Mataupu 2
“E Te Alofa Atu i Le Lua te Tuaoi ia Pei o Oe Lava ia te Oe”
O le aapa atu i isi i le alofa ma le agalelei, e taua tele i le talalelei a Iesu Keriso.
Mai le Soifuaga o Siaosi Alapati Samita
Sa lauiloa Siaosi Alapati Samita i lona malosi e alofa ai i isi. O Peresitene J. Reuben Clark Jr., o se tasi o ona fesoasoani i le Au Peresitene Sili, na saunoa e faatatau ia te ia: “O lona igoa moni lava o Alofa. … Sa ia tuuina atu lona alofa i tagata uma lava e feiloai i ai. Sa ia tuuina atu lona alofa ia i latou uma e le’i feiloai i ai.”1
O le alofa o Peresitene Samita mo isi na tupu a’e mai lona talitonuga maumaututu faamaoni e faapea, o i tatou uma o ni uso ma ni tuafafine, o fanau a le Tama Faalelagi e tasi. Ina ua tulata i le iuga o lona soifua, na ia saunoa mai ai i le Au Paia:
“E leai so’u fili ou te iloa, e leai foi se tasi i le lalolagi ou te ita i ai. O alii uma ma tamaitai uma, o fanau a lo’u Tama, ma sa ou saili i lo’u olaga e tausia faatonuga poto a le Togiola o tagata—ia alofa i o’u tuaoi e pei o a’u lava. … O le a outou le iloa lava le tele o lo’u alofa ia te outou. E leai ni a’u upu e faamatala atu ai. Ma ou te manao e faapena o’u lagona i atalii uma ma afafine uma o lo’u Tama Faalelagi.”2
Na faaalia e Peresitene Samita lona alofa mo isi e ala i galuega e le mafaitaulia o le agaalofa. Na matauina e se tasi: “O le uiga masani lea o Peresitene Samita o le lē faatuaoia o lona tuuina atu o le mafanafana ma faamanuiaga i le toatele o ē mama’i, o ē faanoanoa, ma i latou e i ai mafuaaga e faafetai ai mo lana faamalosiauga ma le lotofiafia. E le o se mea fou le vaaia o ia, a’o lei amataina pe i le mae’a ai foi o galuega i le ofisa, o savali atu i faapaologa o maota gasegase, e asiasi atu i lea potu ma lea potu, e faamanuia, e faamalosiau, ma faafiafia atu, ma o lona tu faafuase’i atu i na nofoaga e matua talisapaia ma le lotofaafetai le mafanafana ma le faamalosiau o lona susū atu. … O lona uiga masani le alu atu i soo se mea na te lagonaina e mafai ona ia tuuina atu ai le fesoasoani ma le faamalosiauga.”3
Na faamatala mai e Peresitene Thomas S. Monson se faataitaiga patino a Peresitene Samita o tuua ana lava fuafuaga ae faaalia lona alofa mo se tasi na manaomia:
“I se tasi taeao malulu, sa la’ueseina ai e le au faamama auala [i le Aai o Sate Leki] ni poloka aisa tetele mai alavai. Sa fesoasoani le au leipa lē tumau o ē sa matua manaomia lava ni galuega, i le aufaigaluega masani. Sa i ai se tasi sa na o sona ofu mafanafana manifinifi sa fai, ma sa mafatia i le malulu. Sa tu atu se alii fuaitino lelei, ma lana soesa ua tafi lelei, i le aufaigaluega ma fesili atu i lea alii, ‘E te manaomia nisi ofu mafanafana nai lo le na o lena mitiafu i se taeao faapenei. O fea lou ofutele?’ Sa tali atu le tagata, e leai sona ofutele. Ona tatala lea e le alii na malaga ane lona lava ofutele, ma tuu atu i le tamaloa ma faapea atu, ‘O lōu ofutele lea. E mamafa ma o le a e mafanafana ai. Ou te faigaluega i le isi ituala.’ O le auala o le Malumalu i Saute. O le Samaria agalelei sa savali atu i le Maota o le Pulega a le Ekalesia i lana galuega o aso taitasi, ma ua aunoa ma lona ofutele, o Peresitene Siaosi Alapati Samita o Le Ekalesia a Iesu Keriso o le Au Paia o Aso e Gata Ai. O lana faatinoga o le agalelei limafoai na faaalia ai lona loto alofa. O ia moni lava o le leoleo o lona uso.”4 [Tagai fautuaga 1 i le itulau e 19.]
Aoaoga a Siaosi Alapati Samita
O tagata uma lava o ni o tatou uso ma tuafafine, o fanau a lo tatou Tama Faalelagi.
Tatou te vaavaai atu i alii uma o o tatou uso, o tamaitai uma o o tatou tuafafine; tatou te vaavaai atu i foliga o tagata ola uma o i ai i le lalolagi, o se atalii/afafine o lo tatou Tama, ma talitonu ai e pei ona foliga tagata uma i le Tama, e faapena foi ona tofu le tagata ma sina vaega itiiti o le faaleatua lea afai e atiina ae o le a saunia i tatou e toe foi atu i Lona afioaga. …
O lo tatou malamalamaaga lena i le faamoemoega o lo tatou i ai i le lalolagi, ma ua faamanino mai ai lo tatou naunau e malamalama i o tatou uso a tagata. E toatele ua manatu, tatou te faaesea i tatou mai i isi, a o nisi foi ua manatu e tatou te fegalegalea’i faaituau. O le mea moni lava, tatou te vaavaai atu i fanau uma lava e fananau mai i le lalolagi, o se atalii po o se afafine o le Atua, o so tatou uso po o so tatou tuafafine, ma e tatou te lagona foi o le a le atoatoa lo tatou fiafia i le malo o le lagi, sei vagana ua tatou olioli i le mafutaga a o tatou aiga faapea i latou o a tatou uo ma paaga ia ua tatou masani ai faatasi ai ma mea latou te fiafia i ai ua faaalu ai le tele naua o lo tatou taimi i le lalolagi.5
A ou mafaufau i lo’u alofa ma lo’u naunau i le aiga o lo’u Tama, le aiga o tagata, ou te manatuaina se mea sa fai mai ai lo’u tama faalelalolagi, ma ou mafaufau ai atonu sa ou mauaina mai se vaega o lena mea mai ia te ia. Fai mai a ia, “Ou te lei vaai lava i se atalii/afafine o le Atua ua matua loloto tele se alavai palapala o i ai ua leai se uunaiga ou te punou ifo ai i lalo ma toe faatu o ia i ona vae ma toe amata.” Ou te fia faapea atu, ou te lei vaai lava i se tasi o fanau a le Tama i lo’u olaga ou te lei iloaina o so’u uso ma e alofa le Atua i Ana fanau uma taitoatasi.6
Oka se lalolagi ina a fiafia pe afai e iloa e tagata i le lalolagi atoa o latou uso a tagata ma tuafafine, ona mulimuli ai lea e ala i le alolofa atu i o latou tuaoi e faapei o i latou lava.7 [Tagai fautuaga 2 i le itulau e 19.]
Ua aoao mai i tatou e le talalelei a Iesu Keriso ia alolofa atu i fanau uma a le Atua.
Ua aoao mai i tatou e le talalelei ia i ai le alofafua mo tagata uma ma ia alolofa i o tatou tagata. Na fetalai mai le Faaola:
“E te alofa atu i le Alii lou Atua ma lou loto atoa, ma lou agaga atoa, ma lou manatu atoa, o le poloaiga muamua lena ma le sili.
“E faapena foi lona lua, E te alofa atu i le lua te tuaoi, ia pei o oe lava ia te oe.“O na poloaiga e lua ua autu ai le tulafono uma ma le au perofeta.” [Mataio 22:37–40.]
Uso e ma tuafafine, afai e lei totoina e le talalelei a Iesu Keriso lena lagona o le alofa i o outou loto mo o outou uso a tagata, e pei ona tuuina atu ia te outou, ona ou fia fai atu lea, tou te le’i olioli lava i le faataunuuga atoatoa o lena meaalofa ofoofogia na oo mai i le lalolagi ina ua faatulagaina lenei Ekalesia.8 [Tagai fautuaga 3 i le itulau e 19.]
O la tatou galuega o le galuega o le alofa. O la tatou auaunaga, o le auaunaga e faatamaoaigaina ai o tatou olaga. … Afai tatou te ola e pei ona faamoemoe le Atua tatou te ola ai, afai o tatou auauna atu e faapei ona Ia finagalo tatou te auauna atu ai, e faatamaoaigaina aso taitasi o o tatou olaga i le uunaiga a Lona Agaga, e faateleina lo tatou alolofa i o tatou uso a tagata, e faalauteleina foi o tatou agaga seia iu ina tatou lagona e mafai ona tatou opoina mai i o tatou lima fanau uma a le Atua, faatasi ai ma se naunautaiga e faamanuia i latou uma, ma aumaia i latou ia malamalama i le upumoni.9
I le avea ai ma tagata o le Ekalesia a Keriso, e tatau ona tatou tausia Ana poloaiga ma ia fealofani. Ona laasia ai lea e lo tatou alofa o laina tuaoi o le Ekalesia lea ua iloa ai i tatou, ma aapa atu i fanau a tagata.10
Ia tatou faailoa atu e ala i a tatou amio, lo tatou agamalu, lo tatou alofa, lo tatou faatuatua, tatou te tausia lena poloaiga sili lea na fetalai ai le Faaola, e faapei foi o le poloaiga muamua ma le sili, “E te alofa atu i le lua te tuaoi, ia pei o oe lava ia te oe.”11
Tatou te faatinoina le alofa moni e ala i le aapa atu ia i latou e manaomia le fesoasoani ma le faamalosiauga.
E le mafai ona fuaina le taunuuga o le mea e mafai ona aumaia e le alofa ma le alofa mamā i le lalolagi. Ua tuuina atu le avanoa i paranesi ma uarota ma misiona taitasi, ina ia o atu ma faasusulu atu le malamalama, ma atiina ae le fiafia ma si’i a’e i latou ua faavaivai, ma avatu le olioli ma le mafanafana ia i latou ua faanoanoa.12
Na fetalai mai le Alii:
“Ia outou alofa le tasi i le tasi; ia tuu le faaloloto; ia aoao e foai atu e le tasi i le isi e pei ona manaomia i le talalelei. …
“A o le mea sili, ia faaofuina outou i le noataga o le alofa, e pei o le ofu talaloa, o le noataga lea o le atoatoa ona lelei ma le filemu.” [MFF 88:123, 125.] …
… Pe o outou mulimuli ea i lana fautuaga e faasino i le alofa mamā? Ou te fia fai atu e faapea, i le vaitau faapitoa lenei i o tatou olaga, e manaomia ona tatou faatinoina le alofa mamā, e le gata i le foai atu o a tatou mea ia i latou o loo manaomia, ae e manaomia foi ona ia i tatou le alofa mamā mo vaivaiga ma toilalo ma sese o fanau a lo tatou Tama.13
A tatou iloa se alii po o se tamaitai ua le o faamanuiaina i le olaga, se tasi ua vaivai le faatuatua, aua nei o tatou fulitua atu ia te ia; ia tatou asiasi atu ia te ia, ma o atu ia te ia i le agalelei ma le alofa, ma faamalosiau atu ia te ia ina ia fulitua i lona sese. Ua i ai i soo se vaipanoa le avanoa e faia ai galuega e tagata taitoatasi; ma e toaitiiti lava nai alii ma nai tamaitai toalaiti i lenei Ekalesia e le mafaia, pe a na latou faia, e aapa teisi atu ai mai le li’o o loo iloa ai i latou, ma fai atu se upu agalelei, pe aoao atu ia upumoni i nisi o fanau a lo tatou Tama. … O le galuega lenei a lo tatou Tama. O le mea aupito sili ona taua lea o le a iloa ai i tatou i lenei olaga.14
E na o le alofa ua tumu ai lo’u loto mo tagata. E lei i ai lava se ita i lo’u loto i se tagata soifua. Ou te iloa e i ai nisi ou te moomoo ia pulea teisi a latou amio nai lo le mea o i ai, ae o la latou faafitauli ae le o a’u. A na mafai ona ou opo maia i latou ma fesoasoani e toe faatulai mai i le ala o le fiafia, e ala i le aoao atu ia i latou o le talalelei a Iesu Keriso, o le a matua faateleina lava lo’u fiafia. … E le mafai ona e tata’iina tagata e faia mea e tonu, ae e mafai ona e alofa ia i latou ma latou faia ai, pe afai e mafai ona latou vaai i au faataitaiga o lena ituaiga o amio, o le mea tonu lea o loo e ta’u atu.15 [Tagai fautuaga 4 i le itulau e 19.]
E maua le fiafia moni mai le alofa ma le auauna atu i isi.
Aua nei galo po o le a le tele o tupe e te foai atu, tusa po o le a lou manao i mea o lenei lalolagi e faafiafia ai outou, o le a fuapau lava lou fiafia i lou alofa mamā ma lou agalelei ma lou alofa ia i latou tou te mafuta i lenei lalolagi. Na fetalai lo tatou Tama Faalelagi i se faaupuga faigofie tele e faapea, o lē e faapea mai e alofa i le Atua ae le alofa i lona uso o le pepelo lava ia [tagai 1 Ioane 4:20].16
E le na o mea tatou te maua tatou te fiafia ai; ae o mea tatou te foai atu, ma o le tele o lo tatou foai atu o mea e faagaeetia ai ma faatamaoaigaina ai fanau a lo tatou Tama, o le tele foi lena o mea tatou te maua e foai atu. E tuputupu a’e e faapei o se puna tele o le ola ma punapuna a’e ai i le fiafia e faavavau.17
A muta lo tatou olaga iinei ma tatou toe taliu atu i lo tatou aiga, o le a tatou iloa ai ua faaopoopo mai mo i tatou iina faatinoga lelei uma sa tatou faia, o agalelei uma sa tatou faia, o taumafaiga uma sa tatou faia ina ia manuia ai o tatou uso a tagata. …
… Ia tatou faailoa atu lo tatou talisapaiaina o mea ua tuuina mai e le Alii ia i tatou e ala i le auauna atu ia te Ia, ma o loo tatou auauna atu ia te Ia pe a tatou faia mea lelei mo Lana fanau. O loo tatou maua fua, ia tatou foaifuaina atu [tagai Mataio 10:8]. Faatasi ai ma loto ua mafana i le alofa ma le agalelei mo o tatou uso a tagata, ina tatou fetuleni atu ia ma le toto’a i luma, seia iu ina oo mai lo tatou iuga, ma tatou fetaiai ai ma le talafaamaumau o tatou olaga. O iina la, afai sa tatou faaleleia a tatou taleni, afai sa tatou faamaoni, amiotonu, nofo mama, agalelei, ma agaalofa, ma sa saili e siitia agaga uma sa tatou mafuta, afai sa tatou ola ai i le malamalama sa tatou mauaina, ma sa faaaoga lena malamalama i soo se taimi na maua ai se avanoa, se fiafia ina a tele ma ni loto o le a faatumulia i le faafetai pe a tatou maua mai le Mataisau o le lagi ma le lalolagi lena faaupuga faafeiloai: “Ua lelei ia, le auauna lelei e, ma le faamaoni, ua e faamaoni i nai mea itiiti, ou te tofia oe e pule i mea e tele; ina ulufale mai ia i le fiafia o lou Alii.” [Mataio 25:21.]18 [Tagai fautuaga 5 i le itulau e 19.]
Fautuaga mo Suesuega ma le Aoaoina Atu
Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–vii.
-
Mafaufau i ni auala e mafai ona e faatinoina ai le alofa e faapei ona faia e Peresitene Samita (tagai itulau 11–13). Mo se faataitaiga, e mafai faapefea ona tatou faatinoina le alofa i le faataunuuina o o tatou tofiga o faiaoga o aiga ma faiaoga asiasi?
-
A o e suesueina le vaega muamua o aoaoga (itulau 13–14), mafaufau pe faapefea e le faaaogaina o nei aoaoga ona faaleleia atili ai la oulua sootaga ma ou tuaoi, o tagata tou te faigaluega, tagata o le aiga, ma isi.
-
Faitau le parakalafa atoa mulimuli i le itulau e 14. O a ni aoaoga po o ni tala i tusitusiga paia ua musuia ai oe e te alofa ma auauna atu i isi?
-
Suesue le vaega o loo amata i le itulau e 16, aemaise o parakalafa mulimuli e lua. Mafaufau i se tasi atonu e i fafo atu “o le li’o o loo iloa ai [oe].” O le a se mea patino e mafai ona e faia e te aapa atu ai i lena tagata?
-
Mafaufau i aoaoga a Peresitene Samita i itulau e 17–18. O a ni ou aafiaga sa e oo i ai, na aoao ai oe o le fiafia moni e maua mai i le faia o mea e fiafia ai isi?
Mau e Faatatau I Ai: Mataio 5:43–44; 25:34–40; Luka 10:25–37; Ioane 13:34–35; 1 Ioane 4:7–8; 1 Nifae 11:16–25; Moronae 7:44–48
Fesoasoani faafaiaoga: “E fai si tele o aoaoga o loo faia i le Lotu e matua pāū lava, o le lauga atu lea. E faalē lelei lo tatou tali atu i ni lauga i potuaoga. Tatou te faia i sauniga faamanatuga ma konafesi, ae o le aoao atu e mafai ona itu-lua, ina ia mafai ai ona fai ni fesili. E faigofie ona e lagolagoina fesili i se vasega” (Boyd K. Packer, “Mataupu Faavae o le Aoao Atu Ma le Aoaoina Mai” Ensign Liahona, June Iuni 2007, 87).