Toefuataiga o le Perisitua

A o i ai Iesu Keriso i le lalolagi, sa Ia faavaeina Lana Ekalesia ma tuuina atu i Ona Aposetolo le perisitua, o le mana lea e galulue ai i Lona suafa (tagai Luka 9:1–2). Ina ua mavae Lona Faasatauroga ma le maliliu o Ona Aposetolo, sa aveesea ai le pule o le perisitua ma le atoaga o le talalelei mai le lalolagi ona o le amioleaga ma le teenaina o le upumoni (tagai 2 Tesalonia 2:1–3).

I le popofou o le vaitau o le 1800, na toe fuatai mai ai e le Tama Faalelagi ma Iesu Keriso le talalelei i le lalolagi e ala mai i le Perofeta o Iosefa Samita. O lenei Toefuataiga na aofia ai le toefuataiga o le mana ma le pule o le perisitua

A o galulue Iosefa Samita ma Oliva Kaotui i le faaliliuga o le Tusi a Mamona, sa laua faitau ai e uiga i le papatisoga mo le faamagaloina o agasala. I le aso 15 o Me, 1829, sa o atu i la’ua i le vao e lata i le fale o Iosefa Samita i Haramoni, Penisilevania, ma sa tatalo ai e uiga i le mea sa laua aoaoina.

I le tali i le la tatalo, na faaali mai ai Ioane le Papatiso, i lalo o le faatonuga a le Alii o Iesu Keriso, ma faaee atu i o laua luga le Perisitua Arona, ma faapea atu, “I Luga o oulua oʼu uso a auauna e, i le suafa o le Mesia, ou te faaee atu i ai le Perisitua o Arona, ua umia ki o le auaunaga a agelu, ma o le talalelei o le salamo, ma o le papatisoga i le faatofuina mo le faamagaloina o agasala” (Mataupu Faavae ma Feagaiga 13:1). I le mulimuli ai i faatonuga a Ioane, na papatisoina ai e Iosefa ma Oliva ia le tasi ma le isi ma faauuina le tasi ma le isi i le Perisitua Arona (tagai Iosefa Samita—Talafaasolopito 1:68–72.)

I se taimi mulimuli ane talu ona faaali mai Ioane le Papatiso, na faaali mai ai foi Aposetolo anamua o Peteru, Iakopo, ma Ioane, i lalo foi o le faatonuga a Iesu Keriso, ma faaee atu i o laua luga le Perisitua Mekisateko (tagai Mataupu Faavae ma Feagaiga 128:20). “O le Perisitua Mekisateko e umia le aiā o le pulefaamalumalu, ma ua i ai le mana ma le pule i luga o tofi uma i le ekalesia i tupulaga uma o le lalolagi, e taitai ai i mea faaleagaga” (Mataupu Faavae ma Feagaiga 107:8). Faatasi ai ma le toe i ai o lenei pule i luga o le fogaeleele, ua mafai ai ona toefuataiina le Ekalesia a Iesu Keriso i lona atoatoa.

O se vaega o le faaauauga o le toefuataiga, na toefuatai mai ai ki faaopoopo o le perisitua i le aso 3 o Aperila, 1836. Na faaali atu perofeta anamua o Mose, Elaia, ma Elia i le Perofeta o Iosefa Samita ma Oliva Kaotui i le Malumalu o Katelani ma tuuina atu i ai ki o a latou tisipenisione ia i laua. O Mose na aumaia ki o le faapotopotoina o Isaraelu. O Elaia na toefuataiina mai ki o le talalelei a Aperaamo. O Elia na aumaia ki o faamauga, lea e mafai ai e aiga ona faamauina faatasi e faavavau. (Tagai i le Mataupu Faavae ma Feagaiga 110.)

Tusifaamaumau Ou Lagona Uunai

Savali Faaopoopo

“Toefuataiga o le Perisitua”

“Ki o le Perisitua: O Le Toefuataiga o Ki o le Perisitua”

“Molimau Faapitoa—Elder Bednar”