O Ieova o La’u Pese Ia

Talu ona ou ola i se tamai taulaga o Arisona ma se faitau aofai aupito toatele o le Au Paia o Aso e Gata Ai, e tele ina talanoa mai faifeautalai ma tagata o le Ekalesia ia te au e uiga i le Ekalesia. Latou te valaaulia soo la’u fanau ma a’u e o atu i le lotu, faitau tusitusiga paia, po o mea uma na. Sa leai so’u manao e talia a latou valaaulia ae ou te faafetai atu ma le faaaloalo ia te i latou mo lo latou naunau mai i lo’u aiga.

Ina ua oo ina ou iloa le tamaitai o le a ou faaipoipo i ai i se taimi, sa ia fai mai o ia o se Au Paia o Aso e Gata Ai. Sa ou fiafia i lona faaleagaga ma ou ioe ai ma te o i le lotu pe a uma ona ma faaipoipo. Na ou faamaoni i la’u upu ma amata ona ou alu e le aunoa, ma sa ou fiafia i le siosiomaga ma le latou faaaumea. Peitai e ui ina sa ou suesue i tusitusiga paia, alu i le lotu, ma tatalo na o au faapea foi ma lo’u aiga, sa ou masalosalo lava i le i ai o se Atua. Po o le a lava lo’u taumafai malosi, sa ou lagonaina lava e le mafai ona ou lafoaia lo’u masalosalo. Ona ou te lei latalata atili lava i le Atua nai lo le mea sa ou amata ai, o lea sa ou teena ai valaaulia uma ou te papatiso.

Ina ua mavae tausaga e ono sa ou alu ai i le lotu, sa faafuasei ona maliu lo’u tama sa i ai i le Fitafita a le I.S. Sa mananao lo matou aiga e ili se faailo faaiu i le tuugamau, ma talu ai o au o se faimusika faapolofesa, sa talosagaina ai au ou te taina le pese. E fiaselau sauniga i tuugamau sa ou faia ai, ae talu ai o le sauniga lea o lo’u tama, sa ou iloaina o le a ese lea taimi ia te au. Sa ou iloaina foi mai le falelauasiga o lo’u tina, o le a aafia lo’u iliina ona o o’u lagona ootia. Sa tonu ia te au o le a ou le faatagaina o’u lagona ootia e faalavelaveina le musika e pei ona i ai i le sauniga o lo’u tina.

I ni nai minute a o lei amataina le sauniga, sa ou taumafai ai ma le gatete e sauniuni. Na o nai nota na faataitai ona ou iliina ae ou iloaina ua ou toe faia foi le mea na ou toilalo ai muamua. Na amata ona oo mai loimata ma iu ai ina ou tagi. Sa faasalaveia la’u manava i lo’u masūsū. O le a mafai faapefea nei ona faia?

Sa ou le popole i so’u viiga, ae sa ou manao e faamamalu lo’u tama. Ina ua amata ona ou iliina, sa ou lagona e le mafai ona atoa sa’u manava. Ou te le masani ona fesili mo se fesoasoani, ae o le taimi lea, sa ou le iloaina po o le a le isi mea e fai. Sa vaivai le nota muamua. I totonu o lo’u loto, sa ou ole atu ai lo’u Tama Faalelagi: “Faamolemole.” Ina ua ou iliina le nota lona lua, sa faatumulia o’u mama i le ea, ma sa taalili le leo o la’u pu i se fati matagofie na faateia ai. O le fatuga na totoe, sa matuai lelei ona ou iliina. Ina ua maea le nota mulimuli, sa faafuasei ona ou tau mole ona o o’u loimata.

I le avea ai ma se tagata musika, ua ou iloa o’u malosiaga ma o’u vaivaiga. I se faaupuga faigofie, semanu e le mafai ona ou iliina lelei tusa lava foi pe na silisili ona lelei ni tulaga e fai ai. Sa ou iloagofie lava, na tali mai e le Tama Faalelagi la’u olega ma sa faamanuiaina au i le malosi ma le tomai e faamamaluina ai lo’u tama faalelalolagi. Sa tuuina mai ia te au se molimau faapitoa e tali mai le Tama Faalelagi ia i tatou, i se auala e mafai ona tatou malamalama ai. O Lana tali mai i lo’u taimi na ou manaomia ai, na fesoasoani lea ou te iloa ai sa naunau pea lava pea o Ia e fesootai mai ia te au.

Ina ua mavae ni masina, sa mafai ona ou faatoilaloina lo’u le talitonu ma auai i le Ekalesia. E ui lava o se faatuatua tele ina ia papatiso ai, sa ou iloaina lava o le a faamanuiaina au e le Tama Faalelagi. O le mea na ou oo i ai a o iliina le faailo faai’u, na aoaoina ai au o le a Ia tali mai i a’u tatalo e tusa ma mea ou te manaomia ma lo’u malamalama.