Ala o Faasalalauga

Sa faaaogaina lava e Le Ekalesia a Iesu Keriso o le Au Paia o Aso e Gata Ai tekinolosi fou e tulei ai i luma le galuega a le Alii. E aofia ai ala o faasalalauga e pei o leitio, televise, tifaga, le initoneti, ma aga fesootai o faasalalauga. I le 1974 na valoia ai e Peresitene Spencer W. Kimball faapea o le a fesoasoani tekinolosi e faasalalau ai le talalelei. “O loo naunau le Alii e tuu mai i o tatou lima ni meafaigaluega faaonapo nei tatou te le i vaai muamua lava i ai,” na ia saunoa ai. “Ua saunia nei e lo tatou Tama i le lagi mo i tatou ni olo malolosi---olo o leitio ma televise ma ni avanoa i talaatu o le malamalama---e fesoasoani e faataunuu ai afioga a le Alii e faapea ‘ e ao ona alu atu le leo mai lenei nofoaga i le lalolagi atoa’ [Mataupu Faavae ma Feagaiga 58:64]” (“Pe O le a Liua le Lalolagi,” Ensign, Oct. 1974, 10).

O le alualu i luma i tekinolosi ua aumaia ia i tatou avanoa e faasoa atu ai le talalelei ma oo atu ai i anotusi-fesootai o le talalelei i ala na lei mafai ona manatu i ai tupulaga na muamua atu. Mo se faataitaiga, ua faaaoga e le Ekalesia le initoneti ma ala o faasalalauga faaleagafesootai e faalautele ai le galuega a le Alii i le salafa o le lalolagi. Ua saunia e le saite a le Ekalesia, o le ChurchofJesusChrist.org, mau, aoaoga o taitai, talafou, vitio, ma isi ala o faasalalauga mo i latou uma e fiafia i ai. E i ai faitotoa a taitai o le Ekalesia i ala o faasalalauga faaleagafesootai latou te faasoa atu ai savali faaleagaga ma fesootai ai ma tagata o le Ekalesia ma isi lotu.

Ua uunaia foi e taitai o le Ekalesia i tatou e faaaoga ala o faasalalauga faaleagafesootai e faasoa ai le talalelei i isi. Na saunoa mai Elder David A. Bednar, “O ala o faasalalauga o ni meafaigaluega faavaomalo e mafai ona aoga patino ma lelei i tagata e toatele taitoatasi ma aiga. Ma ou te talitonu ua oo mai le taimi mo i tatou o soo o Keriso e faaaogaina lelei ia sili atu le aoga o nei meafaigaluega musuia e … faataunuu ai le galuega a le Alii” (“To Sweep the Earth as with a Flood” [Brigham Young University Education Week devotional, Aug. 19, 2014]).

Ao tatou faasoa atu le upumoni o le talalelei i ala o faasalalauga faaleagafesootai, e mafai ona tatou faamaoni ma saili e siitia isi. E mafai ona tatou tatalo ia “maua i latou o le a o mai ma vaai ma fesoasoani, ma o mai ma tumau ai” ona faasoa atu lea o lo tatou faatuatua “i auala natura ma masani” (Dieter F. Uchtdorf, “Galuega Faafaifeautalai: Faasoaina Atu o Mea o i Lou Loto,” Liahona, Me 2019, 17). Na saunoa mai Elder Bednar, “Faasoa atu le talalelei ma le alofa moni ma le popole mo isi. Ia lototetele ma lotototoa, ae le o le faamaualuga, i le lagolagoina ma le puipuia o o tatou talitonuga, ma aloese mai finauga. I le avea ai ma soo, o lo tatou faamoemoega o le faaaoga lea o alaata o faasalalauga faaleagafesootai e avea o ni auala e faasusulu atu ai le malamalama ma le upumoni o le talalelei toefuataiina a Iesu Keriso i se lalolagi o loo faateteleina le pogisa ma le gaogaosa” (“To Sweep the Earth as with a Flood”).

E ui lava i faamanuiaga ma avanoa ua ofo mai e ala o faasalalauga ia i tatou, o loo i ai tulaga lamatia. E masani ona faaaoga ala o faasalalauga mo faamoemoega leaga, ma tatou te manaomia le aloese mai le matamata i ponokalafi, fatuina o ni finauga, faatusatusaina o i tatou lava i isi, ma maimau ai le taimi. Ina ia aloese mai na faamoemoega, e mafai ona tatou atiina ae ni tulafono mo le faaaogaina e o tatou aiga o tekonolosi ma ala o faasalalauga ma uunaia tagata uma o le aiga e mulimuli i ai. Na faamatala mai e Elder Gary E. Stevenson, “Faatasi ai ma le tele naua o faaaogaaga talafeagai ma musuia o tekinolosi, sei o tatou faaaogaina e aoao atu ai, musuia, ma siitia i tatou lava atoa ai ma le uunaia o isi ina ia avea ma o latou tagata sili ona lelei—nai lo le faaali atu o o tatou tagata faafoliga. E tatau ona tatou aoao atu ai ma faataitai ia faaaogaaga amiotonu o tekinolosi i le tupulaga faiae ma lapataia i tulaga lamatia e faatatau i ai ma le faaaogaina le lelei” (“Gasetoto Faaleagaga,” Liahona, Nov. 2017, 47).

E mafai e matua ona aoao i latou lava ma a latou fanau e uiga i le lamatia ma faamanuiaga o le faaaogaina o ala o faasalalauga faaleagafesootai , taaloga, ma polokalama feaveai. E mafai foi e matua ona iloilo soo le faaaogaaga e a latou fanau o ala o faasalalauga ma tekinolosi ma o ese i latou lava ma a latou fanau mai ala o faasalalauga pe afai ua sili atu ona lamatia ai nai lo le lelei.

“Talu ai ona o le ofoofogia o lona lautele, o ala o faasalalauga i aso nei o loo aumaia ai ni manatu se tele ma le maamaai,” na aoao mai ai Peresitene M. Russell Ballard. O le itu faafeagai mai ona aafiaga faatafuna ma le faatosina, o loo tuuina mai ai foi i ala o faasalalauga ia mea e lelei ma aoga. O loo tuuina mai i televise ia alaata o talafaasolopito, o alaata o suesuega, o alaata o aoaoga. E mafai lava e se tasi ona mauaina ia tifaga ma ata malie o le TV ma tala ia e faafiafiaina ai ma faagaeetia ai ma o loo sa’o lelei ai le faaalia o taunuuga o le sao ma le sese. O le Initoneti e mafai ona avea ma se meafaigaluega aoga tele o faamatalaga ma fesootaiga, ma o loo tele foi se aofaiga o musika lelei i le lalolagi. Ae o lo tatou luitau sili o loo i ai o le filifili lea ma le atamai ia mea tatou te faalogo ma matamata i ai (“Ia Lagonaina o Tatou Leo,” Liahona, Nov. 2003, 16).

Tusifaamaumau Ou Lagona Uunai

Savali Faaopoopo