Ko ha Holi Loto-Vēkeveke ke Vahevahe Atu ʻa e Ongoongoleleí

ʻOku ʻi ai ʻa e mamahi mo e faingataʻaʻia ʻi he māmaní mei hono ngataʻanga ʻe tahá ki he ngataʻanga ʻe tahá. ʻOku fekumi ʻi heni pea ʻi hena ʻa e kakai tangata mo fefine pe te nau ʻalú ki fē ke fai ʻa e ngaahi meʻa te nau maʻu ai ʻa e melinó. … Kuo toe fakafoki mai ʻa e ongoongolelei ʻo Sīsū Kalaisí. ʻOku ʻi heni ʻa e moʻoni naʻe fakahā mei he langí, pea ʻe hoko ʻa e moʻoni ko iá, ʻa e ongoongolelei ko iá, ko ha faitoʻo ki he ngaahi faingataʻaʻia ʻo e māmaní ʻo kapau pē ā te nau ʻiloʻi ia. Ko e meʻa pē ia ʻe taha te ne ʻomi ʻa e melinó kiate kinautolu lolotonga ʻoku nau ʻi he māmaní.³

ʻOku fie maʻu ke toe foki ʻa e kakai ʻo e māmaní ki he fakavaʻe naʻe fakatoka ʻe he ʻEiki ʻo langi mo e māmaní, ʻa e fakavaʻe ʻo e tuí, fakatomala mo papitaiso ʻi he fakauku ke maʻu ʻa e fakamolemole ʻo e ngaahi angahalá, pea mo hono maʻu ʻo e Laumālie Māʻoniʻoní ʻi he nima ʻo kinautolu ʻoku maʻu ʻa e mafai fakalangí. Ko e meʻa ia ʻoku fie maʻu ʻe māmaní. ʻOku ou fakamālō ʻoku ʻi ai ha tokolahi ʻoku nau hanga ki ai. Kuo nau ʻalu kui pē ʻi ha hala kuó ne tataki atu kinautolu ki he mamahí mo e faingataʻaʻiá, ka kuo tuku mai ha faitoʻo ki he ngaahi faingataʻaʻia kotoa pē ke nau lava ʻo aʻu ki ai—ʻa e ongoongolelei ʻo Sīsū Kalaisí. Kuo foaki mai ʻe he ʻOtuá ha mape ʻo e halá maʻá e kakai kotoa pē, neongo ʻene fāsiʻi mo faingataʻa ke muimui aí, ka ʻoku tataki atu ia ki heʻetau Tamaí; pea ʻoku ʻikai mo ha toe hala kehe ki ai.⁴

ʻOku feinga ʻa e ngaahi siasi ʻo e māmaní ke ʻomi ʻa e melinó ki he loto ʻo e tangatá ʻi heʻenau founga pē ʻanautolu. ʻOku nau maʻu ʻa e ngaahi ʻulungāanga lelei mo e ngaahi moʻoni lahi, pea nau fakahoko mo ha lelei lahi, ka ʻoku ʻikai fakamafaiʻi kinautolu ʻe he ʻOtuá. Pea ʻikai foki fekauʻi ʻenau kau taulaʻeikí mei he ʻOtuá.⁵

Ko e Kāingalotu pē ʻo e Siasí ʻoku nau maʻu ʻa e mafai ʻo ʻetau Tamai Hēvaní ke ngāue ʻi he ngaahi ouau ʻo e Ongoongoleleí. ʻOku fie maʻu kitautolu ʻe māmani.⁶

ʻOku ʻi ai ha honge lahi ʻi he māmaní ki he ngaahi folofola ʻa e ʻEikí, pea ʻoku fekumi fakamātoato ha kakai faitotonu tokolahi ke ʻiloʻi ʻa e finangalo ʻo ʻetau Tamai Hēvaní maʻanautolú. Kuó u feʻiloaki mo ha kau taki tokolahi ʻo e ngaahi siasi ʻo e māmaní, peá u ʻiloʻi ai ha kakai ʻulungāanga fakaʻeiʻeiki ʻoku nau līʻoa ki he ngāue leleí, ka ʻoku tātātaha ke u ʻiloʻi ʻiate kinautolu kuo ui ke ngāue ʻi he ngaahi siasi kehekehé ha kau tangata ʻoku mahino kiate kinautolu ʻa e taumuʻa ʻo ʻenau moʻuí, pe ʻiloʻi hono ʻuhinga ʻoku tau ʻi he māmaní aí. He ʻikai lava ke akoʻi ʻe he tangatá ʻa e meʻa ʻoku ʻikai mahino kiate kinautolú. ʻOku fakatefito pē ʻa e ngaahi akonaki ʻa e kau tangata lelei ko ʻeni, ʻa ia ʻoku ʻikai mahino kiate kinautolu ʻa e ongoongoleleí mo e fie maʻu ʻo hono ngaahi ouaú, ki he ngaahi lēsoni kau ki he ʻulungāanga leleí mo hono lau ʻo e ngaahi sāmé ki he haʻofangá. ʻOku fili ha ngaahi konga folofola ke fai ai e ngaahi lea kau ki he angaleleí, faitotonú, mo e hā fua, ʻa ia ko ha ngaahi meʻa ʻaonga mo langaʻi moʻui kinautolu, ka ʻoku siʻisiʻi pē ha ngaahi malanga ʻo fakamatalaʻi ʻa e ngaahi meʻa ʻoku fie maʻu ke fai ʻe he tokotaha kotoa pē pea toki lava ke tau hū ki he puleʻanga ʻo e langí. Ko e fakamatala ʻeni ʻoku fie maʻu taha ʻe māmaní. ʻOku tokosiʻi pē ha kau faifekau ʻoku ʻi ai haʻanau pōpoaki maʻa ʻenau ngaahi haʻofangá ke ueʻi kinautolu ke tui ki he fakaʻotua ʻo Sīsū Kalaisí mo e ʻaonga ke maʻu ʻa e ngaahi ouau ʻo e ongoongoleleí naʻá ne ʻomaí.⁷ [Vakai, fokotuʻu hono 2 he peesi 141.]

ʻOku hohaʻa ʻa e fānau ʻa ʻetau Tamaí ʻi he feituʻu kotoa pē ke ʻiloʻi e meʻa ʻoku totonu ke nau faí, ka koeʻuhi ko e ngaahi ivi tākiekina kovi kuo hūhū holo ʻi māmaní, kuo kākaaʻi ai kinautolu; kuo fakakuihi ʻa e kakai anga fakaʻeiʻeiki ʻo e māmaní ki he moʻoní. … ʻOku ngāue ʻa e filí, pea ko e mālohi pē te ne lava ʻo fakafepakiʻi hono mālohí ko e ongoongolelei ʻo Sīsū Kalaisí.⁸

Kuo femahalokoviʻaki e kakaí. Kuo ʻikai ke nau tui ki he meʻa ne nau fanongo aí, pea kuo ʻikai ke nau fie fai e meʻa naʻe fokotuʻu ange ʻe Filipe, ko e taha ʻo e kau ākonga ʻa e Fakamoʻuí, kia Nataniela ʻa ia naʻe ʻaʻahi ange ki aí. Naʻe talaange ʻe Filipe, “Kuo hāʻele mai ʻa e ʻEikí.”

Pea ʻi heʻene fakamatalaʻi iá naʻe fehuʻi ange ʻe Nataniela, “Ko ʻene haʻu mei fē?”

Pea taliange ʻe Filipe, “Ko ʻene haʻu mei Nasaleti.” Pea pehē ange leva ʻe he tangatá, “ ʻE tupu ha lelei mei Nasaleti?” Naʻe pehē ange ʻe Filipe, “Haʻu ʻo mamata.” (Vakai, Sione 1:43–46.)

Ne akonekina ʻa Nataniela ke ne tui he ʻikai lava ke maʻu ha lelei mei Nasaleti, ka naʻe ui ia kimui ʻe he Fakamoʻuí ko ha ʻIsileli ʻoku ʻikai ʻi ai ha kākā—ko ha tangata lelei ka ne kākaaʻi ia tupu mei he ngaahi talanoa naʻá ne fanongo aí.

Ka ʻi heʻene ʻiloʻí, ʻi heʻene tali ʻa e fakaafe ʻa e kau ākongá ke “Haʻu ʻo mamatá,” naʻá ne haʻu ke mamata.

Kuo tau maʻu ʻa e fiefia lahi ʻi he ivi tākiekina ʻo Hono Laumālié. ʻOku tau loto ke maʻu ʻe he kakai kotoa pē ʻa e tāpuaki ko iá, ko ia ʻi heʻenau fehuʻi mai, “Ko e faʻahinga kakai fēfē ʻa e kakaí ni?” ko ʻetau talí, “Haʻu ʻo mamata.”⁹

Kuo ui au ʻe heʻeku Tamai Hēvaní … ke u ʻalu ki he ngaahi feituʻu kehekehe ʻo māmani, pea ʻoku laka hake he maile ʻe miliona kuó u fononga ai talu hono ui au ki he ngāue fakafaifekaú. Kuó u fononga ʻi he ngaahi fonua lahi mo honau ʻea, pea ʻi he feituʻu kotoa pē ne u ʻalu ki ai naʻá ku ʻilo ai ha kakai lelei, ko e ngaahi foha mo e ngaahi ʻofefine ʻo e ʻOtua moʻuí ʻoku nau tatali mai ki he ongoongolelei ʻo Sīsū Kalaisí, pea ko e lauiafe, lau kilu, lauimiliona ʻo kinautolu te nau tali ʻa e moʻoní ʻo kapau te nau ʻiloʻi ʻa e meʻa ʻoku tau ʻiló.¹⁰

ʻOku lahi ʻa e ngaahi siasi lelei ʻi he māmaní, ko ha kakai tangata mo fefine moʻui līʻoa ʻo hangē ko e finangalo ʻo ʻetau Tamai Hēvaní ʻo fakatatau ki heʻene mahino kiate kinautolú. …

Ko e kakai kotoa pē te nau moʻui ʻo fakatatau ki he maama kuo foaki kiate kinautolu ʻe he ʻEikí pea fekumi kiate ia ʻi he lotu fakamātoató, ʻe ongo ki honau lotó, ʻe tākiekina honau ʻatamaí, pea ʻe ʻoange ʻa e faingamālie ke nau ʻiloʻi kuo toe folofola mai ʻa e ʻOtuá.¹¹ [Vakai, fokotuʻu hono 3 he peesi 141.]

Mahalo ko e vakai mai ko ia mei tuʻá hangē ʻoku ngali kehé ʻa e vēkeveke ʻa e Kāingalotú. Hangē ko e lea naʻe toki fai ʻe ha tangata ʻe taha: “ ʻOku faikehe kiate au hoʻomou fiefia ʻi he laka ki muʻa hoʻomou ngāué. ʻOku tatau ai pē pe ko ʻeku talanoa ki ha talavou pe ha tangata matuʻotuʻa, ki ha tangata ngaahi ngoue pe ha taha polisi ʻi homou kakaí, ʻoku nau fiefia kotoa pē mo fiemālie mo falala he ʻoku nau maʻu ʻa e ongoongolelei ʻo Sīsū Kalaisí.” …

… He ʻoku ʻi ai ha ofo ʻi he māfana ʻo ʻetau lotú, ʻo ʻetau hohaʻa ke vahevahe ʻa e ngaahi moʻoni nāunauʻiá ni mo hotau kaungāʻapí? He ʻoku fai ha ofo ʻi hono ui hotau ngaahi fohá ki he malaʻe ʻo e ngāue fakafaifekaú ʻi he hokosia hono taimí, pe ʻoku kole mai ke tuku ʻetau ngaahi ngāué ka tau ʻalu atu ko e kau tamaioʻeiki ʻa e ʻOtua moʻuí, kuo fakakofu ʻaki ʻa e mālohi mei ʻolunga, pea maʻu ʻa e mafai kuo foaki mai ʻi he ngaahi ʻaho kimui ní, koeʻuhí ke tau lava ʻo vahevahe mo e kakai kotoa pē ʻa e moʻoni fakaʻofoʻofa ko ʻeni kuó ne fakakoloaʻi ʻetau moʻuí, … pea tau tali loto-fiemālie mo fiefia ki aí?¹²

Ko e Ongoongolelei ʻo Sīsū Kalaisí ʻoku tau maʻú. ʻOku māfana ʻi hotau lotó ʻa e holi ke fakahaofi e laumālie ʻo e fānau ʻa e tangatá. ʻOku ʻikai ko hono ʻuhingá ke tau hiki hake ʻa kitautolu pea tau hoko ko ha kakai mālohi ʻi he meʻa fakapaʻangá; ʻoku ʻikai ko hono ʻuhingá ke fakalāngilangiʻi hotau hingoá ʻi māmani koeʻuhi ko ʻetau ngaahi lavameʻá; ka koeʻuhí ke fanongo ʻa e ngaahi foha mo e ngaahi ʻofefine ʻo e ʻOtuá ki he Ongoongoleleí ni, ʻi ha feituʻu pē ʻoku nau ʻi ai, he ko e mālohi ia ʻo e ʻOtuá ki he fakamoʻuí kiate kinautolu kotoa pē ʻoku tui mo talangofua ki hono ngaahi akonakí. Pea ʻe muimui ʻa kinautolu ʻoku tuí ki he sīpinga naʻe tuku mai ʻe he Fakamoʻuí ʻi Heʻene folofola ki Heʻene kau ākongá, “Ko ia ia ʻe tui mo papitaisó ʻe moʻui; ka ko ia ia ʻe ʻikai tuí, ʻe malaʻia.” [Maʻake 16:16.]¹³

Fakakaukau angé ki he fatongia ʻoku tau maʻú, ʻo kapau te tau moʻui taʻetokanga pe filifilimānako ʻo ʻikai ke tau feinga ke vahevahe ʻa e moʻoní mo kinautolu ʻoku ʻofa lahi ai ʻa e ʻEikí ʻo hangē pē ko ʻene ʻofa ʻiate kitautolú, pea nau mahuʻinga ʻi hono ʻaó. ʻOku ou ongoʻi ʻoku totonu ke ʻā hake ʻa e niʻihi ʻo e kāingalotu ʻo e Siasí ni. ʻOku ou pehē ʻoku totonu ke tau toe feinga lahi ange ke vahevahe ʻa e moʻoni kotoa ʻoku maʻu ʻi he Siasí ni mo e fānau ʻa ʻetau Tamaí.¹⁴

ʻI he taimi ʻoku puke ai ha tangata, kapau ko hotau kaungāʻapi ia, ʻoku tau fiefia ke tokoni ki ai; kapau ʻoku hoko ha ʻapisia ʻi hono fāmilí, ʻoku tau feinga ke fakafiemālieʻi ia. Ka ʻoku ʻosi atu ʻa e taʻu mo e taʻu mo ʻetau tuku pē ke ne ʻaʻeva ʻi he ngaahi hala te ne fakaʻauha hono faingamālie ke maʻu ʻa e moʻui taʻengatá, ʻoku tau fakalaka pē ʻiate ia ʻo hangē ʻoku ʻikai hano mahuʻingá.¹⁵

ʻOku tau ʻiloʻi koā ko e tangata kotoa pē ʻoku ʻi he tatau ʻo e ʻOtuá pea ko e foha ia ʻo e ʻOtuá, pea ko e fefine kotoa pē ko hono ʻofefine? Tatau ai pē pe ʻoku nau ʻi fē, ko ʻene fānau ʻa kinautolu, pea ʻokú ne ʻofa mo fie maʻu ke fakamoʻui kinautolu. He ʻikai lava ke tau nofo noa pē taʻe fai ha meʻa ʻi heʻetau hoko ko e kāingalotu ʻo e Siasí ni. He ʻikai lava ke tau maʻu ʻa e ʻofa ʻa ʻetau Tamai Hēvaní ʻoku foaki kiate kitautolú, ʻa hono ʻiloʻi ʻo e moʻui taʻengatá, pea tau puke ia ʻi he siokita, ʻo tau pehē ʻe tāpuakiʻi ai kitautolu. ʻOku ʻikai ko e meʻa ʻoku tau maʻu maí ʻokú ne fakakoloaʻi ʻetau moʻuí, ka ko ia ʻoku tau foaki atú.¹⁶

ʻAi ke feʻunga ʻetau tokanga ki he fakamoʻui ʻo e tangatá ke tau ngāue fie ngāue ke fakaului kinautolu: ke tau maʻu ʻa ʻenau loto-houngaʻiá mo e ʻofá ʻo taʻengata, pea houngaʻia ai ʻa ʻetau Tamai Hēvaní, koeʻuhi ko ʻetau tokanga taʻesiokita ki Heʻene fānaú.¹⁷

Ko hotau misiona ki he fānau ʻa ʻetau Tamaí … ko ha misiona ʻo e melino, ʻo e ʻofa ki he kakai kotoa pē. Ko ha holi lahi ia mo e loto-vēkeveke ke vahevahe mo e fānau kotoa ʻa ʻetau Tamaí ʻa e ngaahi meʻa lelei kuó ne angalelei ʻo foaki mai kiate kitautolú; pea ʻoku ʻi ai ʻa e ʻamanaki ʻe mahino kiate kinautolu, te tau tūʻulutui hifo ʻi he ʻaho ki he ʻaho ʻo lotu ke ongo ia ki honau lotó, ke nofoʻia ʻe he laumālie ʻo e ʻOtuá ʻa honau laumālié, pea ke mahino ʻa e moʻoní kiate kinautolu ʻo hangē ko hono ʻoatu kiate kinautolú.¹⁸

ʻOku ou fakaʻamu ʻe fakamafola fakavavevave ʻa e moʻoní ʻe he Siasi maʻongoʻongá ni, ʻa ia kuo foaki ki ai ʻa e mālohi ʻo e ʻOtuá, pea fakahaofi ai ʻa e ngaahi puleʻanga lahi mei he fakaʻauhá. ʻOku tupu vave ʻa e Siasí, pea ʻoku ʻikai te u fiefia koeʻuhi ko e vave ʻo e lahi ʻa e fiká ka ʻi he tui ko e ivi lelei ʻoku hā atu ki tuʻa meiate kitautolú ʻoku ongoʻi lelei ia ʻe he kakaí, pea ʻoku fanongo ʻa e fānau ʻa ʻetau Tamaí ki he pōpoaki ʻo e moʻuí mo e fakamoʻuí, mei tokelau ki he tongá, pea mei hahake ki hihifo, he ka ne taʻeʻoua ia, he ʻikai lava ha taha ke nofo ʻi he ʻao ʻo e Fakamoʻui ʻo e faʻahinga ʻo e tangatá.¹⁹ [Vakai, fokotuʻu hono 4 he peesi 141.]

Kuo tau maʻu ha meʻaʻofa fakaʻofoʻofa, ka ʻoku haʻu fakataha ia mo ha fatongia lahi. Kuo tāpuakiʻi kitautolu ʻe he ʻEikí ʻaki ha ʻilo lahi ange ʻi hotau kāingá, pea ʻoku haʻu fakataha mo e ʻilo ko iá ʻa e fie maʻu ke tau vahevahe ia mo ʻEne fānaú ʻi ha feituʻu pē ʻoku nau ʻi ai.²⁰

ʻOku ʻikai mahino kiate au pe ʻoku tau tauhi koā ki hotau ʻOtuá ʻaki hotau iví ʻo kapau ʻoku tau siʻaki ʻene fānaú, pe ʻoku tau siokita ʻo fakamoleki hotau taimi lahi ʻi hono fai pē meʻa ʻe lelei maʻatautolú mo tānaki e ngaahi meʻa ʻo e moʻui ní, kae tuku pē ʻene fānaú ʻi he fakapoʻulí lolotonga ia ne tau mei lava ke ʻomi kinautolu ki he māmá. Ko ʻene mahino kiate aú ko e misiona mahuʻinga taha ʻeni ʻoku ou maʻu ʻi he moʻui ní: ʻuluakí, ke tauhi e ngaahi fekau ʻa e ʻOtuá ʻo hangē ko hono akoʻi kiate aú; pea hokó, ke akoʻi ia ki he fānau ʻa ʻeku Tamaí ʻoku ʻikai mahino kiate kinautolú.²¹

ʻOku ʻikai mo ha toe Ongoongolelei ʻe taha ʻo e fakamoʻuí, pea ko e fatongia ia ʻo kitautolu ʻoku tau maʻu ʻa e lakanga fakataulaʻeiki māʻoniʻoní ke ʻoatu ʻa e pōpoaki ko iá, ʻo ʻikai ki he ngaahi puleʻanga pē ʻo e māmaní, ka ke sīpinga ʻaki ia ʻi heʻetau moʻuí pea akoʻi ki hotau ngaahi kaungāʻapi ʻoku ʻikai ke tau tui tataú. ʻOku ou ʻoatu e fakatokanga he ʻahó ni ʻoku fakafatongia ʻaki kitautolu ʻe he ʻEikí hono ui ʻEne fānaú ki he fakatomalá pea mo hono fakamafola ʻo ʻEne moʻoní. Ka ʻikai ke tau fakaʻaongaʻi hotau ngaahi faingamālié ki hono akoʻi ʻo e Ongoongolelei ko ʻeni ʻa hotau ʻEikí ki he ngaahi foha mo e ngaahi ʻofefine ʻo e ʻOtuá ʻoku ʻikai ke tau tui tataú, ʻa kinautolu ʻoku ʻi hotau lotolotongá, te Ne ʻeke mei hotau nimá ʻi he tafaʻaki ʻe taha ʻo e veilí ʻa e meʻa naʻe ʻikai ke tau faí.²²

Hili pē ha taimi siʻi kuo tau fehangahangai mo e lekooti ʻo ʻetau moʻuí, pea kapau naʻa tau faivelenga, ʻoku ou ʻilo fakapapau ʻe fakamālōʻia mo tāpuakiʻi kitautolu ʻe he Tamai ʻatautolu kotoa ʻi he māmaní ko ʻetau ʻomi ke mahino ki ha tokolahi ʻo hono ngaahi fohá mo e ngaahi ʻofefiné ʻa e taumuʻa ʻo e moʻuí mo e founga ke tau fiefia ai ʻi he ivi tākiekina ʻo hono laumālié.²³

ʻI he taimi ʻoku tau maʻu ai ʻa e laumālie ʻo e ongoongoleleí, ʻoku tau holi ke lava ʻo akoʻi ʻa e tokolahi taha ʻo e fānau ʻa ʻetau Tamaí ʻe lava ke tau aʻu ki aí ʻa e ngaahi moʻoni nāunauʻia ko ia ʻoku fie maʻu ki honau hakeakiʻí; koeʻuhí ka hokosia ʻa e taimí te tau tuʻu ʻi he ʻao ʻo e Huhuʻi ʻo e faʻahinga ʻo e tangatá pea tau pehē kiate ia: “ ʻI he mālohi naʻá ke foaki kiate aú, ʻi he poto mo e ʻilo kuó ke ʻomi kiate aú, kuó u fekumi ʻi he loto tokanga mo e ʻofa taʻemālualoi, ʻi he vilitaki mo e angaʻofa ʻo hangē ko ia ne u malava ke faí, ke ʻomi ʻa e tokolahi taha ʻo hoʻo fānaú ke nau ʻilo ʻa e ongoongoleleí.”²⁴ [Vakai, fokotuʻu hono 5 he peesi 141.]

ʻOku fakamoleki ʻe hotau tokolahi ʻa hotau taimí ʻi he fekumi ki he ngaahi meʻa ʻi he moʻuí ni kuo pau ke tau tuku ʻi heʻetau mavahe mei hení, ka ʻoku takatakai ʻiate kitautolu ha ngaahi laumālie taʻe-faʻa-mate ʻe lava ke tau akoʻi pea ueʻi kinautolu ke nau fekumi ki he moʻoní, pea fakatō ki honau lotó ha ʻilo ʻoku moʻui ʻa e ʻOtuá, kapau te tau loto ki ai. ʻOku ʻikai mo ha koloa ʻi he māmaní ʻe toe mahuʻinga ange ai kiate kitautolu, he te nau fakamālō kiate kitautolu ʻi māmani pea nau houngaʻia ai ʻo taʻengata ʻi he maama ka hoko maí. Ko ha misiona mahuʻinga ʻaupito ia.²⁵

Fakakaukau angé ki hono mahuʻingá kapau he ʻikai ke tau siokita ʻo feinga ke fakamoʻui hotau fāmili pē ʻotautolú, ka ke lau ʻa e kakai tangata mo fefine tokolahi fau kuo tau tākiekina ke nau tali ʻa e Ongoongolelei ʻa hotau ʻEikí. Ko e moʻoni te tau toki ongoʻi kuo faitāpuekina kitautolu pea maʻu ʻenau ʻofá mo e loto-houngaʻiá ʻo taʻengata.²⁶

Toki meʻa fakafiefia ke vakai ʻi he tafaʻaki ʻe taha ʻo e veilí ki he kau tangata mo e kau fefine lelei ko ʻeni ʻoku nau moʻui ʻaki ʻa e maama ʻoku nau maʻú, ʻo feinga ke fai honau fatongia ki he ʻOtuá, pea koeʻuhi ko ʻetau fetuʻutaki mo kinautolú, koeʻuhi ko ʻetau tokanga mo fie vahevahe mo kinautolú, te nau maʻu ai ha ngaahi fakamatala kehe kau ki he ongoongolelei ʻo hotau ʻEikí pea tali ʻa e ngaahi ouau ʻo Hono Fale Māʻoniʻoní ʻo mateuteu ke kau ʻi he Puleʻanga Fakasilesitialé. Toki fiefia lahi ia te ke maʻu ʻi he hokosia ʻa e taimi ko iá, ʻo ke tuʻu ʻi he ʻao ʻo e Fakamaau lahí ʻo fakamatala ki he ngaahi taʻu siʻi naʻá ke moʻui ai ʻi he māmaní, pea tuʻu ʻi hotau tafaʻakí ʻa e fānau ko ʻeni ʻa ʻetau Tamaí ʻokú Ne ʻofa lahi ai ʻo hangē ko ʻEne ʻofa ʻiate kitautolú, mo pehē, “Tamai Hēvani, ko e tangata ʻeni, ko e fefine ʻeni naʻá ne fuofua ʻomi kiate au ʻa e fakamatala ʻo kau ki Hoʻo moʻoni nāunauʻiá ʻo fakatupu ʻiate au ʻa e holi ke u fekumi fakamātoato ange ki he ʻAfioná ʻi heʻeku fai ʻi he kuohilí. Ko e tangata pe fefine ʻeni naʻá ne ʻomi ʻa e fuʻu tāpuaki fakaʻofoʻofá ni maʻakú.” Pea ʻoku ʻikai ko ia pē.

ʻI he hokosia ʻa e taimi ko iá, ʻi hoʻo fononga atu he ngaahi kuonga ʻo e taʻengatá, ko ha taimi lōloa moʻoni ia, te ke maʻu ʻa e ʻofa mo e fakamālō loto houngaʻia ʻa e tangata, fefine mo e fānau kotoa naʻá ke hoko ko e meʻangāue ʻi hono fakahoko ʻa ʻenau fiefia taʻengatá. ʻIkai ko e meʻa mahuʻinga ʻeni? ʻE lava pē ke fakamoleki ʻa ʻetau moʻuí ʻo maʻu ha paʻanga ʻe laungeau pe lauiafe, ngaahi tākanga monumanu tokolahi, ngaahi fale mo ha ngaahi konga fonua lahi, ka he ʻikai lava ke tau ʻave ʻa e ngaahi meʻá ni mo kitautolu ki he tafaʻaki ʻe tahá. ʻOku ʻikai fie maʻu ʻa e ngaahi meʻá ni ki he moʻui taʻengatá, neongo ʻoku ʻaonga pē kiate kitautolu ʻi he māmaní. Ka ʻo kapau te tau maʻu ʻa e ʻofa mo e fiefia ʻa e fānau ʻa e ʻOtuá, ko e meʻa ia ʻe muimui mai ʻiate kitautolu ʻo taʻengatá. Tau fakakaukau atu angé ki aí! ʻI he hokosia e taimi ʻe fakamaʻa pea fakahaohaoaʻi ai ʻa e māmaní ʻaki ʻa e afí ʻo hoko ko e puleʻanga fakasilesitialé, pea puli atu ʻa e ngaahi meʻa ʻulí mo e ngaahi meʻa taʻeʻaongá kotoa, meʻa fakafiefia moʻoni ʻa ʻetau feohi mo maʻu fakataha ha tofiʻa mo kinautolu naʻa tau tokonia ʻi he māmaní, pea muimui ki he tataki ʻa hotau ʻEiki ko Sisū Kalaisí ʻo taʻengata—ʻikai ko e meʻa mahuʻinga ʻeni? ʻIkai ko ha faingamālie fakafiefia ia?²⁷ [Vakai, fokotuʻu hono 6 he peesi 142.]