Ngaahi ʻUlungaanga Fakapaionia ʻe 5 ʻe Lava ke Fakahaofi ai Hotau Ngaahi ʻApí ʻi he ʻAhó ni

ʻĪmisi

pioneers

Kuó ke fifili nai pe ʻoku lahi hoʻo tuí ʻo hangē ko e tui ʻa e kau paioniá? Mahalo he ʻikai fie maʻu e Kāingalotu e ʻaho ní ke lue ʻi he maile ʻe 20 (kilomita ʻe 32) he ʻaho ʻi ha ngaahi māhina, ke liʻaki e meʻa kotoa pē ʻoku nau maʻú, pe fepaki mo ha fakatanga lahi, ka kuo pau ke tau fai ha ngaahi fili ʻoku ʻikai manakoá, maluʻi kitautolu mei ha ngaahi tūkunga fakalaumālie ʻoku fakatuʻutāmakí, mo pehē ʻikai ki he ngaahi fakafiefia taʻefakangatangata ʻoku taʻefeʻungá, ʻa ē ʻokú ne lava ʻo toʻo ʻetau tokangá mei he meʻa ʻoku mahuʻinga tahá.

Ko e taimi ʻoku tau fili ai ke muimui ʻia Kalaisí, kuo pau ke tau kolea e ngaahi ʻulungaanga tatau pē mo ia naʻá ne ʻoange ki heʻetau ngaahi kui paioniá honau ivi fakaofó.

Ko ha nima pē ʻeni ʻo e ngaahi ʻulungaanga ko iá, te ne lava ʻo fakamālohia kitautolu ʻi he ʻaho takitaha:

1. Tuí. Naʻe maʻu moʻoni e mālohi e kau paioniá ʻi he tuʻunga fakafoʻituitui. Ne nau takitaha ʻiloʻi fakatāutaha ko e fānau kinautolu ʻa e ʻOtuá. Te ke lava foki ke langa hoʻo tui kia Kalaisí koeʻuhí ke tuʻu mālohi ʻo tatau ai pē pe ko e hā ha ngaahi matangi mālohi ʻe hoko.

2. Loto-toʻá. Mahalo ʻe ngali fakavalevale ke fakafehoanaki hoʻo loto-toʻá ki haʻanautolú. Naʻe fehangahangai e kau paioniá mo ha fakatuʻutāmaki fakaesino moʻoni he ʻaho kotoa pē, ka kuo pau ke tau fakaʻaongaʻi ʻa e loto-toʻa tatau pē ʻi loto ʻiate kitautolú ke vahevahe ʻaki e ongoongoleleí pea mo e niʻihi kehé mo moʻui ʻo kehe mei he founga ʻa e māmaní. ʻE lava ʻe heʻetau manatuʻi e loto-toʻa e kau paioniá ʻo tokoniʻi kitautolu ke ikunaʻi hotau ngaahi faingataʻá.

3. Loto Vilitakí. Ko e taimi ʻoku hoko ai e meʻa fakamamahí, ne mei faingofua pē ke fehuʻia ʻe he kau paioniá honau tūkungá, ka ne tokoni ʻenau vilitakí, ʻo nau hoko atu, mo falala ʻe lelei pē e meʻa kotoa. ʻI he ʻaho ní, ʻe lava ke tau maʻu ʻa e fakapapau tatau pea mo ʻiloʻi ʻoku tatau ai pē pe ko e hā e meʻa ʻoku fakahā mai ʻe māmaní, “kuo fai ‘a e ngaahi meʻa kotoa pē ‘i he poto ‘o ia ‘okú ne ‘afioʻi ‘a e ngaahi meʻa kotoa peé (2 Nīfai 2:24).

4. Feilaulaú. Ne tokoni e vīsone pau ʻa e kau paioniá ki he meʻa naʻa nau ngāue ki aí ke nau fai e feilaulau ʻoku fie maʻú ke hoko atú. Te tau lava ʻo falala ki he vīsone tatau ko ia naʻá ne teke ʻa e kau paioniá ki muʻá—ʻa hono langa hake ʻa e Siasi ʻo e ʻOtuá—ʻi he taimi ʻoku fie maʻu ai ke tau feilaulauʻi e ngaahi meʻá ʻi he ʻaho ní.

5. Uouangatahá. Naʻe ʻuhinga e fononga ʻi he ngaahi sālioté kuo pau ke tokangaʻi ʻe he tokotaha kotoa pē ʻa e niʻihi kehé he lolotonga ʻenau fononga ki Saioné. ʻI heʻetau ngāue ko ia ke langa hake ‘a Saione he ʻaho ní ʻi hotau ngaahi uōtí, siteikí, koló, ʻapí, mo e tukui koló, kuo pau ke tau toe feinga ke hiki hake mo fakakau mai e niʻihi ʻoku tau feohi mo iá.