Potutusi
Toefuataiga o le Talalelei

“Toefuataiga o le Talalelei,” Autu ma Fesili (2023)

Ata
Keriso ua Faauuina Aposetolo e Toasefululua

Toefuataiga o le Talalelei

O le atoaga o le talalelei a Iesu Keriso i o tatou aso

E lei leva ona uma Lona papatisoga, ae amata e Iesu Keriso Lana galuega o le aoao atu i tagata le ala e ola ai e tusa ai ma le fuafuaga a le Tama Faalelagi. Sa aoao mai Iesu o loo i ai poloaiga silisili e lua: muamua, ia alofa i le Atua ma o tatou loto, agaga, ma le malosi atoa; e faapena foi lona lua, e te alofa i le lua te tuaoi ia pei o oe lava ia te oe (tagai i le Mataio 22:36–39). O Lana savali o le valaaulia lea o alii ma tamaitai e o mai ia te Ia, talitonu ma ola i upumoni o Lana talalelei, ma ia faaolaina.

Sa valaauina e Iesu ia Aposetolo ma tuu atu ia i latou le pule e fai ai ma sui o Ia ma fesoasoani i Lana galuega. Sa Ia faatulagaina Lana Ekalesia ma faamamafa atu le taua o uluai mataupu faavae ma sauniga o le talalelei: faatuatua ia Iesu Keriso, salamo, papatisoga, ma le mauaina o le Agaga Paia (tagai Mataio 9:13; 16:15–19; 17:19–20; Ioane 3:5).

I le aluga o taimi ina ua mavae le maliliu ai o Aposetolo a le Alii, e tele upumoni taua o le talalelei sa suia pe leiloloa, faapea foi le uluai faatulagaga ma le pule o le Ekalesia a Keriso (tagai Galuega 20:29–30). Ae i le faataunuuina o valoaga, na toefuatai mai ai e le Tama Faalelagi ma Lona Alo o Iesu Keriso, pe toefaatuina, le Ekalesia ma le atoaga o le talalelei. O lenei Toefuataiga na amata i le 1820 e ala i le Perofeta o Iosefa Samita. O loo faaauau pea i aso nei e ala i faaaliga paia na tuuina mai i perofeta o ona po nei.

O Le A le Toefuataiga o le Talalelei?

O le “Toefuataiga o le talalelei” e faasino ia Iesu Keriso i le toefuataiina mai o le atoatoaga o Lana talalelei, pule o le perisitua, ma le faatulagaga o Lana Ekalesia i le lalolagi e ala mai i le Perofeta o Iosefa Samita ma perofeta na mulimuli mai. O le Toefuataiga ua faauigaina i se faasologa o faaaliga faalelagi, e amata mai i le Uluai Faaaliga a Iosefa Samita ma faaauau ai lava e ala mai i perofeta o aso nei e oo mai i lenei vaitaimi.

Vaaiga aoao i autu: Toefuataiga o le Ekalesia

O taiala fesootai mo le suesueina: Iosefa Samita, Perofeta, Uluai Faaaliga, Toefuataiga o le Perisitua, Tusi a Mamona, O Le Ekalesia a Iesu Keriso o le Au Paia o Aso e Gata Ai

Vaega 1

Sa Saunia le Lalolagi mo le Toefuataiga o le Talalelei

Ata
Uluai Faaaliga

Ina ua maliliu Aposetolo a Keriso, e tele vaega taua o le talalelei a Iesu Keriso sa malamalama sese i ai, mou ese atu, pe na suia. A aunoa ma perofeta soifua ma le uluai pule na tuuina mai e Iesu Keriso, ua le toe i ai le Ekalesia moni a Iesu Keriso. I le taimi lea, lea e ta’ua i nisi taimi o le Liliuese Tele, e toatele tagata na sailia se malamalamaaga moni o le talalelei a Iesu Keriso.

E tele mea na tutupu na fesoasoani e saunia ai le lalolagi mo le Toefuataiga o le talalelei a le Alii ma Lana Ekalesia. Mo se faataitaiga, o tagata autu na ositaulagaina le tele o mea, e aofia ai o latou olaga, e faaliliu le Tusi Paia i le faaPeretania ma amata lona tufatufaina atu i isi. O le mauaina o tusitusiga paia na faigofie ai mo tagata ona aoao atili e uiga ia Iesu Keriso. Sa tautatala le au toefaatulagaina e faasaga i eseesega na latou vaaia i le ekalesia i mea na aoao mai e tusitusiga paia. E toatele tagata Europa na sailia le saolotoga faalelotu e ala i le nofoia o Amerika i Matu. E le mafaitaulia tagata sa sailia se malamalama manino atili ia Iesu Keriso ma le auala e maua ai le filemu i lenei olaga.

Mea e mafaufau i ai

  • E tele vaega taua o le talalelei a Iesu Keriso na leiloloa ina ua maliliu Ana Aposetolo. O lenei vaitau o le pauu ese mai le talalelei moni e ta’ua i nisi taimi o le Liliuese Tele. Faitau le Isaia 24:4–5; Mataio 24:9–12; Ioane 16:1–3; 2 Tesalonia 2:1–4; ma le 1 Nifae 13:26–29. O le a le mea o loo tau mai e nei fuaitau o le a tupu pe a mavae atu Keriso ma Ana Aposetolo? Na faapefea ona aafia lou olaga i le Toefuataiga o le talalelei a Iesu Keriso?

  • Faitau le tala a Iosefa Samita e uiga i lana Uluai Faaaliga i le Iosefa Samita—Talafaasolopito 1:14–20. O le a se mea na aoaoina e Iosefa Samita e uiga i le tulaga o le lalolagi faalelotu na siomia ai o ia? Aisea e taua ai le maua o se molimau i le moni o le Toefuataiga o le talalelei?

Gaoioiga mo le aoao faatasi ma isi

  • Valaaulia tagata o le vaega e faamatala mai pe faape’i lagona o le fiaai. E mafai faapefea e le fiaai ona aafia ai o tatou lagona? a tatou mea e faamuamua? o tatou manaoga? A uma lenei talanoaga, faitau faatasi le Amosa 8:11–12 . Aisea e te manatu na filifili ai e le perofeta o Amosa lenei ata e faamatala ai le lalolagi i le taimi o le Liliuese Tele? E faapefea ona tutusa le aveesea o upumoni o le talalelei ma “se oge i le laueleele”? O le a faapefea ona aafia o tatou olaga pe afai tatou te fiaaai mo upumoni faaleagaga i le ala lava e tasi tatou te fia aai ai mo meaai?

  • I lana saunoaga “Sauniuniga mo le Toefuataiga ma le Afio Mai Faalua: ‘E i Ou Luga Ai Pea Lo’u Lima’,”1 na otooto mai ai e Elder Robert D. Hales ni mea patino na tutupu i le talafaasolopito o le lalolagi lea na fesoasoani e saunia ai le lalolagi mo le Toefuataiga. Faalogo pe faitau faatasi le lauga lenei, ona valaaulia lea o tagata o le vaega e faasoa mai mea sa latou aoaoina. Na faapefea ona manino le aao o le Alii i mea na tutupu e tau atu i le Toefuataiga?

Aoao atili

Vaega 2

O le Toefuataiga o le Talalelei na Tatalaina le Tisipenisione o le Atoaga o Taimi

Ata
Toefuataiga o le Perisitua Mekisateko

O le Toefuataiga o le talalelei a Iesu Keriso na aumaia ai le malamalama fou i le lalolagi. Na amata i le tautotogo o le 1820, ina ua tatalo Iosefa Samita talavou i se togavao e lata ane i lona fale i Palamaira, Niu Ioka. Sa popole o ia e uiga i lona tulaga faaleagaga i luma o le Atua ma sa manao ia iloa po o le fea o lotu e sa’o. I le tali i lana tatalo, na faaali mai ai ia te ia le Atua le Tama ma Iesu Keriso.

I le gasologa o taimi, na amata ai e le Atua ona toefuatai mai upumoni o le talalelei ia Iosefa Samita. O lenei sasaa mai o le upumoni na aumaia ai tusitusiga paia, pule o le perisitua, faatulagaga o le Ekalesia, aoaoga faavae, ma sauniga taua o le faaolataga ma le faaeaga. O lenei faagasologa o le faasoaina atu o le talalelei ua toe aumaia ai le mea ua ta’ua e tusitusiga paia o le “tisipenisione o le atoaga o taimi” (Efeso 1:10; Mataupu Faavae ma Feagaiga 112:30). O se tisipenisione o se taimi ua i ai se perofeta a le Alii ma Lana talalelei i luga o le fogaeleele. I lenei tisipenisione faaiu o le talalelei, ua saunia ai le lalolagi mo le Afio Mai Faalua o Iesu Keriso.

Mea e mafaufau i ai

  • Ua tatou ola i le tisipenisione o le atoaga o taimi—o se taimi e le pei o se isi lava taimi. Ua tatou iloa o lenei tisipenisione o le a le muta i le liliuese, ae e le faapea ai la tatou te le feagai ma ni luitau taua. Suesue i le savali a Elder Jeffrey R. Holland “O Lenei, o le Tisipenisione Silisili o Tisipenisione Uma.”2 O a luitau ua faailoa mai e Elder Holland i lenei savali? O le a se mea ua e aoao mai i lana savali i le uiga faaalia e mafai ona e filifili ia maua a o e feagai ma nei luitau?

  • O se vaega fiafia o le ola ai i le tisipenisione o le atoaga o taimi o le avea lea ma se vaega o le Toefuataiga faifai pea o le talalelei. Faitau le Galuega 3:19–21; Efeso 1:3, 10; Mataupu Faavae ma Feagaiga 27:13; 112:30; 128:18. O le a se mea ua e aoaoina mai nei fuaiupu e uiga i le mea o le a tupu i lenei tisipenisione? E mafai faapefea ona e saofaga i lenei galuega tele?

Gaoioiga mo le aoao faatasi ma isi

  • O le sailia ma le talitonu i faaaliga faifai pea e mafai ona i ai se aafiaga taua i lou olaga. I le “O le Toefuataiga o le Atoatoaga o le Talalelei a Iesu Keriso: O se Folafolaga o le Faamanatuina o le Lua Selau Tausaga i le Lalolagi,” na ta’ua ai e le Au Peresitene Sili ma le Korama a Aposetolo e Toasefululua: “Ua mavae nei le lua selau tausaga talu ona amatalia lenei Toefuataiga e le Atua le Tama ma Lona Alo Pele, o Iesu Keriso. … Matou te ta’utino atu ma le fiafia e aga’i pea i luma le Toefuata’iga folafolaina e ala i faaaliga faifai pea.”3 Fai atu i tagata o le vaega e faasoa mai ni faaaliga i ona po nei po o ni aoaoga musuia na i ai se aafiaga taua ia i latou. O le a se mea ua e aoaoina mai aafiaga o tagata o le vaega i faaaliga o ona po nei?

  • O le manatu faavae o tisipenisione e mafai ona faigata ona malamalama i ai. Matamata faatasi le vitio “Dispensations: The Pattern of Apostasy and Restoration” (6:52), ma taofi pe a manaomia e fai atu e le tasi i le isi fesili ma sue tali. E faapefea e le malamalama i le mamanu o tisipenisione ona faamalosia lau molimau i le Toefuataiga i o tatou aso? O le a sou lagona e uiga i le ola ai i le tisipenisione o le atoaga o taimi?

Aoao atili

Vaega 3

O Loo Faaauau Pea le Toefuataiga e ala mai i Perofeta ma Aposetolo o Aso Nei

O le taimi nei, ua silia ma le 200 tausaga talu ona faaali mai le Tama Faalelagi ma Iesu Keriso ia Iosefa Samita, o loo faaauau pea le Toefuataiga. O perofeta ma aposetolo soifua e saili ma maua faaaliga e taitai ai Le Ekalesia a Iesu Keriso o le Au Paia o Aso e Gata Ai. O loo saunia e le Alii Lana Ekalesia ma Lona nuu mo le Afio Mai Faalua o Iesu Keriso. O loo faaauau pea ona agai i luma le galuega a le Atua e ala i le Toefuataiga faifai pea ma le taitaiga musuia a auauna a le Alii (tagai Mataupu Faavae o le Faatuatua 1:9).

I le 2018, na saunoa ai Peresitene Russell M. Nelson: “O i tatou o molimau i se faagasologa o le toefuataiga. Afai e te manatu ua toefuatai mai atoatoa le Ekalesia, ua na o le amataga ua e vaaia. E tele naua isi mea e oo mai. … Faatali sei oo i le tausaga fou. Ma le isi tausaga e sosoo ai. Taumafa au fualaau vaitamini. Fai sau malologa. O le a faafiafiaina.”4

Mea e mafaufau i ai

  • I lana saunoaga i le 2014 “O E Moe i le Taimi o le Toefuataiga?”5 Sa fautuaina mai e Peresitene Dieter F. Uchtdorf, a o i ai i le Au Peresitene Sili, ni faaosoosoga se tolu e mafai ona taofia ai i tatou mai le auai atoatoa i le Toefuataiga faifai pea o le talalelei. Suesue i lenei lauga, o le gauai atu i maa tu’ia na ia fai mai ai e mafai ona taofia ai i tatou mai le ausiaina o o tatou gafatia. O fea o nei mea e mafai ona e galue i le faatoilaloina? Fai se fuafuaga e fai loa.

  • O nisi tagata na molimauina le tele o mea na tutupu i le Toefuataiga sa musuia e tusitusi e uiga i ai. Filifili se viiga mai le itulau autu o le “Toefuataiga o le Talalelei” i Viiga, ma faitau ona upu. O le a se mea o aoao mai e upu ia te oe e uiga i le taua o le Toefuataiga? O le a sou lagona i nei upu? O le a se mea ua musuia oe e fai?

Gaoioiga mo le aoao faatasi ma isi

  • I se saunoaga i le 2020 ua faaulutalaina “Faataunuuga o Valoaga,”6 na lisiina ai e Elder Ronald A. Rasband ni nai valoaga anamua ma ona po nei ua faataunuuina o se vaega o le Toefuataiga o le talalelei. Suesue faatasi i lenei lauga, ona valaaulia lea o tagata o le vaega e faasoa mai po o le fea o faataunuuga o valoaga e sili ona anoa ia i latou. O a ni aafiaga o lenei gaoioiga e suia ai ou lagona e uiga i le Toefuataiga? O le a sou lagona pe a e mafaufau i le taua o le ola ai i lenei taimi ua leva ona faamoemoeina?

  • I le tusiga “The Ongoing Restoration,”7 Elder LeGrand R. Curtis Jr., le Tusitalafaasolopito o le Ekalesia ma le Tusitala, o loo lisi mai ai ni auala se tolu e mafai ona tatou auai ai i le Toefuataiga faifai pea:

    • Osia ma tausia feagaiga paia

    • Faataunuu valaauga ma tofiga tatou te maua

    • Fesoasoani e faapotopoto Isaraelu

    Faitau faatasi o se vaega le mea na aoao mai e Elder Curtis e uiga i nei saofaga taitasi i le galuega. O le fea ua uunaia oe e auai i lenei taimi? O le a faapefea ona e faia? Faasoa atu ou manatu i le vaega, ma faailoa mai ni auala e mafai ona e fesoasoani ai i le tasi ma le isi ia ausia au sini.

Aoao atili

O Isi Punaoa e uiga i le Toefuataiga o le Talalelei