Ko ha Kaungāmeʻa mo ha Faifekau

Mālō e lelei! Ko hoku hingoá ko Uani Patisitā, pea ʻoku ou haʻu mei ʻĀsenitina. ʻOku ou fakaulo atu ʻeku māmá ʻaki ʻeku vahevahe ʻa e ongoongoleleí.

Ongo Kaungāmeʻa Mamaé

Kuó u maheni mo hoku kaungāmeʻa mamae ko Fakatoú talu mei heʻema taʻu nimá. ʻOkú ma fakatou manako ʻi he ʻakapulú! Naʻá ku fakaafeʻi ia ki ha ngaahi ʻekitivitī lahi ʻa e Siasí.

Ko e ʻUluaki Fehuʻi ʻa Fakatoú

I he taimi ʻe taha lolotonga ʻemau maʻumeʻatokoni efiafi fakataha mo Fakatoú, naʻá ne fehuʻi mai, “Ko e hā ʻoku faʻa lotu maʻu ai pē ho fāmilí?” Naʻá ku talaange, koeʻuhí he ʻoku tāpuekina kitautolu ʻe he Tamai Hēvaní, pea ko e founga ʻeni ʻoku tau fakamālō ai kiate Iá. Naʻá ne fakatumutumu ai!

Efiafi Fakafāmili ʻi ʻApí

Naʻe haʻu ʻa Fakatou ki ha efiafi fakafāmili ʻi ʻapi ʻi he taimi naʻe teuteu ai hoku tokoua ko Penisimaní ke papitaisó. Ne ongoʻi ʻe Fakatou ʻa e Laumālié, peá ne kole pe ʻe lava ke papitaiso mo ia foki! Naʻe talanoa leva ʻeku tamaí ki he ongo mātuʻa ʻa Fakatoú.

Ne akoʻi ʻe he ongo faifekaú ʻa e fāmili ʻo Fakatoú. Naʻe fakatou papitaiso leva ʻa Fakatou mo hono tuofefine ko ʻOkusitainé. ʻOku omi ʻene ongo mātuʻá ki he lotú, ka ʻoku teʻeki ai ke na papitaiso.

Ko e Fehuʻi Hono Ua ʻa Fakatoú

Naʻe fehuʻi ange ʻe Fakatou ki heʻeku faʻeé pe ʻe ʻi ai nai ha taimi ʻe lahi tatau ai ʻene ʻilo ki he ʻOtuá ʻo hangē ko aú. Naʻá ne malimali mo talaange kapau te ne ako ʻene folofolá mo lotu, te ne lava ke ʻilo lahi ange!