“ʻOfa Ki Ho Kaungāʻapí ʻo Hangē Pe Ko Koé”

ʻOku tau lau ʻa e houʻeiki tangata kotoa pē ko hotau tuongaʻane, mo e houʻeiki fafine kotoa pē ko e tuofāfine; ʻoku tau lau ʻa e tokotaha kotoa pē ʻo e faʻahinga ʻo e tangatá ʻi māmani ko e fānau ʻa ʻetau Tamaí, pea ʻi heʻetau tui ko e tokotaha takitaha ʻoku ʻi he tatau ʻo e Tamaí, ʻoku tau takitaha maʻu ai ha kiʻi konga faka-ʻOtua ʻa ia kapau te tau fakatupulaki, te ne teuteuʻi kitautolu ke tau toe foki atu ki Hono ʻafioʻangá. …

Ko e mahino ia ʻoku tau maʻu kau ki he taumuʻa ʻo ʻetau moʻui ʻi he māmaní, pea ʻokú ne fakamatalaʻi mai ʻa e tokanga ʻoku tau fai ki hotau kāingá. Kuo pehē ʻe ha tokolahi ʻoku tau moʻui fakamavahevahe mei he niʻihi kehé, pea fakakaukau mo e niʻihi ʻoku tau feohi pē mo kinautolu ʻi he kulupu ʻoku tau kau ki aí. Ko hono moʻoní, ʻoku tau lau ʻa e fānau kotoa pē ʻoku fāʻeleʻi mai ki māmani ko hotau tuongaʻane pe tuofāfine, pea ʻoku tau ongoʻi he ʻikai kakato ʻetau fiefiá ʻi he puleʻanga ʻo e langí kae ʻoua ʻoku tau fiefia ʻi he feohi mo hotau ngaahi fāmilí pea mo hotau ngaahi kaungāmeʻa mo e kaungā-ngāue ne tau maheni pea foaki kiate kinautolu ha konga lahi hotau taimí ʻi māmani.⁵

ʻI heʻeku fakakaukau ki heʻeku tokanga mo e ʻofa ki he fāmili ʻo ʻeku Tamaí, ʻa e fāmili ʻo e faʻahinga ʻo e tangatá, ʻoku ou manatu ai ki ha meʻa naʻe lea ʻaki ʻe heʻeku tamai fakaemāmaní, pea ʻoku ou pehē ʻoku ou maʻu hano konga siʻi meiate ia. Naʻá ne pehē, “Kuo teʻeki ai ke u mamata ʻi ha fānau ʻa e ʻOtuá kuo fuʻu tōlalo ʻene moʻuí pea ʻikai ke u fie ala hifo ʻo fokotuʻu hake ia pea tokoni ke toe kamata ʻene moʻuí.” ʻOku ou fie talaatu kuo teʻeki ai ke u mamata ki ha taha ʻo e fānau ʻa ʻeku Tamaí ʻi heʻeku moʻuí ʻo u taʻeʻiloʻi ko hoku tokoua ia pea ʻoku ʻofa ʻa e ʻOtuá ki he tokotaha kotoa pē ʻo ʻene fānaú.⁶

Toki māmani fakafiefia ia kapau ʻe ʻiloʻi ʻe he kakai ʻi he feituʻu kotoa pē ko e tuongaʻane mo e tuofāfine honau kāingá, pea fakahā ʻaki ia ʻenau ʻofa ki honau kaungāʻapí ʻo hangē pē ko kinautolú.⁷ [Vakai, fokotuʻu hono 2 he peesi 20.]

ʻOku akoʻi kitautolu ʻe he ongoongoleleí ke tau maʻu ʻa e ʻofa faka-Kalaisí ki he kakai kotoa pē pea ke tau ʻofa ki hotau kāingá. Naʻe folofola ʻa e Fakamoʻuí:

“Ke ke ʻofa ki [he ʻEiki] ko ho ʻOtuá ʻaki ho laumālié kotoa, mo hoʻo moʻuí kotoa, mo ho lotó kotoa, ko e ʻuluaki pea ko e lahi ia ʻo e fekaú.

“Pea ko hono ua ʻoku tatau mo iá, Ke ke ʻofa ki ho kaungāʻapí ʻo hangē pē ko koé. Ko e fekaú ni ʻe ua ʻoku tautau ai ʻa e fono kotoa mo e kau palōfitá.” [Mātiu 22:37–40.]

Ngaahi tokoua mo e tuofāfine, kapau kuo teʻeki ai fakatō ki homou lotó ʻe he ongoongolelei ʻo Sīsū Kalaisí ʻa e ongoʻi ʻofa ki homou kāingá, ʻo hangē ko ia kuo ʻoatu kiate kimoutolú, pea ʻoku ou fie fakahā atu kuo teʻeki ai ke mou maʻu kakato ʻa e meʻaʻofa fakaʻofoʻofa ko ia naʻe ʻomi ki he māmaní ʻi he taimi naʻe fokotuʻu ai ʻa e Siasí ni.⁸ [Vakai, fokotuʻu hono 3 he peesi 20.]

Ko hotau fatongia tauhí ko e ʻofa. ʻOku hanga ʻe heʻetau ngāue tokoní ʻo fakakoloaʻi ʻetau moʻuí. … Kapau ʻoku tau moʻui ʻo fakatatau mo e taumuʻa ʻa e ʻOtuá, kapau ʻoku tau tauhi ki he niʻihi kehé ʻo hangē ko hono lotó, ʻe fakakoloaʻi ʻa e ʻaho kotoa pē ʻo ʻetau moʻuí ʻe he ivi ʻo hono Laumālié, ʻe fakautuutu ʻetau ʻofa ki hotau kāingá pea tupulaki hotau laumālié kae ʻoua kuo tau ongoʻi te tau ʻomi kotoa e fānau ʻa e ʻOtuá ʻi hotau umá, mo ha holi ke faitāpuekina mo mahino ʻa e moʻoní kiate kinautolu.⁹

ʻOku totonu ke tau tauhi ʻEne ngaahi fekaú mo feʻofaʻaki ʻi heʻetau hoko ko e kāingalotu ʻo e Siasi ʻo Kalaisí. Pea ʻoku totonu leva ke fakalaka atu ʻetau ʻofá ʻi he ngaahi ngataʻanga ʻo hotau Siasí, pea tau ala atu ʻo tokoni ki he fānau ʻa e tangatá.¹⁰

Tau fakamoʻoniʻi ʻaki ʻa hotau ʻulungāangá, ʻa ʻetau angavaivaí, pea ʻaki ʻa ʻetau ʻofá, ʻaki ʻa ʻetau tuí, ʻoku tau tauhi ʻa e fekau lahi ko ia naʻe folofola ʻaki ʻe he Fakamoʻuí ʻoku tatau mo e ʻuluakí pea ko e lahi ʻo e fekaú, “Ke ke ʻofa ki ho kaungāʻapí ʻo hangē pē ko koé.”¹¹

ʻOku ʻikai malava ke fuatautau ʻa e ola ʻoku ʻomi ʻe he ʻofá mo e ʻofa faka-Kalaisí ki he māmaní. ʻOku ʻoatu ʻa e faingamālie ʻi he kolo mo e uooti mo e misiona kotoa pē ke nau feʻaluʻaki ʻo fakaulo atu ʻa e māmá, fakatupulaki ʻa e fiefiá mo hiki hake ʻa kinautolu ʻoku lotofoʻí, pea ʻomi ʻa e fiefiá mo e fakafiemālié kiate kinautolu ʻoku loto-mamahí.¹²

ʻOku folofola peheni ʻe he ʻEikí:

“Mou vakai ke mou feʻofaʻaki ʻiate kimoutolu; tuku ʻa e mānumanú; ako ke fefoakiʻaki ʻiate kimoutolu ʻo fakatatau ki he ngaahi meʻa ʻoku fie maʻu ʻe he ongoongoleleí. …

“Pea sinoemeʻa ke mou fakakofuʻi ʻa kimoutolu ʻaki ʻa e haʻi ʻo e manavaʻofá, ʻo hangē ko e pulupulu, ʻa ia ko e haʻi ʻo e haohaoá mo e melinó.” [T&F 88:123, 125.] …

… ʻOku mou muimui nai ki heʻene akonaki fekauʻaki mo e manavaʻofá [ʻofa faka-Kalaisí]? ʻOku ou fie talaatu ko e vahaʻataimi ʻeni ʻo ʻetau moʻuí ʻoku fie maʻu ai ke tau moʻui ʻaki ʻa e ʻofa faka-Kalaisí, ʻo ʻikai ʻi he foaki pē mei heʻetau koloá kiate kinautolu ʻoku faingataʻaʻiá, ka ʻoku fie maʻu ke tau maʻu ʻa e ʻofa faka-Kalaisí ki he ngaahi vaivai mo e ngaahi taʻelavameʻa pea mo e ngaahi fehālaaki ʻa e fānau ʻa ʻetau Tamaí.¹³

Ka tau ka ʻiloʻi ha tangata pe fefine kuo ʻikai lavameʻa ʻi heʻene moʻuí, pe ʻoku vaivai ʻene tuí, ʻoua naʻa tau sītuʻa meiate ia; tau fatongia ʻaki ke ʻaʻahi kiate ia, pea ʻalu atu kiate ia ʻi he angaʻofa mo e ʻofa, pea poupouʻi ia ke ne tafoki mei heʻene founga halá. ʻOku ʻi ai ʻa e faingamālie ʻi he feituʻu kotoa pē ke tau fai ai ha ngāue fakafoʻituitui ki he kakai ʻi hotau haʻohaʻongá; pea ʻoku tokosiʻi pē ha kau tangata mo fafine ʻi he Siasí ni ʻe taʻelava ke nau ala fakalaka atu ʻi honau siakale fakasōsialé ʻo fai ha lea ʻofa, pe akoʻi ʻa e moʻoní ki he niʻihi ʻo e fānau ʻa ʻetau Tamaí. … Ko e ngāue ʻeni ʻa ʻetau Tamaí. Ko e meʻa mahuʻinga taha ia ʻe ʻiloa ai kitautolu ʻi he moʻui ní.¹⁴

Ko e ʻofa pē ʻoku ou maʻu ʻi hoku lotó maʻá e faʻahinga ʻo e tangatá. ʻOku ʻikai haʻaku loto-tāufehiʻa ʻe taha ki ha tangata. ʻOku ou ʻiloʻi ha niʻihi ʻoku ou fakaʻamu ke nau toe kiʻi angalelei ange, ka ko e palopalema pē ia ʻanautolu, ʻikai ko au. Kapau ʻe lava ke u puke mai mo tokoniʻi kinautolu ke foki ki he hala ʻo e fiefiá ʻaki hano akoʻi ange ʻa e ongoongolelei ʻo Sīsū Kalaisí, ʻe toe lahi ange ai ʻeku fiefiá. … He ʻikai lava ke ke fakamālohiʻi e kakaí ke fai ʻa e ngaahi meʻa ʻoku totonú, ka te ke lava ʻo ʻofeina kinautolu ke nau fai e ngaahi meʻá ni ʻo kapau ko e ʻulungāanga ia ʻokú ke sīpinga ʻakí ʻo nau lava ai ke sio ʻokú ke fai ʻa e meʻa ʻokú ke lea ʻakí.¹⁵ [Vakai, fokotuʻu hono 4 ʻi he peesi 20.]

ʻOua naʻa ngalo neongo hono lahi ʻo e paʻanga ʻoku mou foakí, neongo hoʻomou holi ki he ngaahi meʻa ʻo e māmaní ke mou fiefia aí, ka ʻe fakatatau pē hoʻomou fiefiá ki hoʻomou ʻofa faka-Kalaisí pea ki hoʻomou angaʻofá pea ki hoʻomou ʻofa kiate kinautolu ʻoku mou feohi ʻi he māmaní. Kuo folofola mahino mai ʻaki ʻe heʻetau Tamai Hēvaní ko ia ʻokú ne pehē ʻoku ʻofa ki he ʻOtuá ka ʻoku ʻikai ʻofa ki hono tokouá ʻoku ʻikai moʻoni ia [vakai, 1 Sione 4:20].¹⁶

ʻOku ʻikai ke tau fiefia ʻi he meʻa pē ʻoku tau maʻu maí; ka ko e meʻa ʻoku tau foaki atú, pea ko e lahi ange ʻetau foaki ʻo e ngaahi meʻa ʻoku langaki moʻui mo fakakoloaʻi e fānau ʻa ʻetau Tamaí, ko e lahi ange ai pē ia ʻo e fie maʻu ke tau foaki atú. ʻOku tupulaki ia ʻo hangē ha fauniteni ʻo e moʻuí pea ʻoku mapunopuna hake ia ki he fiefia taʻengatá.¹⁷

ʻI he ngata ʻa ʻetau moʻui ʻi hení pea tau foki atu ki ʻapí, te tau ʻiloʻi ai ʻa e ngaahi monūʻia kuo ʻosi tuku tatali mai maʻatautolu koeʻuhí ko e ngāue lelei kotoa pē kuo tau fai, ʻa e angaʻofa kotoa pē kuo tau fakahoko, ʻa e ngāue kotoa pē kuo tau fai ke lelei ai hotau kāingá. …

… Tau fakamoʻoniʻi muʻa ʻa ʻetau houngaʻia ʻi he meʻa kuo foaki ʻe he ʻEikí maʻatautolú ʻaki ʻetau tauhi kiate Ia, pea ʻi heʻetau fai lelei ki Heʻene fānaú, ko ʻetau tauhi ia kiate Iá. Kuo tau maʻu taʻetotongi, pea ʻatu taʻetotongi he taimí ni [vakai, Mātiu10:8]. Tau vilitaki atu ki muʻa mo e loto kuo māfana ʻi he ʻofa mo e angalelei ki hotau kāingá kae ʻoua kuo hoko mai hono ui kitautolu ki ʻapí, pea te tau fehangahangai ai mo e lekooti naʻe tauhi ʻo ʻetau moʻuí. Kapau leva ne tau fakatupulaki hotau ngaahi talēnití, kapau ne tau faitotonu, angatonu, sino maʻa, mo angalelei, pea feinga ke langaki hake ʻa e tokotaha kotoa pē kuo tau feohí, kapau ne tau moʻui ʻo fakatatau mo e maama kuo tau maʻú, pea fakaulo atu ʻa e maama ko iá ʻi he faingamālie kotoa pē naʻe maʻú, te tau fiefia pea ʻe fonu hotau lotó ʻi he fakafetaʻi ʻi hono tali lelei kitautolu ʻe he Tokotaha naʻá Ne fakatupu ʻa e langí mo māmaní: “Mālō, ko e tamaioʻeiki lelei mo angatonu; kuó ke faitotonu ʻi he meʻa siʻi, te u fakanofo koe ke ke pule ki he meʻa lahi: hū koe ki he fiefiaʻanga ʻo hoʻo ʻEikí.” [Mātiu 25:21.]¹⁸ [Vakai, fokotuʻu hono 5 he peesi 20.]