O Aafiaga Amiotonu o Tina

E i ai i totonu o le fafine le mana o le foafoaga e tuufaatasi ma lana tane faatagaina faaletulafono iinei, ma afai e faamauina i se faaipoipoga faa-selesitila, o le a mafai ona ia maua ni fanau i le lalolagi a sau. O le fafine o le fatuaiga i lona lava aiga ma o se faaa’oa’o i lana fanau i augatupulaga o le a suitulaga ia te ia. O le fafine o se fesoasoani i lana tane ma e mafai ona tuuina atu ia te ia le atoatoa sili nai lo o le tane. O aafiaga o le fafine e mafai ona faamanuiaina ai se afioaga po o se atunuu e oo i le tulaga ua ia atinaeina ai lona mana faaleagaga e o gatasi ma meaalofa faalelagi ua faapaiaina ai o ia i le natura. … I tausaga uma o lona olaga, e mafai ona faalauteleina ona aafiaga lēgaoia ma le mama ina ia e mautinoa o le a fiafia lana fanau i avanoa e atinae ai i le atoatoa o o latou malosiaga faaleagaga ma natura faaletino.⁴

O tina o ni foafoa o le siosiomaga i totonu o le aiga ma faia mea e tele e faatu ai le faavae malosi mo o latou atalii ma afafine, e tuuina atu ia te i latou le malosi pe a tuua aafiaga o o latou aiga.⁵

Tina, ia e nofo i le fetaulaiga ala o le aiga. I se taimi ua tuanai atu, sa ou auai i se konafesi faalekuata a le siteki. … Sa ou faapea atu i le peresitene o le Siteki, … “O i ai ni tina iinei, o se tina ua matua, o se tasi o i ai ia te ia se aiga toatele ma e i ai le olioli e vaaia i latou taitoatasi o faaipoipo i totonu o le malumalu?”

Sa ia tilotilo atu i le aofia ma ia faapea mai, “Lelei, o tuafafine (o le a ou faaigoaina ia Tuafafine Sione), na i ai ia te ia se aiga e toasefulutasi, ma ua faaipoipo i latou uma lava i le malumalu”. …

Ma ao tu lenei tina lalelei laulu sinasina i ou tafatafa, sa ou fai atu, “E mafai ona e faamatala mai ou aafiaga, ma pe o le a le mea na e faia ina ia ausia ai lenei tulaga matagofie ua faataunuuina?”

Ma sa ia tali mai, … “E mafai ona ou tuuina atu ni manatu se lua. O le mea muamua lava, ao tuputupu ae lo matou aiga, sa masani lava ona ou i ai i le fetaulaiga ala o lou aiga ao o mai ma o ese atu lau fanau mai le aiga. Ma lona lua: soo se mea matou te faia e fai faatasi o se aiga. Matou te taaalo faatasi, matou te tatalo faatasi, matou te galulue faatasi, matou te faia faatasi mea uma. Ou te matea ua na o le pau na o mea e mafai ona ou mafaufau i ai.”

Sa ou faapea atu ia te ia, “O lea ua e aoao mai ni lauga sili se lua.”⁶

Ia tuu le tina o lou aiga i le “fetaulaiga ala” o le aiga. O loo i ai se tulaga faigata tele i aso nei i aiga ua malepelepe ona o faatosinaga ua tosina ai tina ia lē i ai i le fale ao omai pe o ese atu tagata o le aiga mai le fale. O lea, ua ou iloa e tatau i nisi tina ona saili ni mea taumafa mo o latou aiga. Ae ui lava i lea, o Peresitene o Aualofa ma Epikopo e tatau ona faaeteete ina nei tei ua latou faatamala i le ofoina atu o fesoasoani uma e tatau ai mo le tina o fanau laiti ma fesoasoani ia te ia, pe a tatau ai, i le fuafuaina o natura o galuega poo le faatulagaina o taimi. O lenei mea atoa o loo taoto i totonu o le eria a le Aualofa o loo galulue ma le aiga.⁷

O le taimi nei, ou te lagona, ua aafia fua tina i le televave naua o le olaga faaona po nei. O le atiinaae o o latou tulaga lelei faatina, ma le mafutaga vavalalata ma a latou fanau, e mafai ai ona latou vave iloa faailoga o faafitauli, o faigata ma mala, ma foia ai loa lava ina ia le oo ai i ni tulaga pagatia.⁸

Sa ou toe faitau i le isi aso i upu a le tina paia o le Perofeta o Iosefa i le po a o agai atu e aumai papatusi. Sei ou faitauina atu ana tusitusiga:

“O le po o le [aso 2 o Setema ] sa umi ona ou ala. … ou te lei moe seia tea le sefululua i le po. Pe o le ta o le sefululua sa sau ai Iosefa ma fesili mai ia te au pe e i ai sau pusa lavalava e i ai se loka ma se ki. Sa ou iloa vave lava le mea sa ia manao e faaoga iai, ma ona o le leai o se mea sa ou popole tele ai, ao ou mafaufau o se mea e ono taua tele. Ae peitai, sa iloa e Iosefa lou atuatuvale, ma faapea mai, ‘Aua le popole, e mafai lava ona lelei mea uma mo le taimi nei e aunoa ma lea mea—ia filemu—o lo’o lelei mea uma.’

“Mulimuli ane, sa pasi ifo le toalua o Iosefa i le potu ma lona pulou ma ona lavalava tietie solofanua, ma i nai minute sa la’ua o ese atu loa faatasi, i le solofanua ma le taavaletoso a le Susuga a Knight. Sa alu le po o o’u tatalo ma ole atu i le Atua, aua ua le mafai ona ou moe ona o lo’u popole. … ” [Lucy Mack Smith, History of Joseph Smith, ed. Preston Nibley (1958), 102.]

Ou te fai atu ia te outou tina, afai e i ai ni o outou atalii ma afafine pe a tuufaatasi i le tulaga e tatau ona latou i ai i le lalolagi, o le a lē o se galuega itiiti, aua ua i ai i lau fanau se tina na te faaaluina le tele o po i ona tulivae i le tatalo, e tatalo i le Atua ina ia lē toilalo lona atalii, po o lona afafine. Ou te manatua i taimi o le valea o lou olaga talavou, e sau ia te au lou tina ma se lagona mai le loto ma se lapataiga ae ou te lē ano i ai e pei lava ona faia e talavou vaivai. “Oi, tina, e valea lena manatu,” Ou te fai atu, e le i atoa se masina, ae feagai loa ma le tofotofoga e uiga i le mea sa lapatai mai ai tina. Ou te le i mauaina lava se lototoa e toe foi atu ai ia tina e ta’u i ai lona sa’olele, ae peitai sa puipuia au aua sa lapataia au e se tagata—o lo’u lava tina.⁹

O lo matou aiga sa aofia ai lo’u tinamatua, o lo’u tina, ma le toalua pe toatolu o le fanau laiti sa nonofo i luma o se faitotoa sa matala, ma matamata i le faaaliga o galuega matautia faanatura a o matamataita mai le agi o le afa ma faititili i tafatafa o mauga sa tu ai lo matou fale. O le emo faalausosoo o le uila ma le pa leotele faafuasei o le faititili na iloa ai e matua latalata mai lava le emo o le uila.

Sa ou tu i le faitotoa ae faafuasei loa ona tulei malosi au e lo’u tina ma ou pau taliaga ese atu ai mai le faitotoa. I le taimi lava lena, sa oo mai ai ma se pulu uila mai le alaasu o le ogaumu o le umukuka, ma alu atu ai i fafo i le faitotoa sa matala, ma tosiluaina ai se vete mai luga e tau mai i lalo o se laau tele i luma o le fale. Ana ou tu i le faitotoa na matala, semanu ou te le o tusiaina lenei tala i le aso.

E le mafai e lo’u tina ona ia faamatalaina lana faaiuga faafuasei. Pau le mea ou te iloa na faasaoina lo’u ola ona o lana gaoioiga mata’alia ma le musuia.

I tausaga mulimuli ane ai, pe a ou vaai i le ma’ila tele i luga o lena laau tele i le matou fale tuai, e na o le loto faafetai lava e mafai ai ona ou faapea atu: Faafetai i le Alii mo lena meaalofa taua o loo umia i se tulaga faateleina e lo’u lava tina ma le toatele o isi tina faamaoni, o i latou ia e mafai ai ona latalata mai le lagi i taimi e manaomia ai le fesoasoani.¹⁰

O le fatu o se tina o se faleaoga a se tamaitiiti. O faatonuga e maua e fanau mai i o latou tina, ma lesona faamatua faatasi ma le matau i le Atua ma manatunatuga suamalie o faeasaite, e le mafai ona tineia mai le agaga.

Sa faapea mai se tasi o le faleaoga e aupito sili ona lelei mo le amio pulea lelei, o le aiga, aua o le olaga faaleaiga o le ala lava lea a le Atua e aoaoina ai fanau laiti, ma o aiga e faalagolago tele i mea e faia e tina.¹¹

O le a la le tiutetauave o le tina, i le galuega tele o le malo? O lona tiutetauave muamua ma le sili ona taua o le manatua lea o aoaoga a le talalelei i totonu o le aiga.¹²

[Ou te fia agai i le] tulaga o se tina i le aoaoina o lona aiga. … Sa fetalai le Alii:

“A e peitai faauta, ou te fai atu ia te outou, na togiolaina tamaiti mai le faavaeina o le lalolagi i lou Atalii e Toatasi na ou fanaua;

“O le mea lea, e le mafai ai ona agasala i latou, aua e lei tuuina atu le mana ia Satani e faaosooso i tamaiti, vagana ona ua amata ona tatau ia te au ona sueina a latou amio i ou luma;

Aua ua tuuina atu ia te i latou e tusa i lou loto, e tusa i lau lava filifiliga, ina ia sueina mea sili mai i o latou tama.” (MFF 29:46–48.)

… O a na mea sili o loo sueina mai e le Atua i tama o fanau (o lona uiga, e aofia ai ma tina) i lenei vaitaimi a o le i amata ona sueina amio a fanau laiti i luma o le Alii? … Na faatonuina matua ina ia papatisoina a latou fanau pe a valu tausaga le matutua ma ia aoao i latou i mataupu faavae o le talalelei. O a latou fanau o le a papatisoina mo le faamagaloina o a latou agasala ma maua ai lea o le faaeega o lima. E ao ona aoaoina i latou e tatalo ma savavali tonu i luma o le Alii.

E maoae ni faatinoga o loo manaomia mai tama ma tina ao lei i ai ia Satani le mana e faaosooso ai tamaiti laiti. O le matafaioi lava a matua o le faataatia o se faavae mautu e ala i le aoaoina atu i ai o tulaga faatonuina faaleEkalesia e ala i faaaoaoga ma mataupu.

Mo tuafafine, o le uiga o lenei mea, e tatau ona latou faia o se galuega le tulaga faatina. E le tatau ona latou faatagaina soo se mea ia sili atu i lenei galuega.¹³

Talu ai nei sa ou tau ai i se tautalaga sa tuuina atu e se tasi o ou afafine i se faapotopotoga o tina ma fanau teine. Sa ia faamatalaina se mea na oo i ai i lana tama ulumatua, o le sa amata ona aoaoina o ia i tiutetauave e tatau ona ia faia o se tina. Sa ia faapea, “I ni tausaga se tele talu ai, ina o laitiiti la’u tama tama matua, sa ou pisi lava i se tasi po o le taumafanafana ina ua uma aiga o le afiafi, e faauma ona utu fagu ni fualaau aina suamalie.” Ou te mautinoa e mafai ona vaai faalemafaufau outou na tina talavou i lena vaaiga. O mea uma lava e tutupu i lena aso ina ia taofia mai ai oe mai le faamaeaina o lena galuega ae e te manao e faauma. O lenei la ua filemu le pepe mo le po ma ua malaga lou toalua i lana fono i le taimi atofaina, o lau fanau e tolu ma le fa tausaga le matutua ua toeitiiti uma le faiga o la ofu moe ma ua sauni e momoe. Ona e mafaufau ifo lea ia te oe lava, “Ia, o lea la o le a ou oo atu loa i na fualaau aina.”

[Sa faaauau le tala a lo’u afafine:] “O le tulaga lea sa maua ai au i lena po ao amata ona fofoe fualaau aina, ae tutu mai la’u fanau tama laiti e toalua ma faailoa mai ua sauni e faia a laua tatalo.” Ae peitai, ona o le lē manao e faalavelave atu, sa ia faapea vave atu ai i lana fanau tama, “‘Ia, ae a pe a oulua tamomoe i totonu e fai a oulua tatalo na o oulua ae galue atu Tina i le faiga o fualaau aina nei?’ Sa tatu vae laiti o Tavita, le ulumatua i ou luma ma fesili mai, ae le o ita, ‘Ae, Tina, o le fea le mea e sili ona taua, o le tatalo po o le fualaau aina?” Ou te le i iloa i lena taimi, i le avea ai ma se tina talavou ma se ava e pisi, o le a tele ni tulaga faigata i lo’u olaga i le lumanai a o ou tauaveina lenei matafaioi o se ava ma se tina i lo’u aiga.”

O le luitau lena o loo ia te outou o tina pe a faatauanau outou e fanau laiti e tutu atu ma fesoasoani i lo latou tuputupu ae. …

Tina, pe a amata ona fesiligia outou e a outou fanau i ni fesili, tusa lava pe faatatau i mea tuga o le olaga, aua nei tutuli esea pe faatuatuanai ia i latou. Faaalu se taimi e faamalamalama ai i o latou mafaufau faatamaiti, a o latou tuputupu ae, ma le taimi ua matutua o latou mafaufau. O se tina manumalo o se tasi lea e le mafai ona fiu i ona atalii ma afafine pe a o mai ma fetufaa’i mai ia te ia lo latou olioli ma o latou faanoanoaga.¹⁴

Ou te tatalo ina ia i ai faamanuiaga a le Alii i luga o outou [ou tuafafine pele]. O loo ia te outou se mana sili atu mo le tulaga sologa lelei o lenei Ekalesia nai lo se manatu o ia te outou. Pe faapefea ona faataunuuina a outou matafaioi o le avea ai ma tina, o le a fuafua tele i ai le agai i luma o le Ekalesia. Ia fesoasoani le Alii ia te outou ia faia ma fausia i luga o se faavae mautu o le aiga, o lau tatalo faamaualalo lea, ma e tuuina atu lau molimau faamaualalo o totonu o le Ekalesia a Iesu Keriso e maua ai aoaoga ma fuafuaga e mafai ai ona malu puipuia ma saogalemu le aiga, ma ou te tuuina atu ai lena molimau i le suafa o Iesu Keriso.¹⁵