“I Teankoma sy i Môrônia,” Tantara ao amin’ny Bokin’i Môrmôna (2023)
I Teankoma sy i Môrônia
Maneho herim-po lehibe
Rehefa maty i Amalikià dia lasa mpanjaka Lamanita i Amôrôna rahalahiny. Nanohy niady tamin’ny Nefita i Amôrôna. Naharitra taona maro ny ady. Nanomboka nandresy ny Nefita, ka nandositra nankany amin’ny tanàna iray ny miaramila Lamanita rehetra. Nandeha nanaraka ny Lamanita niaraka tamin’ny miaramilany i Môrônia sy i Teankoma ary ny kapiteny Nefita iray hafa.
Almà 52:3–4; 54:16–24; 62:12–35
Tezitra i Teankoma fa i Amalikià sy i Amôrôna no nahatonga ity ady lehibe sy lava ity. Noho ny ady dia maro ny olona maty ary zara raha nisy sakafo. Naniry ny hamarana ny ady i Teankoma. Niditra tao an-tanàna izy tamin’ny alina mba hitady an’i Amôrôna.
Nananika ny mandan’ny tanàna i Teankoma. Nandeha nitety toerana tao an-tanàna izy mandra-pahitany ny toerana natorian’i Amôrôna.
Notorahan’i Teankoma tamin’ny lefona i Amôrôna. Nahavoa azy teo akaikin’ny fony izany. Saingy namoha ny mpanompony i Amôrôna talohan’ny nahafatesany.
Nanenjika an’i Teankoma ny mpanompon’i Amôrôna ary namono azy. Nalahelo mafy ireo mpitarika Nefita hafa rehefa maty i Teankoma. Niady tamin-kerim-po ho an’ny fahafahan’ny vahoakany izy.
Na dia maty aza izy dia nanampy ny Nefita handresy ny ady i Teankoma. Nataony izay tsy hananan’ny Lamanita mpitarika intsony. Ny ampitso marainan’io dia niady tamin’ny Lamanita i Môrônia ary nandresy. Nandao ny tanin’ny Nefita ny Lamanita, ary nifarana ny ady.
Nilamina ihany ny farany. Niasa mafy i Môrônia mba hahatonga ny tanin’ny Nefita ho voaro kokoa amin’ny Lamanita. Avy eo dia nody i Môrônia ka niaina tamim-piadanana. Nampianatra ny filazantsara sy nitarika ny Fiangonan’ Andriamanitra ny mpaminany. Nitoky ny Tompo ny olona, dia notahiany izy ireo.