Potutusi
Fanau a le Atua

“Fanau a le Atua,” Autu ma Fesili (2023)

Ata
tamaiti ma le Atua

Taiala mo le Suesueina o le Talalelei

Fanau a le Atua

O uiga taua o tagata uma i luga o le fogaeleele

Manatu faapea o loo e feiloai i se tasi mo le taimi muamua ma fai mai, “Tau mai ia te au e uiga ia te oe lava.” O le a sau tala e fai atu? Ioe, e fuafua i le tulaga ma le nofoaga, ae o mea moni e te filifili e faasoa atu e mafai ona tele ni upu e fai atu e uiga i le ala e te vaai ai ia te oe lava—ma le auala e te manao ai i isi e vaai ia te oe.

E i ai se mea moni e tasi e uiga ia te oe e sili atu ona taua nai lo isi mea uma. Ma e ui atonu e te le aumaia pe a faailoa atu oe lava, ae e sili atu ona taua i lou faasinomaga nai lo lou igoa, lou nuu, po o ou manaoga patino. O lena mea moni a’ia’i o le avea ai o oe o se atalii/afafine o le Atua. O Ia o lou Tama. E pei lava ona i ai ni ou matua i le lalolagi na e maua mai ai ni uiga faaletino, o oe foi “o se atalii po o se afafine agaga faapelepele a ni matua faalelagi, ma, e pei ona i ai, [ua ia te oe] se natura paia ma se taunuuga.”1 E mafai faapefea e lenei malamalama ona aafia ai le ala e te vaai ai ia te oe lava? E mafai faapefea ona suia ai lou taulimaina o luitau ma avanoa o le olaga?

O le a le Uiga o le Avea ma Atalii/Afafine o le Atua?

O tagata soifua uma o atalii ma afafine o se Tama oi le Lagi alofa. I le avea ai ma se alo moni o le Atua, na fanaua faaleagaga i le muai olaga, ua tofu tagata taitoatasi ma se gafatia paia ma faavavau (tagai Roma 8:16–17).

Vaaiga aoao i autu: Fanau Agaga a Matua Faalelagi

Taiala fesootai mo le suesueina o le talalelei: O Le Atua le Tama, Fuafuaga o le Faaolataga, Muai Olaga

Vaega 1

O le Atua ua Le Na o So Outou Foafoa; O Ia o Lou Tama

Ata
aiga laufofoga ataata

E tofu tagata uma ma se tamā faalelalolagi, ma e leai se tasi o na tamā e atoatoa. Ae ui i lea, e tusa lava po o a o tatou aafiaga i tamā ma tulaga faatamā i le lalolagi, ua ia i tatou foi se Tama Faalelagi o ia o mea uma e tatau ona i ai i se tamā—alofa, lagolagosua, atamai, le manatu faapito, tuuto atu i lou manuia. O le Tagata e sili ona mamana ma mamalu i le atulaulau e alofa ia te oe o Lona atalii/afafine faapelepele. E malamalama atoatoa o Ia ia te oe ma silafia le mea tonu e tatau ona e tuputupu ae ai, alualu i luma, ma maua le olioli e faavavau. O faalagiga e pei o le “Silisiliese,” “Foafoa,” ma le “Tupu Silisili ese” e faatatau moni lava ia te Ia. Ae, e sili atu i lo isi mea uma, e finagalo o Ia ia e iloa o Ia o le “Tama.”

Mea e mafaufau i ai

  • Sa aoaoina e Mose i se faaaliga faalelagi o ia o se atalii o le Atua. Faitau e uiga i lona aafiaga i le Mose 1:1–11. Ia matau foi i fuaiupu 12–18 le ala na fesoasoani ai lenei malamalama ia Mose ina ua taumafai Satani e faaosooso o ia. Mafaufau loloto pe mafai faapefea e le manatuaina o oe o se atalii/afafine o le Atua ona fesoasoani ia te oe i taimi o faaosoosoga.

  • Sa faamatala e Elder Brian K. Taylor se tala e uiga i se tamaitai talavou na fai mai, “O le iloaina o au o se afafine o le Atua o le malamalama aupito sili lea ona mamana o loo ia te au!” Faitau e uiga ia te ia i le “O A’u ea o se Afafine o le Atua?”2 e iloa ai pe aisea na ia fai mai ai lena mea. Aisea na faia ai e le iloaina o le Atua lona Tama se eseesega tele i lona olaga? O le a se eseesega na te faia i lou olaga?

  • Pe na e fatuina se ituaiga o galuega taulima po o se galuega o faatufugaga? Pe atonu na e fatuina se mea e pei o se taimi faatulagaina, paketi, po o se meaai. Mafaufau pe faapefea ona ese lou sootaga ma le mea na e fatuina mai le sootaga i le va o se matua ma se tamaitiiti. Mafaufau i lenei mea a o e mafaufau loloto i mau nei: Kalatia 4:6–7; 1 Ioane 3:2. Aisea e taua ai ia te oe le iloa o oe o se afafine po o se atalii—e le na o se foafoaga—a le Atua?

Gaoioiga mo le aoao faatasi ma isi

  • Ina ia aoao atu e uiga i o tatou gafatia o ni fanau a le Atua, mafaufau pe faapefea ona e faapupulaina faapea o matua ma a latou fanau e fefaasoaai i ni uiga faaletino. Atonu e mafai ona e faaali atu ata o matua ma a latou fanau ma vaavaai mo mea e tutusa ai. Ona mafai lea ona e faitauina ni mau e faatatau i uiga o le Tama Faalelagi, e pei o nei:

    O a faamaoniga o nei uiga tatou te vaaia i le tasi ma le isi? E mafai faapefea ona tatou atiina ae atili ma avea atili e faapei o lo tatou Tama oi le Lagi?

Aoao atili

Vaega 2

Taulima Tagata Uma o se Atalii/Afafine o le Atua

Ata
tamaitai o loo talatalanoa

O se mea masani le faalogo atu i tagata O Le Ekalesia a Iesu Keriso o le Au Paia o Aso e Gata Ai o valaau le tasi ma le isi o le “uso” ma le “tuafafine.” E pei ona faamalamalama mai e Peresitene Henry B. Eyring, o nei upu “e le na o ni faafeiloaiga faaleuo po o ni faaupuga alofa mo i tatou. O ni faailoaga o se upumoni e faavavau: O le Atua o le Tama moni lava o tagata uma; o i tatou uma o vaega taitasi o Lona aiga e faavavau.”3 O lenei upumoni faigofie e i ai le mana e suia ai le ala tatou te taulimaina ai le tasi ma le isi. Atonu e ese i tatou i o tatou mafaufauga, faatinoga, ma foliga vaaia faaletino, ae o na eseesega e sili atu ona faigofie ona talisapaia ma faaaloalogia pe a tatou manatua lena mea, i le tautala atu faaleagaga, o i tatou uma lava e aiga.

Mea e mafaufau i ai

  • O loo faamatala mai i le Tusi a Mamona ni vaega se lua o tagata—o sa Nifaē ma sa Lamanā—o e na avea ma fili maoae mo le tele o augatupulaga. Ae sa i ai taimi na faatoilalo ai e nei vaega lo latou inoino ma taulimaina e le tasi le isi e pei o uso ma tuafafine. Faitau e uiga i nei aafiaga i le Mosaea 28:1–3; Alema 26:23–31; 27:20–24; 4 Nifae 1:1–3, 14–18. A o e faitau, mafaufau loloto i mea e mafai ona e faia e fesoasoani ai i le Faaola e aumaia le filemu i le aiga o le Atua.

  • O tagata tou te feiloai i ai atonu o le a le faailoaina atu i latou lava o se atalii/afafine o le Atua, ae e mafai ona e mafaufau ia i latou i lena ala pe a e feiloai ia i latou. Faataitai i ai! Ma soo se taimi lava e faaosoosoina ai oe e mafaufau leaga i se tasi, sui lena manatu i le “O lenei tagata o se atalii/afafine o le Atua.” Matau pe faapefea ona aafia ai ou lagona e uiga i tagata—ma le ala e te taulimaina ai i latou.

Gaoioiga mo le aoao faatasi ma isi

  • Mafaufau e faaali atu ata o tagata mai ituaiga, aganuu, ma talaaga eseese. Talanoa e uiga i le tele o auala e talitutusa ai tagata i le tasi ma le isi. Talanoa pe aisea e finagalo ai le Atua ia i tatou ia faaaloalo e le aunoa ma taulimaina isi ma le agalelei.

Aoao atili