Filifili Nei Loa

Ou te faafetai i se Tama Faalelagi mo Lana meaalofa o le faitalia, po o le aia e filifili ai. Ua tatou o mai uma lava i lenei lalolagi ma mea faigaluega uma lava e faia ai filifiliga sao. Ua tau mai e le perofeta o Mamona ia i tatou, “Ua tuuina mai i tagata taitoatasi le Agaga o Keriso, ina ia mafai ona iloa e ia le lelei mai le leaga” (Moronae 7:16).

Ua siomia i tatou i savali a le fili: “E nao le tasi lava lea e le afaina.” “Aua le popole; o le a leiloa e se tasi.” Ua i o tatou luma ni faaiuga i taimi uma. Ina ia faia na faaiuga ma le poto, e manaomia le lototoa—le lototoa e fai atu ai leai, le lototoa e fai atu ai ioe. O faaiuga e iloa ai le taunuuga.

Sei ou faasoa atu se faataitaiga o Uso Clayton M. Christensen, o se tagata o le Ekalesia o se polofesa i le Iunivesite o Harvard.

Ina ua 16 ona tausaga, na filifili Uso Christensen o le a ia le taalo i ni taaloga i le Aso Sa. I tausaga mulimuli ane, ina ua ia aoga i le Iunivesite o Oxford i Egelani, na ia taalo i le tulaga ogatotonu i le au pasiketipolo. O lena tausaga na le faiaina i latou i le vaitau atoa ma na o atu i le suega siamupini.

Na faigofie ona latou manumalo ia latou taaloga i le tauvaga, ma oo atu ai i suega siamupini. Ona vaai lea o Uso Christensen i le faatulagaga ma iloa ai o le suega siamupini e fai i le Aso Sa. Na ia alu atu i lona faiaoga ma lona faafitauli. Na fai atu lona faiaoga ia Uso Christensen na te faamoemoeina o ia ia taalo i le taaloga.

Na alu Uso Christensen i lona potu i le faletalimalo. Na ia tootuli i lalo. Na ia fesili atu i lona Tama Faalelagi pe o le a sa’o lenei mea, na o le tasi lava lenei, pe a taalo o ia i le Aso Sa. Na ia fai mai a o lei uma lana tatalo, na ia mauaina le tali: “Clayton, o le a le mea ua e fesili mai ai? Ua e iloa le tali.”

Na ia alu i lona faiaoga, tau atu ia te ia lona faanoanoa ona o le a le mafai ona ia taalo i le suega siamupini. Ona ia alu lea i ana sauniga i le Aso Sa.

Na aoao Uso Christensen e faigofie atu le tausia o poloaiga i le 100 pasene nai lo le 98 pasene o le taimi.

Ou te tatalo faatasi ma outou ina ia fai se filifiliga i le taimi nei lava e aua le alu ese mai le ala lena o le a taitai atu ai i la tatou sini: ola faavavau faatasi ma lo tatou Tama Faalelagi.