Taitaia e se Perofeta Soifua

Ina ua 16 o’u tausaga, sa ou maua le avanoa e auai atu ai i le konafesi aoao mo le uluai taimi. Sa nonofo lo’u aiga i le itu i sisifo o Oregon, ISA, ma sa matou o i le matou taavale i Iuta e auai i le konafesi ma momoli lo’u tuagane matua i le nofoaga autu o aoaoga mo faifeautalai.

Sa ou alu i le konafesi ma se manaoga e aoaoina e le Agaga Paia. O le taunuuga, sa ou maua se faaaliga mai le Agaga semanu ou te le mauaina pe ana ou le saunia au lava ia.

I le taimi o se tasi o sauniga, sa tutu tagata uma ma usuina le pese, “Ieova e, ia Tautai Pea i Matou.” A o matou pepese, sa ou maua se musumusuga patino e tilotilo solo i le Nofoaga Autu mo Konafesi. Sa ou faia, ma sa taia au i le mana o le lotogatasi o le faitau afe o tagata sa i ai iina a o matou siiina o matou leo o viiga i le Atua.

Ona ou mauaina lea o se aafiaga lea na ou lagona ai faapei o Nifae, ina ua ia vaai i le faaaliga o le laau o le ola, aua na tau mai e le Agaga ia te au, “Vaai ia” (tagai i le 1 Nifae 11–14). Sa ou vaai atu ia Peresitene Thomas S. Monson ma lagonaina o le lotogatasi o le Ekalesia na i ai ona o loo taitaiina i tatou e se perofeta soifua. E ala i le molimau a le Agaga Paia, ua ou iloa ai o Peresitene Monson o le perofeta moni mo o tatou aso, ma ou te iloa o loo taitaiina lenei Ekalesia e Iesu Keriso, e ala mai ia te ia.