ʻOkú ke Lea Faka-Lūsia?

Neongo ʻema fuʻu femoʻuekiná, ka naʻá ku loto mo hoku husepāniti ko Tanielá ke ma toe ʻaʻahi ki he Temipale Pelesitoni ʻIngilaní kimuʻa pea ʻosi e 2009. ʻE fai ʻe ʻalú ʻi ha pasi ʻe ua pea meimei houa ʻe ono ke aʻu ki he temipalé mei he kiʻi kolo siʻisiʻi ʻi Sikotilani ʻokú ma nofo aí.

Naʻe ʻaoʻaofia pea ʻuhoʻuha e pongipongi naʻá ma palani ki aí, ka naʻá ma fiefia pē ke ʻalu ki he temipalé. ʻI heʻema tali ko ia he houa makehe ʻe taha ke maʻu e pasi hono ua ki he feituʻu ʻe fai ai e ʻalú, naʻe kamata ke ʻuha lahi pea toe momoko foki.

Neongo iá naʻe fakamāfanaʻi homa lotó ʻe he ʻamanaki ko ia ʻe vavé ni pē haʻama ʻi he temipalé. ʻI heʻema aʻu atu ki Pelesitoní, naʻe ongo mālohi mai ke ma ʻalu he taimi pē ko iá ki he temipalé. Naʻá ma fiekaia pea pīpīponu, ka naʻá ma talangofua ki he Laumālie Māʻoniʻoní.

ʻI heʻema aʻu atu ki he temipalé naʻe kole mai ha tokotaha ngāue anga fakakaumeʻa ke sio ki heʻema lekomení. Naʻá ne toʻo hono matasioʻatá pea toe sio ki he hingoa heʻema lekomení.

Naʻá ne ofo mo ʻeke mai, “Ko hoʻomo haʻú mei Lūsia?”

Naʻá ma tali atu, “ʻIo,” peá ma ʻohovale heʻene talí.

Naʻá ne ʻeke mai, “ʻA ia ʻokú mo poto he lea faka-Lūsiá?”

Naʻá ma tali atu, “ʻIo.”

Naʻá ne toʻo hake leva e telefoní pea tā ki ha tokotaha.

Taimi siʻi pē kuo aʻu mai e palesiteni temipalé. Naʻe lava pē ke ma tala mei hono matasioʻatá, naʻá ne tangi. Naʻá ne pehē mai mo ʻene malimalí, “Ko ha ongo ʻāngelo kimoua naʻe ʻomi mei he ʻOtuá!” pea kole mai ke ma muimui ange ʻiate ia. Naʻá ma muimui atu ʻiate ia peá ma sio atu ki ha faifekau kei talavou puputuʻu ʻoku tuʻu takai ai e kau ngāue temipalé.

Ta ko e faifekau ʻeni mei ʻAmēnia pea ʻoku lea faka-Lūsia. Naʻe ui ia ke ngāue ʻi he Misiona ʻIngilani Lonitoní ka ʻoku teʻeki ai ke poto he lea faka-Pilitāniá. Naʻe ʻikai pē ha tokotaha ia ʻe poto he lea faka-Lūsiá ʻi he senitā akoʻanga fakafaifekaú ʻa ia ʻoku tuʻu pē ʻo hanga mai ki he temipalé. Ko e ʻaho ia naʻe totonu ke maʻu ai hono ʻenitaumení, ka naʻe ʻikai ke lava e kau ngāue temipalé ʻo fetuʻutaki mo ia—kae ʻoua kuo toki aʻu atu e ongo mātuʻa Lūsia kuo pīpīponu-moʻoní.

Naʻe kole leva kia Taniela he taimi pē ko iá ke fakafeʻao ki he faifekau kei talavoú. Naʻe fiefia lahi e faifekaú peá ne talamai naʻá ne ongoʻi ha laumālie makehe he taimi naʻá ma aʻu ange aí.

ʻOku ou fakamālō neongo ʻema femoʻuekiná mo e ʻuha lahí, ka naʻá ku loto mo hoku husepānití ke ʻalu ki he temipalé he ʻaho ko iá ke lava ai ke ma tokoni ki ha foha ʻo e ʻOtuá ʻoku lea faka-Lūsia naʻe ʻi Pilitānia Lahi. ʻOku ou fakamālō ki he ngaahi tāpuaki ʻo e temipalé, ʻa ia ʻokú ne fakafiefiaʻi ʻema moʻuí ʻaki ha maama mo ha taumuʻa makehe. ʻOku ou ʻilo kapau te tau talangofua ki he ueʻi ʻa e Laumālie Māʻoniʻoní, te Ne tataki kitautolu ki hotau ʻapi fakalangí—ʻo hangē pē ko ʻEne tataki au mo hoku husepānití ki he fale ʻo e ʻEikí he ʻaho ko iá.