Ne laka hake he kāingalotu ʻe toko 70 ʻo e Siasí ne nau fakatahataha hake ki he falelotu Mekanakiná ʻi ʻAtisi ʻApapā ʻi ʻItiopeá ʻi he ʻaho 1 ʻo ʻOkatopa 2011, ʻi ha houa nai ʻe nima ke fakatahatahaʻi ha ngaahi nāunau fakahaisini ʻe 5,000 maʻa honau kāinga ʻItiopea ne uesia ʻe he laʻalaʻā ʻi he feituʻu Muitolotolo ʻo ʻAfiliká .

Ko e ngāué ko e konga pē ia ʻo e feinga ʻa e Siasí ke tokoniʻi e kakai ʻoku nofo ʻi loto he ngaahi kauʻāfonua ʻo ʻItiopeá.

Kuo fanongonongo ʻe he Potungāue Lakanga Fakataulaʻeiki ʻa e Siasí ʻa e Laipeli Ako Fakatakimuʻá, ko ha fakalahi ki he fakalelei fakamuimuitaha ki he Tohi Tuʻutuʻuni Fika 2: Ko Hono Puleʻi ʻo e Siasí,, ʻa ia ko ha ngaahi vitiō ako nounou kuo tātānaki ke ne fakamahinoʻi e ngaahi tefitoʻi moʻoni ʻoku akoʻi ʻi he tohi lēsoní. ʻOku ala maʻu atu he taimí ni e maʻuʻanga tokoni foʻoú ʻi he leadershiplibrary.lds.org. ʻE maʻu atu ha ngaahi konga ʻo e laipelí ʻi ha lea fakafonua ʻe 11 he taʻú ni.

ʻI ʻOkatopa 2011, naʻe fakamanatu uike taha ai ʻi Silei ʻa e taʻu ʻe 50 ʻo e ngāue fakafaifekau ʻa e Siasí aí.

Naʻe tokangaʻi ʻe kātoanga fakamanatú ʻe he Kau Palesitenisī Fakaʻēlia ʻo Sileí pea nau lea he meʻa naʻe fai ʻi he ʻaho Tokonaki, ko hono 15 ʻo ʻOkatopá, ʻo fakaʻosi ʻaki e ngaahi fakafiefia naʻe faí.

Naʻe omi ha kāingalotu ʻe toko 20,000 nai ki he Falevaʻinga Sanitā Lolá ʻi Sanitiako, ʻa ia naʻe fai ai e ngaahi lea, ngaahi hiva, faiva fakatātā, mo e ngaahi faiva fakafonua ke fakamanatu ʻaki hono tali ʻe he kakai ʻo Sileí e ongoongoleleí pea mo e tupu tokolahi ʻa e Siasí.