Ou Te Lei Amanaiaina i Latou

A o ou faitauina talu ai nei le Tusi a Mamona, na ou tau atu i le apoapoaiga lenei: “Aisea ea ua outou … tuu e ua fia aai, ma e ua matitiva, ma e ua le lavalava, ma e ua mamai ma puapuagatia, e ui ane i o outou tafatafa, ma outou le amanaiaina i latou?” (Mamona 8:39).

Nai lo le faalogoina o le filemu ma le mafanafana e masani ona ou maua i tusitusiga paia, na lofituina au i se lagona faaumiumi o le faanoanoa. Ua leva ona ou iloaina e le o au o se tagata e vaavaai patino. Na ou faatagaina lava au ia e aafia i lou lava olaga, ou valaauga, ma lou aiga na ou le amanaiaina ai luitau o loo feagai ma isi tagata.

Na ou iloa ou te le o faia mea uma e tatau ona ou faia “e tauave avega a le tasi, ina [ia] mamā; … e faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga” (Mosaea 18:8–9). Na ou manao ia ou suia; na ou manao ia ou sili atu. Pau lava le mea ou te le iloa pe faapefea. Na ou tatalo ia fesoasoani mai le Alii ia te au.

Na oo mai le tali i se auala e lei mafaufauina ma le i manaomia ina ua ou maua i se mai tuga. Na ia aveesea lemu uma lava mea mamafa na ou pisi ai. A o faaauau pea le mai, na manaomia le tuuese o au galuega i fafo, ou valaauga, ma lou auai i le Lotu. Ua noatia au i le fale, ua ou lagona le tuua toatasi, ma ua ou lagonaina le le amanaiaina.

Ou te tatalo ina ia faamalolo au e le Alii i se aso. Pe afai Na te faia, ou te folafola ia te au lava ia ou te le toe tauaso lava faapea. Pe afai ou te taunuu atu i le lotu, o le a ou vaai ina ia iloa po o ai o loo nofo toatasi ma po o ai e le o auai mai i lena aso. O le a ou faaaluina le taimi i vaiaso taitasi e faatoilalo lou matamuli ma asiasi i se tasi o mai po o mafatia pe na o le manao lava i se uo. O le a ou alofa i ou tuagane ma ou uso i aso uma—e le na o le Aso Sa po o taimi o gaoioiga faaleLotu.

O le a ou manatua ma, ou te faamoemoe, o le a ou agavaa e faalogo i le apoapoaiga a le Alii: “Aua na faia e outou i le tasi o e aupito itiiti o ou uso nei, o au lea na outou faia i ai” (Mataio 25:40).