Ua Ou Faia Ea Se Lelei i le Asō?

Sa ma galulue ma lou toalua, i le taimi lena sa avea ma peresitene o le Misiona a Egelani Lonetona i Saute, ae tatagi le telefoni i le aso 18 Iuni, 2008. O Peresitene Thomas S. Monson. Sa ia amata i ana aga masani faauo, o se tasi lea o faailoga faapitoa o lana galuega: “O a mai le misiona? O a mai lou aiga? O a mai Egelani tuai fiafia?” Ona ia malolo lea ma faapea mai, “Sa ma talanoa ma Frances, ma sa ou tatalo e uiga i ai, ma ou te fia manao e te tusia lou talaaga.”

Sa le manaomia se tala e fai atu, ae sa faamamaluina ma vave ona faagaeetia au. Ona ia fautua mai lea afai ou te amata i le taeao e sosoo ai, e mafai ona maea le afa o le galuega i le taimi ma te o ai i le fale. Sa totoe le tasi ma le afa tausaga o le ma valaauga e tolu tausaga.

Na aoao mai Peresitene Monson, “O le ua valaauina e le Alii, e faaagavaaina e le Alii.”¹ Sa ou talisapaia lena folafolaga.

E faapefea ona e tusiaina le soifuaga o se perofeta? E amata i ou tulivae ae le o ki o le komepiuta.

Sa ou iloaina vave e le o se talaaga masani e otooto ai ni aso, taimi, nofoaga, ma femalagaaiga. Ae o se tala i se tagata na saunia a o le’i faia le lalolagi ma na valaauina e le Atua “ua taitaiina e ia o i matou i ona po nei.”² O le lotomaualalo o le faamatalaga sili lea. O le lofituina, luitauina, ma le malosi e mulimuli mai lava i tua.

Na fetalai mai le Alii, “Pe i lo’u lava leo po o i le leo o a’u auauna, ua tutusa lava” (MF&F 1:38). O le faalogoina o le fetalai mai o le Alii e ala mai i Lana perofeta talu mai le valaauina o Thomas S. Monson i le au aposetolo paia i le 1963, o le mea lena sa ou amata ai. Sa ou faaaluina le tele o masina e faitau ai le fia selau o savali na tuuina atu e Peresitene Monson i le tele o nofoaga eseese. Sa ou faitauina talaaga o Peresitene uma o le Ekalesia ma le tele o taitai faalelotu iloga. Sa ou suesueina le amataga o le Ekalesia i Sikotilani, Suetena, ma Egelani, lea na tupuga mai ai tuaa o Peresitene Monson mai; le Pa’ū Tele o le Tamaoaiga lea na tele se aafiaga i lona talavou; ma le Taua Lona Lua o le Lalolagi ma mea na tutupu mulimuli ane ma le vaeluaina o Siamani. (Sa faaaluina e Peresitene Monson le 20 tausaga e vaai ai lenei eria o le Ekalesia.) Sa ou faitauina lona talaaga lea na saunia i le 1985 mo na o lona aiga ma sosoo ai ma lana api o talaaga o aso uma mo le 47 tausaga. Sa ou faatalanoaina ni taitai o le Ekalesia o e na galulue faatasi ma ia i le tele o vaega o le lalolagi faapea ma ni tagata o le ekalesia o e na aafia tele ona o lana galuega. Sa ou faaaogaina se uo mamae ma se tagata atamai i mea tau talafaasolopito o, Tricia H. Stoker, ina ia fesoasoani i le sailiiliga. Sa galue o ia i komiti tusitusi mo le tele o tusi lesona o Aoaoga a Peresitene o le Ekalesia ma e malamalama i le auala e sailiili ai le olaga o se perofeta.

Sa ou faatalanoaina Peresitene Monson i ni talanoaga faavitio faalemasina mai Egelani, ma ina ua ou toe foi i lou aiga i Iuta, sa ou faatalanoaina o ia a o galue ai i lona ofisa mo le 14 masina. I soo se tulaga lava, sa ou lagonaina lona alofa, pei lava o ma saofafai i le laulau o le umukuka. Sa ia talanoa mai i lona olaga talavou ma lona aiga, lona valaauga na tuuina mai e Peresitene Tavita O. MaKei (1873–1970), ma faatosinaga a faiaoga e pei o Peresitene J. Reuben Clark Jr. (1871–1961); Peresitene Harold B. Lee (1899–1973); ma Elder Mark E. Petersen (1900–84), o nisi na o nai igoa o loo faailoa atu.

Sa ia aoaoina le olaga faaKeriso i le aiga, lea sa i ai le alofa—le alofa le pona o Keriso—agaalofa, ma se manaoga e siitia ma faamanuia olaga o isi, e ui lava e lei faitauina atu e ona matua ia te ia ia tusitusiga paia, ae sa la ola ai i tulaga faatonuina i totonu o le aiga.

O lona taulai atu ina ia auauna atu i le toatasi na amata mai i le taimi o lona tuputupu ae i le itu i sisifo o le Aai o Sate Leki, “i le va o auala o nofoaafi,” pei ona ia fiafia e tau mai, i le tulaga pito maualalo o le Pa’ū Tele o le Tamaoaiga. E le’i tele ni mea na maua e ona tuaoi ma uo e faatatau lea i tulaga faaletamaoaiga, ae sa latou faatasi, ma sa lava lea mo i latou. O le toatele o tagata latou te vavalalata, e aofia ai nisi o uso o lona tama po o tuagane o lona tina e fiafia i ai, e le auai i le Ekalesia. E leai ni papuipui o fesootaiga faalelotu; sa oo ina ia alofa i tagata mo i latou lava. Sa tatala e ona matua o la loto i soo se tagata. E lei faagaloina lava e Peresitene Monson na faavae.

O ia o se tagata uiga ese, o le e faaaloalo i tagata uma na te feiloai i ai ma e fia iloa o latou olaga, popolega, ma luitau. Na te fesootai atu i se malo e asiasi mai mai se atunuu ese i le auala lava e tasi e na te fesootai atu ai i se tagata e faamamaina lana kesi i le po. O le tulaga manino, o se tasi o fua faatatau o lona tulaga maoae, e na te mafai ona fesootai atu i soo se tagata ma iloa ai e mafai ona ia aoaoina mai se mea mai tagata taitasi na te feiloai i ai.

Afai, e pei ona saunoa mai ai Peresitene Monson, o le faalapotopotoga o se ata lafoia faaumiumi lea o ona taitai,³ o lona uiga o le manaoga e siitia, uunaia, faaauai, faaaofia, ma laveai isi o se tasi lea o a tatou faatonuga. O lenei auala o le olaga e atagia ai faataitaiga a le Faaola, o le “sa femaliuai ma agalelei, … aua sa ia te ia le Atua” (Galuega 10:38).

Ua leva ona valaau mai Peresitene Monson ina ia tatou avea atili faapei o le Faaola. Ina ua ou faatalanoaina Peresitene Boyd K. Packer, o le Peresitene o le Korama a Aposetolo e Toasefululua, sa ia faamaoniaina mai mea sa mafai ona ou malamalama i ai. O Peresitene Monson, na ia saunoa mai ai, “ua sili atu lona avea faapei o Keriso nai lo tatou uma.”⁴

Mo le silia ma le afa seneturi, na foai ai e Peresitene Monson ona lavalava i e le tagolima. Na ia saofai i autafa o moega o e mamai ma matutua. E le mafaitaulia ia faamanuiaga ua ia tuuina atu i tagata i falemai ma i o latou aiga. Na te suia ana fuafuaga ina ia faia se asiasiga faavave i se tasi o uo ona toe faatopetope atu lea e lauga i se sauniga o le falelauasiga o se isi. (Afai e te fesili atu ia te ia pe toafia le aofai o i le lisi e na te taua o ni uo, na te faapea mai, “Toeitiiti lava 14 miliona.”) Na te malaga atu i se tagata e alu i le nofoa faatavalevale e faigata ona sau ia te ia, “fepaiai lima” ma se vaega o le autalavou, ma faaminoinoi ona taliga i tiakono o i le laina i luma. Na te faaalia le faaaloalo tele mo olaga o i latou na te faamatalaina o e “le iloa ma le amanaia,” e iloa i sina vaega toaitiiti, ae le lilo i lo latou Tama o i le Lagi.

I sina faamatalaga faigofie, e faia e Peresitene Monson mea ia e na ona mafaufau i ai le toatele e fai.

O ana savali ua faatumulia i tala moni (na te le tauaina lava o ni “tala”) lea e aoao ai ia mataupu faavae o le talalelei. Sa ia faamalamalama mai: “O faatinoga ia ua tatou faataunuu ai lo tatou alolofa moni i le Atua ma o tatou tuaoi e pei foi o i tatou lava, o le a seasea lava ona avea ma se vaega e faamemelo mai i ai le vaaiga ma le naunautaiga a le lalolagi. E masani lava o le a faaalia lo tatou alolofa i a tatou fegalegaleaiga ma isi i aso taitasi.”⁵

I ana galuega uma i le salafa o le kelope, atonu o nisi o ana aafiaga sili ona lofituina o tausaga ia na ia vaaia ai le Ekalesia i totonu o tuaoi faakomenisi. Ina ua uma le ma misiona ma lou toalua i le 2009, sa ma o i Siamani e savavali i le laueleele na savalia e Peresitene Monson, talanoa i tagata sa ia alofa tele i ai, ma lagona aafiaga o le tele o tausaga o lana auaunaga. Sa ma mauaina ni perisitua faamaoni o e na fetagisi pe a latou talanoa mai e uiga i ana asiasiga faifai pea, lona alofa mo Iesu Keriso, ma ana faamalosiauga ma popolega. Sa ma tutu i le fale gaosimea ua tuulafoaia ma ua malepe i Görlitz lea sa tu ai Peresitene Monson i le 1968 i le pulelaa ma folafola atu i le Au Paia o Aso e Gata Ai i Siamani Sasae ua lelavava ia faamanuiaga a le Alii mo Ana fanau—pe afai latou te faamaoni. O lena aso sa latou pepese ai ma le naunautai tele: “A tumu le ala i tofotofoga, aua le faavaivai! … O le a le tuulafoaia i tatou e Iesu, aua le faavaivai.”⁶ Sa ia malaga mai i lalo o le taitaiga a le Au Peresitene Sili e laveai le Au Paia. I le luasefulu tausaga mulimuli ane, a o i ai pea le papuipui o Berlin, na maua e nei Au Paia o Aso e Gata Ai i Siamani Sasae ni siteki, falelotu, peteriaka, faifeautalai, ma se malumalu. Ona aveese loa lea o le papuipui, ma sa toe faatasia le Au Paia ma o latou aiga e pei o se atunuu.

E masani lava ona saunoa mai Peresitene Monson, “E leai ni mea e tutupu fua” a o ia faailoa mai, o ana aafiaga i le olaga ua aoao ai o ia ia taulai atu pea lana vaai i le aao o le Alii.⁷

O se tasi o taitai sili o Siamani Sasae o Henry Burkhardt, lea sa galulue vavalalata ma sa mafuta foi ma Peresitene Monson mo le 20 tausaga i le nofoaga lea na tutupu ai mea taua uma o lena atunuu. O Brother Burkhardt o se tagata na galue faamaoni ma sa maoae lona lamatia i na tausaga uma i tuaoi faakomenisi, a o avea ai ma sui o le Ekalesia i totonu o le malo. Sa ia galue, i isi tofiga, o se taitai o le Ekalesia ma peresitene o le Malumalu o Freiberg.

Sa ou fesili ia te ia po o le a se mea na tu matilatila i lona mafaufau e avea o se taimi mataina i le galuega a Peresitene Monson. Sa ou mafaufauina o le a ia tau mai o le fonotaga i Görlitz, le faapaiaina o le atunuu i le 1975, le faatulagaina o le uluai siteki, le faapaiaina o le Malumalu o Freiberg, po o le fonotaga ma Herr Honecker, o se tagata Komenisi iloga i Siamani Sasae, i le taimi na talosaga ai e Peresitene Monson se faatagaga mo faifeautalai e ulufale atu i le atunuu ma isi faifeautalai e tuua le atunuu e auauna atu i isi laueleele. E tusa ai ma le tulaga na i ai fitafita na leoleoina ia papuipui, na foliga mai ai e toeitiiti lava a faavalevalea lea talosaga, ae na tali mai Herr Honecker, “Na matou matauina oe i nei tausaga uma, ma e matou te talitonuina oe. Ua talia le talosaga.” O fea la o nei mea na tutupu o le a filifili e Brother Burkhardt?

Na amata ona tafe mai loimata i ona alafau a o ia tali mai: “O le aso 2 o Tesema, 1979.” Sa le mafai ona ou mafaufauina se mea taua na tupu e faatatau i lena aso. “Tau mai ia te au se mea e uiga i ai,” o lau fai atu lea.

“O le aso lea na sau ai Peresitene Monson i Siamani Sasae e tuu mai i lou toalua o Inge, se faamanuiaga.” E lei i ai se tiute atofaina a Peresitene Monson i le faaiuga o lena vaiaso, ma sa ia lele mai le Iunaite Setete i Siamani mo lena lava faamoemoega. Sa i le falemai Sister Burkhardt mo le iva vaiaso sa i ai ni faafitauli i se taotoga, ma ua amata ona tulaga faaletonu o ia. Sa faamaumauina e Peresitene Monson i lana api o talaaga faapea, “Sa tuufaatasia o matou faatuatua ma a matou tatalo ina ia tuuina atu ia te ia se faamanuiaga.”⁸ Sa ia malaga mo le fia afe maila i lona taimi avanoa mai le tele o masina—ina ia laveai atu.

“Sei o tatou fesili ifo ia i tatou lava” o lana tala lea, “Ua ou faia ea se lelei i le asō? Ua ou fesoasoani ea i se mafatia?’ O se fua faatatau lenei mo le fiafia! O se tulaga lea mo le faamalieina, mo le filemu i totonu. … O loo i ai loto e faafiafiaina. O loo i ai upu agalelei e fai atu. O loo i ai meaalofa e tuuina atu. O loo i ai galuega lelei e fai. O loo i ai agaga e faaolaina.”⁹

O le ituaiga galuega lea a Peresitene Monson. O loo ia aapa atu pea e le aunoa i e ua vaivai, tuulafoaia, e ua lotovaivai. E pei ona saunoa mai Elder Richard G. Scott o le Korama a Aposetolo e Toasefululua, “Na fausia e le Alii ia Thomas Monson ia telē lona tino, ona o le telē o lona fatu.”¹⁰

Ina ua faapaiaina e le perofeta le Malumalu o Curitiba Pasila i le aso 1 o Iuni, 2008, sa ia valaauina se tamaitiiti e fesoasoani ia te ia i le sauniga o le maatulimanu. Sa fautuaina e le pueata se tasi e aveese le pulou o le alii talavou mo le ata. Sa leai ni lauulu o le tamaitiiti ma na manino mai lava o loo faia ni ona togafitiga o le kanesa. Sa opoina mai e lima alofa a Peresitene Monson lenei alii ma fesoasoani atu e po le sima i le puipui. Sa faailoa mai e se tasi o loo malaga faatasi ma le Peresitene ua tatau ona toe foi i le malumalu e faamaea le faapaiaga i le taimi atofaina. Sa lulu le ulu o Peresitene Monson. “Leai,” na ia fai mai ai, “Ou te fia valaauina se isi toatasi i luga.” Sa ia vaai atu i le aofia, ma iloaina se fafine i tua, ma a o fetaui o la mata, sa ia gego atu ia te ia e sau i luga. Sa ia tuuina ona lima i ona tauau ma le alofa ma taitai atu o ia i le puipui e faauma le faamauga o le maatulimanu.

Ina ua mavae le aso o le faapaiaga, sa fesili atu, Elder Russell M. Nelson o le Korama a Aposetolo e Toasefululua, lea sa i ai foi i le faapaiaga, ia Peresitene Monson pe na faapefea ona ia iloaina o le fafine lea o le tina o le tamaitiiti.

“Ou te le’i iloa,” o lana tali mai lea, “ae na silafia e le Alii.”

I ni nai masina mulimuli ane, na maliu ai loa le tamaitiiti. Na saunoa mai Elder Nelson: “Atonu e mafai ona e mafaufauina le faalogona o [le aafiaga i lena faapaiaga] i le tina o lena aiga. O le auala lena o loo fetalai mai ai le Alii, ‘Ou te silafiaina oe, ou te popole mo oe, ma ou te fia fesoasoani ia te oe.’ O se ituaiga tagata lea o loo i ai, i lenei perofeta a le Atua.”¹¹

I se taimi ua suitulaga ai e tesi ma i-meli le saofafai faatasi i lalo, o loo faaauau pea e le aunoa ona faamanatu mai e Peresitene Monson ia i tatou le aapa atu o le tasi i le isi. Na te faasoaina atu lana savali e ala i upu a se tasi o le na tusi atu ia te ia se tusi: “E toetoe lava o tatalo a tagata e tali mai e le aunoa e ala i mea e faia e isi.”¹² E masani foi ona ia faasino atu fautuaga mai le Alii: “O le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga” (MF&F 84:88). E talisapaia e Peresitene Monson le tele o taimi ua avea ai tatou ma agelu mo isi. Na faaosifeagaiga e Alema i le Vai o Mamona le Au Paia e “tauave avega a le tasi, ina ia māmā” (Mosaea 18:8); ua valaau mai Peresitene Monson ia i tatou e ola i lena feagaiga.

O au o se tasi o tagata na faamanuiaina i lona tauaveina o le avega a isi. Na i ai se taimi na ia iloa ai le mamafatu o le tiutetauave o lona talaaga ia te au. Sa ia valaauliaina atu au i lona ofisa ma ia fesili mai i se leo malu ma le agaalofa, “E faapefea ona ou fesoasoani atu?”

Sa le mafai e lou loto ona teena lenei talosaga, ma sa ou sasaaina atu ou lagona o le le atoatoa, le tulaga taufaafefe o le galuega, ma le tele o punaoa e sueina mai, faatulaga, ma tuufaatasia. Sa ou matuai manao lava ina ia sao lelei—mo ia. O le ma talanoaga sa avea ma se tasi o ou aafiaga sili ona taua faaletagata. Sa ou lagona le pei o ou i ai i le Taelega i Petesa, ma sa aveesea e le Faaola le pupuni ma aapa mai ma faatu atu au i luga. E malamalama Peresitene Monson i le mana faaola o le Togiola, ma e faitauina o se faamanuiaga le auina mai e le Alii e siitia i luga se isi.

“Aapa atu e laveai mai se tagata matua, le fafine ua oti lana tane, tagata mamai, e le atoatoa le malosi, e le toaaga mai,” na ia fai mai ai, ona ia taitaiina lea o le galuega. “Tuu atu ia i latou le lima e fesoasoani atu ma le loto e silafia le agalelei atu.”¹³

O lana vaaiga ma popolega i isi o ni fua faatatau lea o lana molimau i le Faaola o Iesu Keriso: “O le sailia ia iloa o Ia, o le talitonu ia te Ia, o le mulimuli ia te Ia, o loo i ai le avanoa e avea ai e faapei o Ia. E mafai ona sui foliga; e mafai ona faamaluluina le loto; e mafai ona sili atu lou malosi ma le naunautai; e faaleleia atili foi uiga faaalia. E oo le olaga i le mea e tatau ona i ai.”¹⁴