina mai ia i tatou le ata o le Faaolataga, o lē o le a taitai i tatou i le Ola e Faavavau, i le afioaga e afifio ai Le Atua ma Keriso.”2
O le malaga toe foi i lo tatou Tama o i le lagi sa avea ma se vaaiga tutotonu o aoaoga a Peresitene Lee i tagata o le Ekalesia. Na ia apoapoai malosi i fanau taitoatasi a le Tama Faalelagi ina ia “maua e ia lava se molimau le faamaluelueina lea o le a tumau ai ona vae i luga o le ala lea e taitaiina moni atu i le sini faaeaina o le tino ola pea ma le ola e faavavau.”3
“O le savali sili ona taua e mafai ona ou tuuina atu ia te outou ma le lalolagi atoa o le tausia lea o poloaiga a le Atua,” ua faapea mai ai Peresitene Lee, “aua o le ala lea e mafai ai ona faaagavaaina outou e maua le taitaiga faalelagi a o e nofo ai i lenei lalolagi, ma i le lalolagi a sau, ia saunia e fetaiai ma lo outou Togiola ma maua lo outou faaeaga i le afioaga o le Tama ma le Alo”4
Ua faatuina e le Au Peresitene Sili ma le Korama a le Au Aposetolo e Toasefululua le faasologa o Aoaoga a Peresitene o le Ekalesia e fesoasoani i tagata o le Ekalesia ia faalolotoina lo latou malamalama i mataupu faavae o le talalelei ma faalatalata atili ai ia Iesu Keriso e ala i aoaoga a perofeta i lenei tisipenisione. O lenei tusi o loo faalauiloaina ai aoaoga a Peresitene Harold B. Lee, o lē na saunoa mai:
“O tulafono a le Atua na aumaia i tagata o loo aofia ai i totonu o le fuafuaga o le talalelei, ma o le Ekalesia a Iesu Keriso ua i ai le matafaioi mo le aoaoina atu o nei tulafono i le lalolagi.”5
“Ia mumu i totonu o o outou agaga na aoaoga o le a faatumauina ai e le aunoa lou tepa taulai atu i le sini e faavavau ina ia le iuvale ai lau faigamalaga i le olaga nei, ina ia saunia oe, pe puupuu pe umi lou soifua, pe a oo mai le aso e te ulu ai i le afioaga o Le o loo e umia lona suafa i le avea ai o oe ma se tagata o le Ekalesia a Iesu Keriso i nei aso e gata ai.”6
O mataupu taitasi o lenei tusi o loo aofia ai ni vaega se fa: (1) o se fesili o loo aumaia ai se otootoga o le autu o le mataupu; (2) O le “Faatomuaga,” o loo faaalia ai le savali o le mataupu ma se tala poo se fautuaga mai le susuga a Peresitene Lee; (3) “O Aoaoga a Harold B. Lee,” o loo tuuina atu ai aoaoga faavae taua mai le tele o ana savali ma saunoaga; ma le (4) “Fautuaga mo Suesuega ma Talanoaga,” o loo uuna’ia ai iloiloga ma suesuega a le tagata lava ia, o nisi talanoaga faaopoopo, ma le faaaogaina po o le faatatauina i o tatou olaga e ala i fesili.
E Faapefea ona Faaaoga Lenei Tusi
Mo suesuega a le tagata lava ia poo suesuega faaleaiga. Ua faamoemoe lenei tusi e faalautele ai le malamalama o tagata taitasi e uiga i mataupu faavae o le talalelei na aoaoina malosi mai e Peresitene Harold B. Lee. O le faitauina ma le agaga tatalo ma le suesue loloto i ai, o le a maua ai e tagata taitoatasi sana lava molimau i nei mea moni. O le a faaopoopo atu foi lenei lomiga i le potutusi faaletalalelei a tagata o le ekalesia, ma o le a avea o se punavai taua o faamatalaga mo aoaoga faaleaiga ma suesuega i le fale.
Mo talanoaga i le vasega i Aso Sa. O lenei tusi e mo le Korama a le Perisitua Mekisateko ma le Aualofa i vasega i Aso Sa. Na aoao mai Elder Dallin H. Oaks o tusi o loo i le faasologa o Aoaoga a Peresitene o le Ekalesia “o loo maua ai aoaoga ma mataupu faavae. E tamaoaiga ma talafeagai lelei ma o tatou manaoga i nei aso ma e matua maoa’e mo le aoaoina atu ma mo talanoaga fetufaai.” E tatau i faiaoga ona taula’i atu i le aano o le mataupu ma mau e faasino i ai. E pei ona faamalamalamaina mai e Elder Oaks, “E lei valaauina se faiaoga o le talalelei na te filifilia le mataupu o le lesona, ae ia aoao atu ma talanoaina mea ua faatonuina.”7
E tatau i faiaoga ona aumai ni fesili o loo i le faaiuga o le mataupu e uunaia ai le talanoaga a le vasega. O le faitauina o fesili ae lei amataina le suesueina o saunoaga a Peresitene Lee e mafai ona aumaia ai se vaaiga loloto faaopoopo i ana aoaoga.
E ao ona taulai atu vasega o le Aso Sa i mataupu faavae o le talalelei, o faataitaiga faaletagata patino e aoao atu ai nei mataupu, ma molimau o le upumoni. Pe a sailia ma le lotomaualalo e faiaoga le Agaga i le sauniuniga ma le taitaiina o le lesona, o i latou uma lava e auai o le a faamalolosia lo latou malamalama i le upumoni. E tatau i taitai ma faiaoga ona uunaia tagata o le vasega e faitau i mataupu ae lei talanoaina i le vasega i le Aso Sa. E tatau ona latou faamanatu atu i tagata o le vasega e aumai a latou tusi i a latou vasega ma e tatau ona aloaia sauniuniga a tagata o le vasega e ala i le aoao atu mai i saunoaga a Peresitene Harold B. Lee. Pe a faitauina e tagata o le vasega mataupu ae lei oo i le aso Sa, o le a saunia ai tagata e fea’oa’oai ma faamalamalamaina e le tasi le isi.
E le tau manaomia le toe faatau e tagata o ni tusi faaopoopo o faamatalaga ma tusi e maua mai ai faamatalaga e lagolago ai mataupu ua i ai i le tusi. Ua uuna’ia tagata e liliu atu i tusitusiga paia po o mau ua fautuaina atu mo le suesueina atili o le aoaoga faavae.
Talu ai o lenei tusi ua fuafuaina mo suesuega a le tagata lava ia ma o loo maua mai ai faamatalaga faaletalalelei, e tele mataupu ua uumi tele mo le aoaoina atoa i le vasega i le Aso Sa. O le mea lea, e taua ai lava le suesue i le aiga ina ia maua ai le atoaga o aoaoga a Peresitene Lee.
Na silafia e lenei perofeta a le Atua le ala e toe foi atu ai i lo tatou Tama o i le Lagi ma sa ia tuuina atu le faasino ala ia i latou uma o e faalogo. “Afai e te faalogo ma faia mea ua e faalogo i ai, o le a taitaiina oe i lena nofoaga mamalu ua faaigoaina e le na o le fiafia ae o le olioli foi. O le olioli o lona uiga ua e ola i se olaga ua e saunia e ulu atu ai i le afioaga o le Alii.”8