Fāifai pea Hoko ko ha Fāmili Taʻengata
ʻOku nofo ʻa e tokotaha naʻá ne faʻú ʻi Kololato, USA.
“ʻIlonga ʻa e meʻa te ke fakamaʻu ʻi māmaní, ʻe fakamaʻu ia ʻʻi he langí” (Hilamani 10:7).
“ʻOku ʻuhinga ki he hā ʻa e ‘Ko e Ngaahi Fāmilí ʻOku Taʻengatá’?” Ko e ʻeke ange ia ʻe Miá. Naʻá ne ʻunuakiʻi leva ʻene foʻi paté ʻi he papa vaʻingá. Naʻá ne fakahoko mo hono kaungāmeʻa lelei ko Souií, ha vaʻinga ʻi he loto fale ʻa Souí. Naʻe tautau ʻi he holisí ha fakatātā ne pehē, “Ko e Ngaahi Fāmilí ʻOku Taʻengata.” Naʻe saiʻia ʻa Mia ʻi he ongo ko iá.
Naʻe fakamatalaʻi ʻe Souī, “ʻOku ʻuhinga ia ʻoku mou kei hoko ko ha fāmili ʻo aʻu pē ki hoʻomou maté.” Naʻá ne tuku hifo leva ha laʻi pele pea ʻunuakiʻi ʻene foʻi paté.
Siosio takai ʻa Mia he lokí. Naʻe ʻasi angamaheni pē. Naʻe ʻi ai ha ʻū sea sofa, tēpile, pilo, pea mo ha televīsone. Ka naʻe ongo kehe ʻa e fale ʻa Souí ia mei hono falé. “ʻOku ʻi ai hao fāmili taʻengata?” Ko e ʻeke ange ia ʻe Miá.
Naʻe hanga hake leva ʻa Souī mei he vaʻinga pea malimali. “ʻIo! Naʻe mali ʻeku mamí mo ʻeku tetí ʻi he temipalé. Koeʻuhí ke mau lava ʻo fakataha ʻo taʻengata.”
“Ko e ʻuhinga nai ia ʻoku ongo kehe ai ho falé?” Ko e ʻeke ange ia ʻe Miá.
Naʻe mata puputuʻu ʻa Souī. “Kehe?”
Naʻe ʻikai ke lava ʻe Mia ʻo fakamatalaʻi e ongo ʻi he fale ʻa Souií. Naʻe fakafiefia mo fakamāfana. Ka naʻe ongo ngalivale ke lea ʻaki. Naʻá ne pehē, “ʻOua te ke tokanga koe ki ai.” “Ta hoko atu ʻeta vaʻingá”
Naʻe ʻikai lava ʻe Mia ke taʻofi ʻene fakakaukau ki he fāmili taʻengata ʻa Souií ʻi he pō ko iá. Naʻá ne saiʻia he ongo ʻi he fale ʻo Souií. ʻE hiki atu e fāmili ʻo Miá ki ʻOniteliō, ʻi Kānata, ʻi ha ʻaho siʻi mei ai. Naʻá ne fifili pe ʻe ongo fēfē honau fale foʻoú.
Naʻe pehē ʻe Mia ʻi hono fakamohe ia ʻe Mamí, “ʻE Mami, ʻoku ongo fiefia moʻoni e fale ʻa Souií.” “ʻOku ou loto ke ongo pehē mo hotau fale foʻoú. Ne fakakaukau ʻa Mia ki he lahi ʻo ʻene ʻofa kia Mami, Teti, mo hono ngaahi tuongaʻane īkí. “ʻOku ou fie maʻu ke taʻengata mo hotau fāmilí foki.”
Ne fanongo fakalongolongo pē ʻa Mami. Peá ne toki pehē atu, “Mo au pē.”
ʻI he ʻaho pē hono hokó, ne tā ʻa Mami ki he faʻē ʻa Souií. Naʻá ne ʻiloʻi naʻe ʻalu ʻa e fāmili ʻo Souií ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Naʻe fakahā ange ʻe Mia ki heʻene ongomātuʻá he lolotonga ʻenau fakamāʻopoʻopó, “ʻOku ou fie ʻalu au ki he lotu ko iá.” Kuo meimei ʻosi kotoa ʻeni e fetukutuku honau falé.
Naʻe pehē ange ʻe Teti lolotonga ʻene tepiʻi ha puhá, “Talamai ʻe he mami ʻa Souií te ne lava ʻo tokoniʻi kitautolu ke maʻu ha ʻapi siasi.”
Ne malimali pē ʻa Mia mo ongoʻi loto māfana. Mahalo pē ʻe lava honau fale foʻoú ʻo ongo fakamāfana mo fakafiefia ʻo hangē ko e fale ʻa Souií!
ʻI he ʻosi pē hiki ʻa e fāmili ʻo Miá ki honau fale foʻoú, ne nau kamata ō leva ki he lotú. Naʻe angalelei ʻaupito ʻa e kakai ʻi aí. Naʻa nau feuiʻaki kinautolu kotoa ko e “Tokoua” mo “Tuofefine.” Naʻe ʻalu ʻa Mia mo hono ngaahi tuongaʻane īkí ki he Palaimelí. Naʻá ne saiʻia moʻoni ʻi he hivaʻi e ngaahi hivá mo e lau e folofolá.
Ne taimi nounou pē mei ai kuo haʻu ha ongo finemui ki he ʻapi ʻo Miá. Ko hona hingoá ko Sisitā Sasitini mo Sisitā Lamosi, pea ko e ongo faifekau kinaua. Naʻá na fakahā ki he fāmili ʻo Miá fekauʻaki mo e Tamai Hēvaní, Sīsū pea mo e Tohi ʻa Molomoná. Naʻe saiʻia ʻaupito ʻa Mia ʻi he fanongo ki he ongoongoleleí. Ne aʻu pē ki hono ngaahi tuongaʻané ʻenau tangutu fakalongolongo pē ʻo fakafanongó!
Naʻe fakamatala ʻe Mia kia Sisitā Lamosi mo Sisitā Sasitini fekauʻaki mo e fale ʻa Souií. “ʻOku ou fie maʻu ha fāmili taʻengata ʻo hangē ko Souií.”
Ne malimali ʻa Sisitā Lamosi mo ne pehē ange, “‘Oku finangalo ʻa e Tamai Hēvaní ke tau maʻu kotoa ha ngaahi fāmili ʻoku taʻengata.” “ʻOkú Ne finangalo ke tau fiefia.”
Taimi nounou mei ai kuo fili ʻa e fāmili ʻo Miá ke nau papitaiso.
Naʻe ō meʻalele mai e fāmili ʻa Souí ki ʻOniteliō ki he papitaisó. Hili ha taʻu ʻe taha mei ai, ne nau toe foki mai. Naʻe tuʻunga ia he taimí ni he naʻe silaʻi ʻa Mia mo hono fāmilí ʻi he temipalé!
ʻI he ʻaho ʻo e silá, naʻe tuʻu ʻa Mia mo hono fāmilí ʻi he temipalé, kuo nau ʻosi teunga hinehina. Ne nau malimali lahi kotoa. Naʻe ongoʻi loto māfana mo loto nonga ʻa Mia. Naʻá ne pehē ʻi he loto fiefia, “ʻOku tau hoko he taimí ni ko ha famili taʻengata!”
Ne pehē ange ʻe Teti, “ʻOku tonu ia.” “Ko ha fāmili taʻengata kitautolu.”